أكون ... لا أكون < بينهما فضــــاء واســــع [ دعوة للنقاش الجادّ]

[LeLou]

أوكي أنا دحين فهمت قصدك..
يعني قصدك الناس إللي ما عندها حل وسط يا تطخه يا تكسر مخه..

أبغى أقول لك شي و هذا الرأي بحكم تجاربي الشخصية و معرفتي بالناس و ما أعمم..

هذي المسألة مسألة قناعات و إنت صعب إنك تغيري قناعة أحد إلا إذا هو كان غير مقتنع بيها تماما..
الواحد يقول و ينصح أما مسألة التغير و الهداية هذا شي ما يقدر عليه غير ربنا..
ربنا قال للرسول صلى الله عليه و سلم: "فلعلك باخع نفسك على آثارهم إن لم يؤمنوا بهذا الحديث أسفًا"
و كمان قال: "فذكر إنما أنت مذكر * لست عليهم بمسيطر"
و أيضًا: "إنك لا تهدي من أحببت و لكن الله يهدي من يشاء"

فلا تذهبي نفسك عليهم حسرات،، إنت انصحي و سوي إللي عليك و ادعي لهم بالهداية غير كدا ما تقدري..

بالنسبة لزي قصة البنت إللي ما تصلي،، الناس إللي زي كذا ترى لما ينهدوا يتمسكوا بالشي بقوة..
أنا بعطيك مثال حي صار معايا لما كنت صغيرة و مراهقة..
أنا مثلا قدامك عارفة زيي زي أي أحد غيري أنه الحجاب واجب..
و معترفة بذا الشي و ما أنكره..
لكن رغم كذا كنت لا أغطي لا على عيال عمي و لا عيال خوالي و خالاتي و كنت في الشارع بس أحط طرحة و أكشف وجهي..
صح من غير سفور و لا ميك أب حتى قرايبي كنت ألبس قدامهم لبس محتشم..
و كانوا على قد ما الناس يكلموني كنت أقول أنا عارفة أنه حرام و سويته لو بتركه بتركه عشان ربنا مو عشان الناس..
إلى أن صار لي موقف عرفت بجد ليه الحجاب واجب و إنه من جد عفة و صيانة للبنت..
ما أبغى أذكر الموقف عشان لا أطول الهرج بس هو كان موقف بسيط جدًا لكنه اثر فيني و اتعلمت منه درس عظيم..
و الحمد لله من وقتها و كان عمري على نهاية 14 قريب 15 سنة للحين و أنا محافظة على حجابي،، و يمكن هو واحد من أكثر الأعمال اللي أسويها بإخلاص..

أتمنى يكون قصدي وصل لك و أعتذر منك على الإطالة||~