(من تجارب طالبة سكن) لجميع الطالبات المستجدات بسكن السليمانيه,,,

[Fatema Alshareef]

بسم الله الرحمن الرحيم ,,

الى كل أخواتي الطالبات المستجدات بالسكن ,, هذا ماجمعته لكم من حصيلة تجاربي بالسكن ,,بالإضافة إلى موضوع الصور للسكن

صور السكن الداخلي للطالبات (السليمانية) ,,,,

وبمناسبة قرب العام الدراسي الجديد,, وايضا اقبالكن على مرحلة جديده ,, وتجربه جديده من حياتكن

أحببت أن أورد لكم هذا التقرير المفصل ,, الذي يحوي كل مايدور في أذهانكن من استفسارات

وسوف يكون الحديث هنا بالعاميه حتى يكون اقرب لأذهانكن ,, وسيكون على شكل أسئله وأجوبة ,,

بسم الله نبــــــــــــدأ ,,,

ايش الاشياء اللي أجيبها معايا السكن في أول مره ؟؟

لحاف ومفرش للسرير ,, مخده (لان المخدات بالسكن مو مريحه كثير ) ,, وللعلم مخزن السكن مليان

مخدات جديده ,, سجلي طلبك ويعطوك المخده ,, سجاد صغير للغرفه ,, او قطع صغيره زي حقت

ايكيا مثلا ,, كمان جيبي تغليف لاصق لون غامق للشباك ,, لانو احيان بتكون الغرفه بمكان مقابل

للشمس ,, وبيدخل نورها ويزعجك ,, فالافضل جيبي معاك هذا التغليف ,,, أو اشتري ستاير

وعلقيها ,, وكمان جيبي أرفف قماش للدولاب زي اللي في ايكيا ,, عشان تحطين ملابسك عليها

لانو دولاب السكن فيلو رف واحد ومايصلح تعلقي فيه شي لانو عالي مره وفي تعليقتين,, بس بتتعبين

من كثر التعليق فالافضل جيبي معاك الارفف ذي القماشيه وعلقيها بالدولاب ,, وكمان ممكن تحتاجين

تعلقين ملابسك فجيبي شماعات للتعليق لانو سعرها من برى ارخص من جوه ,, كمان لاتنسين تجيبين

مكواه ,, وسلال صغيره للقمامه (ونتو بكرامه) ,, والاكياس حقتها ,,

هذا بالنسبه لداخل الغرفه ,,

الحمام ,, دعاسات الحمام ,, شبشب الحمام (اهم شي لاتنسيه ) لانو اللي ينباع جوة السكن مو حلو

ومو مريح ,, كمان طقم الحمام ,, وستارة البانيو ,, سلة لتجميع الملابس الي تحتاج غسيل ,,

جميع أدوات التنظيف والغسيل ,, والافضل تجيبين كرتون كامل تايد ,, وكلوركس ,, وديتول ,,

وفيري للأواني ,, ومبيدات حشريه ,, وصابون الغسيل لليد ووووووووو ,, أي شي بالسوق تبع

التنظيف اشتريه ,,, ايوه وكمان أهمممم شي ,, جيبي معاك مكنسه طويله ومجرفه ,, وممسحه حقت

السيراميك ,, والممسحه الثانيه حقت تصريف المويه ,,

وكمان لاتنسين الفواحه ,, جيبي أنواع الفواحات ,, اذا تبغين عادي ,, وشموع ,,

أدوات المطبخ ,, أنصحكم لاتجيبون أواني كثير ,, اللي حابه انها تطبخ ,, جيبي معاك قدرين

قدر كبير ,, وقدر صغير بس ,, ومقلاه ,, وباقي أدوات المطبخ (سكين ,, ملاعق ,, أكواب ,,

مبشره ,,صحون تقديم الاكل ووووووو ) اللي تعرفونها ,, بس الافضل ,,, اذا كنتي ماتحبين تغسلين

