بخصوص مادة الحاسب للتخصص الإداري والإنساني إنتظام

[skill-full]

السلام عليكم ورحمة الله وبركاته :
مادة الحاسب زي ما إنتوا تعرفوا مادة ثقيلة دم لمن ما نفهمها كويس , وبالتالي تصير عبئ كبير علينا ونحنا نبغى ناخذ درجات كويسة لأننا تحضيري , وزي ما سمعتوا وشفتوا البنات إلي قبلنا إلي ما اتقبلت في القسم إلي نفسها فيه و... , وقد إيش أثرت النسبة عليهم

حأسأل سؤال وأتمنى تجاوبني أستاذتنا بصدق ..
إيش الفايدة من المحاضرات إلي ناخذها إذا كانت ربع ساعة أو عشر دقايق ؟؟
كيف يكون إختبار الحاسب العملي في أقل من نصف ساعة ؟؟
بس نفسي أعرف ليش يا أستاذتنا (تدرسي وعندك ظروف صعبة (أو) ما تقدري تكوني في الجامعة قبل 8ونص )وفي النهاية ما تعطينا حقنا ؟؟

للي يقرأوا موضوعي .. جاوبوني , في هاذي الحالة نرجع لمين ؟؟! مين أصلا حيسمعنا؟؟

إذا تكرمتوا يا مسؤولين نحنا نحتاج لجنة كاملة تهتم في مشاكلنا وتكون بالفعل تعاملنا على الأقل كأنناا بشر وبنفس هادية وطيبة وتعطينا الوقت إلي نقدر نوضح فيه مشاكلنا وتساعدونا نحلها بكل هداوة ورضا
أتمنى من كل الطالبات إلي يأيدوني يأكدوا على موضوعي وخلوهم يشوفوا كم عددنا . أنا متأكدة هاذا الوضع - وأكيد مشاكل ثانية مع الأستاذات - في منو كثير ومو معقولة يطول وما أحد داري وفي النهاية نحنا إلي نضيع ؟
أتمنى ما ينفهم موضوعي غلط , وأنا أتشرف إني أقول إنو جامعتنا فيها ناس أسأل الله ما يحرم الجامعة منهم .. وجزاكم الله خيرا على إهتمامكم
طالبة إنتظام 1030662

[MNMO0ONA]

انا عن نفسي اايد هادي الماده للي كويس في الحاسب عشان يرفع بيها المعدل
واللي موقد كدا في الحاسب ومايبغا يدرسها كان المفروض اخد دوره icdl وعادل الماده وخلاص
وبالنسبه للاستازه تقدرو تغيروها بانو كلكم تروحو لرئيسه القسم وتشرحولها وضعكم وان شاء الله تساعدكم

[طارق المحمد]

بالعكس اختي الكتاب صح كبير بس تستفيد من كثير انا ماني شاطر في الحاسب وجبت تقريبا فوق 80 من 100
وبيني وبينك ترجع للاستاذ او الاستاذة حسب بس مادة حلوه بالتوفيق للجميع..

[عذبة الأطباع]

الله يسهل علينا السنة التحضيريه وان شاء الله ننجح فيها بجداره,, ويتحقق اللي نبغاهـ..

skill-full

والله وضعكم صعب الله يعينكم .. كلمو مشرفة السنه التحضيريه عن الوضع يمكن تساعدكم...

وصراحه عدم التزام الاستاذات بمواعيد المحاضرات شيء مؤسف ويترتب عليه اثر في مستوى الطالبه..

ان شاء الله تنحل مشكلتكم ..

كنت هنا:~
عذبة الاطباع ~..

[skill-full]

Mnmo0ona ..

فكرة مرررة حلوة إنو نروح لرأيسة القسم . بس ياريت تساعديني وتقوليلي مين رأيسة القسم وفين حألاقيها ؟؟؟
والله من جد صح كلامك كان المفروض ناخذ فيها دورة عشان نجيب درجات وعشان أنفسنا .. شكراا
لاكن دحين يعني بدأنا دراسة وخلاص ما عاد ينفع , فلازم أستاذتنا تكون أقل شي قد مسؤوليتها عشان نقدر نفهم ,
يعني أنا أقول المشكلة إلي إحنا فيها ماهي هداكا الشي إلي نسويلنا عليه هليله , وعلى فكرة أنا درجاتي فوق 85 في الإختبارين , بس المشكلة إنو من جد في بنات مايعرفوا للكمبيوتر وأصلا ما عندهم كمبيوتر خاص فيهم ( ممكن تقولي هادي مشكلتم ) -صح , بس المحاضرة في هاذي الحالة لازم تفيدهم على الأقل يطبقوا المعلومات إلي ناخذها لو مررة على الأقل( وكيف يقدروا يطبقوا أو أصلا ناخذ المعلومات كله في ربع ساعة ؟!) . والشي الثاني ترى كثير ولو كانو على مستوى الجامعة كلها قليل ما يقدروا ياخذوا دورات إما عدم المواصلات أو المادة ..
عموما أتمنى أعرف مين المسؤولة في الجامعة إلي ممكن تغيرلنا الأستاذة أو تشوف لنا حل أو حتى تاخذ فكر كدة بس على هاذا الموضوع .
شكرراا وتحياتي

