الدورات الصيفية لطلاب وطالبات الطب

[بنت الضحى]

بسم الله الرحمن الرحيم
السلام عليكم ورحمة الله و بركاته

أبغى أسألكم بالنسبة للدورات اللي ح يسووها لطلاب وطالبات الطب
متى ح تكون؟؟
ومتى و كيف نسجل؟؟
وكم دورة أصلا ؟؟ أنا أكتشفت 2 وحدة حق مصطلحات و الثانية مدري حق ايش بس أظن إنها عن طبيعة الدراسة في الكلية و يسووها الطلاب نفسهم

المهم يا ليت اللي عندهم أي معلومة يحطوها
وشكرا مقدما

[واثق الخطا]

دورة المصطلحات السنة اللي فاتت بالنسبة للأولاد احنا رحنا لقسم الشئون التعليمية في الكلية وطلبناها من الأستاذ عبدالله الزهراني وقال لنا اكتبوا اسماءكم كانت مدتها اسبوعين اظن ومجانا ... بالنسبة للبنات ما ادري كان فيه او لا بس ما اظن


الدورة الثانية واللي كانت مفيدة اكثر وان شاء بتكون السنة هذي مفيدة اكثر واكثر فكانت من تقديم طلاب الدفعة اللي قبلنا وحننزل اعلان عنها هنا في المنتدى وبرسائل جوال للمقبولين في الكلية وفيها كل المعلومات اللازمة للتسجيل والموعد وكل شيء ان شاء الله ... بس اصبروا الين ينزل التسكين الله يخليكم :)

[السندوي3]

اخ واثق الخطا وفيت وكفيت يعني الدورة الاولى لازم نروح الجامعة ونطلبها ولا كيف ليه ماتكون بعد التسكين يرسلوا رسائل وحنا نجي على طول حنا بالله مستحملين تعب التسكين .....وشكرا تاتي

[واثق الخطا]

والله هذا اللي صار معنا رحنا لمكتب الشؤون التعليمية في مبنى 1 في الكلية وطلبنا الدورة وما قصروا معنا على طول قالوا اكتبوا اسماءكم بس لا تروح لوحدك روحوا مجموعة عشان يضمنوا حضور عدد للمحاضرات :)

[PuRpLe_BoXeR]

ممممم يعني محا يرسلولنا رسايل يقولولنا متى
لازم نحنا نروح بنفسنا نطلبها !!

[FrfoSha]

الدورة الاولى اللي كانت مقدمة من الجامعة نفسها هما ارسلوا لنا رسايل .. انو في دورة مصطلحات طبية و انجليزي لطالبات الطب البشري تعالوا سجلوا فيها .. بس ما اعرف هل اذا راح تكون موجودة السنة هذي اولا كاني سمعت من الدكاترة انهم ماراح يسووها بس مو متاكدة ..

اما الدورة الثانية زي ماقال واثق الخطا .. كانت نبذة مختصرة عن الدراسة ف الطب تتقدم من طلاب الدفعه اللي اكبر منكم < يعني احنا

بالتوفيق .. اي استفسار احنا بالخدمة

[PuRpLe_BoXeR]

حلو حلو
طيب يا اختي لا تبخلو علينا بخبراتكم
عشان نقدر نستفيد من خبراتكم ونكون قد المسؤولية

[FrfoSha]

^

آكيد لا انـآ ولا اي احد من شبـآب او بنـآت دفعتي ماراح نبخل عليكم باي شيء ..

الدرآسة ف الطب مرا شيء ممتع وراح تحبوها بزيادة لمن تلاقوا احد يساعدكم زي مالقينا احنا دفعة Med09 كانوا من جد سند لنا ..

ان شاء الله تطلع نتايج التسكين و ترتاحوا :)

[virus7]

يا اخوان ويا اخ واثق الخطى حبيت اسأل اذا نزلت عندك في الاودس كشف درجات الفصل الدراسي الثاني ولا لا ؟؟

[طالب طب في المستقبل]

الاخوان كفوو وفو ...

يا اخوان ويا اخ واثق الخطى حبيت اسأل اذا نزلت عندك في الاودس كشف درجات الفصل الدراسي الثاني ولا لا ؟؟

لا باقي مانزل ...

بالتوفيق للجميع