محاضرات فيزياء-ملاحظات مهمة

[رنــــا]

المشاركة الأصلية كتبت بواسطة رنــــا انا مستعدة اكتب لكم الملاحظات المهمة في كل شابتر ده اللي اقدر عليه وبالتوفيق للجميع

زي ماوعدتكم في موضوع سابق

كتبت هادا الموضوع
اتمنى يكون مساعدة للطالبات والطلاب في الفيزياء

اللي عندو معلومة -ملاحظات مهمة - القوانين والمصطلحات ينزلها هنا
وبليز اتمنى من كل قلبي انكم تتعاونو وبلاش كلمة فكرة حلوة وردود مالها داعي اللي عندو مساعدة يحطها وجعله الله في ميزان حسناتنا

يعني ايش المطلوب منكم ؟؟ انا اكتب اسم المحاضرة والاشياء اللي قالتها دكتورتنا مهمة
(ملاحظات وكدا وانتو تضيفو اللي عندكم عندكم استفسار اسئلة عن المحاضرة ادرجوها ونتساعد نجاوب عليها
حتى لو تمارين اهم شي تتفاعلو باسلوب راقي يساعد الكل ولاننسى الاختبارات ع الابواب


... انا هاابدا اولا
محاضرة شابتر 1 ماكان فيها معلومات كتيرة اغلهبا مصطلحات وتمهيد
تتكلم عن الميكانيكا
واخدنا مصطلح الحركة =موشن=motion

واخدنا النظام الدولي للوحدات
تناقشنا في الكميات الاساسية ووحداتها
ايش هي الكميات الاساسية؟؟
الطول -length
الزمن-time
الكتلة mass
(اللي يبغا طريقة نطقها نو بروبلم يسأل)

نجي لوحداتها حسب النظام الدولي
وحدة الطول -المتر يرمز لها بالرمز -m
وحدة الزمن - الثانية يرمز لها بالرمز-s
وحدة الكتلة الكيلو غرام ويرمز لها بالرمز kg

يوجد ايضا نظام اخر هو النظام الفرنسي
يقيس الطول بوحدة السنتميتر
يقيس الزمن بوحدة الثانية
والكتلة بالجرام

ملاحظة
عند حل اي مسالة يجب ان يكون هناك تناسب في الوحدات عشان الناتج يطلع معاكم صح
وادا مافيه تناسب لازم تحولو

اخدنا كمان انو الفيزيائين ناس مرتبين مرة كيف؟؟
لو رقم طويل مرة منازلو كتيرة زي ده الرقم
3.561231234
يللا هادا السؤال لكم كيف نرتب هادا الرقم؟

اخر شي في دي المحاضرة اخدنا التحويل بطريقة التسلسل (ياليت تجيبو ورقة وحاسبة )
يللا نبدا

وطريقة التحويل كالتالي
لو ابغا احول رقم من دقيقة لثانية او العكس
مثال
t=240s m-??
لاحظو اعطانا الزمن بالثواني ويبغاها ب الدقايق
ايش اعمل؟؟
1-نوجد العلاقة كيف ؟


الدقيقة كم ثانية s-اختصار ثانية ,mاختصار دقيقة
وحدة دقيقة فيها 60 ثانية 60s=1m
اقسم ع الشي اللي ابغا اتخلص منو ابغا اتخلص من ....
الثواني اكيد ليه ؟؟ لانو مطلوب في السؤال يبغاها بالدقيقة شي بديهي

لانو انا مااقدر اعمل هنا بسط ومقام هسوي شرطة / الرقم الاول بسط التاني مقام اوكي
نبدا
60s=1m
60s/60s = 1m/60s

هيطلع الناتج كالتالي..
1= 60s/m
.60s/m
الخطوة الاخيرة
اضرب 240s.60s/m
يعني في الكمية اللي اعطاني ياها في السؤال t=240s اختصر الكمية مع المقام هيطلع الناتج 4 والوحدة دقيقة

اخر بارت في المحاضرة التحويلات وهنزلها لكم في الجزء التاني ....

[رنــــا]

في انتظار استفساراتكم وملاحظتكم ..وبالتوفيق

[shahoda]

رغم إني كنت أبكي ،،،

:)
إلاإني شفت موضوعك وأبتسمت ،،

رنا حبيبتي من جد كفيتي ووفيتي قلتي كل المعلومات المهمة اللي أنقالت
إن شاء الله أقدر أفيد ولو بمعلومة بس إذا فهمت أول :)
وإن شاء الله تسهل علينا ،، ونتمكن منها :)

لكن من جد ،، الله يوفقكــ دنيا وآخره ،،
ماقصرتي ،، والله يسعدكــ وويحقق حلمكــ يارب :)

أتمنى الكل يتاعل مع هذا الموضوع الأكثر من رائع ،،

جزاك المولى الخير الكثير وكثر من أمثالكــ

أختكــ في الرحمن
shahoda

[weddah]

مرررره شكرا رنوووو يعطيك العاااافية ياااااارب

من جد انا استفدت من اللي كتبتيه

لأن دكتورتنا زي عدمها


استنى منك المزيد يا دكتورتنا يا عسل

:)

[Tomy]

إذا كان منهج الفيزياء للبنات هو نفس منهج الأولاد أنصحكم بملزمة الأستاذ أشرف بركات رغم أن الملزمة مخصصة سابقاً لطلاب الهندسة و لا كنها هي نفس المنهج الحالي ( فيزياء 110 ) .. الملزمه موجوده

في مكتبة الجامعة...... جزاكي الله خير أختي رنا

دمــــــتـــــــــم بــــــــــــــود

[العميله السريه]

جزاك الله الف خير
واتمنى انك تنزلي التحويلات الثانيه

[M!ss Mojy]

جزاك الله الف الف خير

وان شاء الله ربي يحقق لك الي تبغيه ويوفقك في دراستك ونشوفك احلى دكتورة

بجد استفدت

بس للامانه احنا الحمدلله دكتورتنا ماشي حالها اسمها دكتورة انسجام والله حبوبه تحاول توصل لنا المعلومه قد ماتقدر

بس الله يعين خايفه من اختبار الفيزياء مرره ( خاصه انه يوم خميس مرره احسها مو جايه )


يلا نراكم قريبا

[camry]

ابي اعرف وش قانون force

[العميله السريه]

اول مره اسمع بهاذا القانون ولاكان نفسي افيدك
إذا عندك التحويلات او اي احد لايبخل علينا لانو ماني عارفه احول ابدآ احولت عيني ولسه ماعرفت احول

[رنــــا]

اعذروني فصل النت عندي 5 ايام من جد شي يقهر روحت ع مكتبة الجامعة قالو لي مافي نت انقهرت
احاول ع بكرة إن شاء الله انزل الاشياء المهمة


وهشوف المذكرات دي ويارب تفيدنا

shahoda
الله يوفقك يارب ويسهل علينا نفسياتنا بجد ... الله يسهل

وده ياعسل الله يسعدك ويوفقك

تومي الله يوفقك

كامري الله يسهل علينا

ميس موجي بالتوفيق

العميلة السرية الله يسعدك وبالتوفيق