بنات دراسات طفوله

[dandoosha]

السلام عليكم

كيفكون صبايا

انا طالبه سنه تحضيريه وحابه اسأل عن دراسات الطفوله ايش المواد اللي تاخدوها

وكمان حابه اعرف في دراسه تربيه خاصه لاني مره حابه دا المجال ومره نفسي فيه

وإذا مافي طيب كيف احاول اوصلو يعني ادرس دراسات طفوله وممكن اشتغل في مجال التربيه الخاصه

وإذا ابغا اسأل في الجامعه اروح لمين ممكن يفيدني

لاني مو عارفه اسأل مين

بلييز تساعدوني واكون ممنونه

[Roa'a]

ان شاء الله ((ساكنه في بيتنا ))
راح تفيدك في دا الموضوع
لأنو هذا تخصصها

ساكنه إليك الماااايك

[dandoosha]

Roa'a
مشكوره إن شاء الله ((ساكنه في بيتنا ))

ترد عليا بأسرع وقت لانو قرب وقت التسكين وانا محتاره ايش اسوي

[ساكنه في بيتنا]

وعليكم السلام ورحمه الله وبركاته

يسلمو رؤى ^_^

حاليا التخصص بيدرس امكانيه فتح مسار الاحتياجات الخاصه .. بس موجوده مواد ممكن اللي ياخدها يكمل ماجستير عليها يكون متخصص في الشي دا , و موجود عندنا دكتورتين متخصصتين في الاحتياجات الخاصه و حده ليها عيادات و التانيه مدري عنها ..

عموما القسم يتكلم عن الطفل و احتياجاته و نفسيته و كيفيه التعامل معاه و الشي الصح و الشي الغلط و كيف انك ممكن تكوني شخصيته .. ( بالعربي كيف تهتمي بالطفل من جميع النواحي ) ..


* نبذه مبسطه عن القسم : طبعا أي وحد ه تفكر تدخل الطفولة لأنو أسهل قسم ومدري ايش من الكلام دا و ربي لا تكره نفسها و اليوم اللي اتخصصت فيه

القسم مهو سهل و في نفس الوقت مهو صعب .. على قولتهم السهل الممتنع  .. يعني لو انتي حابه القسم اكيد راح تبدعي فيه و راح تهون عليكي حاجات كتير ..

* اكتر شي في الطفولة العملي .. راح يكون فيه شغل لما تكرهي نفسك و الاطفال : << و تبغي الناس كمان تتخصص

مممممممممممم ايش كمان .. اه

* اكتر شي يطفش انو كل دكتوره تبغا فكره التكليف فيها ابداع << على اساس اننا وارثين الابداع من بيكاسو
بس الشي دا تحسي بحلاوته لما تجي الدكتوره اخر الترم و تقولك التكاليف حقتك عجبتني و ابغا احطها في ملف الماده في المكتبه عشان البنات اللي بعدك يستفيدوا .. << بالعربي على ينتفع به ان شاء الله


* احلى شي في القسم انو المواد مره تفيدك في حياتك و تطورك لا شعوريا في تعاملك مع الاطفال و ربي تحسي بالفرق بين معاملة وحده فاهمه ايش تعمل و وحده ما تعرف شي عن الاطفال .. على الاقل انتي تكوني عارفه ليش بتعملي كدا ممكن وحده غيرك ما تكون متخصصه و تعمل نفس الشي بس ما تدري ليه !!

طبعا غير المعارض اللي بتتعمل من التكاليف اللي تعبنا فيها طول الترم .. يعني تحسي بجد تعبك ما راح في الهوا .. كلهم يقدروا مجهودك و يعطوكي اللي يرضيكي ان شاء الله ..


* نبذه عن الدكاترة :
و لله الحمد من أفضل الدكاتره راح تلقيهم عندنا في القسم بالذات في المعاملة .. كلللللللللللللهم ذوق و اخلاق , احس الناس تحسدنا على دكاترتنا الحمد لله ( و الله من غير مبالغه ) ..