الاواني ,,جيبي معاك أواني بلاستك من كل الانواع والاشكال ,, أفضل ,,

الثلاجه ,, روحي بنده ,, واشتري من هناك الخضروات والفواكه ,, والاجبان ,, وباقي الاشياء

حقت الثلاجه ,, عصيرات ,, وغيرها ,, بس لاتكثرين ,, واحسبي حساب انو بنت غرفتك ,, كمان

حتشتري ,, ووفري على نفسك اذا كنتي انتي وبنت غرفتك تعرفون بعض ,, اتفقوا تقسمون بينكم

عزبة المطبخ ,, وانتبهوا لاتكثرون لانو الثلاجه صغيره مره ,,

جيبي شبسات وعصيرات وشوكلاتات وبسكويتات ,, وأهم شي كراتين مويه للشرب ,,

جيبي سفره للأكل ,, وجيبي صينيتين للفرن ولاتكثرين ,, اذا كنتي بتطبخين ,, جيبي تلاجات

للقهوه والشاي ,,

امممممممم ,, وهذي كلللل أشياء الغرفه وانتهينا منها ,,,

كيف أتأقلم مع بنت غرفتي؟ وكيف أتعامل معها ؟؟؟

طبعا هناك حبيبتي بتلاقين الناس من كوووووووول الاجناس ومن مختلف الطباع ,, بتلاقين الجنوبيه

وبتلاقين الشماليه ,, وبتلاقين الشرقاويه ,, وبتلاقين اللي من الغربيه ,, فالاغلب ادارة السكن بتحط

معاك بنت من نفس منطقتك ,, عشان تتعودون على بعض بسرعه وتتفاهمون اكثر ,, واذا حصل

مثلا ,, ولقيتي معاك بنت من غير منطقتك ,, وهذا قليل ,, وشفتي انك ماتعودتي عليها ,, عادي

روحي للإداره وقوليلهم يجيبولك بنت من نفس منطقتك ,, لانك انتي مو قادره تتعايشين مع البنت هذي

ونصيحتي لك ,, لاتجلسين متحمله وضاغطه على نفسك ,, حاولي وحاولي تبدلينها ,, وقوليلهم

يتصرفون يايغيرونها ,, او يحطونك انتي مع بنت ثانيه تناسبك ,,

اذا ناسبتك البنت وألفتوا بعض ,, اتفقوا على كل شي بالغرفه ,, سواء في التنظيف ,, يعني قسموا

الشغل بينكم ,, وأوقات المذاكره ,, وأوقات النوم ,, يعني موقصدي انكم تذاكرون بوقت واحد

وتنامون بوقت واحد ,, لاااا ,, هذا صعب مره ,, ومعروف كل واحد له جدوله اللي يرتاح له ,,

بس اذا كنتوا قادرين على كذا ,, حلو وتمام مره ,, واللي قصدي فيه ,, انكم تتفقون من اول اسبوع

اذا الوحده منكم عندها اختبار ,, والثانيه ماعندها ,, تحترم الثانيه وضعها ,, وماتسوي اي ازعاج

بالغرفه ,, يعني مو تروح تسوي نذاله ,, وتطفي كل انوار الغرفه وتقول انا بنام ,, اذا تبغي النور

طافي ,, مو ضروري تطفيه كله ,,, يعني طفي النور اللي بجهتك ,, مثلا ,, او اشتروا اباجوره

حقت المذاكره ,, وحطوها ع المكتب ,, اذا وحده بتنام ,, تطفي الانوار ,, والثانيه تذاكر على

الاباجوره ,, وهذا حل تمام ,,

كمان صديقاتي ,, اذا كانوا عندك صحبات بالسكن ,, وحابه توريهم غرفتك او حابه يزورونك

الغرفه ,, قبل كل شي حبيبتي ,, شوفي وضع بنت غرفتك كيف ,, يمكن تكون نايمه ,, يمكن

يسوولها ازعاج ,, ويمكن هيه من النوع اللي مايحب أحد يجي غرفتها ,,, فا معليش ,, مو ضروري

