بقي أسبوعان فقط : طلاب وطالبات خطة أ الجميلة و ب

[the change]

السلام عليكم ورحمة الله وبركاته












كيف الحال أخواني وأخواتي , و أبنائي وبناتي الطلبة

زمان عنكم والله , وعن المواضيع التشجيعية هنا وردودكم الجميلة

طرحت الموضوع يوم أمس الجميل , وقلت انزله هنا كمان حتى تعم الفائدة للجميع ان شاء الله




بقي اسبوعين على اختباراتنا الدورية الثانية

سواء قدمنا شيء طيب ودرجات مفرحة في الدوري الأول أو لا فالدوري الثاني دوري التغيير دائما

الاختبارت حتبدأ بعد الاسبوع الجاي يوم 29-5






طلاب خطة أ الجميلة والممتعة وكل شيء :

عندنا ماث وفيزكس وحاسب ومهارات

الحاسب والمهارات يمدينا في يوم الاختبار نذاكرها


لكن يوجد حالة استثنائية :

لو خلوا الحاسب مع مادة أخرى !

وحصلت كثير الترم الماضي على حسب كلام طلاب خطة أ الترم إللي فات

فلازم يتذاكر ويتختم الحاسب قبل الاختبارات

يسير تمسكوه الويكند هذا وتذاكروه مزبوط (نظري + عملي ) وتتفرغوا الاسبوع هذا والجاي كله فقط للفيزيا والماث

لان المهارات كمان مايبغاله كثير



لو بدأتوا من اليوم مثلا مسكتوا رياضيات ولا فيزيا مح يجي الخميس ولا الجمعة إلا وانتوا مختمين وكل شيء ان شاء الله


أحب أنوه عن شيئين جدا مهمة , والشيء هذا حصلي والله يهدي الجميع ان شاء الله :


1- في الرياضيات كان فيه موقع لاحدى الدكتورات بتزل فيه وورك شوب للمادة , وجدا مهم

وأنا مع دكتورتي إللي كانت تدرسني مابلغتنا عن هذا الشيء أبدا ولا جابت سيرته , وماشاء الله عليها جدا مهتمة لكن في هذا الشيء ماذكرتلنا هوا أبدا

بعد الدوري الاول الكل خرج مبسوط وفرحان ويقولوا : جات الاسئلة بالنص منه (الموقع ) ونفس الافكار وكل شيء

لما حولت عند دكتورة ثانية عادتها وزادتها مليون مرة في كل محاضراتها وفي كل مرة : افتحوا موقع الدكتورة (بثينة قشقري) ونزلوا

منه الوورك شوب وحلول التمارين والاسئلة جدااا مهمة ويجي منها في الاختبارات


موقع الدكتورة بثينة : http://bkashkari.kau.edu.sa/Default....0009138&Lng=AR


فهنا نصيحة للطالبات وللجميع كمان

- اسئلوا واستفسروا عن الاختبارات والمذاكرة : هل فيه مواقع هل فيه أسئلة معينة في مكان معين او لدكتور معين او مراجعات او ملخصات معينة مهمة

لانو لو حتعتمدوا على كلام دكاتركم فقط فممكن توقعوا وقعة زي ماوقعت أنا والله يهدي الجميع ان شاء الله , هذا الشيء السلبي في

السنة التحضيرية – مراجع ومصادر ومواقع وأشياء كثيرة جدا للمذاكرة والمشكلة في النهاية كلها تعتبر مهمة - !!




طالبات : ادخلوا اليوم على موقع الدكتورة ونزلوا الاسئلة وبعد مذاكرة كل درس أو محاضرة اجلسوا عليها وافهموها وموجودة بالاسئلة وحلولها


بالنسبة للطلاب بخصوص هذه النقطة : سمعت انو عندهم من اول وورك شوب للدكتور حمزة

فذاكروه وركزوا علـ الاشياء اللي يقلك عليها مهمة



2- الفيزياء دكتورتي من أفضل الدكتورات وماشاء الله شرح وروعة وكل شيء

قبل الاختبار سألناها هل نحتاج إننا نذاكر من ملخصات زي ""أشرف بركات ويوسف زويل "" ولا لا لان طالبات الترم اللي فات يقولوا

