تأشير القياس النفسي (ايمان طباع ) مــــــنـــــقــــــــــــــــــــــول

[بنت عسير]

مراجعه القياس النفسي
(مراجعه شامله للمنهج كامل)
أ.إيمان الطباع..
شعبه 4 المراجعه كانت بتاريخ الاربعاء الموافق
8\6\1432
الفصل الاول
مامعنى القياس؟والمقارنه مابين القياس والعد..
تعريف القياس :هو عباره عن عمليه وصف البيانات والاشياء او الظواهر التي نقيسها بأرقام .(اذا كل التعريفات اللي حتمر معانا بالقياس الاختصار حقها حيكون التعريف اللي قلناه وصف الاشياء بارقام)..
اما بالنسبه لوحدات القياس فستكون متصله..مثل الاختبار تكون درجاته من صفر الى 100 هذي تعتبر قياس متصل .
بالنسبه للعد :هو حساب عدد الوحدات الموجوده..مثل لما اعد عدد الاشخاص الموجودين بالقاعه او الكراسي حنقول 1,2,3,4 هذي عباره عن وحدات متقطعه ..
الفرق الرئيسي بين القياس والعد هو:
ان القياس:يكون متصل (لأشياء متصله)
والعد:يكون منفصل (لأشياء منفصله)..
مجالات القياس (المجالات التي يهتم القياس فيها):
1-الذكاء:هوعباره عن قدره عقليه.(تفاصيله بالكتاب)
=============
2-قدرات الاستعداد(مهم جدا نعرف الفرق مابين القدره والاستعداد)
القدره:هي الشي الموجود حاليا عند الشخص..يعني انتِ حاليا عندك القدره على الكتابه والقراءه.
أما الإستعداد:هو (لو)عندي الاستعداد لتعلم الشيء(يعني مايستطيع الفرد اداؤه في المستقبل لو تلقى التدريب والتعليم المناسب)
هناك مجموعه من القدرات بالنسبه للقدرات الفرعيه للذكاء:
1-القدره اللغويه:قدرتي على استعمال اللغه واللغه عباره عن ألفاظ فإذا الى اي درجه الشخص عنده القدره الى استعمال الألفاظ سواء بإيصال المعلومه او بإستقبال المعلومه وفهمها.
====
2-القدره الميكانيكيه: هي قدره الشخص على انه يتعامل مع الآلات يفهم الآلات ونلاحظ الشخص اللي عنده القدره الميكانيكيه مرتفعه عنده قدره انه يفككها ويرجع يركبها مره ثانيه,,جزء منها انه عارف يشوف علاقه الاشياء ببعض (عشان يعرف يفكك الاشياء ويركبها لازم يعرف هذي القطعه جنب هذي القطعه وماالعلاقه بينهم وبين بعض)هذه ميزه القدره الميكانيكيه.
===
3-القدره الحسابيه:هي قدره الشخص انه يتعامل مع الارقام (يعمل العمليات الحسابيه اللي نسميها الرياضيات ).
===
4-النفس حركيه:هي الاشياء اللي فيها حركه بس تحتاج لبعض المهارات الفكريه اللي هيه النفسيه زي مثلاً فكره التناسق البصري الحركي مثل لوعندي جهاز هذا الجهاز امشي الاله بطريقه معينه واركز انه اليد ماتهتز وبنفس الوقت الانتباه والتركيز ناحيه نفسيه فأنتي النفسيه مع الحركيه بيتعاونوا مع بعض حتى تقدري تأديه المهمه بنجاح .
===
5-القدره الكتابيه:انه كيف الشخص بيقدر يكتب ويتعامل مع الاشياء المكتوبه..
بعد ماانتهت مجالات القياس نأتي الى
(الهدف من القياس):
الاهداف الرئيسيه:
1-التعرف على القوانين التي تحكم السلوك الانساني:
لما نقيس اي ظاهره من الظواهر عند الشخص احنا ممكن نعرف العلاقه بينها هي والظواهر الثانيه , ممكن اشوف هل فيه فروق بين المجوعات ..هالاشياء اللي احنا نعملها بتساعدنا نتوصل لقوانين مثل مايكون عندي فرض هذا الفرض بتحاولي تختبريه عن طريق القياس نقيس الظاهره وتختبريه بالاساليب الاحصائيه وبعدين بتعطيني قرارك ..قرار على قرار على قرار كل هالقرارات بيعملوا مجموعه قوانين هذي القوانين راح استفيد منها عشان الهدف الثاني اللي هوه توظيف القوانين لخدمه المجتمع ..لما اعرف انو فيه علاقه بين التحصيل الدراسي والذكاء فإذا مافي داعي يدخل على المدرسه طالب ذكاؤه منخفض ماراح يقدر يمشي مع زملاؤه بالصفوف العاديه لازم احوله للصفوف الخاصه..فاذا انا من هذي الناحيه استفدت من القانون بخدمتي للطفل بدل مايقعد فالمدرسه العاديه ويحس انه ضعيف ومايقدر يجمع ولايفهم احوله على الصفوف الخاصه بحيث يتم تدريسه بطريقه خاصه..
اخر هدف من الاهداف:
التعرف على الفروق :
فيه نوعين من الفروق :
1-فروق *داخل* الافراد (داخل الفرد نفسه بينه وبين نفسه يكون عنده فيه قدرات معينه مرتفعه وفيه له قدرات معينه منخفضه لما اعرف القدرات الموجوده داخل الشخص هوه فين يكون متميز وفين بيكون ضعيف راح اعرفها عن طريق مقارنته بنفسه بحيث اني اعرف نقاط القوه عنده
هذا الشي بيخليني استفيد منها فلو مثلا عرفت انو هذا الشخص بصري اذا ححاول اني اوصله المعلومه بإستخدام حاسه البصر لو اعرف انه ضعيف بالسمعي بحاول قدر الامكان اني لما اعطيه معلومات مااعطيه المعلومات سمعيه راح احاول اعطيه المعلومات بصريه مثلاً .
2-الفروق *بين* الافراد :
(الافراد بينهم وبين بعض)
مين فيهم مرتفع مقارنته بمين ومين فيهم متوسط معرفتك فيهم بتساعدك انك تعرفي هذا الشخص مثلا ضعيف بشيء معين مقارنه باقرانه ممكن احاول اني انميه عنده او متميز بشيء معين مقارنه باقرانه فاحاول اني امسكه مهام معينه تتماشى مع قدراته اللي هوه متميز فيهاا..
أطراف العمليه السيكولوجيه:
3 اطراف رئيسيه بالعمليه السيكولوجيه :
1-المفحوص او العميل اللي راح اختبره.
2-الاخصائي النفسي.
3-الاختبارات النفسيه.







