ظاهرة عواقبها وخيمة

[caramella]

بسم الله الرحمن الرحيم

انا حدخل في الموضوع بدون مقدمات

حتكلم في ظاهرة مهمة بتحصل في المدارس وعواقبها اكيد خطيرة
الطلاب اللي بيتخرجوا من المدارس دي اكيد حيكون منهم الدكاترة والمهندسين و.... و......
والطلاب هما حيكونو واجهة المجتمع والمجتمع حيكون سيء اكيد ازا كانت دراستهم سيئه وهذا بيرجع لهيئة التدريس
السيئه

ياناس المدرسين دي الايام بيقبلو على نفسهم الرشوة وبيعلمو الطلاب الرشوة ازا وهما طلاب المدرسين يعلموهم الرشوة ازا كبرو اش حيسيرو اكيد حيكونو مرتشيين يعني المدرس بيطلب من الطلاب اشياء عشان ينجحهم في المادة الفلانيه دا الشي مو حرام فين الضمير
عواقب الرشوة ارواح ناس
الدكتور اللي بينجح بالرشوة بكرة حيعطي مريض ابرة غلط وبتروح روحه
المهندس اللي سار مهندس بالرشوة حيبني مبنى اساسو غلط وحيجي يوم وينهدم المبنى وحتروح ارواح ناس
الاستاز اللي سار استاز بالرشوة حيعلم الجيل الجديد غلط

ومع كدا كل جيل حيكون اسوء من الجيل اللي قبلو

ياناس دا الوضع احد راضي في

انا اخواني في مدارس سعوديه وحكوميه وباسمع حكايات والله من جد تحزن القلب

اعطيكم امثله وكلها واقعيه وبتسير قدام عيني ...........

الاستاذ يطلب من الطلاب اشياء لنفسه طلب كاميرا ديجيتال عشان ينجحهم في مادة مثلا
المدير ياناس مدير مدرسه طلب من الطلاب شاشة كمبيوتر ال جي المسطحه عشان يدفهم في المواد
الاستاذ واستاذ فقه فين الدين اللي يتكلم عليه فين ضميرو اللي المفروض اتعلمه من دراسته يطلب من الصف انهم يدفعولو الشهر دا قسط السيارة ويعطيهم اسئلة الاختبار
المشرف يطلب من الطالب جوال أي ميت عشان الطالب طلب منو ينقلو من الفصل اللي في لفصل تاني
الاستاذ يطلب من الطلاب انهم يعملولو سيراميك لفصلو عشان ينجحهم في المادة
المدير يطلب من ولي امر الطالب بمساعدة مالية عشان ينجح ولدو في المواد اللي راسب فيها
استاذ قرآن يطلب من الطلاب مكبرات صوت للمسجد عشان ينجحهم في القرآن بدون تسميع
استاذ يطلب من الطالب شماغ عشان يديلو في اختبار الشهري 15

وامثله كثير بس كفايه كدا
شايفين وصلو لفين يعني الاستاذ اكيد اقل شي راتبو بيكون 5 الاف ريال معقول مايقدر يشتري الاشياء دي لنفسوو

الظاهرة دي وزارة التربيه والتعليم تعرف عنها ولا لا
ابغا اعرف هما عارفين وراضيين ولا لا
واالله اللي بيصير دا حرام حرام

قال رسول الله صلى الله عليه وسلم (لعن الله الراشي والمرتشي )عارفه اني طولت عليكم بس ظاهرة عواقبها وخيمه عالمجتمع بعدين نقول المجتمع سيء ليش
من فضلكم ابغا ردوود ابغا حماس في الموضوع

[نضال]

5000 ريال في الزمن دا ما تقدم ولا تاخر


ما بين فواتير جوال و اقساط سيارات و فواتير كهربا و موية


و غير المقاضي ..

و غير طلبات الاولاد


خمسة الاف ريال يا دوب تعيش شخص واحد او اتنين بالكتير في زمنا دا


يا جماعه حال المدرس في بلدنا ما يسر

ابغى اذكر لكم قصة بسيطة تستنجوا منها الفرق بين مدرسيننا و المدرسين في اليابان

وزير ياباني كان برفقة رجل اعمال سعودي ...

راحوا لبيت رجل الاعمال , فاعتذر له عن عدم وجود الغدى لان زوجته المدرسة لساعها في المدرسة

وقتها وقف الوزير الياباني على رجوله !!

قال له زوجتك مدرسة ؟؟

قال السعودي بدهشة ايوة !

قال له المدرس في اليابان يتقاضى اعلى راتب في الدولة ..

و ماهو اي شخص يقدر يصير مدرس عندنا ..

لازم يكون سجله نضيف من اي مشاكل امنية او اخلاقية او ايا كان

و لازم تكون نسبته عاليه

جميع الشباب " و الكلام ما زال للياباني " يطمحوا ان يكونوا مدرسين في يوم من الايام

اضافة الى المعونات اللي يتلاقها المدرس طوال السنة من الارز و الدقيق و الثمار المجففة .. الخ

اضافة الى انه يتمتع بحق التنقل المجاني في محطات القطار اللي تعتبر وسيلة النقل الاساسية في اليابان!!

