خـــطـــه أ ،، شـاركونــا بتجـربتـكمـ ..

[غروكـ و غيروكـ]

السلام عليكم
كيفكم ؟ ان شاء الله تمام

هالموضوع عشان نعطي فكره شامله عن خطه أ ،، وانا بتكلم عن كل ماده حسب تجربتي ورأيي

وياليت بنات خطه أ يشاركونا بخبرتهم ،، وان شاء الله نفيدكم ولو بشي بسيط


خطه أ حلوه وسهله وحاقه قميله خالص بس تحتاج لمذاكره بأمانه يعني لو ذاكرتوا اي كلام حتجيبوا العيد
انا ما اقول حتحملوا الماده مع ان هالشي ممكن ،، بس الاغلب حتكون درجاتكم سيئه فمواد تعتبر سهله وترفع المعدل

و الخطه اعتبرها ضغط مع الانقلش يعني ما فيها اي بريكات الا بريك الصلاه الاساسي وبريكات الانقلش القصيره
وحتكون عندك 3 مواد ورا بعض وبعدها الانقلش والاحد والثلاثاء بتكون عندك ماده بعد بريك الصلاه

طيب نبدأ بالمواد

الرياضيات
اكثر ماده مسببه عقده عند الكل ،، اقدر اقول انو هذي الماده الوحيده اللي تحتاج تتعبي عليها
حاولوا ما تغيبوا فيها او تسحبوا وتكونوا مركزين مع الاستاذه في الشرح
اذا الاستاذه كانت من النوع اللي يعطي ملاحظات تحسيها مهمه وممكن تفيدك يفضل تكتبيها

لازم تكوني فاهمه اول بأول ولو مذاكره يكون احسن لأنكم حتلاحظوا انوا الدروس تترتب على اللي قبلها
الماده فيها قوانين وتعريفيات بالذات الابواب الاخيره لازم تحفظيها لأنها احيانا ً تجي صح او خطأ

الماده والله مو صعبه بالعكس اعتبرها سهله يمكن اخر باب هوا اللي شويه صعب
ولو كنتي فاهمه ومذاكره حتمشي بأذن الله فأذا ما فهمتي شي اسألي عنه
لو تروحي لمكتب الاستاذه وتخليها تشرحلك مو شرط في المحاضره

بعد ما تكوني فاهمه ،،لما تجي تذاكري لا تذاكري نظري ،، فكل درس اتمرني على الامثله والتمارين وهذي اهم خطوه
لو ما اتمرنتي ع طريقه الحل حتلخبطي في الاختبار لأن الخيارات تجي قريبه من بعض فلازم تكوني متأكده
والتركييز التركييييز وقت الحل ،، انا كل درجاتي طارت عشاني احل بسرعه وما اركز ،، اطير اشاره من هنا واحذف جذر من هنا ،، فركزوا وقت الحل

* في ورقه تصويرها من المكتبه ،، موجود فيها الامثله والتمارين اللي داخله معانا لأن مو كل الكتاب داخل


الحاسب
نفس اللي اخذناه في الثانوي بس لبنات السلامه حيكون العملي ع الورق
الدوريات حتكون من 35 والنهائي من 30
الحاسب مشكلته انو مررره يلخبط في الصح والخطأ لأنها تجي كثيره وبعضها بتفاصيل دقيقه

ممكن تجي اشياء ما تكون موجوده نصا ً في الكتاب بس في التطبيق العملي موجوده
يعني مو بس تذاكري الكتاب لأ طبقي العملي بنفسك في البيت و ذاكري بتركيز

العربي
زي الحاسب اخذناه في الثانوي وبالنسبه لي اعتبره اسهل من الثانوي كمان
في بعض القاعدات سهله ما تحتاج هذاك الشرح وفي بعضها لازم تحضري عشان تكوني فاهمتها صح
الامثله في الاختبار تكون من خارج الكتاب وانتي تحلي لكن نفس الفكره

اهم شي القاعدات لو تقدري تحفظيها يكون احسن لأني افتكر في الدوري الاول جانا كم سؤال نصا ً من القاعدات
وبعدها شوفي الامثله واقرأي شرحها عشان تتمكني من المعلومه ،، ولازم تكوني عارفه المواقع الاعرابيه وحركاتها