[skill-full]

عذبة الاطباع.. الله يحققك لك مناكي ومنى كل الطالبات والطلاب ونفرح ونفرِّح أهالينا ..
الموضوع يستاهل إنو كلنا نكون يد واحدة فيه مو بس إلي عندهم مشاكل عشان نساعدهم ,حراام إلي تعرف تذاكر وذكية تجيب درجات حتى لو من غير أستاذة والبنات إلي مهاراتهم يعني مو مررة و يتمنوا قسم من الأقسام ومايقدروا يدخلوه عشان مادة أو مادتين ما اتشرحت كويس أو وقتهم في الأختبار ما أخذوه ( مو وقت زيادة وقت إلي المفروض ياخذوه) , ترى والله من جد الشرح له دور في الحل في الختبار ( دوركبير ), وغير كدا وقت الإختبار العملي معقولة يكون نص ساعة ؟؟
شكراا أختي عذبة الأطباع على تأييدك وأتمنى تكلمي صحباتك يأيدوا على الموضوع , عشان أكبر عدد ممكن يقنعهم أما مجموعة بنات قليلة ما تحرك المسؤولين أبدا ,, على الأقل لمن نروح نكلمهم يكون العدد واضح لهم إنو مو قليل .
وأغلب البنات إلامن رحم ربي يخاف يتكلم وما يسمعونا أوما يغيرولنا الإستاذة فتقوم تحطنا براسها هديك الساعة , ويلا فكينا
.. تحياتي يا عذبة

...

[skill-full]

طارق المحمد : تعاطفك معانا يدل على إحترامك للذات وتقدير منك إنوا الناس طبقات في الفهم والإدرك , شكرا
وعلى فكرة انا درست سنتين في كلية التربة قسم لغة عربية ( فالمواد عموما سهلة علية الحمد لله ) , وشفت المآسي وكيف ينهضم حق البنات وما نقدر نتكلم أو بالأصح وبصريح العبارة مافي أحد يهتم إنو يسمعنا أساسا ( كل مسؤولة ترمينا على الثانية ونتشحطط إلين نطفش ونبطل نقلهم شي وإذا وحدة كانت مررة خايفة على مصلحتها وما طفشت إلين حكت إلي فوق وإلي تحت إلين طلعت أخلاقها وعصبت تكون دوبها وصلت للي بيدهم شي وغصبا عنها تكلمت بنرفزة وأحيانا صوت عالي , وهديك الساعة أنسى يسمعولها لأنها بنت قليلة أدب ) أنا شفت هاذي المناظر في كلية التربية الله يهديهم ويصلحم لو يشوفوا مشاكلنا ويحلوها هم المستفيدين -حيفتخروا بينا وحنرفع راسهم ونكون من جد نستحق هاذي الشهادات وباتالي مستوى المملكة بينا نحنا يرتفع .
الحمد لله على كل حال طولت كلامي بس من حرقت قلبي لأنو ممكن في يوم من الأيام أحد من أخواتي تكون في نفس الموقفوأتمنى هديك الساعة أحد يساعدها .
أتمنى المسؤولين يخيبوا ظني ويحلوا المشكلة عشاننا وعشانهم ..
جزاك الله خير ا,الله يسهل عليك كل عسير يا رب

[MNMO0ONA]

اعتقد في كليه العلوم في هيئه تدريس حقون الحاسب اسالو فين رئيسه القسم ويدلوكم عليها
بس من رايي لوو تتكلمو مع الاستازه باسلوب حلو يعني بنتين تلاته يروحولها في مكتبها وتتكلمو معاها صدقوني حتتجاوب معاكم
افضل من انكم تروحو وتقدمو شكوى وكدا
وربنا معاكم

[طارق المحمد]

الله يسلمك اختي حنا اخوان واي شيء تبغيه انا حاظر
وانا انصحك تدخلين قسم قانون بعد السنة التحضيرية
بس انت ذاكره انك درستي في كلية تربة الي بعد الطائف صح؟؟؟
كيف وضع الكلية وايش فيها تخصصات؟؟؟؟
وهل هي تبع جامعة الطائف ولا جامعة ام القرى؟؟؟
مشكوره تحياتي لك....

[ǮறooЯ]

oO

محاضرة مدتها ربع ساعة !

شوفي أختي .. مادة الحاسب ( كنت ) أعتبرها مادة تافهة ^^

لان ويندوز وورد والطخة هذي .. كانت مرررررررررررررررره سهلة

لكن اللحين .. دخلنا في الاكسس والتصاميم .. وشغلتها شغلة
ولازم تفتحي عينك مع الدكتورة عشان العملي..

اممممممممـ بالنسبة للي تقولك خشي قانون ..

انا ما انصحك تحددي تخصص من بداية السنة ..
لان حتعشمي نفسك .. وبالاخير امكن ماتجيبي المعدل المطلوب لهذه
الكلية .. فتتحطمي ^^

هذا اللي عندي .. وآسف عالاطالة ..

..