الفصل الثالث
انواع الاختبارات لازم اعرف كل اختبار وتعريفه ومميزاته وعيوبه
1-اختبار الورقه والقلم :
هي من اكثر انواع الاختبارات شيوعاً بمعني ان معظم الاختبارات النفسيه نلاقيها عباره عن ورقه وقلم بسبب انه سهله الاستعمال وبنفس الوقت اقدر استخدمها بطريقه جماعيه مثل الاختبارات التحصيليه .
2- اجهزه الاختبار:
فكرتها الاساسيه انه فيه اجهزه الكترونيه مثل الكمبيوتر ممكن تكون الاجهزه اللي بتطلع صوت الاجهزه اللي تبع زمن الرجع يعني مثلا الاجهزه اللي بتطلع صوت زي اللعبه اللي امر فيها من اولها لاخرها بدون ماالحلقه تضرب بالمسار هذا يعتبر جهاز الكتروني فيه كهربه انتِ تبغي تمشيه من اوله لاخره هذي تعتبر من اجهزه الاختبار اللي بتقيس التناسق البصري الحركي
ممكن نلاقي بعض الاختبارات النفسيه موجوده داخل الكمبيوتر المفحوص بيجاوب بنعم او لا او حسب الاجابه اللي مطلوبه منه بعدين نفس الكمبيوتر بطريقه اليه بيسوي التصحيح وبيعطيه الناتج النهائي .
3-الاختبارات غير اللفظيه:
التي لاتعتمد على اللغه يعني مثلاً اختبار المصفوفات المتتابعه مثل رسمه فيها شي ناقص او بيكون فيه تسلسل معين والفحوص يختار اش الشي الموجود فيها او اش الاجابه الصحيحه ..
من مميزات الاختبارات الغير لفظيه:
اني اقدر استخدمها مع الاميين والاطفال لان احد عيوب اختبارات الورقه والقلم اني مااقدر اسخدمها مع الاميين مايقدرون يجاوبوني في اشياء فيها لغويه ..(الغيرلفظيه متحرره من الثقافه وممكن نطبقها على الاميين وممكن اطبقهاعلى شخص بيتكلم لغه مختلفه عن لغتي )
4-الاختبارات الادائيه:
فيها نوع من الاداء مثلا يكون فيه مجموعه مكعبات اركبها فوق بعض او مثلا الفرز اني افرز الكور عن بعضها الاحمر لوحده والاخضر لوحده والاصفر لحده وهكذا ..
انواع البنــــــــــــــود
لكتابه اي اختبار فيه مجموعه من البنود اللي ممكن يتم استخدامها والطرق هي:
1- السؤال :لما نقول بند او عباره او جمله كلهم مترادفين لبعض نفس المعنى ممكن يكون البند صياغه على شكل سؤال والمفحوص يقللي نعم او لا طريقه اجابته بنعم او لا والصياغه هي السؤال .
2- جمله تقريريه :
مثلا: احب الحفلات
والمفحوص بيقولي هل الاجابه صحيحه او خاطئه فهذه احد اشكال كتابه البنود.
3-طريقه انتخاب بين بدائل على متصل:
مثلا احب التعامل مع الاطفال المفحوص يجاوب اوافق بشده, اوافق, محايد ,لااوافق ,ارفض بشده
هذا التسلسل اسمه "بدائل على متصل"هو متصل بين اوافق بشده وارفض بشده وفيه بينهم اشياء متصله بينهم وبين بعض يتم استخدام هذا الاسلوب بكثير من الاختبارات النفسيه واكثر مجال بيستخدمه هو (الاتجاهات).
4-ترتيب التفضيلات:
بيحط لي الفاحص مجموعه اشياء ويقلي انتي اختاري من بينها ايش الشيء اللي بتفضليه او اش الشيء اللي تبغيه واقول مثلا هذا ترتيبه رقم واحد وهذا رقم 2 وهكذا برتب كل واحد على حسب تفضيلي له.
5-انتخاب بين بدائل على (منفصل):
زي اللي يجي فالاختبار فيه عندي مجموعه خيارات كل واحد فيهم ماله علاقه بالثاني وانا اختار الاجابه اللي بتناسبني او اللي بتمثلني .
6-حل واحد للمشكله:
بيكون فيه مشكله بيتم طرحها على مفحوص او مسأله مطلوب منه انه يحلها وبعد مايحلها فيه طريقه واحده بس للاجابه .
(في مقابلها راح تكون عندي:
7- اكثر من حل للمشكله:
انه ممكن المفحوص يحلها باكثر من طريقه,,مثلاً اختبارات بناء المعادلات بناء المعادله ممكن تنبني باكثر من طريقه وكل الطرق راح تكون صحيحه فهذي مشكله وحده وعندي اكثر من حل ..
8-مثير وانتاج اكبر عدد من الافكار:
زي مثلاً لما نقول حرف الألف اعطيني اكبر عدد ممكن من الكلمات اللي تبدأ بحرف الالف فحرف الالف يعتبر مثير وانا ابغا اكبر عدد ممكن من الكلمات اللي بتبدأ بهذا الحرف..
(امثله لبعض الاختبارات وامثله بنود الاختبارات):
(حفظ كل اختبار والعالم اللي سواه)
1-اختبارات الذكاء لكاتل.(حفظ)
2-مهارات الانتباه : اختبار متغيرات الانتباه.(حفظ)

3- سمات الشخصيه وودورث (طور من الخبره العلاجيه)فيه بعض الاختبارات اخذناها من الناحيه العلميه وبعضها من الناحيه العمليه فوودورث بما انه تم تطويره من الخبره العلاجيه فهو يعتبر من الاختبارات اللي تم تصميمها باستخدام مبدأ العملي الفني ..
4- الاختبارات الاسقاطيه :
مهم نعرف (مبدأها): مبدأها هو ان الشخص يقوم بتفسير المثيرات الغريبه او الغير مفهومه او الغامضه اللي بيشوفها قدامه بناءً على الخبرات اللي موجوده عنده سابقاً.
مثل (صوره الطفل اللي قاعد حزين مع الكَمَان) المفحوص كيف حيفسر هالصوره هل بيفسره بناءً على هوه برأيه ايش الشي مزعله فكل مفحوص بيختلف عن الثاني لان المفحوص بيحط الاشياء اللي بداخله على هذي الصوره فحيساعدني اني اتعرف على نفس هذا الشخص ايش هيه الاشياء اللي بتحبطه او بتضايقه كيف علاقته مع الاخرين الموجودين حوله ..
ويفضل لما نختبره هالاختبار اقوله ان هالاختبار بيقيس الخيال عندك عشان يتحمس ويحاول يحط اكبر قدر ممكن من العناصر عشان يثري القصه ويبين ان عنده خيال واسع مااقوله الهدف الحقيقي من الاختبار انه عشان اتعرف ع شخصيته لانه بعدين حيوقف وحيصير حذر وماراح يحكي كل شي.
من امثلتها :اختبار تفهم الموضوع (مثل اللي قلناه صوره ويقول قصه عليها), بقع الحبر لروشاخ, روتر للجمل الناقصه .
5-الاجهزه الفسيولوجيه اللي ممكن نستخدمها للاختبار: الاجهزه الفيسولوجيه هيه اللي تقيس الظواهر الفسيولوجيه بجسم المفحوص زياده درجه الحراره التعرق زياده ضربات القلب سرعه التنفس هذي كلها الاجهزه بتقيسها فلو زاد التعرق مثلا او ضربات القلب معناها الشخص بيكذب
جهاز كشف الكذب
وجهاز رسم المخ الكهربائي بيساعدنا فالتعرف القدرات العصبيه عن الاشخاص هل فيه عندهم تلف فالدماغ كيف الوظائف العقليه هل هي جيده او لا
6-اختبارات الاتجاهات :
مثل الاتجاه نحو العمل مع الاطفال (طريقه الانتخاب بين بدائل على متصل ) هذا اكثر نوع من الطرق اللي بتستخدمها هذا النوع من الاختبارات..
7-اختبارات الميول:
(فيها اختبارين جدا مهمين:
1-سترونج للميول المهنيه .
2-كيودر للتفضي المهني.
هذول الاختبارين بنواحي التوجيه المهني وكل شخص اش المجال اللي بيناسبه اللي يقدر يعمل فيه بنجاح .

