اخترت علاج طبيعي بس ممكن. تجاوبوني ع دي الأسئلة

[صدى الأحلام]

السلام عليكم ورحمة الله وبركاااته
كيفكم حبايبي :)
حابة اسال طالبات العلاج الطبيعي ع بعض الاسئلة وجالسة تدور ف راسي :(

اولا : حابة اسئل كيف القسم حلو ولا يعني ؟ صعب ولا سهل زي الاشعة ؟ لاني بصراحة سمعت انو يقولو قسم الاشعه سهل بس الله اعلم .. هل في احد ندمان انو دخل علاج طبيعي لانو التخصص مو عاجبو او مو حلو؟

ثانيا: كيف الدكاترة ؟؟ كويسين ولا مش ؟ شديدين ولا متساهلين شوي ؟

ثالثا: كيف حسيتو معدلكم ( ارتفع ولا انخفض ) بعد التحضيري ؟
رابعا : دا اخر سؤال . بصراحة حابة تقولولي عن موادكم حقت سنة ثانية وبالذات حقت الترم الاول يعني اللي بدي اعرفو عن انو ايش هي المواد اللي درستوها ف سنة ثانية وحسيتوها صعبة واخفقتو فيها وتنصحونا بايش فيها . وايش هي المواد اللي دسمة وصعبة وتنصحونا بالتركيز عليها ؟؟ و من فين تذاكرو المواد ؟؟ سمعت انكم تذاكرو من سلايدات .. وهل اسئلة الاختبارات معقدة وخارجة من الملخص او المحاضرات اللي بتذاكرو منها ؟؟

اسفة ع الاطالة ... اتمنى تجاوبوني ع كل الاسئلة :)
مشكوووووورة مقدما ^_^

[JoudY]

وعليكم السلامه والرحمه والبركات
اهلا بيكي وكل عيد ونتي سعيدهـ

حرد ع اسئلتك ان شاء الله

اولا : حابة اسئل كيف القسم حلو ولا يعني ؟ صعب ولا سهل زي الاشعة ؟ لاني بصراحة سمعت انو يقولو قسم الاشعه سهل بس الله اعلم .. هل في احد ندمان انو دخل علاج طبيعي لانو التخصص مو عاجبو او مو حلو؟

القسم حلو << بالنسبه ليا... واللي حابب التخصص وداخل عن رغبه وما يعطي ادنو لكلام الناس راح يعجبو
والتخصص مهو سهل مره ولا صعب مره مره مره يعني يبغالو حضور وفهم ومزاكرة يسير سهل
وبالنسبه لسهولة او صعوبه الاشعه ما افتي من عندي لانو ما عندي علم
وعن نفسي انا الحمدلله مووش ندمانه بتاتا البته اني دخلتو



ثانيا: كيف الدكاترة ؟؟ كويسين ولا مش ؟ شديدين ولا متساهلين شوي ؟

وبالنسبه لتعامل الدكاترة معانا
في منهم الطيب مره مره مره
وفي منهم اللي طيب لكن مع اللي شادين حيلهم وبيحضرو
وفي وحده شخصيه بس صعب التعامل معها
يعني انتي حتفرضي احترامهم ليكي
ومن ناحيه الشرح تمام ميه ميه ماعدا الشخصية الواحدهـ تلك التي سبق ذكرها
(( كلامي ع الدكاترة يشمل الرجال والنساء ))



ثالثا: كيف حسيتو معدلكم ( ارتفع ولا انخفض ) بعد التحضيري ؟
الحمدلله ارتفع



رابعا : دا اخر سؤال . بصراحة حابة تقولولي عن موادكم حقت سنة ثانية وبالذات حقت الترم الاول يعني اللي بدي اعرفو عن انو ايش هي المواد اللي درستوها ف سنة ثانية وحسيتوها صعبة واخفقتو فيها وتنصحونا بايش فيها . وايش هي المواد اللي دسمة وصعبة وتنصحونا بالتركيز عليها ؟؟ و من فين تذاكرو المواد ؟؟ سمعت انكم تذاكرو من سلايدات .. وهل اسئلة الاختبارات معقدة وخارجة من الملخص او المحاضرات اللي بتذاكرو منها ؟؟

