للإستشارة الصناعية

[م/ المستقبل]

السلام عليكم للبشوات :)
الموضوع باين من عنوانه
أخوكم داخل على سنة تخرج بإذن الله فعشان كدا نحتاج دعواتكم حبايبي .. اما بخصوص الشي الأساسي هوا اللي يحتاج اي شي بخصوص مواد القسم من ناحية الدكاترة ومفهوم وشغل اي مادة او التدريب أنا في الخدمة
وما يردكم إلا نفسكم ؛)

[الكريم ابن الكرام]

وعليكم السلام ورحمة الله وبركاته

ربنا ييسر لك التخرج ويوفقك

وجزاك الله خير على هذي الخدمة

إن شاء الله الكل يستفيد

أخوك مهندس صناعي

دمت كريماً

[7amody love]

هلاا اخووي ... الله يوفقك ومبرووك مقدماا عالتخرج .. انا ما اتخصصت بس إن شاء الله ناوي اتخصص صناعيه ...
انا رغبتي صناعيه بس كتير يقولو مالها فرص وظيفيه ومادري ايش فاا ايش رايك ؟؟ ... وكيف التخصص من ناحية الدكاتره هل هم معقدين ولا عاديين ... وإن شاء الله ما تقصر ...

[الكريم ابن الكرام]

المشاركة الأصلية كتبت بواسطة 7amody love انا رغبتي صناعيه بس كتير يقولو مالها فرص وظيفيه

ما صدقك اللي قال لك هذي المعلومة

[م/ المستقبل]

شكرآ أخوي الكريم ابن الكرام على الدعوة الحلوة منك وفرصة سعيدة يا باش مهندس قسمنا :)

.................................................. ...........................

أهلآ 7amody love
الله يسعدك يارب ويوفق الجميع للتخرج

شوف عزيزي خليني اعطيك نبذة صغيرة عن تخصص الهندسة الصناعية واختلافاتها ومميزاتها عن باقي الأقسام الهندسية الأخرى
الهندسة الصناعية عبارة عن :
1- إدارة بمفهوم إحترافي مختلف عن كلية الإدارة والإقتصاد ( 20 % )
2- لغات برمجة كمبيوتر وقواعد بيانات ( 30 % )
3- مفهوم هندسي بحت يتعلق بمشاكل الإنتاج والخدمة والمقاييس الصناعية ( 50 % )

يعني انت كدا يا باشا بتجمع بين 3 اشياء : ادارة وكمبيوتر وهندسة
فعشان كدا المستقبل الوظيفي جدآآآآآآآآآآآآ متعدد ومفتوح امامك في اماكن كثيرة سواء في القطاع الحكومي او في الشركات او في المصانع او البنوك او حتى في المستشفيات

ويكفيك عزيزي انك لما تدخل القسم صدقني حتضمن انك حتتخرج على الأقل بلغة جدآآآآآ كويسة مقارنة بباقي طلاب الأقسام الأخرى
لأنه اعضاء هيئة التدريس أغلبهم اجانب بالإضافة الى الشرح وتسليم المشاريع والواجبات يكون بطريقة كتابة تقارير بأسلوب إحترافي كل الشركات يطبقوه ويطلبوه من موظفينهم

ما ابغى اطول عليك لكن صدقني القسم جدآآآآآآآآآ ممتع ومستقبله حلو .. بس لا تنسى لازم يكون عندك لغة كويسة قبل ما تدخله لأنه جدآآآآآآآآآآآ كرف

وبالتوفيق للجميع

[Baf]

المشاركة الأصلية كتبت بواسطة 7amody love انا رغبتي صناعيه بس كتير يقولو مالها فرص وظيفيه ومادري ايش فاا ايش رايك ؟؟ ..

اتحداك تجيب شخص متخرج من الهندسة الصناعية .. من جامعة الملك عبدالعزيز والى الان ما اتوظف

[الكريم ابن الكرام]

إيش تنصحني أسجل التدريب في السنة الأخيرة أو قبل الأخيرة (أتدرب أول ما أكمل 120 ساعة)

ثاني حاجة ما هو أفضل وقت لتسجيل مادة المشروع ؟!

دمت كريماً

[م/ المستقبل]

والله اخوي كريم أنا اشوف انك تنزل التدريب في الصيف الي قبل اخر سنة
لانه حتناقش وتسلم تقارير التدريب في الترم اللي بعده على طول
اما اذا خليته اخر سنة حيكون مفيد ليك لأنك خلصت كل المواد وفاهم وقت تدريبك .. وحتى حتتأخر ترم عشان تناقشه

بخصوص المشروع وقته الطبيعي اخر سنة (بعد لما تاخد الاوبريشن ٢ - الديزاين - السيميوليشن )
لانه ياخد منك ترمين .. الترم الاول تجميع داتا .. والتاني المناقشه وتنزيل الدرجة

شد حيلك يا باشا وان شاء الله اكون وضحتلك اللي تبغاه وشد حيلك

[engneer.alprins.ismail]

لوسمحت ممكن تقلنا اهم مواد في الصناعية الي احتاج اطبقها في مجال عملي

وممكن تقلنا كيف طريقة مذاكره ستات 2 لأنها تخوف المادة.

وشكرا

[البرق الاصفر]

موضوع جميل وفكرة كويسة خاصة انها لينا احنا الصناعية ^_^

ودي اسالك اخوي عن الدكتور المرعب
انا منزل عنده المنجمنت وملاقيه مرررة كوميدي وخفيف دم ويفهمك كمان ومراح معاه وكله
بس اخاف من كثر الضحك دحين ابكي بعدين

ايش رايك فيه ؟ ( مو بس في المنجمنت بل في كل المواد اللي يدرسها )