شوية فضفضه مهمه لمستجدين الجامعه

[MeshMash]

السلام عليكم ورحمة الله وبركاته ..

يا جماعه بعد ما بدأت الجامعه ,, تعبت الين ما دورت على مدرسين خصوصيين ..


ونصيحه ,, لا تعدي اول اسبوعين الا وانتو مضبطين نفسكم بالاشياء الي حتذاكرو منها ..

لأنو فجأه وحيقولو الاختبارات بدأت !! في لمح البصر ..

وغير كذا اعرف طلاب دخلو عند مدرسين ورسبو ,, تعرفو ليش ؟؟ الخطأ مو في المدرسين ..

الخطأ في نفس الطلاب ..

يمسكو الملخص ويقرو فيه كانه جريده !!!

يا شباب ويا بنات ,, الرياضيات والفيزيا والكيميا لازم تحرك يدك فيها ..

لازم تحل مسائل لازم لازم لازم ,, ولا والله حتدخلو الاختبارات ويخلص الوقت وانتو ما خلصتو نص الاختبار ,, لا تفكرو ان الاختبار يكون صعب ,, لأ والف لأ ,, والله الاختبارات سهله ,, وجداً سهله ,, اقسم بالله الي يذاكر يشوف انها مصخره ,, ويخلص قبل الوقت وينزل من الاختبار وهوا مرتاااح ..

شباب والله في ناس يخرجو وهما ندمانين ,, ويقولو يلا الترم الجاي حنعوض ونشد حيلنا ,, شباب تكفا لاتكونو منهم ..

والله السنه التحضيريه كل الي تبغاه شوية مذاكره بس ,, لكن المذاكره ما تكون قبل الاختبار ,, لأ كل اسبوع باسبوعه ..

وخصوصاً الرياضيات والكيميا والفيزيا ..

ونرجع في الكلام للطلاب الي دخلو عند مدرسين ورسبو !

اقسم بالله في طالب رسب في الفيزيا واهو عند مدرس جداً ممتاز ,, انا صراحه انصدمت ,, يعني الطالب غباء مهو غبي ..
صح من آخر الناس المقبولين في الجامعه ..
وكان على شفا حفره لما انقبل ,, بس مهو غبي اهوه دخل الجامعه ..
المهم رحت له البيت وقلتله ,, شوف يا فلان ..
انتا كيف تذاكر الفيزيا ,, قلي امسكها واقراها ,, قلتله نعم !!!!!!!!!!!!!!!!!! ..
شفتو كيف !! نفس الي قلتلكم عليه يقرا جريده ! ..
المهم اشتريت له دفتر ابو 5 ريال A4 ..
تحصلوه في اي مكتبه ,, الي يجي لونه ازرق ..
واشتريتله الـ notes الصفره بريالين ..
وقلتله بهذي الحاجتين انتا رح تجيب A+ ..

المهم ما اطول عليكم ..

قلتله اي مسأله تشوفها تحلها بيدك ,, يا شيخ لو تافهه حلها بيدك ..
ابغاك تخلص الدفتر وتشتري دفتر جديد ,, كل ورقه تخلص منها اقطعها وارميها في الزباله ..
اهم شي حرك يدك ,, شغل يدك خليها تتعب انتا رسبت و ذحين جا وقت الشغل ,, ( الولد رسب في مادتين الفيزياء والاحياء ) ..
وبالنسبه للاوراق الصفره ,, اي مسأله عجزت تحلها ,, او عجزت تفهمها حط الورقه الصفره ,, واكتب سؤالك بطريقه مفهومه جداً لانك لو ما كتبته بطريقه مفهومه انتا بنفسك رح تنسى ايش السؤال ..
وروح للدكتور واسأله السؤال و اذا مو الدكتور احد من اصحابك ..
انا كلمته عن الفيزيا ,, اما الاحياء مالي فيها ..
المهم ..
الولد مشي على الطريقه الي قلتله عليها ..

وما شا الله تبارك الله جاب 95 ,, اقسم بالله اتصل عليا يبكي يقول فين شطارته من زمان قبل ما يخبص ويجيب العيد مواده كلها درجاتها رايحه فجلا !
اما في الاحياء ذاكر نفس المذاكره الي رسب فيها ,, ونجح بـ 60 ! يعني على شفا حفره ..
واقولكم ان نسبته في الثنويه كانت 86% ..

من الآخر مافي شي مستحيل ..

والسلام عليكم ورحمة الله وبركاتة .