أخواتي المنتسبات ..جاوبوني الله يجعل مثواكم الجنة

[NORY]

السلام عليكم
أخواتي المنتسبات
أنا حابة أتخصص شريعة ودخولي الجامعة كان لهدف واحد وهو العلم الشرعي
لكن الحفظ عندي مو زين وفي التحضيري كانت المواد العلمية ماشي حالها معي أفضل من الحفظ
وكانت أقل درجة عندي في الترم الأول في الثقافة الإسلامية مع إني إجتهدت فيها..
لكن الحمدلله

وما زلت مصرة على تحقيق هدفي في دخول هذا القسم لكن خايفة إن إختباراتكم تكون مقالية وأنا بالقوة حليت الصح والخطأ و الإختياري وما أعرف أكتب كلام ودش كثير ولا أحفظ

المطلوب: قولوا لي طبيعة أسئلتكم هل هي دش ؟ أو إختياري زي السنة التحضيرية؟

وشاكرة لكم والله يوفقكم في إختباراتكم

[المزاجيه]

هلا اختي
هالقسم اغلبه يعتمد على حفظ
وفيه اسئله مقاليه اغلب شي ووموضوعيه

[دراسات اسلامية]

قسم جميل وممتع وأجر إن شاء الله
الله يوفقك

[ساكو]

وعليكم السلام اختي حياااااك بين خووواااتك
قلبوو القسم حلووو وبصراحه فيه مواد كثيره لازم تفهمينها ولطالما
تقدرين تفهمين رح تسهل عليك ان شاء الله زي العبادات ورح يكون فيه 4 فقه عبادات
احكام وواجبات وفروض وصفات ووو
السيره النبويه قصص ومعارك واحداث
العقيده والثقافه لو تفهمينها احسن بكثير
وبصراحه الدراسات احسه فهم اكثر مو حفظ لانك تتعلمين احكام وشرائع وفروض
تفهمينها اهم شئ ..
المواد العامه زي الاقناع وعلم النفس ووو هذي اتوقع رح تعجبك لانها فهم واستنتاجات
والله يوفقك ويسهل لك عيوني .. استخيري قبل اي شئ وتوكلي على الله .. الله يوفقك

[محمد المنهالي]

اختي المباركة هذه رسالة من اخ لك

إرادتك للعلم الشرعي هو عبادة بحد ذاتها لذلك أنا على يقين بأن الله سوف يعينك ويسهل عليك

والمواد بأذن الله سهلة وحرصك ورغبتك سوف تكون دافع لك فلا تترددي وانا اخوك وهذا دينك

وصدقيني العزيمة هي المولد الحقيقي لنجاح الأنسان

وعلى الله توكلي

ربي يوفقك ويوفق اخواتي

[غيم تايه]

حياك اختي الكريمة :
أولا - اسمحيلي اعتب عليك على مصطلح ( دش ) ما فيه شيء اسمه دش ،،، دش هذه استخدميها في اماكن اخرى .. بامكانك تستخدمي لفظ او مصطلح افضل ... لا يوجد في قسم الدراسات شيء اسمه دش ،، فيه علم ونور .. وبصيرة ان شاء الله ..

ثانيا - اختي الانسان في هذه الحياة ليس متحكم في كل الامور ،، وانصحك انك تتريثين وتستخيرين قبل الدخول في قسم

معين ،، وادرسي الموضوع من كافة جوانبه ،، صدقيني لا يكفي حب الشيء او الرغبة فيه ابدا ..

ثالثا :- بالنسبة للاختبارات اوضح لك ان الطالبات يختلفون عن الطلاب ،، ومن واقع المتابعة لاحظت ان اغلب

اختبار الاخوات هي اسئلة مقالية يعني عددي ، واشرحي ، وأذكري ، وما حكم ،، وما مناسبة .. ومن هذا القبيل

واللي اطلقتي عليها مصطلح ( دش ) ..
.. انصحك لوجه الله ،، تقيمين نفسك ،، وتخططين لمستقبلك بشكل افضل ،، ويظل قسم الدراسات قسم شيق وممتع ولكني لا احسنه في نظرك ،،، فالمسألة متباينه او متعاكسة احيانا ،، فقد يكون في نظري سهل وممتع بينما انتي تجدينه صعب ومعقد .. إذا عندك خيارات أخرى افضل انك تذكريها هنا ، طالما انك ذكرتي وضعك في السنة التحضيرية وانه الحفظ لديك صعب ،، سؤالنا هل يوجد خيارات اخرى متاحة مع قسم الدراسات امامك ؟؟ بعد الاجابة يتم التقييم او النصح او التوجيه ،،، فكري مليا وادرسيها من كل الجوانب ،، واخيرا هذا مجرد رأي وما قبل وما بعد مشاركتي آراء وانتي صاحبة الاختيار في نهاية المطاف .. سامحيني والله يغفر تطفلي .. ولك تحياتي ؛؛؛

[فتافيت سكر]

السلام عليكم ورحمة الله..

اختي نوري.. حياك الله بين اخواتك طالبات الدراسات الاسلاميه ..

لا تخافي ياختي ترى انا حاسه فيك وكنت مثلك تماما اجد الرغبه والحب للتخصص وبنفس الوقت كنت خايفة من كثرة الحفظ والمواد .. لاكن ترى مافي اي تخصص سهل خلي هذي النقطه دايمن في بالك اي تخصص دخلتيه راح تواجهك صعوبات هذا شيء طبيعي واسالي الكل .. مافي احد بيقولك انو التخصص الفلاني مواده جميعها سهله لا ..لابد من مواجهه الصعوبات : لاتحسبن المجد تمر ان اكله لن تبلغ المجد حتى تلعق الصبر

ولاتصدقين اي احد يقولك ان الدراسات سهلة ترى انا طالبه دراسات وجلست كثير مع طالبات اختاروا التخصص يحسبون انو اسهل تخصص بالجامعه وانصدموا ..

في النهايه احب اقولك استخيري كثير وقولي اللهم هب لي من لدنك حظا عظيما وانا مستعده اذا تبغي تراسليني ..
اتمنى مااكون طولت عليك . اختك

[NORY]

جزاكم الله خير على ردودكم ونصائحكم الأخوية
والله يعطيكم العافية ولا يحرمكم الأجر.. وأحب أقولكم إني أستفدت من آراؤكم جميعا
وأقول للأخت ساكو حتى توقيعك أستفدت منه يا الغلا ولا يهونون بقية خواتي الغاليات اللي ردوا وأعطوني من وقتهم ونصايحهم القيمة والحنونة
وبالنسبة لمراسلتك يا فتافيت سكر شوفة عينك يا الرائعة مشاركاتي ما وصلت 100 عشان كذا صعب أتواصل معاك على الخاص
لكن إذا أحتجت حاجة مرة ثانية بأدخل لكم هنا في قسمكم والله لا يحرمني من الطيبات أمثالكم
أما كلمة دش والله العظيم إني ما قصدت فيها أي إهانة أوإنتقاص للعلم الشرعي وإنما قصدت الإسترسال في الكلام أو الشرح الطويل..
وإذا كان لها معنى آخر سيء لا أعلمه فأسأل الله أن يغفر لي ولجميع المسلمين
والله يختار لي ولكم ما فيه الخير

[فتافيت سكر]

اهلا فيك في اي وقت .. نحن بانتظارك

وبشرينا ايش اخترتي من تخصص ؟ اختك