كيفية زيادة المعدل في السنة التحضيري

[Rghd]

السلام عليكم ورحمة الله وبركاته

انا متخرجة جديدة وانقبلت في فرع الشرفية اللهم لك الحمد ولك الشكر
في البداية انا اخترت الشرفية ..الصراحه حطيتها رغبة اولى وعلى اساس اني كنت احسب انها السليمانية :) .. نسبتي ماشاءالله تدخلني السلمانية لكن نصيبي الحمدالله على كل حال
السؤال في دي النقطة
الكل لمن عرف اني في الشرفية جلس يزعق عليا ويقلي بسرعة حولي لي السلمانية بسبب ان المستوى الدراسي فيها مو كويس وان الدكاتره ما بيساعدوا
هادا الشي صح ولا لا ؟؟

الشي الثاني اني مره مرعوبه وخايفه من شي اسمه تحضيري

بحاول اني ما اسمع كلام الناس لكن الكل خايف ومرعوب وجالس على اعصابه انه ما سنقبل في الرغبه اللي هواحاططها

وانا كل يوم افكز في الموضوع لو لا سمح ما دخلت التخصص اللي اباه

خايفه مره من ان احلامي وطموحي ينقتلوا .. اعرف ان الدعاء يغير القدر وان بتوفيق الله ثم بجهدي حأوصل لكن اللي بشوفوا وبسمعوا ان الطب صار دخوله مره صعب وان النص دي اللي بعد الفاصله ما استهين بيها يزداد خوفي اكثر

انا ما رضيت ادخل جامعات اهليه لانه حرام والله يتعادل مستوى طالبة موزونتها في 90 وطالبة مزونتها 80


ابدا ما اتكبر او اشوف نفسي لكن والله شي يقهر انك تتعب وتقطع نفسك وغيرك مرتاح وفي النهاية يدخلوا في التخصص نفسه

حتى ربي سبحانه قال ( لا يستوي الذين يعلمون والذين لا يعلمون )



وبالنسبة لجامعة سعود انا كنت احسب انها بس تمريض وما دريت انها طب الا بعد ما قفل التسجيل بيوم .. خيره اللهم لك الحمد



السؤال هنا

ياريت اللي جاب درجات كامله يقول ايش كان يسوي بالتمام

اعرف كل شي بتوفيق الله لكن لو جينا نشوف النجاح من ناحيتين انا اقول ان النجاح في الدراسه 99 بالمية جهد و 1 بالميه فقط ذكاء



فا ياريت تكتبوا كل شي ساعدكم وخلاكم تاخدوا كامل

الله يسعدكم يارب ويوفقكم

ادعولي ان ربي يسهل امري

شكرا لكم

[AssmaH]

هلا حبيبتي انا من دفعة 13 بس اعتقد ما يختلف النظام كثير
على العموم راح احكيك عن الي عملته اول شيء واهم شيء تخلصت من الانجليزي اعطيتهم شهادة توفل وخلصت من الدوام الطويل صار عندي وقت اذاكر بالراحة ودوامي كلمة دلع قليلة فيه
لا حد يضحك عليك ويقولك الانجليزي يرفع المعدل اصلا كله بساعتين مو مرة فارقة ولا قد تعبه ودوامه الطويل

ثاني شيء كنت اذاكر اول باول ودائما احرص اني اذاكر النماذج لانه غالبا تكون الاسئلة مقاربة لها
وبحكم انه كان عندي وقت كثير, كنت دائما اكون فاهمه المادة عشان ليلة الاختبار بس يكون عندي مراجعة خفيفة وتدريب ع النماذج

وكمان اعرف بنات كانوا يدرسوا في الشرفية وعادي ما عمري سمعتهم اشتكوا من مستوى تدريس , واصلا فيه استاذات يكون دوامهم ايام في السلمانية وايام في الشرفية وذا اكبر دليل انه مافيه تفرقة
الفرق الوحيد هو انه الشرفية صغيرة وملمومة وما يدرس فيها الا تحضيري فما فيها جو الجامعة, لكن صراحة ماديك عليه واريحلك من التشميس في الحر خاصة ايام التحضيري في السلمانية من مبنى لمبنى

