وضع مزري .. " فضفضه "

[وفاء]

طيب أنا أحياناً أحتاج أرسل السواق يرد لي قطعة للمحل و ما يدخل السوق عشان ( مو عوائل ) !!

لا و الله بجد ..

كلنا متفقين ( شباب و بنات ) على أن الجنسين مو ملائكة

بس الشائع من زمان الزمان إن الشباب منهم الخراب و الطبيعي ( كونياً ) إنهم هم اللي يعاكسوا و يرموا كلام أو نظرات ( وأحياناً يرموا ورق )

بس في السنتين الأخيرة البنات غاروا و قالوا ليه إحنا كمان ما لنا حق نعجب الشباب و نعاكس ؟!
و بدأت فنون البنات بمنطق ( يتمنعن وهن راغبات)
يعني مستحيل مستحيل الوحدة تكون مطقمة لون الشنطة مع الجزمة ( الله يكرمكم ) مع لون الكريستال اللي تارس عبايتها كأنها نجفة و كل هذا تبارك الرحمن متناسق مع لون المكياج و بعدين ما تبغى قبيلة شباب تعاكسها ، هذا بغض النظر عن العباية اللي ما تحتاج حزام عشان تمسك على خصرها !!

و الله قبل يومين شفت منظر فتاااااااااك .. بنت طالعة من سيارة لكزس محترمة ( السيارة طبعاً مو البنت ) و العباية مللليانة كريستال و العباية حرام فيها كلمة ( مخصرة ) لأنه الظاهر مفصلينها على مقاس أختها الصغيرة ، و الشعر قصير آخر موديل و فوووووووووووووشي .. و الله صابغة شعرها فوشي و تسريحة كأنها طالعة من صالون مع full makeup
دخلت السوق و الكل يطالع فيها حتى حراس الأمن و هي ماشية تترقص مختالة بنفسها ، المفروض حراس الأمن اللي طارت عيونهم عليها يمنعوها لأنها من جد من جد فتنة للي في السوق ، بس زي ما قلنا القانون الكوني و الأزلي إن الشباب هم مصدر الخراب .
بس كمان يا نضال الصراحة الشباب مصخوها ، يعني مثلاً سوق البساتين و الله الشباب فيه أكثر من البنات و باااااااين إنهم جايين يلقطوا رزقهم.
و سوق حراء أقرف أمشي فيه من كثر الشباب اللي برضو جايين بحجة يتسوقوا و هم ماشين ( شلل ) و بدل ما يمشوا على جنب يمشوا في نص السوق !
أيام الرسول صلى الله عليه و سلم كان الرجال و الحريم يمشوا في سوق واحد بس الحريم كانوا يلزموا جانب الطريق عشان لا يمشوا جنب الرجال ، الآن و الله و الله أنا حاولت أطبق الشي هذا مرة في سوق حراء كل شوية يطلع لي شباب ما أدري من فين لما اتنرفزت و قرفت و كرهت السوق كله.
أنا مثلاً أكره إني لما أمشي إنه شاب يخبط فيا لو بالغلط ، الآن الشباب من كثر ما يشوفوا بنات و يسافروا و عاااادي في الدول الثانية إنهم يدقوا في أكتاف بعض في الزحمة صاروا لما يجوا هنا يحسبوا نفسهم برا و كل شي المفروض يكون عاااااادي و إيييييزي .
و بعدين بالله عليك قول لي فين العوائل تتمشى عشان أروح أتمشى زيهم ؟ ما في إلا أسواق و مطاعم و فرش على البحر ، الأسواق متروسة شباب ( معقول كل هذول جايين مع عوائلهم ؟ ) و المطاعم و المقاهي و محلات البلياردو من أقل مستوى لأرقى مستوى فيها قسم مخصص للشباب ، و على البحر ياما شفت جلسات كلها شباب و فيه الدبابات و جلسات الشوي و ما إلى ذلك . فيه شي غير كذا ؟ ما في إلا الملاهي و هذي - لا تزعل مني - ما أظنك تبغى تدخلها
ياسيدي كلها يومين و الجامعة تبدأ و ما راح تلاقي وقت تتمشى

قال فضفضة وأنا ما صدقت <<---------

تحيتي ..