تقابلينهم جوه الغرفه ,, قابليهم برى ,, واعتذري منهم بطريقتك ,, بكل الحالات ,, لازم تتشاورين

مع بنت غرفتك ,, ولاتنسين ان الغرفه مو لك وحدك ,, الغرفه انتي وصحبتك مشتركين فيها ,,

طبعا اذا كانت صحبتك عادي ماتمانع ,, جيبيهم ,, ولاتنسين انو اغلب المشاكل اللي تصير بين بنات

الغرف ,, كلها بسبب انهم ما اتفقوا من البدايه ,, وكمان بسبب صديقات بنت الغرفه ,,

لم يتم ,,,

[Fatema Alshareef]

ايش الاشياء الممنوعه بالسكن ؟؟؟

جوال الكاميرا ,, لابتوب بكاميرا ,, ميكرويف ,, فحم ,, بخور ,, اي جهاز كهربائي يشتغل على 220

تلفزيون كبير ,, يعني اكبر من 21 بوصه ,, كنبات للجلوس بداخل الغرفه ,, مراتب صغيره ,, (موحقة السرير )

لكن مراتب السرير مسموح فيها عادي ,, أدوات تسليه ,, زي الكيرم مثلا هذا ممنوع ,, أوراق عادي

زي الاونو عادي ,, تقريبا هذا اللي افتكره من الاشياء الممنوعه ,,

اذا افتكرت كمان اقولكم ,,

وكمان لاااااااااتنسون تجيبون استشوار 110 ,, لانو اللي على 220 ,, مابيشتغل معاك تمام ,,
ايش الامور اللي لازم التزم فيها طوال فترة جلوسي بالسكن ؟؟

اهم شي ,, توقيع المبيت ,, بعد أذان المغرب تقريبا ,, أو بعد صلاة المغرب يفتح التوقيع ,, تروحين

لمكتب الاشراف ,, بالعاده لانك جديده بالسكن بيسألونك المشرفات وهم بنات اغلبهم حبوبات وطيوبات

بيسألونك بأي مبنى ,, ويعطونك الكشف ,,, دوري على رقم غرفتك ووقعي بجنب اسمك ,,

عادة بعد الساعه 10 يكون وقت التوقيع متأخر ,, واذا جات الساعه 1 الليل ,, ونتي لسى ماوقعتي مبيت

رح يخلونك تسجليبن بكشف المتأخرات ,, (بس عادي لاتخافين مافيها حاجه ,, وبرضوا انتبهي

لاتكررينها على طول ,, عشان اذا تكررت ,, تناديك وكيلة السكن وهاتك تهزيء ,, )

يوم الاربعاء ويوم الخميس يفتح التوقيع من الساعه 9ونص المسا ,, يعني اذا جيتيهم قبل الوقت هذا

يبقولولك مانقدر نفتحلك ,, والسبب كما سمعته من وكيلة السكن انو بالعاده البنات ربوع وخميس يطلعون

وممكن وحده من الطالبات توقع مبيت ,, وبعد كذا يجيها خروج مفاجئ ,, بكذا المشرفات بيخربطون

ومايدرون البنت خروج ,, وللا موجوده بالسكن ,,

بس في استثناءات ,, اذا كان عندك اختبار يوم الخميس ,, روحيلهم وقوليلهم انو عندك اختبار وتبغين

توقعين وتنامين بدري ,, او اذا ماكان عندك شي بس تبغين تنامين ومو قادره تتحملين لين بعد 9 ونص

حاولي فيهم ,, وترى بعضهم طيوبات يفتحولك المبيت ,, (الا وحده فيهم بتعرفينها بعدين تجلس

تتفلسف معاك ,, هذي ابد لااااااااااااتحاولين معاها ,, وتذلين نفسك ,, قدامها )

