يا حقون التحضيري ياحلوين ,,تعالوا موهيم مرة ..×)

[Life as Game]

السلام عليكم ورحمة الله وبركاته ,,

مونا سيبي موضوعي في حالو حتى لو فيه شتشتة
دوبي خلصت الغدا وفكرت في الموضوع دا
الموهيم ..
حقون الحاسب هما احلا ناس في العالم ..سوكرين وحلوين .,,
وخصوصا المتحوسبين الاتحاديين زي العسل واحلا ..

طبعا يا اخواني واخواتي الصغننين بما اني اكبر منكم لازم تسمعوا كلامي ,,حتى لو كنت شرير

كلنا نعرف انو فيكم احد محتار بين اكتر من تخصص ..ويفكر تفكير كتير ومبهدل عمرو ,,

اللي يبغى طب

واللي يفكر في هندسة ..

واللي يفكر في كلية العلوم ..

واللي نفسو في ادارة واقتصاد ,,

واللي يبغى علوم البحار

واللي يبغى فنون << عبالو في تخصص ميوزك

واللي يبغى علم نفس

وفي ناس ماتدري ايش تبغى

لكن حقون الحاسب من هما صغار يحبوه

طبعا في ناس ما عندهم فكر حتجي و تشوش لك موخك وتقول الحاسب مالو مستقبل ومدري ايش ,,<< ماعليكم من الجهلة دولا
لما تشوف صاحبك دخل طب وانتا ما قدرت تدخل
لا تتحطم ولا حاجة ..ولا تطالع للطب على انو المستقبل الوحيد ..
او حتى انتا ما تحوب الطب بس اهلك جبروك ..
لا تترك التخصص يطاردك ..
يعني لا يكون التخصص اللي حتختارو بسبب احد قالك ادخل التخصص دا ..
لكن انت وانتي شدوا حيلكم وطاردوا التخصص اللي تحبوه لانكم حتى لو تعبتوا ما راح تحسوا بالعكس تستمتعوا
ولو صاحبك من زمان لما دخل طب صار يتكبر عليك ؟؟
ما عليك منو ,, هوفو مخمس على عينو يعلمو ان الله حق
حركات البزورة دي ما احوبها مو عشانك تدرس طب يعني انك تستلم مكافأة اكتر مني او انك دخلت الجنة مسلا
كل واحد يحوب التخصص اللي هوا فيه ..
عشان كدا انا اقول احلا ناس حقون الحاسب ,,وبالزات IS
او تحوب تخصص بس درجاتك ما اهلتك للدخول فيه ..لا تتحطم ولا تحزن ,,دا خيرة لك من الله
وبعد ما تمشي فيلو فترة راح تقول الحمدلله اني ما دخلت تخصصي القديم .,.

طيب دحين الكلام دا بس لحقون الحاسب السوكرين ..

عشان تعرفوا ان قسم الحاسب مو اي تخصص ولا اي شي زي ما تطلع اشاعات عنو ..
تخصص الحاسب جواتو تلات تخصصات وبعد مدة حيصير 5 تخصصات او اكتر ,,
ايش التخصصات الاساسية ؟؟
نظم معلومات IS
تقنية معلومات IT
علوم حاسبات CS
التخصصات المحتمل انها تجي بعد كم سنة ..الزكاء الاصطناعي او تقنية الروبوت و هندسة البرامج وغيرها
طبعا لا تخافوا من التفكير في التخصص لانو حيكون اول سيمستر عام و التاني تتخصصوا فيه ..
حأديكم ايش معى التخصصات السابقة بتبسيط حلو ,,

نظم المعلومات :
نصها ادارة وبيزنس والنص التاني برمجة ..
الدراسة فيها نص حفظ ونص تطبيق ,,
التخصص دا يأهلك تكون مدير لقسم وفي نفس الوقت مبرمج ..
ويتميز ان مواد الحسابات شبه معدومة فيلو ..

تقنية المعلومات :
كلها تقريبا برمجة وتتميز بأنو الحفظ فيها نادرا ,,
والتخصص دا يخليك مبرمج ,,
طبعا فيلو رياضيات وطقتها

علوم الحاسبات :
التخصص دا اكتر شي فيلو نظري وماث ويتكلم عن الحاسب
وفيلو مواد كتيرة رياضيات وتفاضل وتكامل
وحسابات و يشمل التخصص السابق جواتو
ويتميز انو يتعمق في الحاسب ..يعني يدرس جميع تفاصيل الحاسب ولا يبقى حاجة ..


طبعا انا اخترت تخصص النظم بعد الاستخارة ..وبعد ما شوفت نقاط ضعفي وقوتي ..
ما احوب الماث وشلتها ..
ما احوب النظريات ..
ما احوب البرمجة بزيادة ,,
عندي حوب البيزنس والادارة ..فقلت حلو لانو يشمل تخصصين تقريبا
فطلع معايا دا احسن شي ,,

بعد السمستر الاول حتعرفوا نقاط ضعفكم وقوتكم
بالنسبة للـ وحيواناتهم الشريرة اتوقع يصلح ليهم علوم الحاسبات,,<< ما احوبهم

فلا تخافوا من كترة التخصصات لانو دا من صالحكم يا فتافيت السوكر يا احلا ناس في الدونيا
خصوصا وانو كل حاجة صارت بالحاسب ..حتى لما مشيتوا اول خطوة في الجامعة كانت بعد التسجيل عبر الحاسب ..
والحدف والاضافة كمان بالحاسب ..
الدونيا كلها صارت حلوة وسهلة والسبب الله ثم حقون الحاسب الحلوين بعد ما كان صحاري قاحلة
الاجيال القادمة كلهم ما حيتعبوا في شيل شنطة المدرسة زينا واحنا صغار
واللي يقول الحاسب مالو مستقبل ..دا مع نفسو
ولا تنسوا العالم كلو حنخليه حاسوبي ان شاء الله ..

بس مو تتخصصوا و بعدين ما تشدوا حيلكم ..ترى البعثات تنتظركم
وعالاقل اللي يبغى يتوضف على طول ..
ما حيتعب في الانتظار والبحث عن الوضيفة ,,


اووووه ..نسيت اعرفكم عليا ..
انا لايف السوكر ,,احلا واحد في المنتدى ..يناسوا عليا اتحادي و كل حاجة حلوة في الدونيا


طبعا مرحب بالجميع ما عدا الردود الجحلطية المتخلفة ..

شوكرا وسهلا