واخيرا الله يوفقك ويكتبلك الكلية الي تبغيها ودائما افتكري انه الي يختاره لك الله هو الخير وداومي على صلاة الاستخارة

وافضلك انك تختاري كذا تخصص وتقرأي عنهم ولا تخلي تركيزك على تخصص واحد عشان اذا بعدين لا قدر الله ما تخصصتي فيه ما تتحطمي

[Rghd]

المشاركة الأصلية كتبت بواسطة assmah هلا حبيبتي انا من دفعة 13 بس اعتقد ما يختلف النظام كثير على العموم راح احكيك عن الي عملته اول شيء واهم شيء تخلصت من الانجليزي اعطيتهم شهادة توفل وخلصت من الدوام الطويل صار عندي وقت اذاكر بالراحة ودوامي كلمة دلع قليلة فيه لا حد يضحك عليك ويقولك الانجليزي يرفع المعدل اصلا كله بساعتين مو مرة فارقة ولا قد تعبه ودوامه الطويل ثاني شيء كنت اذاكر اول باول ودائما احرص اني اذاكر النماذج لانه غالبا تكون الاسئلة مقاربة لها وبحكم انه كان عندي وقت كثير, كنت دائما اكون فاهمه المادة عشان ليلة الاختبار بس يكون عندي مراجعة خفيفة وتدريب ع النماذج وكمان اعرف بنات كانوا يدرسوا في الشرفية وعادي ما عمري سمعتهم اشتكوا من مستوى تدريس , واصلا فيه استاذات يكون دوامهم ايام في السلمانية وايام في الشرفية وذا اكبر دليل انه مافيه تفرقة الفرق الوحيد هو انه الشرفية صغيرة وملمومة وما يدرس فيها الا تحضيري فما فيها جو الجامعة, لكن صراحة ماديك عليه واريحلك من التشميس في الحر خاصة ايام التحضيري في السلمانية من مبنى لمبنى واخيرا الله يوفقك ويكتبلك الكلية الي تبغيها ودائما افتكري انه الي يختاره لك الله هو الخير وداومي على صلاة الاستخارة وافضلك انك تختاري كذا تخصص وتقرأي عنهم ولا تخلي تركيزك على تخصص واحد عشان اذا بعدين لا قدر الله ما تخصصتي فيه ما تتحطمي

الله يسعدك يارب .. ايوا انا سويت زيك اديتهم درجة الايلتس وقالولي مو لازم تختبري خلاص


النماذج حتكون موجوده هنا صح ؟؟ ولا ممكن الاقيها في مكاتب ؟
صح كلامك .. بحاول قد ما أقدر ما أحط كل تفكيري في دا التخصص لكن ربي يخترلي الخير فيه يارب
الله يريح قلبك ويوفقك شكرا ❤️❤️

[AssmaH]

والله معرف انا درست بالسلمانية والنماذج كانت في مكتبة الي جوا الجامعة اعتقد حتى في الشرفية راح يكون نفس الوضع
وعلى فكرة لو تبغي تحولي السلمانية ترا ممكن عندك فرصة ادخلي بوابة القبول عزز وادخلي على الاستفسار واكتبيلهم يا حترد وتعدلك يا راح تستدعيك لمبنى 29 عشان تعدلك ممكن كمان تروحي لمبنى 29 مباشرة وراح يحلولك المشكلة , لو تبغيها لا تترددي روحي والحقي عليهم قبل لا يتنهي دوامهم معرف متى يخلصوا
المبنى يقع خارج شطر الطالبات كذا مبنى لحاله هو بس يفتح ذي الايام عشان قبول التحضيري ومشاكلهم واستفساراتهم

[أُنـثــﮯ مـــلآئـكيـة]

وعليكم السلام ورحمة الله وبركاته
مبروك قبولك بالجامعة وان شاء الله بتتوفقي بالسنة التحضيرية وتتخصصي باللي نفسك فيه
وبالمناسبة عنندك فررصة تحولي للسليمانية ( انا من طالبات السليمانية واعرف الاستاذات هناك عشان كذا بافيدك حسب معرفتي)