مواعيد الدخول والخروج من السكن ,, حاولي تكونين نظاميه من الناحيه ذي ,, عشان لاتتعرضين للطرد

من السكن ,,, موعد الدخول ,, من الساعه 7 صباحا الى الساعه 11مساء ,,

وموعد الخروج ,, من الساعه 8صباحا الى الساعه 9ونص مساء ,,

اذا كان عندك خروج طارئ ,, تقولين لولي امرك ,, يقول للسكيورتي ,, ونتي برضوا تروحين

لمكتب الاشراف وتقولين للمشرفه بالوقت اللي يكون فيه وكيلك واقف برى ,,

اذا كان عندك خروج ,, وولي أمرك بيجي ياخذك ,, خليك جاهزه وجالسه بالصاله حقت مكتب الاشراف

لين يوصل ولي امرك ويكلم المشرف اللي برى وهو بصفته حيكلم المشرفه اللي جوه ,, ونتي قبل كذا

اعطيهم خبر انو عندك خروج ,, واعطيهم اسمك ,, عشان اذا جا ولي امرك ينادون عليك ,,,

والفايده من انك تكونين جاهزه من بدري ,, لان المسافه ياحبيبتي من مكتب الاشراف لبوابة الخروج

طويله ,, وبكذا رح يتمرمط ولي امرك برى ,, ورح يعصب ,, ونتي اختصري الوقت واطلعي بدري

مواعيد باصات الدوام ,, من الساعه 7ونص تبدأ ,, يعني اذا سويتي فيها نشيطه وبتروحين من 7 مثلا

بيقولولك ارجعي مافي باصات ,, ومواعيد الباصات كمان طول الفتره من الصبح للعصر تمشي الباصات

,,,


للحديث بقيه ..

[PinKyah]

مآشآء الله
استفدتـ كثير مع اني سكن خآرجي ,,

بالتوفيق حبيبتي
متآبعه ^_^

[Fatema Alshareef]

مع ازعاج البنات بالسكن ؟؟ كيف اذاكر ؟؟


حاولي ياقلبي تذاكرين اول بأول ,, السنه التحضيريه يبغيلها اهتمام مستمر ,, وابد لاتضيعين وقتك

مع الشلل ,, او الصديقات ,, خلي وقت للمذاكره ,, ووقت للوناسه والصديقات ,,

اذا كان عندك اختبار انتي وصحبتك بيوم واحد ,, حاولوا تذاكرون بصوت واطي ,, أو حمسوا بعض

للمذاكره ,, اذا شفتي انك موقادره تذاكرين بصوت واطي ,, حاولي تطلعين برى الغرفه ,, او تروحين

لمكان هادي ,,, وكثييييير اماكن هاديه بالسكن ,, ويكون هذا الشي بينكم بالتناوب ,, يعني مره انتي

تكونين برى ,, ومره هيه ,, بس لااااااازم تحاولون تأقلمون نفسكم على جو المذاكره بمكان واحد ,,

لانو احيان السكن بيكون ازعاج برى ,, وماتقدر الوحده فيكم تذاكر برى ,,

اذا سمعتي ازعااااااااج حوليك بلمبنى حقك ,,, في اي وقت ,, وكان عندك اختبار وانتي موقادره

تذاكرين ,, اتصلي على مكتب الاشراف من تلفون الغرفه الخاص فيك ,, بس ارفعي السماعه

ويردون عليك ,, انا بالمبنى الفلاني ,, وفي ازعاج عندي وماني قادره اذاكر ,, وهم وقتها بتصرفون ,,

او اذا ماعندك تلفون ,, روحي لمكتب الاشراف نفسه ,, وقوليلهم ,,


كيف تتعاملين مع المشاكل اللي تواجهك بالسكن ؟؟؟؟

مثلا / مشكلة ضياع أو نسيان مفتاح الغرفه ,,

بمجرد ماتسكنين الغرفه ,, لازم تروحين للإشراف عند أبله مريم بشاره المسؤوله عن المفاتيح ,,

