فلانــــة محجوزة لفــــلان !!! موضوع يستحق النقاش

[آمال وطموح]

أول شي حابة أقول رأيي في موضوع الحجز هذا يدل على عدم احترام للفتاة في العائلة هي في النهاية بني آدم لها رأي وكلمة وقرار تتخذه وهذي حياتها هي اللي تختار شريك حياتها مو تنحجز له راحت شنطة مسكينه ولا شي من باقي المتاع وهذا التصرف ما يذكرني إلا بالجاهلية اللي ما كان عندهم احترام للنساء ولا تقدير ولو الأب والأم في ذيك العائلة يحبون بنتهم ويحترمونها ما يسمحون لمثل هالكلمة تتردد على الألسن فلانة محجوزة لفلان مع احترامي"تخلف"

من المذنب .في هذا كله. الشاب , الشابه , الأهل , العادات والتقاليد ؟؟

زمان يمكن كانوا يسوون مثل هالحركة من باب حفظ أبناؤهم + تكثير نسل القبيلة الواحدة دون عروق خارجية
بس الحين مجرد عادات وتقاليد بلا هدف ولا غاية او معنى ..!
ونظام القبايل فات ومات من زمان الزمانات لإن الناس ماعاد يحتاجوه إللي ينظلم ما يحتاج القبيلة كلها تفزع له فيه محاكم يقدر يتوجه لها ..

ومين اللي يحدد ويقرر ان فلان لفلانة وفلانة لفلان .. الاهل ام الشاب ام النسب ؟؟

العقليات المتحجرة واحيان المجاملات عشان ما يخسر أخوه يوافق ان بنته تكون الضحية !

اذا تقدم لكي ايتها الفتاة شاب للآن يدرس وقالوا لك أهلك انه يبي يحجزك وش بيكون موقفك ؟

بضحك وأناظر لهم بنص عين أقول إذا تحولت شنطة ولا كنبة ولا أي جماد ماله لا راي ولا كلمة سووها !
بعدين فيه شي اسمه قسمة ونصيب إذا أنا نصيب هالشاب ماراح ينكتب لي نصيب إلا معه سواء حجز ولا ما حجز ..

وهل هذا الشي موجود في عائلتكم ؟؟ وماموقفكم منه ؟؟

يمكن أقاربنا من بعيد لكن عندنا ..لا ابدا ماهو موجود ولا راح ينوجد ان شاء الله

موقفنا منه يمكن يتوضح من رأي في الموضوع ككل فوق ..

مشكورة غلاي على الموضوع :)