فقط ,, لأني آحووبكم

[a7la_bint]

السلام عليكم ورحمة الله وبركاته

مسائكم أطيب من الفل وأنعم من الجوري ,,,

في البداية الموضوع حقي دا ما خلاني اكتبه وأنزله الا حووبي لكم
وانو نفسي أفيد كل واحد هنا بأي شي أقدر عليه
وبمجرد ان شاءالله تنتهي اجازة الحج بحاول انزل لكم ملخصات كتيييره هنا ومره حلوه
لكن اليوم حقول كلام مهم مرررره يارب يفيدكم

أدخل بالموضوع ,,

طبعا الكل فينا اختبر الدوري الأول .. طالبات & طلاب
وزي ما شفنا طلعت درجات كتييره تقريبا البنات كوولها والاولاد نصها اظن
الموهيم انو فينا اللي جاب درجات حلوة وفينا اللي حس انو درجاته مش ولا بد
عشان كدا حبايبي بخاطري كم نقطة نفسي اطرحها ليكم من مشاهدتي وملاحظتي
ويارب تستفيدوا منهم وتكون شُعلة إستمرار لمن أبدع ونقطة تحوّل لمن أخفق ,, !

1- قبل ما ابدا الاختبارات واشوف نتايج الدوري حق البنات هوني وبالجامعة
يالله كنت احسب انو الكل فينا مزاكر وجاهز والكل حيجيبو فل مارك
كنّا كل يوم قبل كل محاضرة نتكلم وكل وحده فينا تتفسلف عالتانية
والوحدة صارت تحس انو خلاص جالسة وسط دافورت وحقها ضايع مهما زاكرت

جات الإمتحانات ... شالت النقاب .. وفضحت كل مستور
للأسف انو القلّة القليلة هيا اللي جابت درجة عالية
ونسبة لا بأس بها درجاتها واطية :/ !!!!
والاغلبية في الوسط < يمكن لو مو اول ابواب اللي هيا سهلة كانت حتكون درجاتهم واطية !!

كمان شوية شوية بدأ يطلع الكلام بالمنتدى وتطلع هرجات البكش ايام المحاضرات
ردود كتيره هنا شفتها بتقول انو احنا ما ذاكرنا الا ليلة الاختبار بس او قبلها بكم يوم
وللاسف انا متأكده انو الاغلبية هيك والدليل الدرجات
مستحيل الجزئيات اللي اخدناها بكل المواد مره سهله فــ ليش التخبيص ؟؟

الموهيم حبايبي حبيت اوصي عليكم انو السنة التحضيرية
وربي وربي وربي ما ينفع فيها الا مزاكره يوم بيومه
اذا مره مسكت الحمّى تأجلها لما الويكند ,, اما لو ما زاكرت لما الويكند مره لاااااا مره ما يجي :/ !!

انا كونت اول اسبوع ما ازاكر
بعدين حسيت انو راح نتعمق بالمنهج وتزيد الدروس
فالحمدلله صرت ازاكر يوم بيومه
خصوصا انو كمان غير الماده العلمية اللي هيا الدروس والمحتوى
انتا عندك شي تاني بكل ماده وهوا اللغه ( المصطلحات )
الحمدلله اقل درجة عندي بكل المواد 29 قولو ماشاءالله

فـ أي تأخير بالمزاكره حتكون نتيجتو سلبيه عليك
وصحيح المزاكره يوم بيومه تعب وإرهاق
بس دا طموح وكلها 8 شهور الـ 8 شهور دي مستقبل عمرك كلو ومستقبل عيالك كمانه !!!
واللي حيفرط حيجي عليه يوم بعد كم سنه
ويقول يا ليت يرجع الزمن واصير ازاكر يوم بيومه طول اليوووووم وادخل الكلية اللي ابغاها :/

2- حاجه مره زعلتني بالاختبارات ومره ضايقتني
اللي هيّا الغش وبشكل علني كمان بين البنات :/
بالنسبة للي يغش ويبغى مساعدة بالغش
ابغاه بس يتخيل نفسو وهوا اسمو بعد كم سنة دكتور / غشاش !!!
صحيح ممكن راح يفيدك الغش اليوم ويساعدك بدخول الكلية اللي تبغاها
بس اللي عنده ضمير راح تبقى وصمة عار بجبينه طول عمره انو غشاش وجابها بالغش
كمان اللي يغش لا يحسب انو دي فتره وراح تعدي وبكره راح اصير انسان كويس
( من شب على شي شاب عليه )
وازا انتا اليوم تغش عشان كلية الطب او غيرها
بكره راح تغش المرضى عشان تتثبت في الوظيفة
وبكره راح تاخذ رشوة عشان تخلي مريض يتنوم بفلوس !!
وهكزا مادام انتا اهم شي مصلحتك بغض النظر حلال او حرام