بالنسبة للمواد بتاعت سنه تانية تعتبر الاساس
في الترم الاول درسنا
علم وظائف الاحياء ( فسيولوجي ) وكنا نزاكرها من سلايدات
تشريح ( اناتومي ) والماده هادي مهمه مرررررره لتخصصنا والمزاكرة بتاعتها من الكتاب
كيميا حيويه ( بايوكميستري ) الماده هادي غلسه ومعقده بالنسبة لي وما ادري ايش الحل لها
لكن لا تخادي بكلامي ولا تسمعي لكلام الناس اللي يحبط زي ما يمكن حبطك بكلامي ... يمكن تبدعي فيها p:
وكنا نزاكرها من سلايدات

مواد التخصص
علاج مائي ( هايدرو )
علاج كهربائي ( الكترو )
تمرينات علاجية ( ثيرابيوتك )
اختبارات ومقاييس في العلاج الطبيعي ( ميجرمينت ) برضو الماده دي مهمه ويبغالها تكوني مزاكرة الاناتومي وفاهماه قبل ما تزاكري الماده هادي

ومواد التخصص كنا بنزاكرها من شيتات ناخدها من الدكاترة قبل المحاضرة بيوم او بعد المحاضرة ع طول

هادي مواد الترم الاول

والترم التاني نفس مواد الترم الاول ماعدا ما راح يكون في بايوكميستري ولا هايدرو
وحتكون في ماده تخصص اسمها بايوميكانك والماده هادي جدا سهلة

اول ترم اكيد حتشوفيه صعب لكن الترم التاني اسهل بكتير وسنه تالته اسهل بكتير مره من سنه 2
هيا سنة 2 شويا حتحسي بصعوبه خصوصا الاسابيع الاولى لانها حاجه جديده علينا بندرسها

وبالنسبة لاختبارات مواد التخصص تيجي من نفس الشيتات اللي بيعطونا هيا الدكاترة


وبس

لو عندك اي استفسار او اي رد مو واضح او ناقص احنا موجودين

[JoudY]

ايوه نسيت حاجه

بالاضافه الى الثقافة والعربي المستوى الاول في الترم الاول
والمستوى التاني في الترم التاني

[صدى الأحلام]

شكككككككرا Joudy يعطيگ الف عافية بصراحة كفيتي ووفيتي ^^
بس بصراحة عندي سؤال بخصوص الاناتومي والبايوكيمستري

البايوكيمستري= بصراحة انا سمعت مو بس منك انو دي المادة صعبة سمعت من بناات كثثيييير بس حابة اعرف يعني ليش كدا كل الطلبة متعقدين منها يعني من اي ناحية هي صعبة .. هل اسئلة الاختبار اللي بتكون صعبة وخارجة من السلايدات ؟ هل المادة دسمة ؟ هل دكاترتها ما يفهمو ؟ هل مذاكرتها صعبة ؟ وايش تنصحينا فيها ..

الاناتومي = هل صعبة دي المادة؟ هل مذاكرتها صعبة لانها من الكتاب ؟ كيف اسئلة الاختبارات لدي المادة؟ طيب. كيف تذاكروها يعني قصدي ما يحددولكم اشياء من الكتاب هي اللي تذاكروها ؟ ولا تذاكرو كل الكتاب من الجلدة للجلدة ؟؟

معليش تعبتگ معايا وطفشتگ باسئلتي الكثيييرة :)

[JoudY]

المشاركة الأصلية كتبت بواسطة صدى الأحلام البايوكيمستري= بصراحة انا سمعت مو بس منك انو دي المادة صعبة سمعت من بناات كثثيييير بس حابة اعرف يعني ليش كدا كل الطلبة متعقدين منها يعني من اي ناحية هي صعبة .. هل اسئلة الاختبار اللي بتكون صعبة وخارجة من السلايدات ؟ هل المادة دسمة ؟ هل دكاترتها ما يفهمو ؟ هل مذاكرتها صعبة ؟ وايش تنصحينا فيها .. الاناتومي = هل صعبة دي المادة؟ هل مذاكرتها صعبة لانها من الكتاب ؟ كيف اسئلة الاختبارات لدي المادة؟ طيب. كيف تذاكروها يعني قصدي ما يحددولكم اشياء من الكتاب هي اللي تذاكروها ؟ ولا تذاكرو كل الكتاب من الجلدة للجلدة ؟؟

لا عادي مافيها تعب ولا طفش

احب اجاوب لمن احد يسأل شي عن العلاج الطبيعي



البايوكميستري هيا الماده دسمه وبالنسبه للدكاترة في منهم شرحهم كويس وعارفين انو الماده صعبه وبيحاولو يفهمونا قد ما يقدرو وفي دكاترة بتشرح ع اساس انو احنا ناس فاهمين الماده

