اعزائي ..احتاج مشورتكم ..

[tex]

السلام عليكم ..

نفسيتي جدا جدا تعبانة في هذا الاسبوعين .. درجاتي سيئة .. ومعدلي أسوء - 3.25 - وممكن ينزل زيادة .. ميولي ما كانت علمي من الاساس وكنت ضائع وما ادري ايش اريد عكس الان لكن فات الاوان .. افكر اسحب ملفي واسجل معا الدفعه الجديدة بعد الصيف أختصاص أدراي .. ايش رأيكم ؟ هل استطيع ؟

محتاج اي كلمة ممكن ترفع معنوياتي مثل ما قلت نفسيتي سيئة وفكرة سحب الملف في دماغي من يومين وما قادر انام كويس .. ابي اعرف فقط هل استطيع ؟

[S.Bn]

شوف اول شي استخير

تاني شي اسأل اللي حولك

بعدين اذا ميولك مو علمية الافضل انك تحول للادبي



و دا اللي اقدر افيدك فيه

الله يسر امورك و يفرج همك

[Nina MD]

صحيح أول شي أستخير :)

ثاني شي تقدر تعيد التسجيل مرة ثانية . لكن إنك تحول إلى إداري هذا شي إنت تعرفه أكثر

خصوصا انك دارس علمي بالثانوي وسنة تحضيرية وإنك فشلت فيها أو جبت معدل أقل من مستوآك هذا مو يعني إن ميولك مو علمية

[طبيب القلوب]

و الله إذا ميولك ما هي علمية ( و عندك استعداد تعيد السنة ) إذن توكل على الله ،، و ابدأ بالاستخارة فالله سبحانه ما بيختار لك إلا كل خير ،، و الله يسهل لك أمورك

[tex]

شكراً لكم : ) .. انا خلاص قررت راح اسحب ملفي واعيد السنة "اداري" إن شاء الله بس .. انا اطلعت على مواد الادراي اقل ما يقال عنها piece of cake !! اي شخص في هذي الحياة يقدر يجيب 4 او 4.5 بأبسط جهد !
بعدها اقدر ادخل كلية الحاسبات او الاداب "لغة انجليزية" وانا مرتاح من عدم هبوط المعدل او رفعه مستقبلاً *__*

بس.. بس احد يدري اذا كان في شروط ؟ كذا بكل سهولة اسحب ملفي واقدم في الصيف للدفعه الجديدة ؟ ..آسف اعرف ان الموضوع مكرر لكن هذي طبيعه المنتدى على اي حال ..

[نسيم الجوري]

الشي الوحيد اللي يوتر بموضوع سحب الملف والتسجيل من جديد
انو ممكن دفعه السنه الجايه توقف نسب قبولها على موزون عالي :/

افضل شي الاستخاره قبل كل شيييي

[DedoOo]

دآمك عقدت آلعزم على آلسسحب .. آسأل اذآ تقدر تقدم من جديد لو سحبت دحين مع الدفعة الجآإية آو لآ ..

والله يوفقك ويكتبلك اللي فية الخير يآرب ..

[shox2]

اللي اعرفه في السحب و التقديم مع الدفعه الجديده لازم يكون ماضي على سحبك 3 شهور اعتقد و ممكن اكثر
راجع العماده و افتاهم معاهم

الله يكتب لك ما فيه خير وصلاح

[dr.ro0ody]

المشاركة الأصلية كتبت بواسطة tex شكراً لكم : ) .. انا خلاص قررت راح اسحب ملفي واعيد السنة "اداري" إن شاء الله بس .. انا اطلعت على مواد الادراي اقل ما يقال عنها piece of cake !! اي شخص في هذي الحياة يقدر يجيب 4 او 4.5 بأبسط جهد ! بعدها اقدر ادخل كلية الحاسبات او الاداب "لغة انجليزية" وانا مرتاح من عدم هبوط المعدل او رفعه مستقبلاً *__* بس.. بس احد يدري اذا كان في شروط ؟ كذا بكل سهولة اسحب ملفي واقدم في الصيف للدفعه الجديدة ؟ ..آسف اعرف ان الموضوع مكرر لكن هذي طبيعه المنتدى على اي حال ..

كليه الحاسبات علمي بس
وزي مازكرت الاخت اللي فوق
مو يعني جبت معدل اقل من مستواك ف يدل هادا الشي انوا ميولك مو علمي ؟؟
ودرست كمان تانوي علمي

انا بشوف ازا معدلك تحت 3 تستخير وتسحب وترجع علمي طبعا لانوا بتكون عندك فكرة عامه عن المواد والجامعه
وازا معدلك فوق 3 شد حيلك وكمل وادخل كيمياء ازا ميولك مررة حلو ومطلوب في ارامكو وسابك او ادخل اي كليه واجلس فيها ترم وارفع معدلك وحول


لاكن تحول اداري بشوف مرة حرام وقهر

[tex]

dr.ro0ody والجميع .. اهتمامكم يعني لي الكثيييييير .. شكراً لكم : )

مسار الاداري يدرسون مادة الحاسب نفسها الي ندرسها فإذا كانت للعمي فقط فإيش الحكم من المادة ؟ يتعبونهم بس ؟ .. عموماً انا بسأل العمادة يوم الاثنين عن كل شيء .. وان كانت للعلمي بس .. فراح اسحب ملفي واقدم في الصيف للدفعه الجديدة "إن امكن" وما راح اكرر اخطائي :

1) راح ادرس ليفيل 2 و3و4 واجيب فيهم A+ وتنضاف 6 ساعات في المعدل
2) ما راح استهين بالحاسب ومهارات الاتصال خصوصاً بعد ما درستهم A+ و6 ساعات
3) خلاص بعد ما درست الفيزياء والرياضيات للمره ما اعتقد راح يصعب علي اجيب درجات عالية فيها في المرة القادمة !

بالنسبة للباقي مهما خبصت فيهم راح يضل معدل مرتفع :)

انا بشوف ازا معدلك تحت 3 تستخير وتسحب وترجع علمي طبعا لانوا بتكون عندك فكرة عامه عن المواد والجامعه وازا معدلك فوق 3 شد حيلك وكمل وادخل كيمياء ازا ميولك مررة حلو ومطلوب في ارامكو وسابك او ادخل اي كليه واجلس فيها ترم وارفع معدلك وحول

الجزئية الاولى من كلامك هي الي بتسير ان شاء الله .. معدلي ما راح يكون تحت الثلاثة بس انا مما ابي اعيش ال5 السنوات القادمة وانا في هم كيف ارفع المعدل -___-

الجزئية الثانية .. موضح موقفي تجاهها فوق ^