بس لا تستهينوا في الماده في كثير حملوها

الثقافه
ماده دسمه مع انها مو صعبه بالعكس حلوه ،، وضروري تكوني مذاكرتها من قبل بوقت عشان تاخذ حقها في المذاكره لأن بعض الاسئله تجي من بين السطور
الاستدلال مرره كثير ومره يلخبط يعني ممكن تلاقي في الصفحه الوحده 3 او 4 ادله والاستدلال مايكون واضح في الاختبار زي ايام الثانوي فأقرؤا بتركيز
انا طريقتي في مذاكرتها اقرأ الدرس بتركيز كذا مره وبعدها اقرأ الملخص ولما اخلص اراجع الجزئيه كلها


الخطه ابدا ً مو صعبه وحرام ما تجيبوا فيها معدلات عاليه اهم شي ذاكروا قبل الاختبارت ع الاقل بأسبوعين قسموا الماده على يومين او ثلاثه
لا تضغطوا نفسكم ليله الاختبار بالماده الوحده بالذات في النهائي وبأذن الله حتجيبوا معدلات حلوه
اذا عندكم اي سؤال خذوا راحتكم ،، الموضوع موضوعكم

[زهرة للوتس]

طيب انا سمعت اني الثقافة اسئلتها على كلام البنات خيالية وتلخبط وكمان الرياضيات كثير يقولو صعب فممكن تعطيني رايك وشكرا حياتي

[ѕσσмч .●]

غروكـ و غيروكـ

أشكرك ع ـالمبآدره الحلوه =)

وكلآمك تمآم لكل مآده بس رآح أضيف على كلآمك بعض الأشيآء اللي حسيتها مهمه

أول شي الريآضيآت

أنصح الكل يجيب دررجه عآليه في الدوري الأول لأنو الباب الأول مرررا سهل
وحتى الأبواب اللي بعدو سهله بس يبغآلهآ شويا وفيها قوانين ..

الثقافه ..

يبغآلهآ مذااكره أول بأأوول لأنو مستحييل تدخلي الإختبار النهائي وإنتي مخلصصه في يوم .. مرررآ مآيمدي

العربي

أنآ عن نفسي كنت أذاكر كل جدول بعد كل كم درس + القاعده ..
والحمدالله درجتي مررآ حلوه في العربي ..

الحآسب ..

نفس حكآية الريآضيآت حآولو تجيبو درجه حلوه في الدوري الأول لأنو حيكون أسهل من الدوري الثآني
الدوري الثآني فيلو الآكسس والإكسل أنآ وصحبآتي تعبنآ يوم إختبار الحاسب الدوري الثآني !
فاا أنصحكم تجيبو درجآت حلوه في الدوري الأول وتركزو في الدوري الثآني ..


وإن شآءالله أكون قدرت أفيدكم ..

^____^

[غروكـ و غيروكـ]

زهرة للوتس

بالنسبه للثقافه ممكن تكون تلخبط و مو واضحه يعني احيانا ً تحتاجي تقرأي السؤال والاجابات كذا مره عشان تستوعبي بالضبط ايش المطلوب " اسئله استيعابيه "
بس حكايه ان الاسئله خياليه لا ما توصل لهذي الدرجه

اما الرياضيات والله مو صعب لو انتي بذلتي مجهود وبعدين لا تصدقي اي كلام تسمعيه الا لما انتي بنفسك تجربي
يعني حلو انو تكون عندك فكره عن المواد وطريقتها بس ما تكون سلبيه وتأثر عليك
لأنو طبيعي بيكون في اختلافات فرديه كثير عند البنات ،، في اللي تشوف العربي سهل والرياضيات لأ وفي العكس

* واذا استاذاتك او غيرها من الاستاذات عملوا مراجعه يفضل تحضريها بتفيدك كثير بس لازم تكوني مذاكره قبلها

بالاخير انا اشوف انو الموضوع يعتمد عليكي انتي من جميع النواحي سواء بالثقافه او الرياضيات

والعفو ولو ما سويت شي

.
.


