-->آجمل مافي المشاعر..تكــتـبك آبيات وقصايـــد <--

[ليال...]

هاك كل القصيد آخــذهـ مثل ماتـبي !!
..............والله إنــي آغبط الخــاطر المستريـح
كيف لا جيت ابكتب احترق بلهبي
.............شمعت (ن) ماتحس بعمرها من تسيح
كل شاعر ترى لو هو تشاطر غبي
...........يطرب الناس شعره وهو جروحه تصيح
خذ قصيد(ن)بدا قبل يخط شنبي
..............يوم الأيام كانت مثل ريضان شيح
آهــ ياليت تجمـــــع بعثرت مكتـــبي
..............والله إني نويت ابني لشعري ضريح
كم كتبت وكتبت ولا وصلت طلبي
.............ماادري العيب فيهم او بطبعي صريح
كأن الأيام برد وهالقصيد حطبي
..............والأماني رماد وهالتوافيق ريــــــح
بدل الوقت شكلي ولا قوى مذهبي
..............وادري ان الأماني بهالزمن من صفيح
سهل وياى الصديق ولا الردي مصعبي
................بدون طيحت خويي والله إني لا اطيح
هيه يامن تـفـتــش دفتري وش تــبـي!؟
..................كل بيت(ن) يمــــرك آعرف انه جريح
وكان ماأكفاك شعري يخلف الله تعبي
...................مايخــلد ويــبقى إلا القـــوي والصــحيح
يالقصيده تثني وآطربي وإلعـــبي
.................في زمان(ن) إبوجه الي هقى به شحيح
دامها بالـــبـداية والــنــهايه حــبـــي
...................لا يغرك قــوي العود باكـــــر يــطيــح