عدة أسئلة عن ابتعاث الملك عبدالله وارامكو

[crowzing]

سلام عليكم

أنا سمعت معلومة أنه إذا انت قدمت على الجامعة وبعدين قدمت على بعثة الملك عبدالله رايحين يلغو البعثة حقتك صح المعلومة هذي ولا غلط؟

وكمان هل لو أنا ابتعثت أدرس في البداية على حسابي؟ علما بأني وافي كل الشروط الحمدلله

وهل البعثة حقت الملك عبدالله أحسن من بعثة أرامكو؟

وعلى فكرة أنا الين داحين مسجل في 4 جامعات: الملك عبدالعزيز والملك فهد وأم القرى وطيبة
وداحين أبغا أسجل كمان في ابتعاث أرامكو وهنتظر بإذن الله كمان ابتعاث الملك عبدالله <<< سويت كشري صح؟

لأني الين داحين ماني محدد ايش أبغا أكون وأحس أني لو دخلت في أي مجال راح أبدع فيه
ومعروف أنه مافي أحسن من الطب صح؟

بس ياليت تفيدوني ايش احسن مكان من هذولا؟ وفين أروح؟ والله محتار ماني عارف ايش اسوي

[lord konvict]

اولا اخوي بالنسبة للجامعة تلغي البعثة فهادي المعلومة خاطئة ممكن تقدم ع البعثة وانت ف الجامعة عادي ولو انقبلت راح يخلوك تسحب ورقك عادي وكدا اما الباقي ما ادري عنو
ثانيا اول شئ تسوية انك تصلي استخارة وتقرا عن جميع التخصصات يمكن تفضل تخصص عن الباقي وتبدع فعلا فية

[Dr. Abdul]

اهم شي يوم تدقيق الوثائق في بعثة الملك عبدالله تكون ساحب من الجامعة لو شهادتك مختومة وتجيب ورقة اخلاء طرف لانه حصلت لي دي الحركة وراحت علي البعثة لاني ما جبت الاخلاء الطرف

اما بخصوص ايهما افضل ارامكو ولا برنامج خادم الحرمين

مافي مقارنة بين الاثنين لكن برنامج خادم الحرمين للتخصصات الصحية فقط في مرحلة الباكلوريوس

اما ارامكو اعتقد مافيها تخصصات صحية ماني متاكد بس اكيد مارراح ترسل بعثة الا في تخصصات تحتاجها الشركة

[ABDULELAH AL QARNI]

بعثة أرامكو لتخصص الهندسة و أول حاجة تدرس في الظهران سنة و بعدين يبتعثوك لأي دولة أظن عندهم بعثة لخمسة دول بس أمريكا و اليابان و بريطانيا و دولتين ما أذكرهم و مو انتا الي تختار الدولة هم على حسب درجاتك في السنة الي تدرسها في الظهران و هما يختارو التخصص الي تدرسه على حسب التخصصات الي تحتاجها الشركة و بعدين لمن تبغى تسحب من بعثتهم ترجع لهم كل ريال صرفوه على بعثتك ............
هذا الكلام من الوالد و أخويا و ولد عمي أنا انقبلت في بعثتهم قبل كذا و كلهم نصحوني ما أروح و الحين الحمدالله دخلت جامعة عزوز و درجاتي عالية .........
انتا استخير و شوف الي يناسبك والله يوفقك يارب
أعتذر على الإطالة و اتمنى اكون افدتك