‏ѕσσмч .●

معاكي حق الجزئيات الاولى اسهل من اللي بعدها ،، وحتى الدوريات في بعضها كانت اصعب من اللي قبل فأنتبهوا لهالنقطه

منوره الحته يا قمر

[xx_NaNo_xx]

ثآآآنكس ماقصرتوو وانا حكتب الي عندي

الرياضيااات
بأولى ثنوي كانت عقدتي من جد لكن لما درستها هذا الترم تغيرت نظرتي لدرجة حبيت الماادهـ
والله من جددد مرآآ حلوووهـ

وطريقتي برضو كانت حلووهـ ودرجاتي مرآ حلووهـ
كنت ماسسحب ابدا واحظر كل المحاظرات واكتب مع الاستاذهـ وقبل الاختبار بأسبوع ابدأ اذآكر
وكنت ماترك شي الا افهمه .. والله طريقتي مررآ ممتازهـ
انا من النوع الي ماحب اذاكر اول بأول بس قبل الاختبار بووقت امسسك واذآكر
يعني مو شرط تذاكرونها اول بأول بس انووو لازم قبل الاختبار بفترهـ

ووواهم شششي بناات لاتفتوون المرااجعه من جدد بدون مبالغه اغلللب الاسئلة
حقت الاختبار منهآآ

مووووفقيـــن يآآرب

الحاسسب
حلووو وسسسهل واحلا مافيه انو الي اختبر فيه ماارجع اختبره ثاني
بس ركزوو ع العملي

العربـي
مرررآآ اححبهـ وسسسهل اسهل من الثنوووي بكثثثثثثثير

الثقااافه
مااااااادري كيف نجحت فيها من جد ماااحبهااا ولما ذحين ماعرف ايش الطريقه الصحيحه لمذاكرتها
هيا قدرررآآت تفرق من شخص لشخص يعني ماخووفكم منها بس عني مااعرف لهاا


اتمممنى افدتكمـ

[إيملي22]