ودايما اللي يغشوا اخرتهم وحشه حتى لو بعد عشرات السنين
ولكم في امطار وسيول جده السنه اللي راحت خير دليل (:

3- الملخصات :
بالنسبة للملخصات ملخص واحد وربي مره مره يكفي او بالكتير ملخصين
تاني حاجه ما ينفع تزاكر الملخصات لحالها او مع الشرح في فتره بسيطه
لازم تزاكرو حبه حبه ع مهلك نفس هرجة الدروس يوم بيومها
عشان ما يصير لخبطه وعشان تعرفو فين ماشي وايش فاهم وانتو عارفين الباقي ,,
افضل تلات اسماء للملخصات يوسف زويل - اشرف بركات - جمال السعدي
مره شغلهم نظيف وحاجه محترمه ودايما تكون واضحه بس زاكرها بفتره كافيه مش قبلها بيومين !!

4- شفت كتير مواضيع هنا في نظره سلبية للايام الجاية وتشاؤوم فضيع
يا ناس ترى كولها 30 درجة مش الـ 100 كلها
ويمكن ازا مره مره كونت bad امكن جبت 10 من 30
طيب معناتو عندك 80 درجة ليش التشاؤوم ؟؟
انا متأكده انو كل شخص ما جاب درجه كويسه ما اعطى المزاكره حقها
حقها زي ما انا قولتلكم يوم بيومه واهتمام شديد
واحب اقولكم شي وانا واثقه منو وربي مره مره
لـ هادي اللحظه اللي هببو بالاختبار اللي راح وربي الطب لسه متاح قدامهم
وانو الفرصه لسه ما راحت ولا شي احنا لسه بأول المشوار
وزي ما قلت اقلها باقي 80 درجة
اعطي المزاكره حقها يوميا واتوكل على الله وصلي وطيع الوالدين ولا تسهر ..
وشوف انتا حتجيبها والا لا !!!

اقل شي حتى لو ما جبتها انتا راضي عن نفسك انو سويت كل شي بـ وسعك ,,,
وارجع واكرر وربي وربي وربي لا تيأسو وربي الفرصه لسه قدااامكم مرره لسه مرره ,,

كمان اللي جابو درجة حلوه
اقولهم لا تتكلو عليها وتكسلو وتقولو خلاص سهاله
لا تنسوا ان اول الدروس سهله والجاي اشد شويه
يعني استمرو ع نفس الاهتمام والمواظبة وربنا يوفق

آخر شي يارب اني ما طولت عليكم
ازا عجبكم الموضوع ادعولي بالتوفيق واني ادخل الكلية اللي ابغاها
وازا ما عجبكم سامحوني يا حلوييين

C ya

[Optimistic Girl]

كلامك درر

موفقة يارب

[عـآزفـ الكيـبورد ـة]

ما قرأت كل موضوعك صراحتن ,,

بس أظن خلاصته ,, ان الدرجات القليلة ,, لا بسبب الدكتور ولا سبب التصحيح الآلي

ولا بسبب الملخصات ولا المنهج ,, لانو شوية تركيز في المذاكرة ,,

واجتهاد وتوكل بيمشي الحال ,, اصلن المنهج مكرر × مكرر,,

السبب الوحيد اللعب والكسل طوال السنة ,, وقبل الامتحان بيوم أو حتى اسبوعين قالو يله نشوف وش في هنا ,,

الله ما بيخذل أحد ,, ولكل مجتهد نصيب ,, وما جزاء الاحسان الا الاحسان ,,

بس اظن هالكلام ما تعرفوه يوم تسهرو يا طلاب وطالبات

عالمنتديات أو المسن او البيبي او الشات او البالتوك ,, او الفيسبوك ,,أو ,, أو ,, أو ولا حد ينكر ,,,.,

تلاقوه يوم تطلع النتايج ,, صج حاآآآآآآآآله ,,

آسفة عالأطالة ,,

[د. هدّولا]

تسسسلمي ياسكرة على الكلام المرتب دا
والله يوفقك ويوفق الجميع يآرب

والله ترا التحضيرية أحلى سنة من جد
وأسسسسسهل سنة وربي دلع

أولا ماعندنا واجبات وبحوث ومشاريع تشغلنا عن مذاكرة للإختبار بس
ثانيا مافي اختبارات قصيرة كل يوم

