عيب .. استحي .. والله احرآآآآآآآآج ...!

[سملّق :)]

يا عالم انبسطوا انبسطوا .. بلاشي حب وكره واحترام < خلك فري زيي

من جد يعني تخيل أروح لـ ابوي اقول له : يبـه ،.......... ( فيس مستحي ) أحبك :$

قسم أتخيله الحين وميت ضحك

بيقول : يالبيييييه ياعمري انت ، تعال تعال أحظني :$ ههههههههههههههههه

،،

معليش بس انا تربيت تربية جاااافـة جداً ، ولا فيها الا ( سمعاً وطاعة )
......


العلاقة مع الوالد ( رسمية )

يدق الجوال : فجأة تحصلني وااقف .. سم طال عمرك

ابشر


مايصير الا اللي تقول


ابشر طال عمرك



خلاص طال عمرك



يصير خير



ان شاء الله



مع السلامة


طننننننننننننننننننننننننننننننننننن < قفل الخط


< يلعن ام الجحده حتى ..مع السلامة.. ماقالها

،،،

واكثر الشعب زي كذا ... < مره رومنسيين
.......


ولو نتكلم من ناحيــــــة ( مثاليـّة ) يعني شخص مثالي

اقول انه صعب الواحد يقول هالكلمات .. ماهي سهله الشغلة < يبي لها دراسة معمــقة وتفكير صويب

خاصة في بيئة مجتمع زي اللي نعيش فيها !!

،،،


بالنسبة لي ( شخص واقعي ، جاف المشاعر )

خير صديق في الزمان كتاب .. وخير من تحب هو ربك و المسجد والقرآن والنبي محمد صلى الله عليه وسلم


الوالد = نوع من الاحترام المتبادل .. علاقة رسمية بحتــه .. ولا افتح معه اي موضوع
سوى مواضيع ( العمل )

الوالدة : الله يحفضها لي ، وهي تعرف مشاعري نحوها من خلال تعاملي معها ..

أخواني = طلعات وناسـة فلـة ( فزعات لبعض ) مشاكل نحلها مع بعض ومشاكل تواجهنا وتحديات

< حشا انا واخواني صرنا ( الابطال الخارقون )

ممكن بعض الاحيان تعترض لنا مشاكل ( تحسسنا بقيمة الاخ ) ونتغلب فيها مع بعض
ونجلس بعدها فترة مع بعض زي الاصدقاء

ولكن مايمديها الا وكلن راح في حال سبيلــه ..

الخلاصة : علاقتي مع اخواني علاقات مصلحة فقط ، عند المصالح (( لي او لهم )) نتقابل

غيرها ( ماحد يدري عن الثاني ) ههههههههههههههه

،،،،

في اجازة مابين الترمين سويت حادث الييييييم في شارع حايل .. وصدمت في نخلة وعمود الانارة

وانقلبت السيارت حوالي اربع قلبات .. وكان وقتها ( اخواني كلهم في الطايف )

وكان بيننا مشاكل كثيرة ..

فجأة أنتبهت في لمح البصر الا وانا جوة السيارة والسيارة مقلوبة ( وكان لي حوالي ربع ساعة أغماء )

والناس من حول السيارة متجمعين !!

قلت لنفسي : يالله انا كنت قبل شوي ماشي في الشارع وش جابني هنا !!

انتبهت للموقف .. واحد يحاول كسر زجاج السسيارة الخلفي ( اناا في المرتب الخلفية )

يقول لي : انت حي ؟؟ << قلت لا ، طال عمرك : ميت بس قمت استهبل !!

طلعوني من السيارة وحسيت زي النوووم جاني وانا على الرصيف ... استسلمت للغيبوبة

قمت في المستشفى .. طالع في الدكتور ( لحد الان مادري وش الموقف ) !!

العالم متجمعين علي .. وش السالفة ؟؟

كان آخر وأحلى شيء شفته : أخواني كلهم جنبي .. دق عليهم المرور وقت الحادث

ونزلوا من ساعتهم .. على جدة وقضوا الليل بجنبي ف المستشفى ..
،،

صراحة ما أخفيكم والله على ما اقول شهيد : اني كنت متوقع أني راح اموت ( من الاوجاع )

الام شدييييييدة ،، خاصة بعد مادخلت المستشفى وراح تأثير الادرينالين عني
ولا أقدر اتنفس و ولا اقدر اوقف ..

تكسرت من حوالي 3 اماكن ... بس كنت مرتاح نفسيا وقسم

مرتاح اني حتى لو متت ماراح اموت لحالي ،، على الاقل اخواني كانوا بجنبي ..

هذا موقف ما انساه ..

..

وشكرا لكم على حسن اصغائكم < شكلي بنجلد أحس طووولت