أخيرا الحل الوحيد لأزمة الأحياء testbank

[FrfrQnm]

السلام عليكم ورحمة الله وبركاته ..
بخصوص مادة الاحياء اللي مسببة أزمة لأغلب الطلاب والطالبات ..

انا في رأيي الحل اننا نزاكر من دحين وما نضيع وقت في كلام مالو داعي ونحبط غيرنا بالطريقة دي :) ! بتأثروا على غيركم بدون ما تحسوا حتى خطة أ من دحين حاطة فـ بالها انو الاحياء صعب وانا حخبص فيه ! وهما لسا ما خلصوا الترم دا ..

بتفكروا في وقت المادة من دحين وجالسين تضاربوا اذا حيرجعوا التيست بانك الترم التاني !
اشياء لسا ما سارت ولا فكروا فيها ! وانتوا ما صدقتوا وجالسين تتكلمو في تفاهات وبعد شوية حتلطشوا بعض !
بدال كل دا الكلام اجلسوا زاكروا احسن لأنو عندنا وقت وباقي 18 يوم عالاختبارات النهائية ..
مو عشانها 10 شباتر تقولو كتيير وصعبة ونحنا كنا نختبر في 4 شابتر و6 شابتر في الدوري كيف دحيين 10 شابتر و الاختبار نفس الوقت ..

وقت الاختبار ما يهم وكمية الشابتر ما تهم !! اللي مزاكر كويس حيحل في ساعة ويخلص والوقت حيكفيه يراجع كمان !! لا تضيعوا وقتكم في تفاهات !

احد فتح وشاف كمية الـ 10 شابتر ؟ شفتو كم صفحة !! قبل ما تحبطوا غيركم وتتكلموا ....

اختبرنا في: الدوري الأول 4 شابتر كانت 307 سلايد
والدوري التاني 6 شابتر كانت 259 سلايد

ودحين النهائي 10 شابتر 252 صفحة "سلايد" بس!!! يعني نفس الكمية واقل كمان فـ ما تفرق!

متى حتتعلموا !؟ اختبرنا مرتين ونفس الغلط بيتعاد !! مستنين رحمة مسؤولين الجامعة الكريمين ينزلولنا تيست بانك وبنضيع وقتنا ! لا تستنوا احد اتحركوا وزاكروا !
ولا تستنوا رحمة احد غير ربنا !.. ادعوا يوفقنا ونجيب درجات وتعدي على خير..

كلامي ما يعني انو عاجبني الوضع ولا شيء زي كدا ! بالعكس ..
بس نحنا حاولنا ومهما سوينا اصلا هما حيسووا اللي في راسهم !
واكيد ما تبو تخبصوا في النهائي ! باقي 40 درجة في يدكم لو زاكرتوا حتجيبوها !
40 درجة مو قليلة !!!! لا تضيعوها زي الدوري..

ترا الاسئلة اللي جات ما خرجت من السلايدز بس كم فقرة 3 بالكتير يمكن كانت من بين الكلام ويبغالها تركيز شوية الباقي كلو من السلايدز و واضح..
يعني لا تشتتوا نفسكم وتستنوا ينزلوا training وبعدين تستنوا احد يحلها عشان تزاكروها ويمكن الأجوبة صح أو غلط .. دا كلو تضييع وقت ومستحيل حتحلو كويس لو زاكرتوها لحالها !! لأنو
اول شيء مو كل الاسئلة منها انا فتحت بنفسي بعد الاختبار وشفتها نص الاختبار مو منها!
وتاني شيء الاسئلة مره كتير ! حتزاكري ايش ولا ايش من 700 سؤال مخك حيضيع ولا حتركزي ولا حتفتكري يوم الاختبار المعلومة دي من فين بالزبط وكمان يمكن حلها يكون غلط زي ما سار يوم الاختبار جات تقول في كم فقرة حلها غلط !
والشيء التالت انو الاسئلة اصلا مو 700 سؤال اكييد انها فوق 1000 لأنها بتتغير كل شوية

يعني بالعقل زاكروا من السلايد لأنو مصدر المعلومة الاساسي للأسئلة وبعدين لما تبي تراجعي افتحي الـ training وحلي بنفسك وشوفي حلك كيف وشوفي التصحيح ..

الخلاصة اجلسوا زاكروا السلايدز بتركيييز بدال تضييع الوقت!
واللي يقولي نحنا ما عندنا غير الاحياء نزاكروا وما عندنا مواد غيروا !! كيمياء، احصاء ؟

ما قلت زاكروا في الـ 18 يوم احياء بس!
يمديكم في 10 ايام تخلصوا الاحياء كل يوم تزاكروا شابتر بس!! وتمسكوا شيء معاه من مادة تانية
لأنو الشابتر خفيفة وسهلة تقريبا 25 صفحة و 30 صفحة متوسط عدد الصفحات !
اكتر شابتر 34 صفحة وفي شابتر 12 >>> 7 صفحات بس !!!!!!!

