الخزي والعار لمعهد العالميه .. فات علي الاختبار احتاج مساعدتكم

[ملك الصمت]

السلام عليكم

اخواني انا اليوم كان علي اختبار نظم معلومات اداريه
طبعا اختباري كان بالليل وانا النظر عندي لك عليه بالليل خاصه
المهم من دخلت مخرج الثمامه والطريق كان اغلبه مظلم وربعه منور
لين وصلت الدوار الثالث وامسك طريق خزام ( الطريق المظلم المزدوج )
ياجماعه من دخلت هالطريق وانا ما شوف لاعيون القط ولا اشوف الخطوط زين وكله شاحنات
والله ياجماعه وبنص الطريق المظلم اني بغت تنحرف السياره على التراب
كل هذا عشان ابي اشوف لوحة حقت الجامعه ابي اعرف المخرج
وجيت امشي شوي شوي عشان ابي اشوف اللوحه الا تجي شاحنه من وراي ويعطيني بوري
خلاني انسى وش الاختبار اللي كان علي المهم اني عديت المخرج وعرفت يوم تفاجات اني اكلت مطب .. في هذه اللحظه قسم بالله ماهمني الاختبار همني كيف ارجع ماني عارف وقعدت احوس بالطريق لين تعدى وقت الاخبار يعشرين دقيقه وقتها مامداني حتى افكر ارجع
لين لقيت طريق ورجعني والحمد لله على السلامه
حتى يوم رجعت البيت الوالده تقول بشر كيف الاختبار .. قلت لها زين مابي تعرف ان الطريق خطر راح تقول لاتروح الاختبارات
والحمد لله انه الاختبارات الجايه تكون صباح وظهر اهون شوي
الحين ابي مساعدتكم والله يجزاكم خير وش الحل مع الاختبار اللي فاتني
ابي الطريقه اللي تساعدني ارجوكم
وجزاكم الله خير

[سعود المهندس]

شف المادة اي يوم واختبرها في جدة وعلم المشرف

[نجم الرياض]

كان الله بعونك ياخوي وبالتوفيق ان شاء الله ....

[بدر11]

اولاً/ الحمد لله على سلامتك
ثانياً/ نصيحة البس نظارة اذا كنت ضعيف نظر ، واستغرب من بعض الناس اللي نظره ضعيف ويصّر بعدم لبس نظارة ، مع العلم بأنها سبب في وقايته بعد الله لكثير من المخاطر
ثالثاً/ احجز لجدة بعد معرفة موعد اختبارها ، وبالتوفيق

[abu.hossam]

الحل تختبر في جدة ولو جبت عذر طبي وتجي يوم الاختبار الصباح للجامعة وتبلغهم بالحلصل اذا لم يتم احضار تقرير ويكون افضل بس اهم شي لا يفوتك اختبار جدة واعتقد ان الامر بسيط ان شاء الله

[زيـ المشاعر ـف]

الله يعينك


حاول تختبرها بجده

جب معك تقرير احتياط

وحاول تدخل بدون لا تقول لأحد

محد درى عنك


وبالنسبه للطريق

والله انا ما البس نظارات ونظري تمام وضيغت المخرج

والله سيد رايح جاي

والله اني اقول الله يستر على هالطلبه

ومرتين صادني ساهر وحده قبل الاختبار ووحده بعد الاختبار


يعني الاقيها من الاختبار والا من المخالفات

والا من البعد والا من الطريق الخايس

والا من زحمة المواقف

ما اقول الله يعين هانت :(

[فهد العنزان]

الحمدلله ع سلامتك وهذا الاهم والله يعافيك اخوي

الحل تسافر وتختبر وترجع وما يحتاج عذر او شيء

وعليك مراجعه طبيب ممتاز لحل مشكلة النظر التي لديك وهذا الاهم شفاك الله وعافك والحمدلله ع السلامه
وموفق

[طالب متورط]

الللللللللللللللللللللللللله يعينك
اول شي البس نظارات لان النظاره بتحفظ النظر مايزيد يضعف
والطريق ظلماء ورايح جاي وتريلات وحالته حاله


الاختبار احجز ورح اختبر بجده هذا هو الحل.

[ميشو999]

الله يكون بعونك ياخوي ويسهل أمرك إن شاء الله

رح إختبرها بجده .. ومثل ماقالوا الأخوان جب معك تقرير طبي إحتياط .. وأسأل أهل الخبره بمثل هالحالات ..

أختبر بجده ورح عمره وأدع لنفسك ووالدينك ولنا ياخوي .. بالتوفيق لك إن شاء الله .. وماتدري وين الخيره فيه ..

[KAUODUS]

الحمد لله على السلامة
ولا الووومك وأنا اخوك
اللي مايدل الديرة هناك يتوه ويضيع
ولا يجيها الإ ناس هاوية للبر كما تشير اللوحات أدناه
أو حقين أمور لا تليق أن تذكر هنا
ولا نقول إلا
اللهم انصرنا عليهم نصرا عزيز مقتدر
وعلى كل مفسد في هذا البلد
هذا بحد ذاته والله فساد وضياع انفس وممتلكات
وكأن الرياض مدينة خاوية من الصالات والمعارض والفنادق

بالله هذا وضع يليق بطلاب وأعضاء هيئة التدريس جامعة المؤسس
؟؟؟

أين هيئة مكافحة الفساد عن هذا الإجراء
وهدر الممتلكات والأنفس
حسبنا الله ... حسبنا الله ... حسبنا الله