سنواتي الجامعية : السنة التحضيرية

[haneen k]

بسم الله الرحمن الرحيم

السلام عليكم و رحمة الله و بركاته ,,,

الحمد لله الذي لولاه ما جرى قلم, ولا تكلم لسان ,,,

والصلاة والسلام على سيدنا محمد ( صل الله عليه وسلم ) كان أفصح الناس لسانا وأوضحهم بيانا ,,,

في بداية الموضوع راح اتكلم عن حياتي شوية , الي هيا حياتي الدراسية كنت من الناس الي ماتعترف بالدراسة , و لا تحب الدراسة مع اني شاطرة و ادا حطيت المادة في رأسي بعد إرادة الله أنجح فيها

اخر سنة ليا في الثانوي جلست في البيت و سبت الدراسة في الترم الثاني < و عشان اسباب مالها اي معنى بس الحمدلله على كل حال و كل تأخيرة فيها خيرة .

السنة الي بعدها شجعتني احدى صديقتي الله يسعدها و ييسر امورها اني اكمل الثانوي , و الحمدلله كملت الثانوي على خير

و رجعت حليمة لعادتها القديمة و قعدت في البيت من غير اي سبب بس الحمدلله على كل حال


احكيلكم دحين عن بدايتي في الجامعة و السنة التحضيرية :

اتسجلت في الجامعة و برضوا دخلت غصبا عني < ناس تدور العلم دوارة و أحنا متوفر لنا و بكل الطرق و مو عاجبنا :)

اول ترم في السنة التحضيرية كانت خطتي أ , أنبسط كتير قولت الحمدلله اتعب الترم دا و الترم التاني أريح

طبعا يا حوست حوسة في دي السنة , و الشكر الاول لموقع سكاو من بعد الله , استفدت من موقعهم طول السنة التحضيرية و الى الان

كان الموقع مرشدي الاول , وبعد كدا الجروب الي عملناه على الواتس اب , و الصديقات الي اتشرفت بمعرفتهم من السنترا

مذاكرتي في الترم الاول طبعا لعبة لعب مو طبيعي , ما كنت اذاكر الا الرياضيات و الانجليزي , باقي المواد بس اسمع محاضرتها و خلاص :)

تعالوا اقولكم كيف كنت اذاكر :

الرياضيات

اسمع المحاضرات المسجلة , لانو دكتورتي كان شرحها سريع بسبب ضيق الوقت :)

و اتمرن على كتاب سؤال و جواب , كتاب تابع لجامعة الملك عبدالعزيز < انا عن نفسي عجبني كتير

بس الحمدلله اخدت f < طبعا عارفين التحطيم لمن تكونوا مذاكرين و واثقين و في الاخير f الحمدلله

نجي للانجليزي قبلها كنت احضر دورات على مواقع النت المجانية و قعدت فترة عليها و الحمدلله انجليزي مشي حالك

و ذاكرت الانجليزي من قلبي و الحمدلله خلصت الكتاب الاخضر و قلت بنام و امسك الاحمر

بس وقت نومتي جاتني حالة صرع و رحت على المستشفى وصلت هناك اعطوني ابر و الحمدلله صرت احسن بس شايلة هم الكتاب الي ما ذاكرتوا و راح الاختبار عليا و الحمدلله على كل حال dn

و بنسبة لثقافة و العربي و الحاسب ما ذاكرت شئ < السبب الوحيد انها صعبة و مني قادرة احفظها :)

مدري كيف نجحت فيها بدرجات لا بأس بها الثقافة 78 - الحاسب 66 - العربي 68 المعدل كان 2 حاف

نصايحي لكم :

1- ابدو ذاكروا من قبل ما تبدأ المحاضرات ماعندكم عذر فيه المحاضرات المسجلة و كل الي يشرحوا فيها شرحهم يجنن

2- لمن توقفوا عند نقطة ما تفهموها لا تصرخوا وتعصبوا سمو بالله و حاولوا تفهموها ما فهمتوها جيبوا استاذ و لا كلموا المحاضر الي يدرسكم