لو سمحتوا كفاية تعيدوا في الموضوع وفي الاحباط دا اللي كل يوم ! من شهرين ونص في نفس الموال بتعيدوا! ما طفشتوا ؟؟
ارحموا نفسكم :) ! واتستغلوا وقتكم في الدراسة بدال ما تجو هنا تحطموا غيركم !
وحتى اللي بيزاكر ما بيطلع بنتيجة لأنو في بالو انو الأسئلة صعبة ! فخلاص مهما زاكرت ما حستفيد ولا حأحل .. وبعدين بعد الاختبار والله انا زاكرت ومتأكدة من فقرة وحدة بس :| لا حبيبي اتحدا لو زاكرتي كويس ! شكلكم بتقرأو بس وبتمشوا كدا وحاطين في بالكم الاسئلة حتكون صعبة..

اتمني تستفيدوا من كلامي وتبدأوا تذاكرو من اليوم !! 10 ايام ونكون مخلصين ان شاء الله !
قسموا وقتكم وزاكروا كويس ! وما حنحس بالمادة زي لو زاكرناها قبل الاختبار بأسبوع او كم يوم أو يومين زي ما كل الناس بتسوي.. اكيد ما حتجيبوا درجات كدا ! لأنو ضغط والمادة ما يكفي نزاكرها في يومين !


وفي حل بس بعد فترة مو دحين.. دحين خلينا نزاكر بس وبعدين
ممكن نقولهم يخففوا الشابتر يعني يخلوها 8 او 7 ! أول اقترحنا وخففولنا شابتر 16 من 103 صفحة الى 71 صفحة !! صح مو كتير بس احسن من ولا شيء ..
دا حل وممكن يوافقو ممكن لأ ! ومو دحين نقولهم قبل الاختبار بشوية ! دحين بدري دوبنا مخلصي
الله يوفق الجميع وربنا ما حيضيع تعب احد ان شاء الله ! لا تعلقوا امالكم ومستقبلكم بمادة الاحياء.. عدينا الثنوي والقدرات والتحصيلي ! اكيد حنقدر على دي السنة ونخلص ان شاء الله!

اسفة لو طولت عليكم بس منجد الموضوع منرفزني وما قدرت اسكت عليه !

[6flah]

كأنو زادت المواضيع وهالموضوع مكرر ,, خلآص ي قلبي عطيتك لآآيكـ <~ برآآآ

[.:. mEmO .:.]

ياششييييخه انتي 100/100

=) مافي شي ينقال اكتر من اللي قلتيه

ششدوو حييييلكم واحنا قدها ان شاء الله

بالتووفييييق يارب

[Cherry blossoms]

كلام صائب وسليم استمرووا
ولا توقفوا قدام ماده

بالتوفيق خواتي وفالكم الفل مارك
باذن الله ^^

[طموح بنوتة]

يسلمو خيتو كلامك عين العقل *ـ^

[^اتعبتني جروحي^]

هما لو يكتفوا بمصدر واحد للمذاكرة كسلايدات مثلا بدون التريننغ حتى مايسبب تشتت لتعدد المصادر
ويجيبو اسئلة مباشرة اتوقع كان الاغلبية حيكحون الوضع ماشي معاهم تمام

[MeAhmed]

لازم السلايدات ومن الان

[F6o0omah]

أحد ييسوي فيا خير ويقولي اش اللي داخل معانا في الفاينل بالزبط
وبالتفصيل الممل اسم الشابتر ورقمة ^^

[FrfrQnm]

Gas_exchange تبادل الغازات *

chapter 22 "Gas exchange" تبادل الغازات
+ chapter 23 "Circulation" الدورة الدموية


Excretion الاخراج *

Chapter 24 "Control of Body Temperature and Water Balance"
التحكم في درجة حرارة الجسم و الاتزان المائي

*
Reproduction التكاثر *

Chapter 31 "Plant Structure, Reproduction, and Development"
التركيب, التكاثر, والتكوين الجنيني للنبات

+ Chapter 27 "Reproduction and Embryonic Development"
التــكاثــر والتَــكَـــوُن الجــنـيـنـي

*
Genetics الوراثة *

Chapter 8 "The Cellular Basis of Reproduction and Inheritance"
الأساس الخلوي للتكاثر والوراثة

Chapter 9 "Patterns of Inheritance" أنماط الوراثة

Chapter 10 "Molecular Biology of the Gene" البيولوجيا الجزيئية للجين

Chapter 11 "How Genes Are Controlled" كيفية التحكم في الجينات

Chapter 12 "DNA Technology and Genomics"
تقنية الدنا ”التقنية الحيوية“ وشئون جينومية

[الحمدلله على كل حآل]

صح كلامك من جد مانبغى نغلط زي اول لازم نحاول نذاكر لو كل يوم شبتر وربي ماراح يضيع تعب احد وانا بجد بقلك لكل مجتهد نصيب انا بالاختبار الاول شديت حيلي وجبت درجة حلوة بس بالاختبار التاني اتهاونت وخبصت وجبت العيد فا من جد حطو ببالكم لو شدينا حيلنا والله والله ماراح يضيع كدا وربنا معانا