اول شيء الحمد لله افتكيتي من الانجلش صار وضعك تمام تقريبا
تجربتي بالتحضيري
انا الحمدلله جبت بكل المواد 100 ما عدا انجليزي ليفل 4 جبت فيه 95
بكتب لك عن كل مادة وطريقتي فيها
الاحصاء: كنت داخله وانا خايفة من هالمادة لأنها جديدة علينا و غريبة شوية
لكن قدرت اتغلب على خوفي بشيئين , الاول من كثر ما كنت حريصة على هالمادة صرت احضر عند استاذتين
وحدة استاذتي الاصلية (عبير بالبيد) و الثانية ( سماح سندي ) وما شاء الله كلهم بعد الله السبب في درجتي الكاملة
كانوا يجتهدوا ويجيبوا افكار و اسئلة و مراجعة الله يسعدهم يارب, الشيء الثاني كان كثرة سؤالي وحضوري لسكاشن الاحصاء.
وكانت الاختبارات كلها سهله الحمد لله
الاحياء: كله حفظ بحفظ بس في اشياء تحتاج فهم فابحثي عنها باليوتيوب مثلا لو حابه تفهمي او الافضل انك تحضري مع د. حنان الشاذلي
والاختبارات حقت الاحياء كانت سهل لمتوسط بالنسبة لي لكن بالمذاكرة اول بأول تسهل عليكي كثير فلا تخافي من هالمادة
الكيمياء: كله من الثانوي , بالنسبة لافضل الاستاذات ليلى الحربي بس انا كنت مع استاذة نهى وزان وبصراحة ما استفدت شيء اسلوبها بالشرح ينومني
لكن كنت اذاكر سلايدات ليلى و نهى مع بعض من باب الاحتياط, والاختبارات سهله ومتوسطة , وبإمكانك تتابعي دروس على اليوتيوب بس بالانجليزي احسن
...
رياضيات: كانت من اجمل المواد مع استاذة ليندا الزبن, جميلة و شررحها مفهوم ومبسط, كنت اكتب كل ملاحظة و اكتفيت بالكتاب و بالوورك شيت تبع كل شابتر و الحمد لله جبت 100
المهم في هالمادة هو أنك تسألي عنك كل شيء ما تعرفيه او شاكه فيه حتى ( اسألي ليندا الزبن او روحي لهدى افندي كنت اسألها احيانا لما ما الاقي ليندا وبصراحة رهيبة وتفهمك صح)
و الحمد لله بالنسبة للاختبارات كانت سهله

فيزياء: اسهل المواد والي ما شلت همها ابدا من سهولتها وسهولة الاختبارات حقتها
كنت اذاكر سلايدات هناء فرحان و اذاكر نماذج اختباراتها ( وكان الاختبار يجي كوبي بيست من نماذج هناء) و حظك بيكون حلو لو كنتي من طالباتها
وممكن تتابعي شروح يوسف زويل لأنه كويس في الفيزياء

مهارات اتصال: اجمل المواد واخفهم و اسهلهم , اخذتها مع اجمل دكتورة بالجامعة الله يسعدها د. اميرة النمر
والاختبارات حقتها سهله وبسيطة وتخلصيها بأقل من 10 دقايق بس دايما خذي وقتك و حلي برواق

مهارات الحاسب: بالنسبة لي اغث مادة لكن العملي كان سهل و اجيب فيه كامل , اما النظري كان غثيث وبقوة احفظه يمكن لاني مو شاطرة بالحفظ
وكنت انقص فيه بس الحمدلله حطوا بونس 5 درحات وعوضت نقصي وجبت 100
كانت اكثر المواد الي ارهقتني و كرهتها :( واحس انجاز اني جبت فيها كامل اكثر من كل المواد العلمية هههههه
...............

