عبقرية المُهندس الضعيف !

[سعدون07]

أهلاً بالجميع ، أبارك لكم نهاية هذا المشوار المُمل ، وأتمنى لكم التوفيق والنجاح الدائمين !

المهندس الضعيف هو أنا - شخصياً - وأما مسألة العبقرية فلا يزال الشك قائماً حول مفعولها !

للأسف الشديد أني قُبلت مهندساً في القسم الموازي ، ولعلّ المُحزن في الموضوع هي ذاتُ الكلمة ( موازي ) التي تُشعرني بالنقص !
لا أعتقد أن المشكلة تكمن في المكآفأة التي تُصرف في أحد المقاهي ! ليست كذلك ! إنها مقدارُ الإهانة - بالنسبة لي - في مفردة ( موازي ) !

عموماً .. الخطة هي كالتالي :
1. جرُّ أذيال الهزيمة ، والانسحاب السريع من جامعة المؤسس ، والتحويل لمكان آخر .. بعيد جداً !
2. الانتقال من مرحلة الموازي إلى مرحلة المُهندس الحقيقي الكويّس !
3. بدء حياة سعيدة جديدة بعيدة عن كل مظاهر جامعة المؤسس !

هل من الممكن حدوث هذا الشيء ؟ ( التحويل من الجامعة بتخصص موازي والانتقال لجامعة اخرى بتخصص عادي ) ؟
وان امكن ، فهل أستطيع أن أتخصص مباشرة هناك ؟ بدون قضاء فصل في جامعتي الكويسة !


شاكر تعاونكم المسبق ،،

[تركي4444]

لا الاه الا الله ياحبيبي اهم شي انك مهندس عارف ايش يعني ؟؟ يعني بعد ماتتخرج ماحد بيسألك يقولك انت موازي ولا انتظام عادي احمد الله على نعمته وتمسك بتخصصك ولا تسحب ولا شي هادي الأفكار اللي في بالك حتروح اول ماتخش الكلية وتشوف حلاوة المكان اللي انت فيه وعلى فكرة ترى فيه غيرك كثير يتمنى الهندسة حتى لو يدفع فلوس كل سنة نصيحتي لك اشتغل على نفسك واخرج من قوقعة التفكير السلبي ولا تسمع لكلام اي احد خلي عندك هدف واحد وهو انك تتفوق في دراستك وتتخرج بأحلى المعدلات وتتوظف احلى وظيفة ان شاء الله موفق يارب

[Anas94]

اولاً احب اقولك شي، قبولك في الهندسة هذا معناته انك بذلت جهد اكثر من ناس كثيرين حلمهم كان الهندسة و ما انقبلوا !!
و على موضوع الموازي، دكاترة و مهندسين اعرفهم البعض منهم كان يدرس موازي و الان اتخرجوا و مبسوطين

ماعرف بس ممكن اللي حولينك بيقولولك السلبيات اللي ذكرتها ! بس صدقني اذا بديت تفتح اذنك للناس اللي بيحبطوك من البداية، و ما بنيت لنفسك قناعة !
والله لو انقبلت في هارفرد ( من اقوى الجامعات العالمية ) ح يجي واحد حاقد انك انقبلت فيها و يحاول ينقل لك مشاعر سلبية و ما راح تكمل فيها

نصيحة مني لك: انت جاتك فرصة انك تدرس هندسة و هذه الفرصة ما اتوفرت لكثير ! حس بقيمة انك تصير مهندس و كمل دراستك مين عارف ممكن بإجتهادك في الدراسة تكون افضل من كثر بيدرسوا فالانتظام

بالتوفيق لك

[T U R k i]

الفرق الوحيد هوا المكافأة فقط.. غير كذا مافي فرق حتى شهادة التخرج ماينكتب موازي... اقولك مبروك وكمل ماانت عليه غيرك يتمنى المكان الي انت فيه

[picasso]

على فكره كلمة موازي يعني الطالب بنفسه يدفع فلوس عشان يدرس ؟!
بالجامعة تدرس وما تدفع شي لكن ما تستلم مكافئة عادي زي اي احد
مافي فرق وتداوم مع الناس ومحد يعرف انك موازي ..

