ادعولي بالصبر

[أبوسيار]

من بغى الفرقا لقاله عذر واسباب ودليل
خل عنك العذر والاسباب دام الحب ضاع

كان ودك بالفراق ابشر عسى عمرك طويل
لاتردد وانت لك كلمه ولك امراً مطاع

لي عليك انك تبد بكلمتن تشفي الغليل
ولك علي اني لوقف وقفه الرجل الشجاع

لاتجاملني مخافه قال مدري خوف قيل
عمر هرج الناس مايسمن ولا يغني جياع

كان قصدك سر حبك اوعدك لا اصبح بخيل
واحمل اسرارك معي للموت قد المستطاع

بس قلها قل ما احبك وابشر بصبراً جميل
لاتحسبني من مثل من طبعهم لوي الذراع

صاحبك ماهو كذا ياصاحب القد النحيل
صاحبك طبعه غريب وغربه غربه طباع

فالهوى مايقبل الحل الوسط ولا القليل
مثل ماهو لاشرى يشري ولا من باع باع

ثابت لوهي تميل الارض حدرة مايميل
يدري ان الفقر ماهو عيب والدنيا متاع

ماعشق لذة حياة كثر عشق المستحيل
ولا كرة حتى مماته كثر كرة الانصياع

كم تعلم من شديد البدو وش معنى الرحيل
وكم تعلم من غروب الشمس وش معنى الوداع

وكم تعلم من سحاب الصيف وش معنى الحصيل
وكم تعلم من ليالي البرد وش معنى الضياع

ايه انا هذا طريقي موحوش وصعب وطويل
وانت لمنك تعبت العالم فجوجه وساع

اعتبرني في بدايه سكتك عابر سبيل
ورح وانا قلبي معك ومن وين وجهت الشراع

يكفي اني لا ذكرت في سالفه عشاق قيل
عاشر احبابه شجاع وفارق احبابه شجاع


.


للشاعر

فهد مساعد


أبـــــ ســـيــــارــــــو