الصراحة انا فيا شوفة نفس =-=-=-=-=-=- اشوفهم اقل مني ..انا كدا

[rubi]

السلام عليكم ورحمة الله وبركاته

كيفكم

منيحين..؟

مرة دخلت على منتدى وشفت موضوع عن >>انا ما احب اتعرف او اتصاحب مع وحدة مو سعودية

وكتبت انها عارفة كويس ان لا فرق بين عربي واعجمي الا بالتقوى بس تقول :

مادري .. انا كدا وخلاص

والغريب ان اغلب الردود وافقوها الراي

ولمن بعض الردود سالوها عن السبب.. وعارضوها

قالت :
كدا انا فيا الصراحة (شوفة نفس) عليهم ولا اعرف اتعامل معاهم

وكتيرين نفس تفكيرها

وانا حابة اقول للي تفكيرهم كدا ان اوول ذنب ارتكب في الكــــون

الكبـــــر

لمن تكبر ابليس على ادم لانو مخلوق من نار وادم من طين

وكلنا عارفين اللي سار

بس ما انتبهنا ان اول غلطة .. اول خطا فالكون كلو كان .. الكبر

تخيلو يا جماعة ان الجنة ريحتها تنشم من مسار 500 عام

تخيلو ان اللي في قلبو ذرة كبر .. لا يشم ريحتها

ايش تسوي لو كنت انت دا الشخص فعلا..

ممكن تتخيل ان دحين انت رايح للنبي محمد الكريم عند حوضه .. عطشاااان من وقفة يوم القيامة .. تبغى تحضنو .. وتقلو انك اقتديت بيه وانك صليت وصمت وصليت عليه كتير..

وتبغى النبي يرحب بيك .. انت من امته.. ونفسك تشرب من يد النبي الكريمة..شربة لا تظما بعدها ابدا

فتجري للنبي .. فيقولك .. سحقا سحقا بعدا بعدا

ايش تحب ينقال لك؟

ـــــــــ

وقت الحشر يوم القيامة .. المتكبر في حديث للنبي ( في معناه) ان المتكبر يصبح حجمو كحجم النـــــملة .. يدوسهم الناس.. يغشاهم الذل

وانتا نفس شكلك كانسان لكن حجمك كالنملة.. تخيل الموقف.. تخيل الناس اللي كنت انت تتكبر عليهم وتشوفي نفسك عليهم

ايش يقولو عليكي .. وكيف نظراتهم ليكي وانتي زي النملة يدعسك الخلق ..يغشاكي الذل

اهي البنت دي اللي كنتي تتريقي عليها وشايفة نفسك موهوبة اكتر منها وما تطيقي تتكلمي معاها.. اهيا معاها حسناتها وملائكة حسن الوجوه يطمنوها لانها كانت متواضعة وصالحة اكتر منك

اما انتي يغشاكي الذل .. شوفي كلمة يغشاهم الذل>>يغطيهم الذل .. زي ما تغطي جسمك بالبطانية.. يغطيكي الذل .. وقدام مين ؟.. قدام جميع الخلق من جميع الامم .. والاهم .. امام ربنا

او تخيل العكس..

تخيل لمن تكون متواضع فالدنيا ويوم القيامة تكون متطمن قلبك .. لانك خفت من ربنا فالدنيا واتقيت .. بالتالي ربنا ما حيخوفك فالاخرة

واللي ما يخاف ربنا فالدنيا .. لازم يخوفك فالاخرة

ــــــــــــ

ايش تحب يحصلك..؟؟؟
اللي حتختارو .. هوا اللي حيسير يوم القيامة باذن الله

زي ما تختار حيحصل

اللي تقررو فالدنيا على حسب مزاجك .. حتشوف نتائجو فالاخرة

ـــــــ

فالنهاية احب اقول انك مو شرط تتعلمي كيف تتعاملي معاهم .. لكن ماتشوفي نفسك عليهم.. لان مافي قانون فالكون يمنع انهم فيوم من الايام يكونوا احسن منك

مافي شي يمنع انك فيوم تحتاجي مساعدتهم




...
ان بدر خطا مني فارجو تنبيهي ..
دعواتكم

rubi