جدا مهم واهم من الكتاب وماذاكروه أصلا فما رأيك يا دكتورة ؟


قالت لا , أبدا , مش مهم , الكتاب والسلايدات فقط , وولا حيجكم منه أبدا أبدا أبدا

وأختكم العزيزة "التغيير" صدقت وذاكرت زي الدوافير من الكتاب الكبير الجميل والسلايدات اللي هي أساسا من الكتاب برضو وما مسكت ولا ملخص


في النهاية والله العظيم معلومات وأسئلة بالنص جات من ملخص أ. أشرف بركات

لقوها بالعربي الصريح معلومة كاملة مكملة في ملخصه وبالتوضيح والسؤال جا بالنص ونفسسس فكرة أ. الدكتور والبروفسور أشرف بركات

جاتني صدمة نفسية , مافي مصداقية ومايدروا عن شيء , او مايبغونا نذاكر منها وهم عارفين ان الاسئة منها !!




الفيزيـــــــــــاء طالبات : كتاب وسلايدات وملخص أشرف بركات أو يوسف زويل

لكن المُجرب الان هو أشرف بركات


أما بالنسبة للطلاب فبصراحة مادري كيف وضعهم


.
.


هذه النقطتين اللي حبيت أركز عليها لطلاب خطة أ ( الحاسب + الاسئلة والاشياء المهمة للدكاترة )






خطة ب الاجمل والاحسن والاكمل والأروع وكل حاجة في الحياة :



الاحياء ذاكروا السلايدات هي مرجعكم النهائي والاول والاخير

حسب كلام إحدى الدكتورات انو الترم هذا معتمدين على السلايدات فقط في الاول والاخير

وبعدين للتدريب عندكم التريننق

المطلوب : تبدأو تذاكروه من اليوم عشان تختموه , وسهل وجميل وA+ ان شاء الله


عشان مايجوا طلاب قبل الاختبار بيوم ولا يومين وينزلوا مواضيع عن الاحياء ولا يتشكوا

اهوه أنا بنبهكم ترا لا وقبلها باسبوووعين



ترا الاحياء + مهارت الاتصال

مواد ترفيع معدل ومستوى (من وجهة نظري وبالنسبالي وان شاء الله تكون بالنسبالكم كلكم سهلة وجميلة )

لانو مايبغالها


الكيميا : نفس الشيء ذاكروه , وهو زي الرياضيات والفيزيا يبغاله إطلاع على أسئلة وأفكار وكل شيء

عندكم التريننق

الدوري الثاني والنهائي جاتنا الاسئلة من التريننق الترم الماضي وكانت مو بس حلوة

إلا حلوة مليون مرة الحمد لله وجبنا درجات حلوة

+ نماذج أسئلة اعوام سابقة + بعض مواقع الدكاترة و الدكتورات المهمة جدا زي د. أكرام دانش + د. ليلى الحربي >> طالبات


ذاكرت في الاختبار النهائي من أسئلة لعام 29 و30 و31 وماجا إلا من 29

في الغالب يجي توقع الشخص انو حتجي الاسئلة للسنة الاقرب , يعني لعام 31 مثلا لكن ماشاء الله جامعتنا لاتعترف بهذا الشيء

وتُخرجنا طلاب دوافير عن جدارة ومايتخرج منها إلا دافور >> واحد ذاكر من كل شيء في الحياة وتخرج منها

يعني : ذاكروا من كل أسئلة الاعوام السابقة وخذوا إطلاع عنها وعن نوعية الاسئلة فيها


موقع الدكتورة إكرام : http://eydanish.kau.edu.sa/Default.a...0002173&Lng=AR

موقع الدكتورة ليلى : http://www.kau.edu.sa/CVEn.aspx?Site_ID=0005193&Lng=AR




الاحصاء سهل وبسيط , لكن شابتر 5 حق الاحتمالات يبغاله فهم وتركيز وتدريب أقوى شيء

وأنا أعيد وأكرر شااابتر 5 ياجماعة

نص أو كل الاسئلة في الدوري الثاني جات منه , حتى في النهائي ركزوا عليه بشكل مو طبيعي


طالبات : ماذكرنا من التريننق تبع الاحصاء ولا أي شيء مجرد الكتاب وتمارينه والامثلة إللي فيه +السلايدات + نماذج أعوام سابقة