وبس الانجليزي حطوني ليفل 4 و الحمدلله عدى على خير
..
السنة كانت ممتعة وجميلة , اقضي وقت حلو و بنفس الوقت اجتهدي
لا تقضيها دراسة وتوتر لأنك بتضيعي لحظات حلوة ولا تقضيها لعب و نت لأنك بتضيعي مستقبلك ( خليكي وسط )
هي صح سنة مصيرية , بس من تجربتي كانت سنة سهله لأني كنت ابعد نفسي عن الناس السلبية و التوتر وهذا اهم شيء
ومتأكدة كل تعبي ما بيروح ع الفاضي
...
استمتعي بالاجازة عشان ما تضيع عليكي و اعطي كل شيء وقته لما يجي
وبس كل التوفيق يارب

[عاشق الامل]

عشان تحصلي على 5 من 5 ف السنة التحضيرية بالكامل
محتاجه ع الاقل 95 من 100 في كل المواد
ولو جبتي 95 فما اكثر في اي مادة راح تحصلي على النقاط كاملة 15 من 15 لو المادة ب 3 ساعات ولو ساعتين هتكون 10 من 10
اما لو جبتي من 90 ل 94 هتحصلي على 14.25 من 15 يعني 95
ما اظنه شي صعب واظنك تقدرين عليها ان شاء الله . ^_^

[Mirinoxd]

بصراحة حتى لو انحطيتي مع دكاترة مو كويسيين مو معناه نهاية الطريق
انا عن نفسي اعتمدت مرا كتير على قناة خان اكاديمي في اليوتيوب
كنت لما ما افهم شي في الفيزيا والرياضيات والكيمياء أكتب اسم الدرس ويطلعلي وأفهمو وممكن بطريقة احسن من حقت الكتاب كمان!!
الكيمياء كنت كمان أستفيد من فديوهات يوسف زويل والفيزياء برضو جدا جدا فادني!
الإحصاء مادة ماهي صعبة ودكتوراتها غالبا فاهمينها لكن لو ما فهمتي مع دكتورتك احضري مع دكاترة تانيين عشان تفهميها لأنو الاحصاء لو تفهمي في المحاضرة يكفيك عن أي مصدر ثاني فحاولي تفهميه في المحاضرة واذا عندك سؤال اسألي وقتها,
أما الحاسب برضو كنت ما اكون دايما مع الأستاذه غالباً اكون جالسة ع النت لأنو كلو درسناه في الثانوي (اكسل,بور بوينت, وورد, ويندوز) لكن آخر برنامج كان اكسسيس ودا ما اخذناه ف الثانوي ولما درسناه كان وقتها فترة اختبارات وما كنت أبداً مع الاستاذه بس جدا استفدت برضو من اليوتيوب فديوهات تعليم للأكسس
اذا مافهمتي شي لا تستسلمي او تروحي تجيبي مدرس خصوصي وتخسري نفسكك حاولي تدوري في النت كل شي موجود أو تفهمي لوحدك اذا مرا ما زبط وقتها ممكن تطلبي خصوصي
والشرفية صح مايمدحوها بس برضو السليمانية مليانة دكتورات مايمدحوهم واغلب البنات يحولو لدكتورات أحسن
فنفس الشي انتي سويه ف الشرفيه اذا انحطيتي مع دكتورة مو كويسة حولي لوحدة كويسة
وفيه اصلا دكتورات من السليمانية يدرسو ف الشرفية وفي دكتورات بس ف الشرفية واشوف بنات كتير يمدحوهم
لا تشيلي هم وان شاء الله انتي قدها وعلى فكرة البوينس (درجات اضافية) جدا تفيدك لو نقصتي فلا تيأسي لما تشوفي نفسك نقصتي, أعرفي انو حيتعوض وشدي حيلك أكتر
وبس ربي يوفقك

[wafa al7arbi]

أنا من طالبات فرع الشرفيه لدفعة 14 ،،، وماخدت ولا ماده عند مدرسات خصوصيات والحمدلله بالنسبة للمواد العلميه كلهاا a+ وبعضها بالبونس يعني 100+ ،، كلو بالتركيز مع الدكتوره وقت المحاضره والمداكره + النماااادج (جدا مهمة النماادج والتست بانك وكدا)* ،،

فأقولك أول شي مادامك شلتي الانقليش فمره كويس لأنو هوا اللي نقصني شويه فالمعدل ووقتو كان متعب مره مع اني ماخدت كل الليفيلز كان الترم التاني عندي بدون انقليش فمره حسيت بفرق الدوام ...