الاستفاده من ادوات القياس:
(اش الاشياء اللي ممكن اتستفيدها من ادوات القياس):
1-الاختبار
2-التصنيف
3-التسكين
(1و2و3 خاصين بالجهات اللي تبغا توظف الاشخاص تخليني اعرف اي مجال ممكن يشتغل وتحديدا اي وظيفه راح اعطيه)
4-التشخيص والعلاج :
انه لما يكون الاخصائي يبغا يشخص حاله جات عنده ليعملها عمليه تقييم فهوه راح يحتاج يطبق عليها اختبارات نفسيه تساعده بعمليه التشخيص حتى يقدر يقرر هوه كيف راح يعالجها .

5-الارشاد:
مثل الارشاد الاكاديمي الارشاد المهني
ارشاد وظيفي هذي كلها اطبق عليها مجموعه من الاختبارات اقول هذي بناءً عليها اختار التخصص اللي يناسب المفحوص او الوظيفه اللي تناسبه .
ممكن استخدام ادوات القياس في تطوير البرامج لو فيه اي برنامج ونبغا نشوف هل هوه فعال او غير فعال فنطبق الاختبار عليه فمثلا لو نفرض نبغا نطبق اختبارتطوير المهارات الاجتماعيه فأطبق مقياس المهارات الاجتماعيه على المفحوصين قبل البرنامج وبعد مااخلص ارجع اطبق عليهم البرنامج مره ثانيه واشوف هل فعلا هذا البرنامج كان فعال ولالا وبقدم لهم استمارات مثلا يقولولي اش الاشياء اللي فيها نقاط القوه واش نقاط الضعف اللي كانت موجوده عشان يساعدوني اطور البرنامج اللي انا بقدمه لهم .
7-تطوير النظريات النفسيه:
مثلا لما اجي اعمل بحث التخرج راح احط فرض
الفرض عشان اختبره راح استخدم مقياس المقياس هذا لما اطبقه واطلع البيانات اللي منه واعمله معالجات احصائيه حتعطيني فكره هل انا حقبل الفرض اللي حطيته او حرفضه
(اذا عشان انا اختبر الفروض واختبر النظريات اللي موجوده حستخدم مقايس تساعدني باتخاذ القرار حولها.

باقي الفصل الرابع والثبات والصدق

[بنت عسير]

الفصل الرابع
بناء الاختبار
لما ابغا ابني اي اداء فيه عندي مجموعه من الاشياء اللي بيحتاجها الباحث عشان يعد هذا الاختبار لازم يكون فيه عنده معرفه علميه ويكون عنده مهاره بتحويل النظريات والكلام اللي موجود الى جمل
هذي بعض المهارات اللي بيحتاجها نفس المصمم للاختبار ومن الاشياء المهمه اننا نعرف واحنا بنعد الاختبارات اش الهدف اللي ممكن يخليني اعد اي اختبار مايصير بمجرد ان الباحث قرأ اي موضوع وحاب يسوي اختبار عنه يروح يسويه ..ماينفع هالكلام لان هذا الشي راح يخلي المكتبه السيكولوجيه كم الاختبارات النفسيه الموجود عندنا فراح يكون عندنا كثير اختبارات مالها داعي فمن الاشياء المهمه حتى يتم تصميم اي اختبار انه يكون فيه حاجه لازم نعد الاختبار عشانها ممكن يكون مفهوم جديد طلع ومافيه عندنا اي معلومات عنه مافي عندنا اي مقاييس تم اعدادها مسبقاً له
نقطه اخرى مهمه هي:
اتجاهات تصميم الاختبار :
فيه اتجاهين هما:
1-الاتجاه العلمي نظري:
الفكره الاساسيه له انه بتكون عندي نظريه معينه وفقاً لهذي النظريه ببني الاختبار اللي ابغاه .فيه له مجموعه من العيوب وفيه له مجموعه من المميزات
من عيوبه :
1-انه بياخذ وقت كثير طويل لان الشخص عشان يعد هذا الاختبار محتاج يعرف كل الاشياء اللي موجوده تحته يلم بالنظريه كلها ككل وبعدين يبدأ يكتب العبارات حقتها .
2- من عيوبه كمان انه اذا كانت النظريه اللي بيتم الاستناد عليها فالمقياس ضعيفه فهذا حينعكس على نفس المقياس كمان راح يكون المقياس ضعيف .
لكن ممكن لو كان النظريه جيده والاعداد المقياسي جيد هالشي راح يساعدني اني اثري هذي النظريه.
2-الاتجاه العملي الفني:
ماتهمني فيه النظريات انا يهمني فيه الواااقع العملي اللي موجود ايش اللي بلاحضه على مثلاً الفئات الاكلينيكيه المصابين بالذهان المصابين بالقلق المصابين بالاكتئاب بروح وبشوف ايش هيه الصفات اللي بتنطبق عليهم ايش العبارات اللي بقولولي بتنطبق عليهم نفسهم ايش تشخيص الاخصائيين لهم ايش الاعراض اللي جدا بيلاحضوها بناءً على الملاحضات العمليه اللي بيشوفوها الاخصائيين انا ببدأ ابني المقياس اللي يخصني ,,زي ماقلنا على قائمه وودورث انو هالقائمه تم بنائها وفقاً لهذي الطريقه..
عندك كمان اختبار الm.b.i تم بناؤه بهذي الطريقه شافوا الاشخاص اللي مشخصين اكلينيكياً ايش الاشياء اللي بتنطبق عليهم وبناءً عليها راحو صمموا لنا المقياس..
من عيوب الاتجاه العملي الفني:
1-انو مافيه فيه اي فائده نظريه لانه انبنى على اساس الممارسه الواقعيه ماراح استفيد منه في النظريات .
من حسناته:
1-انه سريع الاعداد انو بس راح احتاج لملاحضه المرضى والاخصائيين اسالهم عن ارائهم وبناءً عليها ابدا اعد المقياس.
بالنسبه لتطبــــــــيق الاختبار
لما يجي الفاحص يطبق الاختبار فيه عندي مجموعه من العوامل اللي لازم يراعيها وينتبه لها لانها راح تاثر على اداء المفحوص للاختبار وتاثر ع درجاتهم ..
1-متغيرات فيزيقيه:
اللي هيه الاشياء الماديه مثل الجو الحراره او بروده الاضائه الضوضاء مشتتات الانتباه اللي موجوده هذي كلها تتبع المتغيرات الفيزيقيه اللي راح تاثر على اداء المفحوصين اذا كانت غير مريحه راح يكون ادائهم اسوأ من الحقيقه حقتهم ولو كانت مريحه راح تساعدني على اني احصل فعلا على الدرجات اللي تمثل المفحوصين ..
2-شكل الاختبــار:
ممكن شكل الاختبار يخلي المفحوصين يتعاملوا معاه ويعطوه اهميه وممكن يخليهم يستخفون بالاختبار ومايعطوه اي اهميه هذا بيسبب قله التعاون تبعهم ودرجتهم ماراح تعكس قدرتهم الحقيقيه ..
من الاشياء المهمه كمان
3- حال ووضع المفحوصين:
انو كيف نفس المفحوص اللي بيجاوبني ايش الاشياء اللي موجوده عنده ممكن تأثر على اداؤه في الاختبار:
1-المران والخبره:ممكن يكون متمرن على طريقه الاداء وعنده فكره عن هذي الطريقه او اول مره بيتعامل مع الاختبار موفاهم اي شي موعارف كيف يتصرف معاه او ممكن نفس الاختبار تعرض له اكثر من مره هذي كلها عوامل راح تأثر على اداؤه بوقت الاختبار يعني مثلا لو توتر ومو عارف يحله موفاهم الطريقه حيحصل على درجه منخفضه عشان كذا لازم تكون التعليمات جداً واضحه اللي بتساعد المفحوصين بيجاوبون بالطريقه المطلوبه ولو كان هوه لاكثر من مره ادى الاختبار او اختبارات ثانيه مشابهه في نفس المفهوم هذا الشي راح يخلي درجته ترتفع وماراح تعطيني الدرجه الحقيقيه اللي بتمثل اداؤه.
ومن الاشياء المهم كمان انو *الخبره* اكثررر تأثيراً على درجه المفحوص من *المران*
2-وجهه الاستجابه:
أ-التعبير اللفظي:مثلاً فيه شخصين بيصلوا الفجر وسألت هل تحافظ على صلاة الفجر؟
هالاثنين صلوا الاسبوع اللي راح خمس مرات الفجر فلما سألت واحد فيهم هالسؤال بيقول لي غالباً
هيه الخمس هذول اعتبرهم غالباً
حيجاوبني الثاني ويقول لي احياناً
الاثنين جوابهم نفس الشيء بس كل واحد قدَّرها بطريقه مختلفه عن الثاني هذا الشي حيأثر على الدرجه حقته فهذا المقصود فيها الطريقه اللي بيعبر فيها الاشخاص عن اللي بيعملوه..
ب-فيه بعض الاشخاص بيكون عندهم قبووول واذعان اي سؤال بسالهم بيكون جوابهم نعم بدون مايفكر بيكون جوابهم نعم ممكن يقول لا بس بشكل عام حتكون اجاباته بنعم فهذا راح يأثر على درجه المفحوصين..
ج-من الاشياء اللي حتأثر كمان هي الجاذبيه الاجتماعيه :
وهذا حيكون نوع من التزييف للاشخاص اللي بتحب تبين بشكل جذاب لو فيه اي عيوب موجوده عندها ماراح تعترف فيها بالاختبار فلو قلنا مثلاً :
اقول الصدق دائماً
بيقول: نعم دائماً
بينما حقيقةً احنا غالبا مانقول الصدق ..
من الاشياء الثانيه اللي ممكن تأثر على المفحوصين واداؤهم على الاختبار:


