الحيــاة الجَامعييةة [ مما رآق لي]..$

[آنسة مفهية !]

هالموضوع قريته وحبيت تستفيدو منو معآيه
الموضوع بقلم : نونآ






[ أخطاء ممكن تقعين فيها كـ طالبة freshmen ]

في السنة الأولى بالجامعه أغلب الظن نقع بأخطاء تافهه ..
نتمنى بعدين لو كنا نعرف شلون نتداركها و نندم انه سويناها
أول شي لا تعتقدون إنه الجامعه لعب و حالها بختلف عن المدرسه
الجامعه تحتاج ساعات نوم بالضبط مثل المدرسه
يعني السهر ممنوع
بأول سنة لي كنت أروح الكلاسات و أنا نايمة ساعتين ولا ثلاث
و هذا كان أكبر غلط
تداركته بالكورس الثاني على طول و صارت قدرة استيعابي بالكلاس أكبر
و هالشي أثر على دراستي بالبيت .. فـ صرت أخذ وقت أقل في المراجعه بالبيت
الخطأ الثاني الي اعتبره خطأ من وجهة نظري .. البعض ما يشوفه خطأ
وهو الجلوس في الخلـــف
مادري أنا من النوع الي اذا قعدت ورى على طول انام
فـ بالنسبة لي أتجنب الجلوس في الخلف عشان أكون منتبهه
الخطأ الي بعده و أغلبنا نطيح فيه و هو انه نكتفي بشرح الدكتور و هذا أكبر خطأ
لما الدكتور يشرح احنا نستقبل معلومه يديدة و عشان تثبت هالمعلومة تحتاج منج التكرار
لازم لازم لازم نراجع بعد الكلاس .. لا تأجلين المراجعه أكثر من يومين
أنا أفضلها بنفس اليوم لكن احيانا يكون في أولوية اختبار أو شي فممكن نأجلها
لكن اذا اكثر من يومين ما راح تكون بالسهولة نفسها لو راجعتي دروسج أول يومين
فـ شنو نستنتج من هالكلام يا حلوين ؟
إن أكبر خطأ هو إنج تدرسين بس قبل الاختبار بكم يوم و تطلبين من الله انج تاخذين A
يمكن تصدف و تاخذين قريد عالي لكن A مستحيل لأنه لك مجتهد نصيب
فالصحيح هو انج تراجعين على الأقل اسبوعيا
لأني أعرف بنات مستحيل يراجعون بشكل شبه يومي
على قولتهم كلن عقله براسه و يعرف خلاصه
اذا انتي تبين القريد العالي .. تبين تتعلمين و تستفيدين .. تبين تسوين شي مميز
ابذلي مجهود و بتلقين نتايج حلوة باذن الله
اما اذا انتي راضيه بالقريد العادي و مقتنعه خلاص
كل واحد ينام على الجنب الي يريحووو
أقول هالكلام لأنه في بنات يقولون لا ما عندج سالفه تدرسين كل يوم
يحسسونج انج قاعده تسوين شي غلط و عيب
نرجع لموضوعنا و محور حديثنا
الحياة الجامعية فيها مسئوليه
المسئوليه الي ابي اركز عليها ~
هي انج توازنين بين الوناسه و اللعب و الدراسة بنفس الوقت
لا تحرمين نفسج الوناسه .. لكن مو على حساب دراستج و مستقبلج
انا مو عايشه بالمستقبل مثل ما البعض يعتقد
و لا الماضي يعنيلي الكثير .. الذكريات حلوة
لكن ما ارهق نفسي في الماضي
انا عايشه في الحاضر .. مستمتعه بوقتي و اسوي الشي الي احبه
لكن مهتمه للحياة الي بعيشها السنة الجآيه و الي بعدها وبعدها
اذا الله عطاني عمر ~
فـ الغلط انج ترهقين نفسج بالدراسة وايد لدرجة تلغين حياتج
بس عشان المستقبل
و غلط بعد تلعبين و تنسين مستقبلج و بعدها تتحسرين
حآولي توآزنين بين الاثنين

[آنسة مفهية !]