افضل حاجه عملتها الجامعه انها فتحت كليات بنظام موازي يزيدوا عدد المقبولين فيها
زي ما قال الي فوقي خخخ غيرك يتمنى الكلية الي انت فيها .. الله يوفق الجميع

[Jomy]

والله التخصص جامد لا تفكر فدا الشي تعبت سنه كامله وعشان موازي ما تبغى انت في كليه تعتبر من الكليات القويه بالجامعه وبتتخرج بمسمئ مهندس وكثير يتمنو هالتخصص فكر ززيييين كثيييير يتمنو مكااااانك

[khalid al]

انا مثلك ياخوي هندسه موازي والله اني ابوس يدي واحمد ربي كل ماتذكر اني انقبلت هندسه وعلى فكرة كانت فقط نسبتين تفصلني عن الهندسه انتظام

خلي عنك الافكار الي مالها داعي وادرس واجتهد

انا اسف بس فعلا تفكيرك جداا غريب مو تفكير واحد درس ودخل هندسه !!

اذا على المكافاه ها نحن درسنا 9 سنوات بدون مكافاه وقدمنا درجات ماعتقد حتى قدمناها في التحضيريه !!

انصحك نصيحه اخويه انك تكمل

والله يوفقك ويوفقنا

[L.a.m.a]

وإذا يعني انقبلت موازي ؟
الهندسة رغبتك وطموحك أو مجرد إسم عجبك ؟
لأن لو طموحك كنت ماتنازلت أبداً

قول الحمدلله يكفي إنك انقبلت في تخصص مثل الهندسة
ولا يفرق موازي وإنتظام ! الفرق في معدلك إذا تخرجت

[ططال عمري]

شوف يا الطيب ,
أنت جاوبت على سؤال " ايش الفرق بين طالب الانتظام و الموازي " !!
ترا بس المكافأة اللي تصرف بالمقاهي على قولتك
و دامها ما تفرق معاك الحمدلله , ليش زعلان ؟
اللي أعرفه أن أي طالب حاط رغبة " موازي " سواء طب هندسة حاسب!
يكون فعلا ناوي ع التخصص أياً كان , ليش أنت حاس انها انتقاص منك ؟
بتدرس نفس المواد بنفس الوقت بنفس المبنى بنفس كل شيء!!

هندسة و زعلان ؟ فعلا شيء غريب ,
ممكن تزعل لو ما كانت رغبتك أساسا هندسة ,
بس دام ان عندك فكرة , انك تدرس هندسة بمكان ثاني و تصير مهندس حقيقي مالها داعي الشعور بالانتقاص!
عموما , لو بتروح مكان ثاني فين مثلا ؟
جامعة حكومية ؟ بتدرس تحضيري من جديد عشان تصير تدخل هندسة و أنت حالياً هندسة بجامعة حكومية و بكلية حاصلة على الاعتماد الاكاديمي abet !!
ولا بتروح كلية أهلية و تدفع ؟ < هنا بينطبق عليك مثل كأنك يابو زيد ما غزيت , يعني نفس الموازي و بالاهلي بالعكس بتكع مبلغ و قدره
هنا بالجامعة ما بتدفع شيء ولا بتاخذ شيء =)

عموما أنا أحس دام الرغبة موجودة , لا تحول ولا تروح بمكان و خلك مكانك و قول الحمدلله غيري ما أخذ هالمقعد!
فكر أن وثيقتك و شهادتك , بتكون نفس قوة و شهادة وثيقة طالب انتظام =)

بالتوفيق يا مهندس =)

[RHF]

هدول الناس نفسهم الي بعدين لمن يشتغلو يتركو كل حاجة و يتناقشو في المسميات الوظيفية


-

سار الموضوع كلو في كلمة موازي ؟