شوفوا حال المدرس عندهم كيف و حال المدرس عندنا كيف؟؟

عندنا

كلية المعلمين تقبل الطلاب اللي ما حصل لهم اي فرصة قبول لا في الجامعه ولا في القطاع العسكري

اصحاب النسب المتدنية .. و طبيعي دي العينة ما راح تكون من فئة الناس المهتمين بالعلم

اذا ما كانت عليهم ملاحظات اخلاقية .. بعضها ممكن يكون جنسي !!!

تخيلوا احنا ناخد من دي العينة , و نحطهم في مدارسنا حتى يدرسوا فلذات اكبادنا؟؟؟

المعلم هوا اساس العملية التربوية

المفروض يصير الاهتمام بالمعلم اكبر من الطالب او لا يقل عن الطالب على اقل تقدير

رواتب المعلمين المتندية هي اللي تعطي مجال لدا النوع من النماذج

متى ما تم رفع رواتب المعلمين

و توفير بدلات و مزايا تشجع اصحاب النسب المرتفعه على دخول حقل التعليم

راح نقدر ننتج جيل مميز

اما جيل المعلمين الحالي

يمكن تنصعقوا لو قلت لكم انهم يشاركوا طلابهم جلسات القهاوي .. و ما ستر كان اعظم

[caramella]

يالله لدي الدرجه الموضوع مو فارق معاكم مافي غير رد واحد وياليته يشفي

[نضال]

احم

ايش تقصدي يا ست كرميلا انتي؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟

[NooDy]

حال يجيب القرف.....

من رايي مافي اي سبب يعطي الحق للانسان انه يكون بلا مبادئ وقيم.. الواحد ايش يبقاله غير سمعته ,الفلوس تروح والدنيا تروح.. بس بكره لما يموت يقولوا فلان كان محترم وابن ناس ويخاف ربه..

حتى لو كان محتاج ده الاستاذ ماليه حق يعمل كده بعدين يقولوا شباب معفن ومدري ايه .

دناءة وسفالة ناس بلا مبادئ يعني الله يعزكم زي الحيوانات_ اسفه_ تقبل على نفسها اي شي. ايش الفرق بيننا وبين الحيوانات ازا مافكرنا قبل مانعمل الشي عقل عالفاضي..

عصبتيني وخلاص ياكراميلا.. بس دا مجتمعنا ايش حنعمل؟

من جد الواحد يخاف على اولاده الي لسه ماجوا ايش حيسير فيهم في الزمن الاغبر ده والجاي اسوأ..

[نضال]

يا جماعه انتوا كلكم بتتكلموا عن الموضوع من الناحية الاخلاقية

من الناحية الاخلاقية دا التصرف مدان ولا فيه اي تبرير للشخص اللي يقترف زي دا الذنب


لكن من ناحيتنا احنا كمجتمع ايش نقدر نتصرف حتى نوقف التصرفات دي ؟؟

خصوصا انها تحصل في مدارسنا ؟!


و من تفصيل الاخت كرميلا ... واضح انه الظاهرة ما عادت تشكل حالات فردية , انما صارت تصير بشكل جماعي

هنا اي عاقل راح يعرف انه فيه خلل !!

اي واحد مننا ممكن يرتكب الخطاء " لان اصابع يدنا ماهي سوا "

لكن كلنا نرتكب نفس الخطاء؟؟

هنا تنحط علامة استفهام كبيرة لازم نجاوب عليها الجواب الشافي الكافي

بدون رتوش او تحامل على الطرف الاخر , و في نفس الوقت بدون اهمال لنظرة الخطاء تجاه المذنبين !

====================

عمر السب او الشتم ما عمل شي ..

كل واحد يقدر يدخل الموضوع دا و يسب و يشتم

طيب و الحل؟؟

تبقى علامة الاستفهام زي ما هيا

و يبقى السؤال الكبير بدون اجابة

ايش اللي يخلي مجموعه كبيرة من الناس تتصرف بدا الاسلوب ؟


ايش اللي يخلي التعليم يصير وسيلة لكسب الرزق بدل ما يكون طموح يطمح الانسان الوصول له ؟؟


على فكرة ,,


فكروا مرة تسألوا اخوانكم و اخواتكم في البيت

ليش انت تروح المدرسة ؟؟

اذا واحد من اللي راح تسألوهم قال لكم " عشان اتعلم " تعالوا قابلوني هنا

حتى اطفالنا صاروا يروحوا المدارس لاسباب مادية ...

[ry1d]

لاااااا تعليق....................................
موضوع خطير ولا يناقش في منتدى................

لان الرشوووووووووه موسعه وفي كل مكااااان لابد منها......................

حتى العامل اللي يجيب العربيه اللي في وطني او بنده لازم ترشيه.........<<<<< وش رايكم في المثال....<<خطيير .


على العموم الواحد لا يحرق اعصابه لان الواضيع هذي كبييييره؟؟!؟!؟!؟!؟!؟!؟!؟!؟!؟!؟!؟!؟!؟!؟!؟

!
!
!
!
!
!ومعليش مع ان ردي ما منو فايده بس لا تزعلين علينا يا كارميلا.....ما باليد حيله <<<<<زي ما قالوا؟ّ؟ّ؟

[عــــامـــر]

لو اتطبق نظام الرشاوي صح في المملكه محد راح يفكر ياخد رشوه

انا ادرس قانون والترم هذا كنت بدرس عن الرشوه المملكه مششده في الموضوع دا وتعطي مكفأت كبيره للي يفضح عملية رشوه

ما اقدر اقول اكتر من كدا بس الرشوه مو افة المجتمع السعودي افة العالم كله