السلام عليكم ورحمة الله وبركاته
قبل كل شئ مبروووك للكل على النجاااااااح وسلامة الكل لمن حدث له مكرووه وسلمكم الله من كل شرررر يارب...
أولا:أقدم نفسي أنا الحمدلله تفوقت من هذا الترم بمعدل حلوولله الحمد وكانت خطتي (أ) طبعا أتكلم لكم عن الخطة شوي أفيد الكل...
طبعا اتمني التثبيت من المشرفين لأنه جدا مفيد للكل يحتاجه وإي شخص منكم يشوفة مفيد يرجوا أن ينصح بالتثبيت ورجاء اخر ترى طوويل بس مهم كل واحد أو وحد يقرأ/تقرأه زين زين طيب مهم والله لكم أنا حبيت أفيد فقط وعاد الكل حر ....
بسم الله أبدأ قولي خطة (أ)خطة دسمة يعني محاضرات وراء بعض يعني مافية هبقاااات ولا سحب ع المحااضرات ههه كنت أسويها بس مازودتهاا يعني أشووف الدرس إللي مايستاهل وأسحب بس لاتسوا زيي ههههههه...
طيب أبدأ أووول شي بمواد الخطة وهي 5 مواد وهي (الثقافة الإسلامية-العربي-الرياضيات-الحاسب-الأنجلش على حسب 1-2-3-4 level)..طيب وش أبدأ لكم فيه امممم..
أبدأ بعقدة الكل زى ماهو معرووف للإداري الأنساني أكيد عرفتوووه الرياضيات طبعا أول شي الفصول الأولى تبدأ المجمووعات وكل مايشملها ههههههههه بس لاتستهونوا فيها طيب..
الفصل الثاني نبدأ بالتحليل:باب حلو وبسيط تصدقوا العمد العمد على الدرس الأول إذا فهمتيه أو فهمته صدقوني الباقي حيسهل عليكم بأذن المولى..
الفصل الثالث:المعادلات وماأدرااك ما المعادلات حتكرهوااا( x,y)من كثر ماهي موجودة بالقوانين واااااو كثير بس نصيحة مني كل قانون تكتبوه في ورقه خارجية من أول الدرووس حتي تنتهوا الباب هذا لأنة جدا جدا مخربط إذا مارتبت نفسك المعادلات لا تخربطوا نفسكم بكثر الأمثلة طيب أسمعوا مني ماعليك إلا تفهم تفهم القانون تمام ومثال واحد فقط ok
الفصل الرابع:أصعب وأعقد وألعن باب جاب لي العقدة النفسية هههههه تقولون هاذي بس تخوفنا أنا أقول الحقيقة لأنا نحنا إداري إنساني يعني كنا أدبي حتي تري إللي كانوا علمي هببوا فية يعني بالهواء سوا بس نحنا لنا عقووووول وبنقدر نجتاز الشي مهما بلغت صعووبته أبدا الدوال تحتاج إلي الحضوووور اليومي والتركيز مهعااا وانتبهوا نتشغلوا بالكتاابة زيي لالالا أنتبهوااا لأن جدا الأنتبااه مهم لباب الأخيرأنا بصراحه كنت أكتب معاها وماأركز فندمت ولكن الحمدلله أستطيع أنا والجمييع الأسترجااع للمعلومات فلذا الله يخليكم المحاضرات تبع الرياضيات مهمة جداجدا والمراجعه يوميا لها انتبة تقول صاحبي ولا صاحبتي تعرف بعدين تشرح أو يشرح لي تري للمعلومية مو كل واحد بيعرف يشرررح هذة تري موهبة من الله البعض شاطر ومعدلات عاالية لكن تعال أو تعاالي عند شرحه ماعند أم أمه سالفة ...
هذا بالنسبة للرياضيات أما المادة الثانية :الثقاافة الأسلامية ..طيب الثقافة ماتحتاج إي أنك تكتبوا معاها لا ماله داعي بس أكتبوا الأسئلة إللي تقولها هي جدا مهمة وتجي بالأختبار والأدلة كمان بتركز على شي محدد شوفوا الثقافة على سهولة الدروس لكن الأسئلة تبعها مو زي الدرووس انتبهواا الأسئلة شوي معقدة الثقافة مافيها الشي إللي يحتاج أنصح بس المهم التركيز معها أو معه فقط ولن تندموااههههه..
طيب الحااسب اااااااااخ يالحاسب تقريبا هو أقل درجة إللي شوفوا تري هو على الأستاذة أوالأستاذ إللي بدرسك لأن لكل شخص أسلوب معين صح ..يعني الله يعينكم وحظكم هههه طيب الحاسب أنا من تجربتي كنت مستهونة فية كنت أقول وش هو الحااسب ميكروسوفت ورود أكسس أكسل يووه سهلة لكن تري الأسئلة مو سهلة لأن مدري كيف يجيبوهاا ؟؟
الحاسب 25 للعملي وشدوا الحيل فية و10 للنظري هذا جدا بجي سهل لأنه مكون من عشرين فقرة يعني نص على كل فقرة يعني حلوو أما العملي نصيحة لاتحاول تخسروا كثير درجااات لأن المجمووع بالنهاية 70 ويبقى 30 للنهائي عرفتوا أما الأبواب الأخيرة نظري طبعا حفظ مايحتاج أنصح الله الله هاه ياحلووين ..
طيب قلنا الرياضيات-الثقافةالأسلامية-الحاسب .. وش بقي العقدة للجيمع هههه بالنسبة لنا الأن حبدأ أغير أسلوبي ممكن تعرفوا الماادة ..ماذا دهاك؟هاه عرفتوها أكييد(العربي)هههه.
طيب العربي هو دروووسة جدا جدا سهلة وأبد لايوجد تعقيد أنا سوف أنصحكم ببعض النصايح تفيدكم:
أولا:أحضر قلما ودفتر أو noteلكتابة كل درس بمايحوية من معلومات لأن الكتااب ليس شامل بل لابد على الأستاذ أو الأستاذة الأضافة كما كنا نفعل أيام الثانوي الكتاابة سوف تعوود لكم أيام الثانوي لأن جميع الدروس إعادة للثانوي يالها من أيام جميلة حقا....
لاتذهبوا للذكريات أبقوا معي نعم
ثانيا:لاتحاول أن تفكروا الهروب من المحاضرات لأن أيضا العربي يعتمد على الفهم كالرياضيات حسنا..
ثالثا:كل العربي سبق أن درسناها لذا سهلة عليك ..
طيب حغير أسلوبي أكيد كرهتنوني ههه أنا مستعدة بماأنني شطورة بالعربي والكل يشهد بمعرفتي بالشرح وأجيد الشرح للمتعلم جيدا ولله الحمد يارب هذة مووهبة وأحمدالله عيها ..
شوفوا أي منكم لدية صعوووبة بالعربي أنا متكفلة بالشرح أنا لاأجحف حق الأساتذة بالجامعه ولكن أيضا أنا من ملاحظظتي الكل بيحتااج وقت الأختبار من يفهمة أويفهمها نقطة معينة صعبت عليه أو عليها ولكن أنا مووجودة للجميع أنت أيضا لاتهملوا المحااضرات وأبدا من يريد أن أشرح له نقطة مبهمة أو إن شاء الله العربي كلة ماعيكم بس السينسي موجودة عندكم طيب تفضلوا هاي إيميلي طيب للتواصل والأستفساارالرجاء إرسال على الأيميل دعاية ههههههههه