[ شلون أدرس ؟ ]




فكري و جربي .. شوفي انتي شلون تحصيلج العلمي يكون بأعلى مستويآته ؟
في ناس تحب تدرس اكثر عن طريق القرآءة .. في نآس مثلي لازم تسمع صوتها > بصوت عالي
يعني لو تمرين جنبي و انا ادرس > سكنهم مسآكنهم
فـ كل وحده لازم تعرف طريقتها الي تدرس فيها ..
مو بس طريقة تفضلينها .. لازم تعرفين انها تجيب نتايج !
البعض يحب يدرس مع مجموعة .. انا عن نفسي ما اعرف
في ناس تحب تدرس واهي تسمع موسيقى ..
انا مثلا ما اقدر لازم صممت حواليني و اكلم نفسي و اشرح
كل شخص يختلف عن الثاني .. اذا للحين ما تعرفين
جربي كذآ طريقه لين ما تلقين الطريقه المناسبة
نقطه اخرى مهمة هي انج تلقين المكان المناسب
هالمكان ابدا ماهو السرير !
اختاري مكان اضائته حلوة و كرسي مريح
بالنسبة لي هالمكان يا اما غرفة الطعام
أو مكتبي غالبا ~


النقاط المهمة الي لازم تعرفينها عشان تكون دراستج صحيحه :

- اختيار طريقة التعلم المناسبة لج
- اختيار المكان المناسب باضاءة جيدة
- تنظيم الوقت بحيث تقيمين شكثر وقت راح تاخذين للدراسة يوميا و اسبوعيا
- كتآبة الأشياء الي تحتاجين انجازهآ مثل الـ assignments و غيره وهالشي يحتاج بلانر ..
دفتر صغير تكتبين فيه هالأشياء الي تحتاجين تنجزينها اسبوعيا ~
- الاستمرار بالمراجعه الدورية للمواد







[ هل الأفضل أسئل أسئلة أثناء المحآضرات ؟ ]



نعم تسألين اذا احتجتي .. اذا ما فهمتي شي و حاولتي ارجعي اسألي مرة ..
اذا الشرح ما كان وآفي
روحي لدكتور اثنآء الـ office hours .. بس فكرة غلط مأخوذه عن البعض
انه الي تسأل كثير يحسبها الدكتور شاطرة و مهتمة .. لأ غلط للأسف
بعض الأسئلة تكون تافهه فعلا و يقيمج الدكتور كـ مستوى ضعيف فآنتبهوآ
السؤال للحاجه و مو لـ اثبات شي معين ~







[ شكثر لازم أخذ وقت أثناء الدراسة عشان اعرف اني فعلا درست ؟ ]

معروف انه كل ساعه تندرس بالجامعه تحتاج ساعتين الى 3 بالبيت عشان تثبت المعلومة
لا تخترعون .. بالامكان تقسيمها .. احنا ما ناخذ المادة كل يوم .. المواد موزعة على ايام الاسبوع
مع شوية تركيز منج وانتي تنظمين وقت راح تقدرين تحصلين هالساعات للدراسة
و افضل طريقة تعرفين فيها مدى جودة دراستج هي الأسئلة بنهاية كل chapter
جاوبيهآ و تأكدي من صحة حلج .. و الاختبآرات ممكن تحصلينها عند الدكتور
اسئليه و رآح يعطيج يآهم و راح تستفيدين وايد منهم (ترى والله كنز)
لأنه منها راح تعرفين اسلوبه و طريقه وضعه للاختبارات ~







[ أول يوم بالجامعه ]

شنو تحتاجين لأول يوم بالجامعه .. هالجزئية حبيت أحطها .. لأني مريت بهالتجربه
كـ بدآية .. أول شي يفضل تسوينه هو إنج تطبعين جدولج أو تصورينه بفونج
أنا أفضل الاثنين ،
أحب أسويه على المآيكروسفت وورد، أسوي جدول مقسم
يهمني يكون اليوم و الوقت و المادة بالاضافه الى المبنى و الدور و رقم الكلاس
طبعا هالخطوات ما زلت أسويها في بدآية كل semester

شي ثآني أيضا أشوفه مهم لكل طالب هو الـ syllabus
راح أقولكم ليش مهم
تقريبا يوضح لج كل شي انتي محتاجه تعرفينه عن الماده الي انتي ماخذتها
لكل مادة syllabus يختلف عن المادة الثانيه
راح تلقين فيها أهداف المادة .. توزيعة الدرجات
المنهج .. بمعنى كل اسبوع راح يكون تركيزكم مثلا من الصفحة الفلانيه الى الصفحة الفلانية
تستفيدين من هالشي لما تجين تحضرين للمادة بشكل اسبوعي
ايضا يكون موجود فيه كل طرق التواصل مع الدكتور.. الايميل و ساعات تواجده في مكتبه
و رقم الـ office
أهم شي فيه إنه راح تعرفين منه كم اختبار راح يمر عليج و متى أوقاتهم
و راح تعرفين كم homework .. كم تقرير .. هل فيه مشروع يحتاج تفكرين فيه قبل مدة ..
هل في معرض لنهاية المادة
غالبا هالأشياء تكون مكتوبة بالتفصيل بس الدكتور ما ينبه عليها الا حزة الحزة !
بس مو مشكلته لأنه كل شي مكتوب و الطالب المهتم بيعرف من نفسه ~