3-قلق الاختبار:
بيتكون من جانبين:
أ- جانب انفعالي:
الشعور بالانفعال والخوف من الاختبار.
ب-جانب معرفي او ناحيه معرفيه :
الاهتمام المشوب بالحذر
فكرتها انو ايش النتيجه اللي انا متوقعتها من خلف الاختبار كل ماكان المفحوص حاط بباله نقطه الخوف من الفشل فالاختبار كل ماراح يزيد القلق عنده بينما لو هوه حاط بباله انا راح انجح بالاختبار هالشيء ممكن يخفف من عنده القلق بس لو كان الشي اللي هوه متوقعه الفشل فكل ماتوقع الفشل كل مازاد القلق عنده عشان كذا لاطبقت الاختبار لااقول للمفحوصين انو الشخص اللي بيحصل على درجه منخفضه راح يفشل .
اخر شي ممكن يأثر:
4-موضوع التزييف :
التزييف اللي هوه متقصد عمليه انه يزييف ويغير اجاباته وفيه نوعين من التزييف:
أ-تزييف نحو الاحسن:
لما يكون فيه مقابله ونبغا ناخذ اشخاص معينين عشان وظيفه فراح يكون عنده تزييف نحو الاحسن.
ب-تزييف نحو الاسوأ:مثل شخص مدَّعي المرض لو سألتيه اساله عن هل هوه مريض ومو قادر ينام حنلاقي اجابته كلها نعم وغالبا ودائماً يبغا ياخذ العطف مني ويخليني اتعاون معه.
من الاشياء اللي راح تأثر عندي على الاختبار:
اسلوب الفاحص:
لو الاختبار كان اختبار قدرات او اختبار تحصيل دراسي وذكاء وانا ماحاولت اشجع المفحوص عشان يعطيني اقصى قدره موجوده عنده هذا الشي راح يأثر على درجته فتشجيع المفحوصين عشان يحاولوا
يعطوني اقصى درجه ممكنه عندهم من النقاط المهمه في الاختبارات .
2-التآلف:انو هل قدر الفاحص يبني علاقه فيها تآلف بينه هوه والمفحوص او ماقدر يبني هذي العلاقه للألفه والموده لانه كل ماكان فيه تآلف كل ماهذا الشيء ساعدهم انو يتعاون معيو يتجاوب بطريقه افضل..
3-الصرامه والعصبيه:
صرامه الفاحص وعصبيته لوكان الفاحص عصبي وجاد وطريقه تعامله سيئه هذا راح ينعكس بطريقه سلبيه على اداء المفحوص.