هي كلها شغلة 3 اختبارات
شدوا حيلكم فيها وبعدين تتخصصوا في اللي تبغووه


وكل عآآم وانتو بخييير
يارب يعوده علينا وعليكم بالخير والفرح

[يالبى أنا]

الله يسعدك يارب ويوفقك وتدخلي الكلية اللي تبيها
صرااحة موضوعك رائع يستحق الشكر وكلامك درر

بالنسبة للملخصات حبيبتي أنا ما أعرف للكيمياء ولا ملخص يااريت إذا مافيها كلفة عليكي وتعرفي ملخص كويس واستفدتي منو تقوليلي هوه أو تحمليه

[فردآسكو]

.. الله يوفقكـ و يحقق لكـ مرآدكـ ..

[عزتي مالها حـد]

كلامك راااائع ماشاالله
شكرا جزيلاآآ ..

[a7la_bint]

Optimistic Girl

يسلمو عالمرور يا حلوة .. موفقه يااارب


عـآزفـ الكيـبورد ـة

اهلن بيك يا غالية
كلامك مره مره شرفني ووجودك اكترررر
بجد معاكي حق بكل اللي قلتيه خاصة دا

عالمنتديات أو المسن او البيبي او الشات

آخر تلاته مصيبتهم مصيبه خاصة البيبي :/
بجد اللي مدمن عليها يطلع حرتو بالاجازة وينساها :/ ,, !!

لو تشوفيهم بالاحياء لانو شرحها شوية يطفش اللي ورا كلهم طقطقة عالبي بي خخخخخ :/
الله يهديهم ما توصل بالمحاضره كمانه مستقبلك اهم

يسلمو يا قمر ربنا يسعدك ويحقق لك مرادك


د. هدّولا

اهلن بيك يا دكتورة
ربنا يسلمك ويخليكي يا قمر

والله ترا التحضيرية أحلى سنة من جد وأسسسسسهل سنة وربي دلع أولا ماعندنا واجبات وبحوث ومشاريع تشغلنا عن مذاكرة للإختبار بس ثانيا مافي اختبارات قصيرة كل يوم هي كلها شغلة 3 اختبارات شدوا حيلكم فيها وبعدين تتخصصوا في اللي تبغووه

بجد حبيبتي معاكي حق
سنه دلع لا تقييم مستمر وعدد مواد قليل مرره واللهم واجب الماث الصغنون ض1 !!
وزي ما قولتي كلها 3 اختبارات حاسمة جهز لها من بدررري
وان شاءالله خلاص اقل شي تجيب 90 بكل ماده

موفقه خيتو ربنا يسعدك ويخليك
وكل سنه وانتي طيبه ينعاد عليكي بالصحة والعافية

[a7la_bint]

يالبى أنا

الله يسعدك يارب ويوفقك وتدخلي الكلية اللي تبيها صرااحة موضوعك رائع يستحق الشكر وكلامك درر بالنسبة للملخصات حبيبتي أنا ما أعرف للكيمياء ولا ملخص يااريت إذا مافيها كلفة عليكي وتعرفي ملخص كويس واستفدتي منو تقوليلي هوه أو تحمليه

مرره شوكرن يا قمر عالدعوه
ربنا يجزاك كل خير ويااارب تدخلي الكلية اللي تبغيها يا عسل
طبعا انا يا قلبي خطة أ مش ب
عشان كدا لسه انا ما درست الكيمياء
بس اسمع عن ملخصات يوسف زويل مرره كويسه
اخويه قبل سنتين كان تحضيري وكان يزاكر منها
مره واضحه وفيلها امتله كتيره
كمان الكتاب حق الكيمياء الصغير الجديد دي السنه مرره موهيم وواضح والمسأئل اللي فيه مره مهمه حتى اسئلة الاختبارات القديمه اللي اخر الكتاب
بس يارب ازا لقيت الملخصات حق يوسف زويل عند اخويه ارفعها لك
بس امكن ع طبعة الكتاب القديمة ايام اخويه
عشان كدا انتي اسأل بالمكتبة عن حق دي السنه الملخص
وربنا يوفقك ويسهل عليك

فردآسكو

شوكرن عالمرور .. آمين ويحقق لك مرااادك

عزتي مالها حد

شكرن عالمرور العفو منك كلك زووء

[عاشقة علم النفس]

مشكوررررررررررررره اختي على النصايح

و جزاك الله خير

و بالتوووووووفيق للجميع
و كل عام و انتم بخير