أول يوم حرصي تكون معاج لستة الكتب لكل المواد المحتاجتها
عن نفسي بهالجزئية أستعين بخبرة الي سبقوني بالدراسة ..
أول شي أسويه أكتب أسماء الكتب على نوت صغيرة ..
أبتدي أسأل أي الكتب الأفضل اني أشتريها جديدة و أي الكتب ما يفرق لو أخذتها من شخص
بعض الكتب يفضل تكون جديدة علشان التمارين ..
و بعض الكتب مثل الريضيات أحب أخذها من أحد لأنه ألقى فيها ملاحظات قيمة للأمانه
و في كتب تظل عندج فترة يعني بتستخدمينها بأكثر من مادة ..
بعد ما أسئل .. أروح الـ book store و أشتري الكتب الجديدة المحتاجتها
و بعدها أشوف لو عندي من رفيجاتي الي بتسلفني كتاب أحتاجه ..
و آخر شي أروح معرض الكتب المستعملة
أتوقع كل جامعه تسوي مثل هالمعرض و أشتري الكتب المحتاجتها
ياخذ مني هالكلام 3 إلى 4 أيام .. و غالبا أول يومين أو 3 ما ناخذ شي قوي
لكن أحرص إني أكتب كل كلمة و لو احتجنا الكتاب
احرص اني اصور الصفحات قبل الكلاس

[يتبع]

[آنسة مفهية !]

[ شلون أكتب الملاحظات و الأشياء المهمة أثناء المحاضرات ؟ ]

النوتس كثير يغفل انها هي مفتاحك عشآن تاخذين a بأي مادة
أقولكم ليش !
لأنه الدكتور هو أكثر شخص عارف شنو الشي الي لازم تركزون عليه
و لو كرره تأكدي مليون بالميه انه الجزئية الي قالها راح تكون ضيفة عليج بالاختبار
فلازم تجهزين لها عدل
في طرق وايد و الكل يختلف عن الثاني
لا تحاولون تصير وايد مرتبين اذا انتوا تفهمون اكثر بالفوضى
اتفهم هالشي لأني من هالنوع .. الترتيب الزايد بالنوتس يوترني يخليني افكر بشي ثاني غير الماده
أما اذا كنتي تفهمين اكثر لما يكون الشي مرتب فـ لازم تتبعين الطريقة الي تفهمين عليها
ما أقولكم لا تصيرون منظمين لأ
لازم يكون في تسلسل للأفكار و ترتيب
اهم شي ابيكم تركزون عليه هو التاريخ .. في كل كلاس تدخلينه كتبي التاريخ في البداية
عشان وقت الدراسة تعرفين .. و اذا طافتج محاضرة تقدرين تكتشفين ما تحت الأنقاض
يعني في مواد مثل الرياضيات اذا ما كتبتي التاريخ ضعتي خلاص
احرصوا على هالنقطه
العنوان الرئيسي مهم جدا بالاضافه الى رؤوس الأقلام أو نقدر نسميها الأفكار الرئيسيه
أنا أسميها مفآتيح الدرس
بعدها أنصحكم تخلون مساحه نسميها هامش للملاحظات أو التعاريف الي انذكرت من خلال الدرس

[آنسة مفهية !]

[ الثقه بالنفس و تكوين الصدآقات ]

الثقة بالنفس أنا من منظوري أشوفها مهمة بالحياة الاجتماعيه
بدونها ممكن الانسان يفقد لذة الصداقة !
الثقة بالنفس مو محصورة على هالشي بس
انتي من خقج تثقين بنفسج .. بقدرآتج .. بشكلج
بكل شي ~
و تكوين الصداقات ايضا متفق عليه انه صعب عند البعض
خصوصا لو كان مكان جديد عليج و تقريبا كل semster
راح تشوفين ناس جدد و اكيد بتصادفين القدم
المهم الي ابي اقوله .. انه كونوا على عفويتكم لا يهد حيلكم هالموضوع
لا تتوترون .. الناس بتحبكم على عفويتكم و اهم شي لا تتصنعون ~
عدم الثقة بالنهاية مو شي بصفج ابدا
راح يخسرج وايد
أعتقد الثقة بالنفس تحتاج نقضي وقت عشان نبنيها بنفسنا
لو كنا مهزوزين من داخل !
مو عيب نصارح نفسنا ..
اذا تحسين نفسج تفتقدين الثقة الكامله
وتعرفين انها تحرمج من امور وايد
حاولي تتخلصين من هالمشكله

[آنسة مفهية !]

آممممم البقية مَ قدرت انقلو لآنو فيه صور وشُروحات بَ ارواح هالشئ ممنوع
يارب تستفيدو ولو بَ القليل ()*

.
.

[البـرنـس]

شيء جمميـــل ~

يعطيك ألف عآفية

دمت بووووود

///