"خطه تصميم الاختبار"
لما يجي الفاحص يبغا يجهز الاختبار ايش هيه الاشياء اللي لازم ياخذها بعين الاعتبار ..
1-الهدف: الهدف من الاختبار ايش هوه .
2-المحك:لازم تحديد المحك وماهو الفرق بين المحك لوكان مرجعي =(محكي) نفس الشي كلمتين مترادفتين أو هل المحك حيكون معياري؟
الفرق بينهم جدا رئيسي و (مهم)
أ-المعيار المحكي(المرجعي):
بطبقه على مجموعه من الافراد وبعدها اطلع المعيار اللي ابغاه
هو قبل تطبيق الاختبار بيتم وضع مستوى لازم المفحوص يوصل لهذا المستوى اللي تم وضعه بنجاح لازم المفحوص يوصله لو ماوصله المفحوص يعتبر راسب.
فهو عباره عن (محك يتم وضعه "قبل" تطبيق الاختبار)لانه لازم يحقق المفحوص مستوى معين من الطلبات او مستوى معين من القدرات والمهارات .
وغالبا بيتم استخدام المحكي او(المرجعي)في اختبارات القبول بالجامعات في اختبارات التحصيل الدراسي او اختبارات القدره على القياده ..
ب- المحكي المعياري:
راح اقارن الفرد بمجموعه من الافراد ابغا اشوف مين فيهم متوسط مين مرتفع مين منخفض مين متميز مين جدا منخفض اللي بيصير اني راح اطبق الاختبار على الافراد بعد مااطبقه راح استخرج "المتوسط و الانحراف"
بناءً على المتوسط والانحراف انا اقدر اصنف الافراد لمجموعات .
فيه عندي نوعين من المحكات المعياريه :
أ-تشخيصي:
راح اعمل مقارنه بين الاسوياء وغير الاسوياء زي معايير المرض انو فيه مستوى معين يكون فيها الاشخاص مرضى ومستوى معين يعتبروا اسوياء .
ب-غير تشخيصي:
الهدف منه اني اقارن الفرد بالمجتمع بشكل عام.
اذا المرجعي يكون قبل الاختبار ,,والمعياري بعد الاختبار,مرجعي(قبلي)
معياري(بعدي).
النقطه الثالثه بعد ماحددها الهدف والمحك
3-الجوانب اللي بيشملها السلوك الذي تمثله السمه:
الجوانب اللي بيشملها السلوك اللي ابغا اقيسه في له مجموعه من الجوانب اللي لازم تؤخذ بعين الاعتبار انو كيف الباحث بيتعرف على الجوانب هذي اللي لازم تؤخذ بعين الاعتبار:
أ-تحليل الاستجابات:بطبق اختبارات مفتوحه بشوف اشخاص عندهم ثقه بنفسهم جدا مرتفعه بطبق عليهم الاختبار بقلهم اوصفوا لي نفسكم او مثلاً اشخاص قياديين بقلهم اوصفوا لي القياده اش هيه القياده او ممكن اخلي خبراء يقولوا لي هيه والاشياء اللي تكررت بحط عليها علامه انو لازم اخذها بعين الاعتبار.
ب-مراجعه البحوث والدراسات:
الباحث بنفس المجال اللي هوه حابب يعمل فيه المقياس بيشوف ايش هيه المجالات اللي اشارت اليها الدراسات السابقه انها بتشتمل عليها هذي الخاصيه اللي هوه حابب يقيسها.
ج-التعرف على المواقف الطرفيه:
يعني مثلا انا ابغا اشوف الثقه بالنفس لازم اقارن بين الافراد اللي عندهم الثقه جدا مرتفعه والاشخاص اللي ثقتهم بنفسهم جدا منخفضه اش هيه الفروق بينهم الفروق اللي موجوده بينهم حتساعدني اني اعرف ايش هيه الجوانب اللي موجوده بالثقه بالنفس .
د-الملاحظات المباشره:
زي مثلاً لو ابغا اعمل موضوع العدوان بروح الاحظ الطفل العدواني اعمل عمليه ملاحضه بيضرب بيعض بياخذ اشياء غيره هذي كلها اشياء لازم اخذها بعين الاعتبار لو ابغا اعد مثلاً مقياس للعدوان .
بعد ما تعرفنا على جوانب اللي نبغا نقيسها (كل اللي فات اعدادات )..راح نبدأ نبني بعمليه الفعلي انو راح ابدأ ابني فقراتي عشان قبل ماابدأ قبل الفقرات لازم اختار ايش الشكل اللي حابه تكون الفقرات موجوده فيه,,
بعد مانختار الشكل راح نشوف هل اللي انا اخترته هذا يتماشى مع الفئه العمريه يعني لوكانوا اطفال لازم استخدم اسلوب معين بالعبارات لهم لو كانوا اميين ..الاشخاص مثلاً اللي عندهم اعاقه كمان فيه لهم اسلوب معين بصياغه الاسئله هذي فهل اللي انا اخترته يتناسب معهم او لا.
بعد مااخترت الشكل المناسب وتاكدت انو هوه مناسب راح ابدا اكتب الفقرات بناءً على كل المجموعات اللي انا جمعتها مسبقاً.
بعد ماالباحث يكتب الفقرات لازم يعمل خطوه جدا مهمه عشان يبتعد عن الذاتيه لازم يروح يعرضه على (مجموعه من الخبراء) لانهم راح يقولولي هل فعلا العبارات صحيحه ودقيقه او لا ..هذول اسمهم محكمين.
فأنا راح اعرض مقياسي على مجموعه من المحكمين راح يحكموا على مقياسي ممكن يقترحون تعديلات على المقياس لازم الباحث يلتزم فيها لو قالوله مثلاً هذي غير مناسبه احذفها راح يحذفها او انو طلبوا اعاده الصياغه راح يعيد الصياغه..
بعد بناء الفقرات راح يكون عندنا (التطبيق الاولي):
التطبيق الاولي هوه اني اطبق اختباري بعد ماأخرجته وانتهيت بطبقه على مجموعه هذي المجموعه الاوليه موهيه العينه الفعليه لا هذي زي تجربه استطلاعيه استطلع الوضع معاهم حشوف هل الوت مناسب اللي حطيته ولامحتاجين وقت ثاني بيساعدني اني احسب وقت الاختبار من لحضه ماوزعت الورق للحضه اللي تم فيها الاجابه عليه وراح يساعدني اعرف هل فيه اجابات غامضه ماعرفوا يجابوا ع اسئله او مافهموها بيساعدني اخذ اشياء بعين الاعتبار ويساعدني اني اعمل تعديل للفقرات بناء على الاسئله اللي احنا لاحضناها ..
بعد ماالباحث يخلص التطبيق الاولي يعمل التطبيق الفعلي بعدين يقوم

(بالتحليل الاحصائي للفقرات) بعد مالباحث طبق المقياس يبغا يبدأ يعمل تحليل احصائي للفقرات التحليل الاحصائي فيه عندي مجموعه خصائص احصائيه نبغا ناخذها بعين الاعتبار اكثر اثنين مهمين هم :
أ-معامل سهوله وصعوبه الفقرات:
هو عباره عن عدد الافراد اللي اجابو اجابه صحيحه مقسوم على العدد الكلي للافراد..من الاشياء المهمه كمان انه( كل مااقترب للواحد معناها سهل لانو لو قلنا ميه من ميه من الاشخاص جاوبواعليه ميه تقسيم ميه =1
وكل مااقترب للصفر حيكون صعب .
ب-تمييز الفقرات:
افضل تمييز ممكن احصل عليه لما تكون صعوبه الفقره 0,5 يعني نصف المجموعه تقسموا بالنص بين مرتفعين ومنخفضين.
بالنسبه لتمييز الفقره عشان اعرف فقرتي مميزه او لا ممكن اقارن بين (المجموعات الطرفيه) انو الاشخاص اللي درجاتهم جدا مرتفعه والاشخاص اللي درجاتهم جدا منخفضه لو كان فيه فروق بينهم فالاجابه على هذي الفقرات معاناه انو فعلا انا فقراتي قدرت تميز لي بين المجموعات المختلفه وممكن استخدم (معاملات الارتباط) .
لما اعمل تحليل احصائي لازم اخذ حجم العينه بعين الاعتبار يفترض كل ما كانت حجم العينه كبيره كل ما كانت النتائج للتحليل الاحصائي افضل .
وفيه كمان من اللي قالوا انو من الافضل يكون الاختبار عدد المفحوصين اللي حطبق عليهم الاختبار من 5 الى 10 اضعاف عدد الفقرات ..يعني لوكانت الفقرات عباره عن 10 فقرات المفحوصين حيكونوا من 50 الى 100 هذا يعتبر الحد الادنى لعدد المفحوصين وبشكل عام كل مازادوا المفحوصين كل ماهذا الشي كان افضل وحيساعد اكثر بعمليه التحليل الاحصائي ..
وبناءً عليه نقدر نعيد ترتيب الفقرات او نشيل فقرات وهالشي جدا مهم بالنسبه لمعامل الصعوبه بحيث انو ابدأ ترتيب الفقرات من الاسهل واتدرج فيها حتى اوصل لأصعب فقره.
بعد ماعملنا عمليه التحليل الاحصائي نروح لاختيار اسلوب الاستجابه هيه نفسها انواع البنود هل هيه مثلا سؤال واجابته بنعم او لا او هل هيه جمله تقريريه اجابتها صح او خطأ .
آخر شي انو بعد ماانتهينا من كل هذي الاشياء راح نروح لمرحله (اعداد الاختبار للاستخدام النهائي):
ممكن يتم عرضه :
أ-ببطاقات منفصله:مثل ماكان عندي باختبار بينيه اعطيكي صوره الخرز واقولك رتبي الخرزات بنفس الطريقه ممكن تكون بطاقات مستقله .
ب-ممكن تكون صحيفه (ورقه) :اعطيكي ورقه واكتب عليها مجموعه اسئله.
ج-ممكن عن طريق الكتروني :زي الكمبيوتر واستخدام اجهزه الاختبار.
د-ممكن يكون شفهي: بسألك وبنتظر منك الاجابه.

