منع المنقبات من الدخول الجامعات في سوريا!!

[soma al7elwa]

سكوت .. اتفق معكِ فيما قلتيه ..

أول شي منع فرنسا لارتداء النقاب يختلف تماما عن منع دولة كسوريا لارتداء النقاب ..

تاني شي في اعتقادي انو مهم نعرف انه منع النقاب شي .. ومنع الحجاب شي تاني ..

والاختلاف بين العلماء والمذاهب في انو هل النقاب جزء من الحجاب او لا..

يعني أول شي من ناحية انو زي ما انا ما ابغى اشوف وحدة ماشية ببكيني هنا .. وكل امرأة مهما كانت ديانتها ومهما كان فكرها ومهما كان مذهبها وسواء كانت محجبة او لا .. 99.99% منهم بتلاقيها ماشية فالشارع وفي اي مكان عام بعباية -حتى لو ماكانت حاطة شي على راسها -لكن ككل شكلها مو غريب ولا شاذ ..
ونفس الشي زي ما نطالب الاخرين باحترام ديانتنا وتعاليمنا .. من الواجب ايضا اننا نحترم بلدهم وتعاليمهم

تاني شي .. النقاب يخفي هوية مرتديه .. يعني لو حطيت نفسي مكان اي مواطن فرنسي .. ما ابغى امشي فالشارع او فالمول او فمكان عملي والاقي شخص امامي مو شايف منو شي غير عيونه ويده ويتوقع مني اني اتعامل معاه بطريقة طبيعية!!

تالت شي تركزت صورة المرأة التي ترتدي النقاب بأنها امرأة مرغمة على ذلك وانو مو باختيارها -حتى ان كانت مرتديته باختيارها- .. وزي ما قال الرئيس ساركوزي انو دا الشي مو مرحب ابدا فيه ففرنسا ..

أنا ما بقول اني اؤيد القرار دا .. لكني اتفهمه جيدا من دول كفرنسا وبلجيكا..

فإن كانت المسلمة في فرنسا مصرة على ارتداء النقاب وتمسكت برأي انه جزء من الحجاب وماعجبتها قوانين البلد .. بلاد الله واسعة والدول الاسلامية كثيرة ..

نجي دحين لدولة زي سوريا ..

الخبر بيقول

"جاءت هذه التوجيهات بعد مطالبة أهالي الطلبة وخاصة اللواتي يدرسن في الجامعات الخاصة إدارات هذه الجامعات بوضع حد لظاهرة الفتيات المنقبات اللواتي يرتدن إلى الجامعات والمعاهد بحجة العلم, وبأن يكون اللباس عموما في إطار الاعتدال والوسطية"

طيب ياترى كم عدد الاعتراضات دي؟؟

وايش السبب اللي يخلي الأهالي دول يرفضوا وجود الطالبات المنقبات داخل الحرم الجامعي؟؟

هدا الشي لازم تطالب الطالبات المنقبات في سوريا بتفسير له .. ومايسكتوا عن حقهم ابدا ومهما حصل ..

تحياتي