اغلب الدكاتره تحسيهم اخواتك الكبار لو عندك مشكله يساعدوكي لو مضايقه يسمعوكي .. أي شي تبغيه منهم راح يقدمولك هو لو كانوا يقدوا ..


* طبعا اول شي يجي في بال أي احد , قسم دراسات طفوله = معلمة رياض اطفال و دا الشي اعتبره جهل بالقسم و امكانيات الطالبات المتخرجات من القسم , لانو مجالات العمل و التوظيف في قسمنا مره كتير و ممكن حتى تشتغلي و تسترزقي و انتي في بيتك ..


مثلا يعني ممكن تكوني : معدة برامج رياض الاطفال سواء في التلفزيون او الاذاعة , رسامة قصص أطفال , كاتبة قصص أطفال , استشارية تربية الاطفال , اخصائية في علم نفس نمو الطفل , معلمة للاحتياجات الخاصه ......

و بالنسبة لمجالات المشاريع الصغيره من البيت :
ممكن انك تصنعي لوحات و خامات تحتاجها معلمة رياض الأطفال أو أي أم مهتمة بتعليم طفلها بطريقة مثالية و تبيعيها بأسعار رمزية .. و ممكن انك تفتحي حضانه في بيتك ان شاء الله لو تكون مختصره على اطفال عائلتك و الجيران ..

اللي يفكر يلقى الف طريق و طريق بس نحن اتعودنا انو الشي هو اللي يجينا لحدنا ..




دا كل اللي جا في بالي حاليا ,, أي استفسارات نحن في الخدمة  ..

ان شاء الله اكون افدتك ..

ساكنه في بيتنا

[dandoosha]

ساكنه في بيتنا

الله يسعدك يارب كفيتي ووفيتي مشكووووووووووره

وجزاكي الله خير

من جد رديتي فيا الامل لانو كل البنات يقولولي انو مافي تربيه خاصه

وانا مره نفسي اتعامل مع الاطفال وخاصه ذوي الاحتياجات الخاصه انا حابه دا الشي ويارب اتوفق ويتيسرلي

دخول دا القسم لانو رحت العماده قالولي دراسات طفوله لبنات تحضيري اداري انساني وأنا تحضيري علمي

مشكوره تاني مره ويارب يوفقك ويحقق لك امانيكي

ما تدري قد ايش انبسط من كلامك

ما ننحرمش

[ساكنه في بيتنا]

امين يارب و اياكِ :) ..

غريبه !!

على ايامنا من 4 سنوات كانوا يقبلوا العلمي و الادبي بس اللي نسبتها عاليه ..

بس يمكن عشان شالوا الكيمياء و الاحياء من الخطه الجديده << تسأل و تجاوب نفسها

يالله على العموم ربنا يوفقك ان شاء الله و يكتبلك الخير :) ..

[dandoosha]

اميييييييين يارب

موفقه بإذن الله

[Kids LOver]

ماشاء الله سوسو كفت ووفت
بصراحة انا ما ابدعت إلا في الطفولة والحمد لله
الكل صار يقدرني لأني بشهادة الجميع مبدعة
اهم شي انك تكوني حابة المجال
مو بس احب الأطفال لأ لازم تكوني صبورة وعندك سرعة بديهة
ونشيطة ومرحة كمان ههههه بجد ما اعرف في ناس نكديين وبيتعاملوا مع
اطفال مره ما تضبط

[ساكنه في بيتنا]

المشاركة الأصلية كتبت بواسطة kids lover ماشاء الله سوسو كفت ووفت بصراحة انا ما ابدعت إلا في الطفولة والحمد لله الكل صار يقدرني لأني بشهادة الجميع مبدعة اهم شي انك تكوني حابة المجال مو بس احب الأطفال لأ لازم تكوني صبورة وعندك سرعة بديهة ونشيطة ومرحة كمان ههههه بجد ما اعرف في ناس نكديين وبيتعاملوا مع اطفال مره ما تضبط

^_^

ولو خيتوو .. دا قسمنا وحبيب البنا من قوه

خخخخخخخخخخخ

مشي حالك اعرف بنات ما يحبوا الاطفال بس دخلوا القسم , متأملين إنهم يحبوهم ..