هذا موكل شي بس الكلام كثيرفقسمت المراجعه على قسمين باقي الثبات والصدق لانهم جدا مهمين (هذي موكل المراااجعه بس المنتدى بيقول الكلام حقي كثير)

[بنت عسير]

الثبـــــات
و
الصدق
جدااااا مهميييين
اولاً الثبات
تعريف الثبات:هو عباره عن ثبات درجات المفحوصين على الاختبار (مونفس الاختبار اللي ثابت الدرجات هيه اللي ثابته)

ثابته يعني=> درجاتهم ثابته لاتتغير
يعني انا راح اطبق الاختبار اكثر من مره على المفحوص وبكل مره حيحصل على الدرجه نفسها.
يعني مثلاً طبقت عليكي اختبار القلق اليوم يفترض لو طبقته عليكي بعد شهر حيعطيني نفس الدرجه .
بالنسبه الى الاساليب لحساب الثبات :
فيه عندنا 3 اساليب رئيسيه:
1-اعاده الاختبار:
بطبق الاختبار على المفحوصين بتركهم فتره زمنيه وبرجع اعيد عليهم التطبيق مره ثانيه .
الطريقه الثانيه لحساب الثبات للمفحوصين على الاختبار:
2-طريقه التجزئه النصفيه :
بقسم الاختبار لجزئين .
3-طريقه الصور المتكافئه.
فيه عندي اشياء ثانيه بيوزن لي عليها الكتبا اللي هوه كيف انا راح احسب الثبات عشان الاختبارات اللي فيها (الزمن)وكيف عندي (ثبات المصححين)
بس بالنسبه للاختبارات بشكل عام ال3 الرئيسيين واللي همه اهم شيء همه :
1-اعاده الاختبار.
2-التجزئه النصفيه.
3-الصور المتكافئه(أو الصور المتناظره).
بالنسبه لاعاده الاختبار:
الخطوات هي انه يتم تطبيق الاختبار اول مره بترك المفحوصين فتره زمنيه معينه بعدين برجع اطبق الاختبار مره ثانيه على نفس العينه مره ثانيه عشان كذا سميناه اعاده الاختبار ..
بالنسبه للفتره الزمنيه فيه عندي بعض الاشياء اللي لازم اخذها بعين الاعتبار لازم ماتقل فتره التبيق بأي حال من الاحوال عن اسبوع ولا تزيد عن 6 اشهر..(الفتره المثاليه) هي من اسبوعين ل3 اسابيع (21)يوم .
طبعا كل ماكان الاختبار بيعتمد على الذاكره راح ازيد الفتره الزمنيه وكل ماكنت اطبق عل اطفال حقلل الفتره الزمنيه لان الاطفال بينمو بسرعه فبالتالي اداؤهم ممكن يختلف لو خليتهم فتره زمنيه طويله ..
كل عمر من الاعمال له فترته الزمنيه موجود بالكتاب اطفال ماقبل المدرسه لهم فتره زمنيه غير اطفال الابتدائي غير المتوسط غير الجامعه فكل فتره تختلف عن الثانيه لان كل عمر له فترته الخاصه..
بالنسبه للتجزئه النصفيه :
فيه عندنا اسلوبين للتجزئه النصفيه :
أ-اقسم الاختبار لفردي وزوجي .
ب-جزء اول وجزء ثاني
او اقسمه لاربع اجزاء..اخذ الجزء الاول مع ال3
والثاني مع ال4
من الاشياء المهمه بالنسبه لتجزيء الاختبار انو انتي بعد ماطبقتي الاختبار راح تعملي عمليه التجزيء (يعني انا راح اطبق الاختبار مره وحده على المفحوصين لما اجي اصحح بعمليه التصحيح راح اعمل عمليه التجزيء هذي).
طبعا افضل علميه اللي هي لما يكون فردي وزوجي
لانه لما اعمل جزء الاول مع الجزء الثاني ممكن بالجزء الثاني يكون المفحوص بدأ يعرف الاختبار فترتفع درجاته لانو بدأ يتدرب عليها وفهمها..أو ممكن العكس ممكن تنخفض درجاته لانو بدأ يتعب ويزهق ويمل
فأنا لما اخذ الفردي والزوجي فأنا من بدايه الاختبار لاخره اخذت واحد و3 ومقابله عندي 2و4 مثلاً يجيني على الاخر اخذت 99و101 راح يكون معاها 100و102 فأنا نفس اللي حصلي في بدايه الاختبار ونهايته كله متساوي ومتكافيء.
فيه عندنا بعض المعاملات الاحصائيه اللي راح نستخدمها عشان حساب الثبات من الاشياء اللي لازم احطها بعين الاعتبار احنا عملنا تطبيق قبلي وتطبيق بعدي او عملنا عمليه التجزئه بس الفكره انو فيه عندي التطبيقين هذولا التطبيقين حنعمل بينهم معامل ارتباط ..
(معامل الارتباط هونفسه معامل الثبات)
فاذا المعالجه الاحصائيه لثبات الاختبار هي معاملات الارتباط..
يعني لاي درجه انتي درجتك في المره الاولى مرتبطه بدرجتك في المره الثانيه معناها الاختبار مرتفع معناها اختباري ثابت..
المعادلات لازم احفظها :
السبب من عمليه التعديل انه لما كنت اعمل اعاده الاختبار كنت اعمل معامل الارتباط بين درجتي على الاختبار ككل مع درجتي على ا لاختبار ككل تطبيق اول مره وتطبيق ثاني مره
لما راح اعمل التجزئه النصفيه انا بعمل معامل الارتباط بين نص الاختبار ونصه الثاني فأنا بطلع معامل ارتباط نص الاختبار ..عشان يكون الناتج اللي طلعت فيه صحيح راح اعمل شغله اسمها معادله (معامل الارتباط الجزئي)..
*معادله بيرسون (مع)تعديل سبيرمان براون (اعلى)قيمه تقديريه.(اعلى معامل ارتباط يعني اعلى ثبات)مثال: ( 0,7)
*كرونباخ معامل ألفا (أدنى) قيمه تقديريه.(اقل معامل ارتباط)مثال (0,6)
======
0,7 و 0,6 نتائج درجات لنفس الاختبار بس تختلف بسبب المعادلات
يعني الاسلوب الاحصائي راح يأثر على الناتج النهائي..
=====
*معادله موزير(مع)تعديل سبيرمان براون.
*معادله هورست.
*معادله رولسن.
معادله فلاناجان.
*معادله كودر ريتشاردسون للتناسق الداخلي.