3- لا تعتمدوا على نظام عد لعشرة في الاختبارات ترى مو كل مرة تسلم الجرة < يعني لا تسمعوا كلام الي يقولوا لكم ترى الموضوع دا مرة يزبط

5- مهما كنتم تكرهوا المادة و لا ماتقدروا تذاكروها حاولوا تعملوا اي شئ اهم شئ تروحوا الاختبار وانتو بس لو عندكم معلومات بسيطة

6- طبعا اكثر المنتسبين عندهم اوقات فراغ كثيرة حاولوا تاخذوا دورات انجليزي او اي دورات تنفعكم مع تخصصكم


موقف ظريف وقت الاختبارات :

قولتلكم عن صديقاتي الي في السنترا , طبعا في وحدة منهم اكثر وحدة قريبة ليا و قت الاختبار مع بعض وحتى وقت المذاكرة , دخلنا اختبار الثقافة و كانت جنبي

المهم قالوا لنا الي تبغى تخرج تخرج , ما شاء الله عليها اول وحدة رفعت يدها , سلمت ورقتها و كل شئ , وشالت الشنطة و اغراضها وشوية ما اسمع الا وحدة تتهزأ

صراحة استغربت حسبت المراقبة تدور مشاكل , و انا طالعة كلمتها , بسالها فينها و رسلتلي صورتي و انا متحمسة مع ورقة الاختبار قولتلها حلال الي عملتوا فيكي المراقبة


و الحمدلله خلصنا من الترم الأول

راح اكمل في رد رجاء وليس امرا لا احد يرد الا بعد الرد

مشكورين

[haneen k]

الترم الثاني : بدايتي

عمري ما راح انسى هذا الترم كان احلى ترم في حياتي , اتغيرت تغير كامل بذات لمن كانوا الكل يحطموني ويقولولي انتي فاشلة و ماكنتي مهتمة < من حقهم لاني فعلا لعبت ما جابوا شئ من راسهم

بس الحمدلله اني عقلت , و عرفت الصح من الغلط , ومو عيب انك تغلط العيب انك تكمل في الغلط

بدأت المحاضرات , وكل دكتورتاتي و استاذتي , يسعدهم ربي شرحهم يخلي الواحد يعشق الجامعة

ايش كنت اسوي في المحاضرات :

1- كنت اتفاعل مع الدكتورة او الاستاذة الي تدرسنا و ادا سالت و عندي جواب اجاوب < صدقوني لمن تتفاعلوا المعلومة ماراح تنسوها بأذن الله

2- مافهمت شئ من الجزء الشرح بعد ماتخلص الجزية اطلب منها تعدلي الي مافهمتو

3- كنت امسك الكتاب و الورقة وادا فيه شئ مهم او قالت ركزو عليه عالطول احط عندو نجمة و اكتب مهم

بعد ماتخلص كل المحاضرات :

ملاحظة : ادا ماكنتوا تقدروا تكملوا و تعبتوا وقت المحاضرة المحاضرة بتتسجل ناموا و ارتاحوا و اليوم الثاني يصير خير

قال تعالى في كتابه الكريم : (لَا يُكَلِّفُ اللَّهُ نَفْسًا إِلَّا وُسْعَهَا) سورة البقرة اية : 298

نكمل :

1- بعد ما تخلص المحاضرات امسك الكتب و اذاكر و اركز على الاشياء المهمة < بس مو تركزوا على الاشياء المهمة و تنسوا الباقي

2- اكثر شئ فادني بعد المذاكرة التمرين اكتب اسالة و لا ادور اسالة من النت و احلها و اصحح لنفسي و الاخطاء اراجعها مرة و مرتين و تلاتة


طريقتي في مذاكرة المواد قبل الاختبار:

نبدأ بالاحصاء :

1- احلى مادة بنسبة ليا عشقتها عشق مو طبيعي ركزت اول شئ على التعريفات اكتر شئ لانو هيا الي فيها المفيد

2- كنت اراجع الباب اخلص منو عالطول اتمرن عليه الين ما خلصت المادة < بس مو معناتو راجعتوها تقولوا مو مذاكرين لا ذاكروا الين قبل وقت المحاضرة