بالنسبة للدكاتره الكويسات ففرعناا "من رأيي" :-
الفيزياء كنت عند د.آمال الغامدي عجبني شرحها واخلاقها ومشيت معاها كويس لدرجة اني صرت بس احضر سكاشنها عشان ماتلخبط مع الدكاتره التانيين.
الكيميااءء كنت عند د.عايشة مباركي شرحهااا مرررره جيد بشهادة الكل وصارت تسوي سكاشن تحل فيها تست بانك د ليلى كماان واخلاااقها عاااليه ماشاء الله.
الاحياء كنت عند د.فريال شرحها جميل لانو تعرض افلام وكدا وغير انها منسقة الماده بس برضو الاحياء عشانو حفظ مايحتاج دكتوره قد مايحتاج حفظ واهتمام منك.
الرياضيات كنت مع منى السلمي جيده بالنسبه للبنات لكن انا ماقدرت افهم ع شرحها فكنت احضر سكاشن لدكاتره كتير منهم د.عواطف وبرضو عجبني شرح د.ضحى ابو الحمايل حضرت لها كدا مراجعه.
الاحصااء دكتورتي كانت سيئه فاخدت إضافي عند د.فاتن الحسين وطبعا بشهادة الكل مافي احسن منها فالاحصااء جدددا شرحها ككويس ومراجعتها نفس افكار الاختبار وحضرت كدا سكشن لهديل الرويثي برضو جيده.
كدا خلصنا المواد العلميه باقي حاسب واتصال وانقليش .. انقليش شلتيه ،، حاسب واتصال سهله مره لاتشيلي همها بالدات الاتصال بس طبعا لاتهمليهم عشان يرفعوكي

ادري طولت بس ان شاء الله اكون أفدتك وشلت الخوف منك ، عموماا السنه التحضيريه ماتخوف لو انك اهتميتي فيها ... والقبول فالتخصصات صح يخوف لكن لو جبتي معدل ترتاحي وقت القبول فمن البداية لاتفرطي فولا شي شدي حيلك فكل شي وكل ماده ويكون سويتي اللي عليكي وبس تستني القبول فالكليه اللي تبغيهاا ....
الله يكتبلك الخير .. ويعطيكي التخصص اللي نفسك فيه

موووفقه

[smiley14]

السلام عليكم
مبروك القبول
ماشاءالله الي قبلي قالوا كل شي كنت اسويه
و كلامك صح النجاح يعتمد ع الجهد ..
بس بعلق على نقطه وهي ان الجامعه الملك سعود مافيها طب بنات تخصصات البنات في 3 اشياء فقط
وهي التغذيه الاكلينكيه و التمريض زي ما قلتي و علاج تنفسي الي في الرياض هي الي فيها طب للبنات ..
موفقه ان شاء الله

[shem]

مبرووك على قبولك وربي يحققلك كل اللي تتمنيه
ﻻ تشيلي هم من ناحية السنة التحضيريه ابدا بتاتا البته عموما سنة لطيفة جميلة سهله باذن الله حتعدي في غمضة عين وحتعرفي بعد ماتخصلي ان شاء الله قديش هيا سهله
المواد جدا دراستها سهله وتعاون الدكاترة عموما مااحس في فرق لو سليمانية او شرفيه ﻻنو من التعاون وجاي هوا مطبق على نظام الجامعه كاملة في اي فرع كان من ناحية البونس والكيرف اب
وﻻ تشيلي هم الدكاترة ان شاء الله انتي شاطره وقدها وقدود 90% يعتمد عليكي انتي وعلى مذاكرتك هذا من وجهة نظري ﻻني خلصت التحضيري الحمد لله ومااتذكر اني استفدت من دكتورة جربت كل الدكاترة وكمان المناهج كلها نفس الثانوية بالزبط مافي شي جديد بس بتطوير اكثر وباذن الله بتخلصينها وبتجيبن درجات عاليه وبتدخلين التخصص اللي تبغينو بس عزيمة وارادة وحماس هذا المطلوب منك عشان توصلين لطموحك
وبالتوفيق يارب ♡