الصور المتكافئه
(اوالصور المتناظره)
الفكره الرئيسيه لها هي ان نفس الاختبار اللي اعده الفاحص هوه نفسه بيعد اختبار ثاني مكافيء للاختبار الاول يعني بسوي اختبار ثاني صوره للاول ومكافيء له ..
من الاشياء اللي لازم الباحث ياخذها بعين الاعتبار اش الاشياء اللي لازم تكون متكافئه بين الاختبارين اذا الصوره الاولى ابغا اعد اختها من الثانيه اش الاشياء اللي لازم اراعيها في هذا التكافؤ :
1-الصياغه:همه الاثنين لازم يكون اسلوب صياغتهم متقارب وجوهرهم نفسه.

2-مستوى الصعوبه:
الفقرات اللي بتكون بترتيب مستوى الصعوبه بالاول بترتيب معين لازم الثاني الصوره الثانيه كمان بيكون مكافيء له وبنفس الترتيب لمستوى الصعوبه .
3-التعليمات:
التعليمات اللي يتم تطبيقها على الاشخاص اللي بتبين لهم طريقه الاجابه تكون هيه نفسها بالصوره الاخرى .
4-عدد البنود:
عدد البنود اللي موجود فالصوره الاولى هوه نفسه بالصوره الثانيه .
يعني همه في كل شي متكافئين شبه بعض بكل شي الاول اخوه الثاني التوأم بس (الفرق بينهم) الكلمات اللي موجوده.
بعدين الزمن اللي راح يتم التطبيق فيه ..كل هذي الاشياء لازم يراعيها الفاحص لما يعد الصوره المكافئه للصوره الاخرى .
هذا الاختبار للصور المتكافئه كيف ابغا اقدمه للمفحوصين ؟
فيه عندي طريقتين لتقديم الصور المتكافئه :

أ-فوريا:
يعني اطبق الاختبار عليه وارجع اطبق الثاني مره ثانيه (مباشرةً).
ب-متعاقبه:
يعني اطبق الاختبار عليه الحين واتركه (فتره زمنيه) وارجع اطبق الصوره الاخرى عليه.


"ثبات الاختبار بالزمن"
الفكره الرئيسيه لها هي ان اختبارات الزمن غالبا المفحوص مابيخلصها لاخرها ..
يعني مثلا: احط له 200 فقره بوقت 20 دقيقه وغالبا المفحوصيم مايوصلون لاكثر من 100 او لو كثروا يوصلون 120
لانو الفكره حقتها انو كم فقره بيقدر المفحوص يجاوب عليها فما راح اقدر اعمل تجزئه نصفيه واقول اني راح اجزيء النص الاول والنصف الثاني حيكون فيه فرق كثير كبير
راح اعطي مثال توضيحي:
مثلا عندي وقت 20 دقيقه وانا عملته 4 اجزاء اخلي المفحوص يحل الجزء الاول وبعد خمس دقايق اطلب منه يحط اشاره مكان ماوقف بالجزء الاول ويبدا بالجزء الثاني والثانيه بعد 5 دقايق يحط اشاره وال5 الثالثه حتى يخلص الوقت حق الاختبار فالاختبارات هذي
بتجزيء نفس الزمن
يعني الزمن هوه اللي بيتم التجزيء فيه.
لو قسمت ل4 اخذ الجزء الاول مع ال2 والثالث مع ال4.
اخر شي هو ثبات المصحيين:
نستخدمها لما تكون تصحيح الاختبارات تصحيح (غير موضوعي)يعني فيه نوع من (الذاتيه) وتختلف الدرجات ع حسب اختلاف المصحيين اللي بتكون عندي بالاختبارات الاسقاطيه واختبارات الابتكار او الابداع.
أ-ثبات المصحيين (اكثر من شخص):اني اشرح طريقه التصحيح لاكثر من مصحح وبعدها اشوف لما يصححون قد ايش كانوا قريبين بتصحيحهم من بعض يعني اكثر من شخص بوقت واحد.
ب-ثبات المصحح:
اني بعطي المصحح فتره زمنيه واخليه بعدها يعيد تصحيح الورقه نفسها يعني (يعيد التصحيح مع نفسه)

العوااامل المؤثره على ثبات الاختبار:
1-طول الاختبار يزيد من ثبات الاختبار.
2-تقارب معاملات الصعوبه يزيد من ثبات الاختبار.
3-استقلاليه البنود(كل فقره مالها دخل بالفقره اللي بعدها) يزيد من ثبات الاختبار.
4-موضوعيه التصحيح(يعني الاجابه معروفه فيه عندي مفتاح تصحيح واضح اصحح علي اساسه) يزيد من ثبات الاختبار.
5-التخمين (يعني اسئله تجعل المفحوص يخمن المطلوب مثل اللي موجوده باختبارات القدرات والذكاء واختبارات الاختيار من متعدد) ينقص من ثبات الاختبار.
6-زمن الاختبار الالتزام ممكن يأثر على اداء الاختبار (لما اعطي فالاختبار للمره الاولى ساعه غير لما اعطي للاختبار فالمره الثانيه ساعه وربع ادائي راح يختلف).
7-تجانس العينه :كل ماكانت العينه متجانسه يعني كلها مثل بعص وبيشبهو بعض هذا الشي راح ينقص من ثبات الاختبار.

8-غموض الاسئله:
(لما تكون الاسئله غامضه تخلي المفحوص مايفهم اش المطلوب ) ينقص من ثبات الاختبار.
9-وضوح الاسئله:
تزيد من ثبات الاختبار.
10-تعب المفحوص:
(لما يتعب المفحوص)ينقص من ثبات الاختبار.

