مدونة "شخص مختلف" ~

[the change]

في الليل كنت أخرج مع أبويا دايمن

أيام سيارتنا الكابرس الكحلية

وكان دااايمن يغنيلي مقطع معين ما أنساه أبدا


(( يـاقمر يــاقمر يــاقمر صبرك شويا ياقمر ياقمر

ايش حصل بيني وبينك حتى عن عيني تغيب , حتى عن عيني تغيب ))



أعشششقها من كل قلبي

والشيء الغريب إني ماقد فكرت أسأل أبويا عنها هل هي من تأليفه ولا غنية

إلا العام الماضي تقريبا

سألته فقلي لا يابنتي هذه أغنية لطلال مداح أيام زمان

وفرحت بالمره , قلتلهم والله حبيت طلال مداح مع اني اعرفه



الله يرحمه ويغفرله وينور في قبره يارب ويونس وحشته يااارب

الرجال هذا ما أذكره إلا وأدعيله

كفاية الفن الاصيل اللي قدمه , وذكرياتي مع الغنية هذه لاتنسى


الويكند هذا قلت خليني اكتب في قوقل عن الاغنية وخليني اشوف يمكن تطلعلي - مع اني ماكنت متوقعه أبدا لانها قديمة يعني ومن زمان

فكتبت "ياقمر صبرك شويا" , فجاتني غنية له عن " يازمن صبرك شويا" , فيأست بالمرره قلت مدام كذا أجل شكل الغنية ماهي محفوظة

وخرجت ورجعت دخلت مرة ثانية وكتبت ياقمر طلال مداح

وجاتني أغنية اسمها ياقمر

غنية المقدمة ماكانت توحي بالكلمات اللي اعرفها فقلت برضو شكلها مو نفس الاغنية لكن خلينيي اتأكد

وكانت بدايتها : يـاقمر تسلملي عينك , يــاقمر يــاقمر >> أول ماسمعت الشيء هذا فز قلبي والله , ودمعت عيني وحسيت بشعووور غريب لايمكن أوصفه !!!

وطلعت نفس الاغنية وسمعتها ولاول مرة


ماقدرت أصبر استنيت ابويا كثير لين مارجع وسمعته هيا وطلع ناسيها أصلا , قلي ايش هذه يابنتي قلتلو اصبر شويا اسمع وحتعرف

واول ماوصل عند يــاقمر يــاقمر طل فيا وضحك << عرفها

قلتلو والله 3 ساعات استناك ترجع بس عشان اسمعك هيا , وقلتلوا ترا دمعت عيني وتذكرت ايام زمان

وابويا مايحب المواقف هذه قلي خلاص خلاص


الحمد لله ما اتعمد أسمع أغاني أبدا , لكن إلا هذه الغنية غييييير

والله يرحم طلال مداح ويوسع مدخله ويغفر له ذنوبه يارب

ويخليلي أبويا ويحفظه