تقوليلها ابغى اسجل طلب مفتاح للغرفه ,, تعطينيها رقم المبنى والغرفه ,, وتعطيك موعد تجيها فيه

تستلمي المفتاح ,, تقريبا تدفعيلها 5 ريال ,, حق النسخ ,,

لما يوصلك مفتاحك ياحبيبتي ,, خليه معااااااااك على طول وحاولي قد ماتقدرين انك ماتنسينو بالغرفه

وتخرجين ,, وتتسكر عليك الغرفه ,,, وماتقدرين تدخلينها ,, وتظطرين تروحين لمكتب الاشراف

تطلبين مشرفه تفتحلك الغرفه ,, وهم يااااااااااااالله يجون ,, يعني مرررررره بهذله وتعب ,,

على بال مايطلبولك مشرفه تروح معاك وتفتحلك باب الغرفه ونتي جالسه على اعصابك ,,,

الحل في هذا كله حبيبتي ,, اول مايجيك المفتاح ,, اذا كان عندك خروج بيوم ,, سوي نسخه ثانيه

للمفتاح ,, وخليها مع وحده من صحباتك الثقااااااااااااااااااااات ,, او اذا مررره مافي احد تثقين فيه خبي

المفتاح الاحتياطي بمكان آمن بالسكن برى الغرفه ,,, عشان اذا نسيتي المفتاح جوه الغرفه ,, يكون عندك

الاحتياطي ,,

مشكلة غلاء الاسعار بالسكن ,, زي ماقلتلك حاولي تجيبين معاك كااااااااامل عزبتك من برى ,,

ولاتنسين تشترين (الفوط الصحيه) من برى ,, اشتري منها كميات كبيره ,, لانها بالسكن 8ريال

ومن برى 6 ريال ,,, وضااااع مصروفك كلو ببقالة السكن ,,

مشكلة تعطل صرافة السكن ,, احيانا تتعطل علينا صرافة السكن ,, ونتوهق وقتها ,, خلي عند فلوس

للأوقات الحرجه ,,, وكمان حاولي تسحبين فلوسك كامله ,,,, واذا بيوم تعطلت الصرافه وكان يوم دوام

بإمكانك تروحين للجامعه وتصرفين ,, لكن اذا كان يوم ربوع ؟؟ او خميس ؟؟؟؟ او جمعه ؟؟؟؟؟؟

كيف بتتصرفين ونتي تبغين فلوسك ضروري ,, اذن سوي زي اللي قلتلك عليه ,,

مشكلة انقطاع المويه بالسكن ,,, بصراحه هذي المشكله مانعاني منها كثيييير ,, وان صار وانقطعت

عنك المويه ,, بالعاده بتكون في مباني المويه فيها موجوده ,, وعادي الناس للناس ,,

استئذني من اي وحده فيهم وخذي من غرفتها مويه عاااااادي ,,

[Fatema Alshareef]

أمـــــــــــــــــــــــــــــــــور هامه ,,,

قبل لاتجين السكن ,, خلي معاك كل ادواتك المكتبيه ,,, ومن ضمنها طابعه بدون سكينر ,, (اللي فيها

سكينر ممنوعه ) ,, خلي هذي الطابعه معاك وربي حتفيدك كثيييير ,,, هناك اسعار المكتبه نار ,,

فالافضل انك تجيبين طابعتك معاك لانك بتضطرين تطبعين اوراق وواجبات وجدول ,,, وغير كذا

المكتبه ياعمري ماتكون مفتوحه طول الوقت ,,, يعني لها اوقات محدده ,, واوقاتها مرررره ضيقه ,,

يعني بيوم الخميس اللي يفترض انو تكون فيه المكتبه مفتوحه ,, عشان البنات وقتها يتفرغون

لواجباتهم ويطبعونها ,, تكون المكتبه مقفله !!! انتي وقتها عادي محا تشيلين هم لان طابعتك عندك ,,

