الأحياء الدقيقة ياديوان الخدمة المدنية

[أروع إنسآنة]

الأحياء الدقيقة ياديوان الخدمة المدنية


بقلم / الأستآذ : فتحي حلوآني


خد ياسيدي هادي رسالة جاتك على الايميل، ماشاء الله تبارك الله صرتي تعرفي تفتحي الايميل حقي وتجيبي الرسايل كمان الله يستر بكرة النهار ألاقي عندك صفحة على تويتر وصفحة على الفيس بوك والله يرحم أيام زمان أيام التلفون أبو هندل ما علينا هاتي نشوف ايش بتقول الرسالة، نحن خريجات وخريجون قسم النبات والأحياء الدقيقة دخلنا هدا القسم عشان ننهي دراستنا الجامعية بعد ما تأكدنا من أهمية هدا التخصص وفائدته في نهضة هذا الوطن الغالي وزي منت عارف ياسيدي فتحي انه تخصص قسم النبات والأحياء الدقيقة فيه برنامجين للبكالوريوس هما بكالوريوس العلوم في النبات وبكالوريوس العلوم في الأحياء الدقيقة المهم انه بعد ما درسنا وتعبنا ودخلنا في بحوث ومختبرات وتشريح هدا غير انه أننا درسنا خمسة تخصصات رئيسية :
1ــ علم البكتيريا ( البكتريولوجي ) 2 ــ علم الفيروسات. 3 ــ علم الفطريات. 4 ــ علم الطفيليات الطبية. 5 ــ بكتيريا زرقاء. بإضافة إلى دراستنا لعلم الدم وعلم المناعة والأمصال وعلم السموم الميكروبية وبعد كدا حاولنا نلاقي وظائف تناسب تخصصاتنا ما لقينا وكل جهة بترمينا على التانية والله يسامح ديوان الخدمة المدنية ووزارة الصحة ويسامح وزارة التعليم اللي ما عندها مخرجات للتعليم الآلاف بيتخرجوا من الجامعات والكليات ومصيرهم بعد كدا بطالة وهم وغم ودشرة في الشوارع رغم انه لما تدخل على أقسام هادول البرنامجين اللي هما قسم النبات وقسم الأحياء الدقيقة بتلاقي لوحة كبيرة مكتوب عليها بالبنط العريض ( مجالات العمل لخريجي قسم النبات والأحياء الدقيقة) وشوف ايش بتقول اللوحة وشوف المجالات اللي نقدر نتوظف فيها، لكن للأسف لنا دحين اكتر من (5) سنوات ونحنا متخرجين ومالقينا وظائف تناسب تخصصاتنا وأسيبك دحين تشوف المجالات اللي ممكن نحنا نتوظف عليها، وزارة التعليم العالي: معيد ــ فني مختبرات ــ مساعد باحث، مدينة الملك عبد العزيز للعلوم والتقنية: إشراف ــ أبحاث ــ فنيين وزارة الزراعة ومؤسساتها ومعاهدها مختبرات زراعة الأنسجة، وزارة الصحة والمستشفيات والمختبرات الطبية هيئة المواصفات والمقاييس السعودية ومختبرات الجودة بوزارة التجارة الهيئة السعودية للغذاء والدواء (SFDA) الرئاسة العامة للأرصاد وحماية البيئة هيئة الصوامع والغلال (GFMO) الإنتاج التجاري للنباتات، وزارة المياه والكهرباء وزارة التربية والتعليم: مدرس ــ خبير مختبرات مراكز الأبحاث والمختبرات الهيئة الوطنية لحماية الحياة الفطرية وإنمائها: باحثين ــ فنيين. وزارة الدفاع: المختبرات ــ المستشفيات، شايف كيف ياسيدي كل هادي المجالات ولسه ديوان الخدمة المدنية مو قادر يشوف لنا وظايف ناكل منها عيش، ضاع العمر وشيب راسنا ونحنا كل يوم كعب داير نبغى وظيفة ناكل منها لقمة كريمة، لكن اللي محيرنا ومتعب قلوبنا ليش هادي التخصصات إلى الآن موجودة طالما مالها وظايف في ديوان الخدمة المدنية وليش بتعبوا الطلاب والطالبات طالما مصيرهم حيكون زي مصيرنا يقفلوا هادي التخصصات ويريحوا ويستريحوا، دخيلك ياسيدي فتحي شوف لنا حل تعبنا وجاتنا الأمراض وصرنا مكتئيبين بعد ما أخدنا شهادتنا وجلسنا في بيوتنا، انتهت الرسالة، والله مدري ايش أقول لكن كل اللي أقدر أقوله لكم انكم ترفعوا يدكم لرب السموات والأرض وتقولوا يارب فرجها من عندك والله يكافي مين كان السبب.
وعيشوا كتيييير تشوفوا كتيييير.



للتعليق على المقآل من هنآ ..
http://www.okaz.com.sa/new/Issues/20...0120471422.htm