3- اخر باب مافهمتوا كلو لو صرلك موقف كدا وفي نفس يوم الاختبار خلي صحبتك او صاحبك يفهمك هوا لو باقي لك 5 دقايق استغلها

الاحصاء صعب زي الرياضيات و كلو معادلات و انا مرة ما افهم

الاحصاء اسهل من الرياضيات بمراحل :

1- اهم شئ تفهموا التعاريف وتعرفوا الرموز و تعرفوا كيف تطلعوا النواتج < تفهم التعريف راح تعرف تحل المعادلة بس

2- وقت الاختبار راح تجيكم ورقة فيها كل المعادلات و عليكم تطبقوا وتحلوا بس لو مافمهتوا التعريف صدقوني انسوا انكم تحلو المعادلات

مادة الانجليزي:

اكيد بتقولوا ضامنة نفسك لانك مذاكرتوا لا حبايبي ذاكرتوا و اهتميت فيه زي باقي المواد

في الرابط دا كاتبة طريقتي في مذاكرة مادة الانجليزي و مانزلتها في المنتدى الا عشان الكل يستفيد زي ما استفدت اتفضلوا :

http://www.skaau.com/vb/showthread.php?t=761455

مهارات الاتصال :

المادة دي اشوف كثير يتساهلوا فيها و يقولوا مايبغالها مذاكرة , و الله ي انها طلعت عيني في المذاكرة

كيف ذاكرتها :

1- جلست احفظ و افهم و اشرح لنفسي و اسوي اني اشرح و الحمدلله على كل حال المخ صلب

2- طبعت ملخص من النت وحدة من الطالبات مسويتو بس نسيت اسمها الملخص يجنن بس المخ برضو مصلب < الحمدلله على كل حال

3- بس المادة ممتعة و حلوة وتستفيدو منها اشياء كثيرة , بذات ادا كانت الدكتورة تجنن زي دكتورتي الله يذكرها بالخير

مادة التعلم و التفكير :

1- جلست احفظ و افهم و اشرح لنفسي و اسوي اني اشرح و الحمدلله على كل حال المخ صلب

2- طبعت ملخص من النت وحدة من الطالبات مسويتو بس نسيت اسمها الملخص يجنن بس المخ برضو مصلب < الحمدلله على كل حال

دليل جنائي قوي :

http://www.skaau.com/vb/showthread.php?t=761702

و الحمدلله انتهى الترم الثاني و الاختبارات على خير و كنت قاعدة على قلبي و استنى النتايج على احر من الجمر و كانت النتيجة

مادة الاحصاء 98 - مادة مهارات التفكير 90 - مادة الانجليزي 86 - مهارات الاتصال 80 المعدل 4,56

المعدل ارتفع الحمدلله و احسن من 2 بس التراكمي كان 3,18 بسبب معدلي في المستوى الاول و لكن الحمدلله رضى

نصيحة :

1- لمن تكونوا مذاكرين و واثقين من نفسكم , لا تخلوا التوتر و الخوف و البكاء , يأثر عليكم و مايخليكم تعرفوا تحلوا في الاختبار


موقف ظريف وقت الاختبار :

كان اول يوم عندي اختبار انجليزي , وقتها من الخوف مانمت عشان خوفت يصير فيا زي الترم الاول < استغفر الله و اتوب اليه

روحت الجامعة و انا مبسوطة و متحمسة للاختبار , سألت وحدة من الي يشتغلوا هناك , قالتلي الاختبار في داك المبنى :)

انا اروح الجامعة قبل الاختبار بساعة عشان الزحمة و عشان اذاكر , و جلست في المبنى و اخدت قهوة من المكينة و الاخت واثقة مرة

و جاء الاختبار و دخلت و قعدت و الدكتورة جالسة تسال البنات عن اسامي الدكاترة الي يدرسوا الطالبات و عن البطايق و سالتني عن اسم دكتورتي < الحمدلله اني احفظ اساميهم

قالتلي انتي انتساب يا حبيبتي دي القاعة لطالبات التعليم عن بعد < طبعا مو فشلة القاعة كلها كدا و انا وجهي كدا




