معا لنحارب المرض وليس المصابين بالمرض

[Dr.Passed]

السلام عليكم ورحمه الله وبركاته ورضوانه

اليوم جيتكم بموضوع جدا مهم وضروري انو المجتمع كلنا صغيرنا وكبيرنا يكون مثقف ويعرف

موضوعنا حنتكلم عن مرض الإيدز

يوم الثلثاء الماضي حضرت محاضره في البترجي للدكتور نزار باهبري

...وفي المحاضره اتفقنا انو الي اتعلمنا كل شخص فينا يوصلو لي 5 أشخاص فقط ع الاقل عشان يسير الكل واعي وفاهم انو احنا متصورين وماخدين المرض بصوره غلط !!!

مريض الايدز مو معناتو اوووه دا الانسان صاحب المرض مايستحي لا سوا مصيبه احسن خلو يمرض


في ناس مولوده بي دا المرض
في ناس تنظلم من ازواجها ويصابو بالمرض
لكن للأسف كتير ياخدو مرض الايدز انو صاحبو لازم نعزلو ونقاطعو ونسيبو لأنو فكرتنا عن المرض غلط !

طبعا مرض الايدز زي ما اتعلمنا في المحاضره لهو علاج
..معد سار زي اول
مريض الايدز ممكن يتعالج وممكن يتجوز وممكن يخلف عيال سليمه...نسبه انتقال المرض لجوزته 2%

الحامل ازا اخدت العلاج ابنها يتولد سليم

يقلك مريض الايدز تكون نفسيته تعبانه يقلك انو يخاف الناس تعرف عن مرضو عشان ما تتجنبو وتسير تخاف منو ..تجيهم حالات نفسيه بيتعبو وبيموتو مقهورين !!

مرض الايدز ما يعدي الا بالحرام
وازا كان في جرح فريش سار في ( contact) ممكن ينتقل المرض

لكن...

غير كده مستحيييييييل ينتقل المرض
ازا قعدت جنبو مايجيك شي ازا كح في وشك مايجيك شي
ازا نمت جمب مصاب مايجيك شي
ازا مسحت بالمنشفه حقتو مايجيك شي
ازا حضنتو وقعد يسلم عليك لبكره برضو مايجيك شي

ليش نحارب المصابين !!! ليه مانحارب المرض ونقول للناس ونوعيهم ونقلهم انو المرض معد سار زي اول...المرض له علاج


والمصاب مايستاهل المعامله الي تجيلو من أهلو واصحابو وهوا بريئ

الدكتور كان بيحاكينا انو واحد من المرضى كان يقولهم أنا نفسي اشوف اهلي! اتصلولي على اهلي!! ولمن كلمهم رفضو تماماً يجو يشوفو...!! متصورين!!! حتى الممرضات من قله وعيهم محد يبا يقرب !!

مايسير كده!! دولا ناس تحس زينا زيهم!! ماغلطو!! مهم مجرمين!!

طبعا الدكتور بيقول انو الفحص للإيدز يتعمل 3 اسابيع بعد الشك

حبيت انشر الوعي والكلام الي سمعتو في المحاضره وزي ماقال الدكتور كل واحد فينا يحاول يوصل الرساله اقل حاجه خمسه أشخاص


كان في فيديوهات حابتكم تشوفوها بس ما اعرف انزل هنا يوتيوب وكده ياريت احد يفيدني

وكمان ياريت ازا نقصت شي من رساله الدكتور وفي اي احد فيكم حضر وحابب يفيد العالم ياريت تتفضلو =)


وجزاكم الله خير

[الــدولار]

اهلا دكتوره

الله يسعدك على نقل الرساله

وهي بالفعل معلومات يغفل عنها الكثيرين بل ان اغلب الناس ما تعرفها للاسف

وهذا بسبب عدم التثقيف الصحي سواء من المدرسه وكمان المراكز الصحيه اللي بنزورها وبرضوا وسائل الاعلام الغافله .

ولابد نتفاعل مع اي شيء يزيدنا معرفه ونكون على قدر من الوعي .

اخيرا شكرا لك اختي الكريمه على نشر الرساله وعدم كتمانك لها وهذا الشيء اللي نبيه يصير سواء على مستوى الافراد ام على مستوى الشاشه المضيئه .

اخوكـ
الــدولار

[Dr.Passed]

صحيح وياريت كلنا نحاول ننشر ونوعي العالم في دا الموضوع
وجزاك الله خير اخي

[Eng.SouL]

ودي أقول عنوان مخالف بس للأسف العنوان سليم 100%

جزاتس الله خير ..
خلاص إن شاء الله من اليوم ورايح أباخذ سكينه من المطبخ وأروح أحارب المرض

اعتبري المعلومة وصلت لواحد من الخمسة d:

بالتوفيق ~