وقعت في مشكلة يارب انكم تساعدوني

[snake2]

السلام عليكم ورحمة الله وبركاته
حدخل في الموضوع على طول

يا جماعة انا غلطت غلطة فادحة
وانا اسجل البيانات الاكاديمية لأختي
غلطت وحطيت معدلها التراكمي حق الثانوي غلط

ايش راح يسير الله يسعدكم قوليلي
وايش الحل في نظركم

لأنو اختي دوبها اتخرجت ولما جيت اسجلها غلطت الغلطة هذي
هل حينرفض الطلب لما يجو يطابقو المعلومات ؟؟!!

[aced]

روح عمادة القبول والتسجيل يمكن يعدلون لك الدرجة او يخلونك تسجل من جديد عندهم .. مكان العمادة خلف مسجد الجامعة .. لا تشيل هم :)

[حيــــــاة]

حسب ما قرأت انه هم يتأكدوا من كل النسب والدرجات ،، فمو مشكلة ،
وللتأكد راجع العمادة ،
او اتصل عليهم ،
وهذه حساباتهم في تويتر كمان اسألهم

@admission_f

@admissionweb

@hussam_kau

..
صحبتي كان عندها خطأ في الارفاق واكدت الطلب ، ولم راسلتهم فتحوا لها الملف وعدلت ورجعت اكدت ،

بالتوفيق : )

[sa3lola]

اتصلي علي العمادة ويفتح لك عشان تعدلي

[Hatoon hamed]

ترى انا كمان غلطت في نسبة الثانويه حقتي .. ورحت و لا قالو شي ..
يعني ما عرفو .. و بعدين رحت الين بدهم يسوولي البطاقه .. قمت قلت للموظفه
و راحت عدلتلي هيا .. بس لو ما قلتلهم ما راح يدرو ..
لكن دحين صارو يطلبو ارفاق الشهاده مو ؟ .. فخلاص ما يحتاج تصححها لانها عندهم و هما حيشوفوها .. الا اذا تبغى خليها تروح يوم ما يجو يدوهم البطاقات و تكلمهم هناك ..
مع انو دحين اعتقد لمن حيروحو بس حيدوهم بطايقهم بدون تأكيد بيانات .. لانهم ارفقو الصور و كل شي .. مو زي العام احنا نوديها بنفسنا ..

[snake2]

الله يطمنكم يا اخوات ووجزيكم كل اجر وخير زي ما طمنتوني .. تسلمو حبايبي

[Lujain :)]

-


على حسب غلطك !
إذا كان بجزء من بعد الفاصله مايهم لما تروح هناك إن شاء الله يعدلوها ( صارت معي )
اما لو كان الرقم مره بعيد عن النسبة الاصليه فالأفضل تكلمهم من دحين
هو برضو محا تفرق تتعدل هناك بس عشان ايام القبول حسب النسب ..
فعشان تضمن الايام الأولى وتضمن العلمي تعدلو من دحين أفضل .

بالتوفيق

[رآمـــآ]

صارت معايا نفس المشكلة العام ، اتصلت على عمادة القبول و التسجيل و رجعوا فتحوا لي الطلب من جديد ف لا تشيلي هم .. بالتوفيق

[رآمـــآ]

عمادة القبول و التسجيل 6952000 التحويلة 52222 و اتاكدي من الرقم في الموقع

نصيحة كلميهم على الساعة 9 او 10