أنا والله العظيم أريد المساعدة للكل ولا أريد منك إلا الدعااء لي فقط وإي خدمة ولا صعب شي فقط ارسلوا على الأيميل وأنا مح أقصر بحق أحد ..
لن ننسي حبيب القلب Eطبعا هو على مستويات انا الأنس أبدا بالمستوى 4 اتمني التوفيق لي وللجميع وأيضا الأنجلش ..
أسمعوووووني إي صعب لديكم هااي الأيميل موجود والمساعده لوجه الله ..
وأخيرا أعذروني على الأطالة ولكن تقريبا شرحت لكم خطة (أ)وإن شاء الله أستفدتوا بأذن الله والخطة أرجع وأقول ماهي سهلة وماهي حق هبقااات هاه ياويل إللي يهبق حعرف ترى هههههه ..
امني من الله العلي القدير أن يوفق الجميع لما يحبة ويرضاااه ونحنا طلاب علم وأبدا لابد من التعب ومواجهه الصعوبات والطفش والتضجر بس تذكر لو طفشت أو طفشتي وش مصيركم بالبيت ربة منزل أو فراااش هذة النصيحة من صديق لي وفقه الله وأخذت بها دائما تذكروا بالمستقبل كل شخص يبغى يكون فوق وعنده فلوس ووووو أبدأ بالماناني ههههه صح؟؟؟لذا أنتبهوا وشدوا حيلكم والله يسر لكم ولي ولاتنسون أن المذاكره لوحدها لاتكفي واتحدى أي شخص حتى لو كان الأول بالجامعه أبدا لا أولا وأخرا التوفيق من العزيز والأستغفاار وقراء سورة البقرة جدا رائعه أسألو مجرب وإي سؤال أنا أجيب وأن تأخرت أعذروني وإن شاء الله ماأتأخرعليكم ..
IF I WANET BE THE FIREST,I SHOULD STUDING HARD
فكروا في هذا المثال ولما يحمل من معني عظيم ..
مع تحياتي وخالص أمنياتي لكم..

[إيملي22]

هلا ليقرأها الكل وبكل تركييييييييييييييييز الله يخليكم ..

[غروكـ و غيروكـ]

8

يعطيك العافيه ع المشاركه

بس الايميلات ممنوعه

[saif al-harbi]

شباابـ بالنسبة للرياضياتـ لأنيـ أحبها أكثر مادة فإنيـ أتشرفـ بالرد على أيـ سؤالـ غير مفهوومـ وهذا




أخوكمـ / سيفـ الحربيـ

[خوخة القلب]

ياقلبي تسلمو والله مررررررره شوكرن لكم كلكم يارب تدخلو التخصصات الا انتو تتمنوها وتجيبو معدلااات حلوه ياااارب لنا ولكم يارب وانتو كمان لاتخافو من خطه ب ترا مرررره حلوه احلى من أ

بسسسس انا خايفه من شي واحد في الرياضيات الدواااااااااااااااااااااااااااااااااااال كان عقدتي في 3 الثانوووووويه
كيف كانت الاسئله علي الدول ؟
جابولكم هياا بكثرررررر

ومن ناحية الثقافه تحسوها مررره دش زي التفكير والا اشياء واضحه ؟