بيني وبينك ناس زي كدا الله يعين بزورتهم ..


كلمه سر :

سوري جيت اعمل اقتباس جا تعديل بالغلط .. متعوده يكون التعديل بس في مشاركاتي ,, قله ولف بعيد عنك ..

[تخصص 13]

مشكورة ساكنة وفيتي وكفيتي

[ساكنه في بيتنا]

:)

العفو يا البي ما عملنا شي ..

[ذنبي طيبتي]

طيب انا فكرت ادخل هاذا القسم بس بصرااااااااااحه انا مااحب اشتغل واسوي اعمال لو دخلته اقدر امشي فيه

[ساكنه في بيتنا]

حتتعبي قد شعر راسك

وربي التكاليف في قسمنا تخليكي تشدي شعرك ..

مو من صعوبتها لا ,, بس من كترتها ..

[عصر الحاسب]

مشكوررررررة يا ساكنة في بيتنا <<اعجبني النك هههه

بس والله احبااط انه للأدبي والعلمي لاااااااا :(

ياليت اذا تعرفين التخصصات التابعة للاقتصاد المنزلي لطالبات المسار العلمي اكون شاكرة لك :)

[ساكنه في بيتنا]

..

دي هيا تخصصات العلمي عندنا يا بط بط ..

$ الغذاء و التغذية .
$ نسيج و ملابس .
$ مسار تصميم داخلي .

اي سؤال تاني نحن حاضرين :) ..

[بنوته دلووعه]

مشكوووووووره اختي ماقصرتي ...
بس حابه اسالك؟؟؟
انا احب الاطفال واحاب اتعامل معاهم
ونفسي اتخصص في هذا المجال
لكن انتي قلتي في تكاليف والي ماتحب الشغل بتتعب اش تقصدي بهذا الكلام يعني اش نوع هذه التكاليف مو خاصه بالاطفال فقط ،،،
والدراسه بالعربي ولا الانجليزي
اسفه عالإطاله
ولك مني جزيل الشكر والعرفان

[ساكنه في بيتنا]

الدراسه بالعربي

بس فيه تكاليف بالانقلش بس سهله و بسيطه ..

و التكاليف ما تتعب من صعوبتها لا

من كترتها .. مره اختي تقولي انا مني عارفه انتي طب ولا طفوله من كتر ما اكون مشغوله وما الحق اجلس معاهم زي اول .. >> طبعا الشي دا لو كنتي مهتمه انو واجباتك تكون مميزه و تاخدي عليها الدرجات اللي ترتاحيلها باذن الله ..

دا نموذج للتكاليف ..

http://www.skaau.com/vb/attachment.p...1&d=1227846989


طبعا غير التكاليف النظري ..

و الشي المريح انو كتير من الافكار تلقيها في الكتب و المواقع المهتمه بالطفوله بس الذكيه هيا اللي تقدر تستفيد :) ..

[عصر الحاسب]

^
جزاك الله كل خير ماشاء الله مبدعة : )

نفسي اتعلم خدع الأطفال هذا أهم شئ عندي ^_^

[ساكنه في بيتنا]

:)

واياكي و المسلمين اختي


يااااااااااااااااه على الاطفال و حركاتهم .. ما تخلص من مكترتها و برائتها ..

في كتاب في جرير بس ناسيه اسمه حاليا مكتوب فيه حاجات كدا و تستفيدي منو كتيييييييييييير ان شاء الله :) ..

[بنوته دلووعه]

الف شكر لك اختي ساكنه في بيتنا
بصرااحه مرررررره حلو الله يعطيك العافيه