واشتري كل شي يخص الطابعه من اوراق وحبر ,,

ادواتك الجامعيه ,, كتبك ,, دفتر محاضراتك ,, آلتك الحاسبه ,, أقلامك ,, أوراق المذاكره ,,,

كللل أدواتك اشتريها من برى افضللك واريحلك واوفرلك كمان ,,

ملابسك ,, انتبهيييييي ,,,, ممكن تتعرض للخطف ,,, طبعا مو من الطالبات ,, لكن بالسكن ,,

في عاملات صيانه آسيويات ,, اللي يعجبهم من الملابس ياخذونه ,,, بتتعجبين وتقولين كيف ياخذونها

؟؟؟؟؟؟؟؟!!!!!!

احيانا تحتاج ملابسك لغسيل ,, وتحطينها بالغسالات ,,, ممكن تنسينها ,, ويجي الليل ,, اويطلع الصبح

ونتي ناسيتها هناك ,, وقتها ممكن تنخطف ملابسك ,, وتصيرين بدون ملابس ,, ههههه ,, فانتبهي

وبرضو ,, انتبهي من نشافات السكن ,, لانها تخلي لون ملابسك بااااااااااهت ,, او عادي

ممكن تحطينها بالنشافات ,, بس لاتخليها تطول ,, وافضل حل ,, انك تجيبي منشره للملابس

واول ماتطلعينها من الغسالات انشريها بغرفتك وافتحي الشباك عليها ,, او انشري بجنب باب غرفتك ,,

عاملات النظافه ,,, ممكن تجين ومافيك تشيلين اغراضك ,, فتشوفين العاملات عاملين زي الدائره

عليك ,,, كلهم يعرضون عليك خدمتهم ,, طبعا بفلووووس ,,, بتسمحين لوحده فيهم طبعا ,, ولما توصلك

مبناك وتوصل اغراضك هناك ,, بتطلبك مبلغ محترم يعني ,, وطبعا بتشوف وجهك كذا بريء وجديد

على السكن ,,, بتقول هذي اكيد ماتعرف شي وبتضحك عليك ,, لكن انتي من البدايه ,, قبل لاتشيل

اغراضك ,,, اتفقي معاها على سعر معين ,, يعني تقريبا الشغله تستاهل 15 او 20 حسب بعد المبنى

انتبهيييييييييي لاتعطينها فلوسك كلها ,,,




وووووووه ,,,,, هذا كل اللي افتكره ذحين ,, وربي ياحبيباتي ,, اتمنالكم كلللللللل خير بالسكن ,,,

واتمنالكم إقامه سعييييييييده بالسكن بدون مشاكل تنغص عليكم عيشتكم ,,, الله يحفظكم ويبعد عنكم صديقات

الســـــــــــــــــــــــــوء ,,,,

وماكان من خطأ فمن نفسي والشيطان ,,,


الحمدلله رب العالمين ,,, وأصلي وأسلم على أشرف خلق الله نبينا محمد صلى الله عليه وسلم ,,,


أختكم // بنت جامعتي ,,,

[شوشو الاموره]

تم اضافة موضوعك للمفضله ياأطلق بنت


بجد استفدت مررررره من موضوعك

شكــــــــــراً مليوون مرررره

[ǁ غــلأآإ ، رٍوٍحــي ǁ]

يعطيكِ العافيه بنت جـآمعتي ..
تم تثبيت الموضوع ..