"صـــــدق الاختبار"
جدا مهم واهم من الثبات فالصدق اهم شي يكون موجود بالاختبار لانه بيتعلق بهدف الاختبار..
تعريف الصدق:ان يقيس الاختبار ماوضع لقياسه.
فلو قاس ماوضع لقياس فهو فعلا صدق..
اساليب الصدق:
1-صدق المضمون:
الاختبارهل هوه فعلا يتضمن جميع الجوانب المهمه اللي هوه لازم يتضمنها ..صدق المضمون يتوفر في الاختبارات *التحصيليه* اكثر شي (لان) لانه في الاختبارات التحصيليه عندي فيه كتاب معين ومنهج معين لازم اشمله لما احط الاختبار..
بس (الخصائص النفسيه) نوعا ما حيكون قليل فيها صدق المضمون (لانه) من الصعب اني اعرف فعلا كل الجوانب.
كمان لازم يتاكد الباحث انه مثل الصفه المراد تمثيلها بطريقه جيده وكافيه وتعبر عنها.
الاشياء اللي ممكن تساعد الباحث انو هوه يشوف هل هوشمل جميع الجوانب اللي المفروض انو يشملها او ماشملها كلها اللي هي:
أ-لجوئه للكتب والبحوث: ارجع اراجع الكتب والبحوث الثانيه اللي مهتمه بنفس المجال اللي راح اعمل خاصيتي فيه اشوف البرامج المشابهه ..مثل اختبارات اللغه الانجليزيه لما اعمل اختبار زي التوفل قبلها بروح القي نظره على الكتب اللي مهتمه بمجال اللغه الانجليزيه اش الاشياء اللي لازم تكون موجوده .
ب-البرامج المشابهه.
ج-التقارير الفنيه : مثل البحوث اللي بلاقيها في المجلات العلميه اللي مهتمه بنفس المجال اللي نفس اختباري موجود فيه

2- الصدق المظهري:الظاهر على الاختبار هل ظاهر انو هوه اختباري فعلا بيقيس السمه المراد قياسها ولا موظاهر عليه.(الشكل الخارجي)
لازم احيانا اخليه يكون ظاهر عشان يبذل المفحوص اقصى جهد عشان يجاوب عليه يعني ماابين ان الاختبار تافهه او استتفه الاختبار بحيث احط لشخص بالغ اختبار فيه صور متحركه .مثل اختبارات القدرات والتحصيل والذكاء هذي ابينها واجعها ظاهره عشان يبذل كل جهده فاذا يكون الهدف واضح واسم الاختبار كمان يكون موجود وواضح.
وكمان فيه اختبارات اخفي الهدف من الاختبار فيها عشان امنع التزييف اللي ممكن المفحوص يسويه لما يعرف الهدف من الاختبار زي اختبارات الشخصيه لو عرف انو الاختبار بيقيس الثقه بالنفس راح يزييف الاجابه عشان يبين انو واثق من نفسه فلازم الهدف في هذا النوع من الاختبارات يتم اخفاؤه ولا يكتب اسم الاختبار يتم وضع رموز فقط.
بعد كذا نجي على النوع ال3 من انواع الصدق
3-صدق التكوين:
اللي بيتعلق بالفهوم والتعريف الاجرائي للظاهره اللي بقيسها اللي هوه فكره المكون الافتراضي ..فيه بعلم النفس مافيه اشياء نلمسها بايدنا فيه عندي مكون وبناءً على هذا المكون انا بحط التعريف وببني عليه اختباري.
فيه بعض الاشياء اللي بتساعدني اتحقق ان صدق التكوين موجود او غير مووجود:
أ-الفروق بين الجماعات:
فيه بعض الصفات انتي عارفه انو فيه فروق بين الجماعات فيها فلما تطبقي الاختبار يفترض يوضح لك انو هذي الفروق موجوده او غير موجوده.مثلا فيه فروق بين الاطفال والكبار فيه فروق بين النساء والرجال فلازم الاختبار يدلل على وجودها ومن اوضح الامثله اللي هيه المتفوقين عقليا واللي عندهم اعاقه عقليه لو انا راح اطبق عليهم اختبار ذكاء لازم اختباري يقدر يميز بين المجموعتين لو اختباري ماميز بينهم راح يعتبر اختبار غير صادق.
ب-للتحقق من صدق التكوين نقيس التغير في الاداء.مثل اختبار القدره اللغويه لو طبقته ع طفل عمره سنتين بعد فتره راح يتغير اداؤه لانه الطفل بينمو بسرعه.
ج-الارتباطات:لاي درجه الاختبار مرتبط بمجموعه اخرى من الاختبارات اللي بتقيس نفس السمه اللي هوه بيقيسها
د-الاجابات الداخليه فالاختبارهل هي متسقه ببعضها ولالا.


4-صدق المحك:هو شي اقارن فيه (شيء واقعي على ارض الواقع )او شيء ملموس وانا اقدر اثق اني اقدر اقارن اختبار فيه.
فيه له نقطتين :
أ-الصدق التنبؤي:
انو انا لو طبقت اختبار وقلت مثلا يظهر انو انتي يظهر عندك استعداد حسابي وانا مرنت عندك القدره على الحساب وطورتها فيفترض لما ارجع اقيس الاحظ انو انتي فعلا تطورت عندك وصارت قدره وفعلا انو انتي التنبؤ اللي انا تنبأت فيه صحيح .
ب-الصدق التلازمي(اختبار آخر):
هو تلازم درجتي والدرجات اللي حصلوا عليها المفحوصين على اختباري مع درجاتهم باختبار اخر,, يعني مثلا
اختبار بينيه للاختبارات المعروف للذكاء فلما اجي ابغا اعمل اختبار جديد للذكاء ممكن اطبق على نفس المفحوصين اختبار بينيه واشوف لاي درجه انا اختباري مرتبط باختبار بينيه .
فاذا انا راح يكون محكي هو اختبار اخر معروف وراح يكون متزامن معه بفتره زمنيه يعني همه الاثنين راح اطبقهم مع بعض..

"العوامل اللي ممكن تؤثر على صدق الاختبار"
1-طول الاختبار يزيد من صدق الاختبار.
2-ثبات الاختبار يزيد من صدق الاختبار.
3-ثبات المحك يزيد من صدق الاختبار.
4-زياده الفروق الفرديه بين المفحوصين يزيد من صدق الاختبار.
5-نقاء الاختبار(يعني مثلا اختباري بيقيس سمه معينه لو اختباري فقط اشتمل على هذي الصفه اللي انا بقيسها وماتدخلت معه عوامل ثانيه) يزيد من صدق الاختبار.


 تم بحمد الله 
حاولت اكتب بالمللي اللي قالته الاستاذه سامحوني لو قصرت والله يوفقكم

[روزوود]

الله يعطيكي الف عافيه عزيزتي مشكووورة وتمنياتي لك بالa+وللجميع يارب والشكر موصول للأستاذة القديرة ايمان الطباااع الله يسعدها ويسهل امورها كما سهلت علينا الماادة

[بنت عسير]

وياك يا ام الحلوين

[إحسـاس هــادئ ..]

الله يعطيييييك العااافيـــة بنت عسييير ألف شكر لك ...
معليش سؤال أ/ إيمان ما قالت شي عن المصطلحات الانجليزية راح تجيب منها أو لا ؟؟

[بنت عسير]

والله حبيبتي زي ما انتي شايفه بالموضوع انه منقو ل انا ما حضرت لكن على ما اتذكر من كلام البنات ما فيه مصطلحات انجليزي بالتوفيق

[بنت مكه]

يعني هدا الكلام نكتبه كتابه ولا هوا موجود في الكتاب ؟؟

[بنت عسير]

هذا شرح الاستاذه ايمان بطريقتها وكتبته البنت بنفس اسلوب الدكتوره لكن خذي هذا الرابط في التحديد واضح
http://www.skaau.com/vb/showthread.php?t=378046

وبالتوفيق