ع فكرة كل شابتر كانت بتجينا دكتوره غير

وما ادري انصحك بايه .. بالنسبة ليا كانت كابوس ما ادري ايش كانت تبغى مني الماده هادي

خدي النصيحه من وحده جابت A ولا B







اما الاناتومي الماده مو صعبه مرة

صعوبتها بس في البدايه لانو المسميات جديده علينا ويبغالها اول بأول تزاكريها

لانو حتسمعي بمسميات جديدة كتير لكن بعد كدا حتسير سهله وتسيري حافظاها زي اسمك

والترم الاول كان عبارة عن كتابين اول كتاب اللي هوا الفاندامينتال

الجديد فيلو المسميات بس ولكن هرجتو زي ما اخدنا في الاحياء ايام المدرسة

الجهاز الدوري والجهاز التنفسي والجهاز الهضمي .... الخ لكن بالانجليزي

وما راح ندرس الكتاب كلو ... ونزاكر بس اللي تشرحو الدكتورة

دا حيكون في الاسابيع الاولى

بعد كدا في كتاب اسمو lower limp

اول شي حتاخدو اسم كل عضمة في جسم الانسان

وتعرفي اسم كل طلعه وكل بروز وكل حفرة في العضمة <<< كلام كلييييييييييييم لوووول

طيب ليش لازم نعرف اسم كل حاجة في كل عضمة

عشان بعد كدا حنخش ع اسم كل عضلة في الاطراف السفلية

ومن فين تبدا وفين تنتهي (( وهيا حتبدا وحتنتهي في احد الحفر او البروز او الطلعات اللي في العضمة )) فعشان كدا لازم نكون عارفين كل شي في العضمة

ونعرف العصب المغذي لكل عضلة والحركة اللي بتعملها

نصحية لمن تزاكريها خلي قدامك صور العضلات عشان ترسخ في بالك ويسير بعد كدا تتخيليها وتسهل عليكي

والمادة دي صعبوتها بس في المسميات الكتيرة



والاختبار بيجي من الكتاب واللي شحروه الدكاترة



والترم التاني حتاخدو كتاب ال upper limp ونفس هرجه ال lower limp




ولو في اي استفار او اي شي مو واضح احنا حاضرين

[DarkRoXaS 13]

المشاركة الأصلية كتبت بواسطة joudy القسم حلو << بالنسبه ليا... واللي حابب التخصص وداخل عن رغبه وما يعطي ادنى لكلام الناس راح يعجبو والتخصص مهو سهل مره ولا صعب مره

وعليكم السلام ورحمة الله وبركاته ... وكل عام وانتم بخير
انا اؤيدك على الكلام اللي قولتيه 100%

وشكرا على النصايح بخصوص مواد سنة ثانية

[weddah]

مشكوورة جودي على اجوبتك المفيدة

بس حابه افيدهم بشي عن الترم الاول
هو من جد ترم صعب ومتعب لان لسه شي جديد ولسه بدايتكم في التخصص
وفيه البايوكمستري العجيبة
أبدا لا يحبطكم هذا الشي وتستسلموا وتاخذوا فكرة وحشة عن التخصص
حاولوا تتحملوا وتقووا نفسكم ووحتكونوا مره مضغوطين لازم تتعاملوا مع هذا الضغط وتكونوا منظمين

لان الترم الثاني بيكون اسهل
وسنة ثالثة اسهل واسهل
مره كانت حلوه سنة ثالث وممتعة عوضنا التعب حق ثانية الحمدلله
والحمدلله كل ترم المعدل يكون اعلى من اللي قبله

هذي نصيحتي المتواضعة وربي يوفقكم
ويوفقنا في سنة رابع يارب

[bayan sait]

شكراً يا دكاترتنا جودي و ود افدتونا الله يسهل علينا و يوفقنا و يوفقكم

[صدى الأحلام]

مشكوووووورة Joudy و Weddah يعطيكم الف عافيييييييية ^^

بس Weddah حابة اسالك ايش تنصحينا ف البايوكيمستري ؟ وكيف درجات الطالبات كانت فيها ؟ وهل ف طالبات جابو فيها A؟
مرررة خايفة من البايو كيمستري ومن سنة ثانية كلها حاسة الكل بيقول انها صعبة

الله يوفقنا وايااااكم يارب :)

[man_hood]

ممكن لو سمحتوا تقولون لي كم راتب اخصائي العلاج الطبيعي في البداية ؟ ؟ ؟