ممكن ترجعوا لملخص جمال السعدي , شخصيا الترم اللي فات ما اعتمدت على أي ملخص

كتب وسلايدات ومحاضرات والحمد لله , ماكان فيه وقت أصلا امسك الملخصات

لكن في النهاية كل واحد وفهمه ووضعه , لان الكل يمدح ملخص السعدي الله يعطيه العافية



طلاب : حسب إللي أعرفه إنو ماتعترفوا بالكتب أصلا

سلايدات + تريننق + وبعض الواجبات في مواقع بعض الدكاترة عندكم زي د. سعيد الغامدي ود. عبد القادر داغستاني + وأكيد لكم

ملخصات تذاكروا منها زي ملخص أ. جمال السعدي


موقع الدكتور سعيد : http://saalghamdy.kau.edu.sa/Default...0003610&Lng=AR

موقع الدكتور عبد القادر :http://saalghamdy.kau.edu.sa/Default...0003610&Lng=AR








خلاصة الموضوع لكلا الخطتين

أبدأو ذاكروا + وشوفوا وضعكم من الحين

والله يوفقنا يارب

[ghazl]

يعطيك العافية


ع فكره موقع الدكتورة إكرام مالقيت فيه شيء عن كيمو 110

[shox2]

اكرام بطلت تدرس 110كل ما يخص الكيمياء موجود في موقع ليلى الحربي مجمعه عن كل الاستاذات

[{ فيفو ~]

الترم اللي فات أبدا ماحطوا مادة مع الحاسب ، ماأعرف من فين تجيبي معلوماتك

لكن ماقد صار وحطوا مادتين مع بعض بالنسبة للبنات

[sara g]

الله يسهلنا لنا يااارب هااانت

[the change]

أهلا


أنا جبتلكم موقع الدكتورتين اللي نزلنا منهم نماذج الأسئلة والمراجعات والاشياء المهمة الترم الماضي واللي انا استفدت منه شخصيا

فعذرا , ححذف موقع الدكتورة إكرام مدام إنه مو مهم , لكن برضو ترا مراجعاتها والاشياء اللي كانت بتنزلها مهمة


+


اختبار الحاسب قالتلنا عليه احدى الدكتورات , ونبهتنا عشان نحط في بالنا انو ممكن يكون مع مادة أخرى

بالاضافة لوحدة من الطالبات قالت انو كان مع مادة ثانية

عموما : سواء صحت المعلومة من الطالبة أو لا , فكلام الدكتورة هنا هو الموثوق ^^

بالتوفيق


..........


طالبات خطة ب : ركزوا علـ تريننق الكيمياء وان شاء الله تجيكم نفس أسئلتنا لانو لو جات نفسها فباذن الله كلكم " ماركات مفلفلة" << دائما أنسى حرف اللام مشكلة والله

[سملّق :)]

موضوع على أكوس مايكون

بس ماركات مفلفلـة ما اعتقد ... يمكن ( ملفلفـة ) بس مفلفله .. مره مره ماتدخل المخ !!

اعجبني الموضوع شامل وكامل والكمال لله ..


التغيير ( دايم مواضيعك على الجرح ) .. اشكرك

[اجلس في البيت يعني؟]

التريننق بالكيمستري قصدك تست بانك ولا غير عنه ؟
اما الاحياء زي الاتصال لا والله ماحزرتي فيها هع
ومشكووره على الموضوع فادني كثير :)

[رفيقي كتاب ربي]

موضوع (رآآآئع ومفيد>لها قصه :p )

بجد مرااااا استفدت من كلامك .. يسلمو ي عسل ي متفائله ومجتهده انتي ^_*

[noonz]

-

اللـه هالله ،
دائما مواضيعك محفزة وتساعدنا أنه نشد الهمة أكتر ..
كياني ، كلمتني عنك : حبيتك وحبيت شخصيتك المتفائلة ،
أستمري يا بت وخليكِ كدا على طول
منجد أشكرك ع المعلومات الله يجعلها ف ميزان حسناتك
وعلى حكاية الحاسب ؛ يمكن. الأستاذة قصدها ع الإختبار العملي ، صحيح هوا بعض الأحيان يصادف اختبار معاه ف نفس اليوم ، طبعا على حسب الأستاذة متى تقرر. تحطه أي يوم !
ترى أنا وصحباتي كنا جالسين نقرأ موضوعك ف كلاس الحاسب أمس خخ!