[MeeNo92]

=""""")

خلااص ببكي

مدري ايش كنا حنسوي بدووونك بنت جامعتي

داايما موجوودة واحنا استفساراااتنا ما تخلص

يعطيكي ربي الف عااافية على الموضوووع .. حتى انا حطيتو في المفضلة

مررررة شكرااااا

[بشائر الفرح =)]

ماشششاااااااء الله تبارك الله ,,

الله يعطييييييييييك ألف عااااااافيه يابنت جامعتي ويجزاك بجنته ويعتقك من الناااااااار يارب
ماقصررتي موووضوع شامل ومتكامامل وفي وقته فعلاااااا .. أحيي فييك هذا الحرص على الخير .. ماشاء الله عليك
وقفتي معنا وووووووقفه مستحيل ننساها لكٍ ياطيبه .. , الله يوفقك ويحقق لك مناكٍ , آمين آمين

كلها تساهيل من الله .. الله يسهل لنا وننتهي من الأغراض بدري ونستعد للمجيء ..
بس ما الفاااائده من توقيع المبيت .؟


دمتي كما أنتي بعطااااااء
الله يخليك لأهلك ويبارك بأيامك =)

[مقنووون]

صـحَ آنوَ مـآليَ دخ‘ـلَ ,, ههههههههههه
بس يعطيكَ آلفَ ع‘ـآفيهَ ,,
و طلبَ وآإحدَ ,, يآ ليت تسوين لنـآ‘ نسخه منكَ رجـآإل عشـآنَ يعلمنا احنا ايش نسوي هههههههه

[Eman al-hindi]

مررررة أفدتينا .. الله يسعدك ويوفقك ياا رب :)

[мαѕooяy]

ماشاء الله تبآرك الرحمن
شيء روووعه يآعسسسوله ,
الله يعطيك العافيه ,

[انسان محتار]

ما شاء الله عليكي سردتي كل شي

وبالنسبة للشباب كل اللي قالته صحيح لاكن من دون مكياج او استشوار

والله يعينكم على التدقيق كله حنا لو طلعت ورجعت الفجر ماحد يكلمك ولاكن المهم بطاقة السكن معاك

والله الموفق

[*طالبة العلم*]

يعطيك العافيه يابنت جامعتي وصدقتي بكل حرف قلتيه .. =)

آختك : طالبة العلم ..

[آجرآسٌ~]

يعطيكِ العافيهـ ..

وجزاكِ الله خير .. موضوع مفيد جدااا صراحهـ ..

^^

انبسطوا يا طالبات السكن .. :)

خالص~ ودي~

[Dr.Shaikhah]

ربي يديكِ العآفيه يآقموووره

مرآ استفدنآ

احسس تحمممست هع + خفت مدري ليه وودي ابكي ><

[Fatema Alshareef]

المشاركة الأصلية كتبت بواسطة pinkyah مآشآء الله استفدتـ كثير مع اني سكن خآرجي ,, بالتوفيق حبيبتي متآبعه ^_^

ايوه حبيبتي ,, بعض الكلام ينطبق برضو ع السكنات الخارجيه ,,

مشكوره ع المتابعه ,,

[Fatema Alshareef]

المشاركة الأصلية كتبت بواسطة شوشو الاموره تم اضافة موضوعك للمفضله ياأطلق بنت بجد استفدت مررررره من موضوعك شكــــــــــراً مليوون مرررره

تمام ,, وهذا اللي انا اتمناه ,, الفايده لكل زميلاتي الجدد بالسكن ,,,

العفوووو ياالغلا ,,

[Fatema Alshareef]

المشاركة الأصلية كتبت بواسطة ǁ غــلأآإ ، رٍوٍحــي ǁ يعطيكِ العافيه بنت جـآمعتي .. تم تثبيت الموضوع ..

الله يعافيك ,, مشكوره حبيبتي ع التثبيت ,,

[Fatema Alshareef]

المشاركة الأصلية كتبت بواسطة meeno92 =""""") خلااص ببكي مدري ايش كنا حنسوي بدووونك بنت جامعتي داايما موجوودة واحنا استفساراااتنا ما تخلص يعطيكي ربي الف عااافية على الموضوووع .. حتى انا حطيتو في المفضلة مررررة شكرااااا

الله يعافيك ياعسل ويسلمك يااارب ,, ولووو حبيبتي هذا من واجبي ,,