و الحمدلله انتهى الترم الثاني على خير و يارب كلنا تكون الاترام علينا حلوة زي دا الترم

اتمنى اكون افدتكم في الموضوع

تمنياتي للجميع بالتوفيق

[ماجد قرشي]

ماشاء الله تبارك الله

قصة فيها من الكفاح والجهد والمثابرة بعد توفيق الله سبحانه الشئ الكثير

[جآمعيهه]

اللله وماششا الله عليكككك
حلووو الواحدد يتعلمم ويككمل حياته الدراسسيه وهي صصح متعبه لكن بتطلع اشياء حلوه فيهااا
انا هالسسنه انتساب اول ترمممم لي وخايييفه مرررره
ابي ادرسس واشد على حيلي مرره ابي اجيب معدل فوق 4 عشششان انتظممم
كان حلمي اكمل دراستي الجامعيه منتظمه واتخصص اللي ابيه وكنت علمي
بسس الحظ ماششش ودخلت انتساب ومصصصره اكمل والله يوفقني
وبسوي اللي علي والباقي على الله
وان شششاء الله اسستفيد من هالمنتدى ومن الاخوات والاخوان الموجدين فيهاا
عسسساكم على القوه ودعواتكم لي بالتوفيق

[haneen k]

المشاركة الأصلية كتبت بواسطة ماجد قرشي ماشاء الله تبارك الله قصة فيها من الكفاح والجهد والمثابرة بعد توفيق الله سبحانه الشئ الكثير

شاكرة مرورك اخويا ماجد

[haneen k]

المشاركة الأصلية كتبت بواسطة جآمعيهه اللله وماششا الله عليكككك حلووو الواحدد يتعلمم ويككمل حياته الدراسسيه وهي صصح متعبه لكن بتطلع اشياء حلوه فيهااا انا هالسسنه انتساب اول ترمممم لي وخايييفه مرررره ابي ادرسس واشد على حيلي مرره ابي اجيب معدل فوق 4 عشششان انتظممم كان حلمي اكمل دراستي الجامعيه منتظمه واتخصص اللي ابيه وكنت علمي بسس الحظ ماششش ودخلت انتساب ومصصصره اكمل والله يوفقني وبسوي اللي علي والباقي على الله وان شششاء الله اسستفيد من هالمنتدى ومن الاخوات والاخوان الموجدين فيهاا عسسساكم على القوه ودعواتكم لي بالتوفيق

اهلين اختي شكرا على ردك

لا تخافي لانو ما يضيع الواحد الا الخوف

باذن الله راح تقدري تجيبه , بس اهم شئ تشدي حيلك , لازم الواحد يتعب شوية و على قولتك في الاخير بيطلع اشياء حلوة

و ان شاء الله ربي يحقق الي في بالك و يسعدك في دراستك

و بنسبة للمنتدى كلهم ماراح يقصروا معاكي , وكلهم ان شاء الله راح يكونوا معاكي و قولي حنو قالتها

و الله يوفقك و يسرلك امرك و يحقق الي في بالك

[جآمعيهه]

امين حبيبتي .. وياكك يارب
الله يسعدكم جميعا

[اسيرالبحر]

وعليكم السلام ورحمة الله وبركاته

موضوع جدا يستحق التأمل

والجميل في الأمر ان على كثر ما حصل لك من مواقف ممكن توقف أي شخص ضعيف الا انك واصلتي وثابرتي

انتي مثال لأي طالب مجتهد ويحب يثابر ولا يقف امام العقبات

أسأل الله لك التوفيق والسداد في الدنيا والآخره

وحفظكم من كل شر

[haneen k]

المشاركة الأصلية كتبت بواسطة اسيرالبحر وعليكم السلام ورحمة الله وبركاته موضوع جدا يستحق التأمل والجميل في الأمر ان على كثر ما حصل لك من مواقف ممكن توقف أي شخص ضعيف الا انك واصلتي وثابرتي انتي مثال لأي طالب مجتهد ويحب يثابر ولا يقف امام العقبات أسأل الله لك التوفيق والسداد في الدنيا والآخره وحفظكم من كل شر

امين يارب و ياك اخويا اسير