أول يوم في الجامعة

[KHALED-18]

السلام عليكم جميعا



باختصار لاني ما احب اطول في الكلام >>>> اش فيه داخل معصب


اعزائي انا وكثير من المستجدين امثالي بنروح اول يوم اكيد بنحوس الدنيا لاننا محنا عارفين الانظمة وتونا طالعين طازة من المدارس

عشان كذا اتمنى من اصحاب الخبرة السابقة يعلمونا ( بالتفصيل ) اش خبصوا في اول يوم في الجامعة


اتمنى انكم تعلمونا المفيد

( سؤال عابر : متى تبدا الدراسة لعام 1430 هـ >>>> مضيع الدنيا حتى مو عارف اول يوم دوام )

ايه صح نسيت اقولكم انا تحضيري علمي خطة ب >>>>> يعني وش نسوي نصفق لك خخخخخخخـ

لا تصفقون لي بس رح استفيد اكثر لو كان في احد سبقني ودرس هاذي الخطة وممكن ايضا نكون انا وانت يا من تقرا الموضوع في نفس الكلاس

يلا يا جماعة كل واحد يستطرد ويحكينا وش صار معاه اول يوم ، منها سواليف ومنها إفادة


تحياتي

[mzat kau]

اهلين الدوام يوم 14 -10
واول يوم حتمشي كتيييييييير والمطلوب منك انك تدور على كلاساتك وتعرفها :)
وخطه باء يبالها شده حيل ومزاكرة اول باول سوو شد حيلك وبالتوفيق:)

[A N G E L]

من جد لازم يكون عندك لياقة ههههههههه
وشيل معاك مظلة عشان الشمس
وبداية الدراسة يوم 14
يعني بدرري
بالتوفيق خيوو

[KHALED-18]

mzat kau


A N G E L



يعطيكم العافيه وتراكم نكدتو علي لاني كسول جدا جدا جدا .....خخخخ

بس انتو عطيتوني الزبدة قلتلكم ابغى التفصيل الممل كمان

[طالب سنة تحضيرية]

من واقع خبرتي في السنه التحضيريه >>>>>مسوي معلم
لكن من جد الخطه يبغالها تركيز و مذاكره
شوف يا سيدي راح تدرس في الترم الأول أحياء و كيمياء و إحصاء و إنجليزي طبعا جدول راح يتزلك 12 ساعه لكن الإنجليزي راح تدرس في الأسبوع 15 ساعه و محسوب في الجدول 3 ساعات
يبدو أنك تبغى تخش طب ما أدري يمكن
الطب لا زم تكون نسبتك الخاصه 85 و فوق
شد حيلك وما عليك من كلام الطلاب
وإذا في أي سؤال أنا حاضر

[KHALED-18]

"طالب سنة تحضيرية " يعطيك العافية

وإذا في أي سؤال أنا حاضر

الله يعينك جنيت على نفسك خخخخخخخـ


بس حبيت استفسر عن :

1- الجدول مفهوم لكن قدام الانقليزي في مواعيد كثير كلها رح ادرسها ولا بس موعد واحد

وكمان أخر عامود في الجدول مكتوب فيه النوع اش معنى النوع


2- اول يوم لما ادخل الجامعة اي مبنى اروح >>> مايعرف يدبر نفسه

تحياتي لك

[لحن الحياهـ]

وي وي مرره بدري 14 :(
على بالي بعد الدراسه بأسبوع :(

[خزامى ،،]

اممم طيب أنا أقولك اش سار معايا ..

اول يوم جامعي بعد ماركبت السياره وانا رايحه لطريق الجامعه

كل شويا كنت أدق ع اختي في البيت أسئلها عن حاجه << متخرجه من الجامعه " أختي "

بالعربي كنت مرا قلقانه ..لمن وصلت رحت لبوابه غربيه 1 حقتنا << البنات..

وقبل مااخش الجامعه سئلت السكرتيه الي عند الباب عن مبني 420 << لانو قالو راح يكون التجمع في للمستجدين..
وبس رحت ع الوصف واتعرفت ع وحده في خلال 30 تانيه تقرييا واخدتها معايا

ولمن وصلت المبني جلست ادق ع صحباتي ويدقو عليا واتجمعنا ..بعدين قمنا نشوف المباني الي راح

ندرس فيها والكلاسات ونحاول نحفظ اماكنها<< طبعا من الجدول

اخر شي رحنا رابيس وفطرنا بعد المشي واكلنا باسكن وبعدين رجعنا البيت وبس ..

واليوم التاني ماجيت الجامعه ..

أنت لا تفكر كتير في الموضوع بعدين تتعب وتتوتر ..خليها ليومها والله ربنا يفرجها ..ولايضيع أحد ..

ومهم في اول يوم انك تسال أي واحد قدامك ع أماكن المباني الي عندك في الجدول ..

في الجدول *
بالنسبه للنوع ماعليك منو مراااا..

والانقلش لازم تحضر كل المواعيد حتى الي تحت دي كلها تكون تبع الانقلش

وأي سؤال برضو انا حاضره ..

الله يسهل ع الجميع يارب وييسر لنا ولك كل طيب ..

[طالب سنة تحضيرية]

لا جنيت على نفسي و لاشيء بالعكس هذا واجبنا نقدم الخبره اللي اكتسبناها في السنه التحضيريه للطالب المستجدين
أول شيء بالنسبه لمواعيد الإنجليزي لازم كلها تروحها مو نختار موعد>>>>>>>لعبه هيه
و بالنسبه للنوع ما أعرفه لكن ما أعتقد لو أهميه أهم شيء احفظ الشعبه علشان لا تضيع وخلي الجدول في جيبك لمن تروح الجامعه
و أول يوم لمن تروح الجامعه على حسب جدولك أول محاضره روحها>>>>>>>>>>>>>سؤال مال أمو داعي اعذرني

وما زلت عند كلمتي إذا عندك سؤال في الخدمه
اسأل و نحن نجيب

[نجمة بحر]

أنا خطه ب
والحمد لله مرت السنه التحضيريه بسلام
الخطه يبغالها شدة حيل مره لان موادها دسمه ويبغالها مذاكره اول بأول
أبدا لاتغلط غلطتي وتحسبها زي المدرسه لازم جد واجتهاد من أول يوم هذا الترم حيكون عليك ضغط بس حاول انك تلحق نفسك أول بأول
والترم الثاني راح تلقى المواد مره اسهل واخف من كل النواحي
أتوقع انهم راح يتلافون الاخطاء الي سووها على خطتنا وراح يصححوها لكم وإن شاء الله تكون أسهل من خطة دفعتنا لانهم على عهدنا ماكانوا ماشين بنظام وكل يوم يطلع قرار لخبطونا لكن انتوا اتوقع انهم تعلموا من أخطائهم وأتمنى يصححوها على خطتكم
وان شاء الله تنجح من السنه التحضيريه وتتخصص الشيء الي يعجبك
دعواتكم لي بتحقيق حلمي