ارغب في الانسحاب من الجامعة والعودة السنة القادمة ؟!.

[M!sS chocolate]

السلام عليكم ورحمة الله وبركاااته...

أنا ياجماعة الخير نفسي أسحب من الجاااامعه السنه هادي وأدخل السنه الجاايه
والسبب انو درجااتي في الدوري الأول عدم بإختصار معفنه ومااتوقعتها كدا
واللي زاد الطين بله درجة الإنجلش 16ونص مرره مااتوقعتها كدااا ..

وغير كدا صراحه أنا كااااااااااااارهه الجااامعه وبعض الأحيان أفكر اني أحول انتساب لكن حرام تعبي حق الثانوي يروح هباء منثورا لأني كل ماأدخلها أحس بضيقه بصدري
حتى صحبه كله تمشية حااال وبس وأحيانا أكون قرفانه ومابي أكلم أحد واجلس
لحالي أفطر وبعدها أروح للمكتبه أضيع وقت واليوم اللي يكون فيه عندي بريك
طوييل أحمل هم داك اليوووم ..

يوم السبت مارحت الجاامعه عشان المطره وفي نفس الوقت أبغى اشرد منها
ودحين ماني قادره انااام جالسه أفكر ببكره .. بعض الأحيان أقول في نفسي
غير يتمنى اللي أنا فيه وهادي الجاامعه اللي تعبت عشان أدخلها وتعبت أهلي
معايا وفي النهايه أقول كدا لكن مايلبث الشعور بالراحه كم يوم ويرجع الخوف
من ثاني .. والسبب أنا عارفته الصحبه أنا مرره كنت متعلقه بصحباتي حق الثانوي
ولمن اكلمهم بالتلفون وأسمع صوتهم أجلس ابكي من كثر ماني مشتاااااااقه لهم
ودايما أحلم اني أرجع للمدرسه من كثر تفكيري فيها وتفكيري بايام المدرسه
اللي أتمنى أرجع لها ..أساسا أنا في الجامعه مو أنا أحس اني إتغيري كثيير
طبعي في المدرسه إجتماعيه وفله وأحب الهرج والضحك لكن الجااامعه دااااائما
ساااكته وحتى البنات ماني قادره أتداخل معاهم والسبب انو حاطه في راسي
ابغى صاحبه تكون زي اختي بإختصار تفكيري تفكير بنت مدرسه مو بنت جامعه
في حكاية الصحباااات .. صحيح اني اتعرفت على بنتين من كلاس الإنجلش
ودايما أجلس معاهم بس أحس نفسي لسى كارههه الجااامعه ...
ماأفرح الا لمن أشوف وحده من صحباتي حق الثانوي حتى هيا مرره تنبسط
لمن تشوفني تقولي لمن أشوفك أحس بالحنين للمدرسه وتعاني من نفس المشكله
تقولي صحبة تمشية حال وبس .. جدولنا هو السبب واللا كان اجتمعنا دااايما
بس للأسف أوقات البريكات حقها أنا يكون عندي محاضره ..

أدري انو في اثنين حيقروا كلامي وحيستغربوا منه وأولهم أخويا وأساسا أنا
كنت متردده في طرح الموضوع لكن في النهايه كتبته ...

[بنوته...]

ياحياتي
هوني على نفسك فكيها وما عليك من احد
بلا صديقات وكلام فاضي
عادي انتي حطي ببالك انك بتدرسي وبس
ومع الوقت بتحسي انك مالك ومال البنات دامك بس تبي شهادة
حياتي انا دحين مشغولة ليا رجعه لكي
تيك كير ياقمر

[متاخره واااايد]

طيب اقولك شي وماتزعلي.. انا ماقريت كل الكلام لانو منعاد من كم وحده وواحد قبلك وعاذرينكم

لاننا مرينا بظروفكم ..وانا اكتر وحده اتأزمت ..ولو تركزي بأسمي راح تعرفي .. انا ماراح اتكلم كتير عن نفسي

بس اللي حابه اقلك هوا اني خشيت الجامعه بعد كل الناس .. يعني جايه متاخره بشهر لظروف .. وكان الاسبوع اللي

داومتو كان بداية اختبارات الدوري الاول.. وطبعا مو الكل رضي ياجل منهم يعطيهم العافيه اجلولي اسبوع ..!

باللهي باسبوع ايش راح اسوي ازاكر ولا افهم ولا ايش.. بس اعضاء المنتدى ماقصرو ..

وخصوصا شخص يعطيه الف عافيه تعب معايا يومها.. ومع انو مايعرفني بس تعب معايا ..

ماراح انسى جميلو ابدا ..

وفي النهايه ارجع واقول يعطيهم العافيه ع التاجيل .. وطبعا غيرهم مااجل واختبرت متلي متل اللي داوم من بداية السنه

وخبصت وبكيت وبغيت اسحب ..بس صحباتي واهلي اقنعوني اكمل لنهاية السنه واشوف كيف ..


وكملت والحمدلله نتيجتي ترفع الراس والحمدلله مع انو مايبين عليا ههههههههه << مو كانك طولتي


الزبده من دا كلو اانو انصحك تكملي وتشدي حيلك لاتكوني ضعيفه ومن اول طيحه تستسلمي خليكي قويه وصبوره


ان الله مع الصابرين .. وصدقيني بتيجي ايام التسكين وتفرحيني انك دخلتي التخصص اللي تتمنيه وبأعلى الدرجات


بس انتي اعقدي النيه وراجعي نفسك واسترجعي عزيمتك وكل شي بالصبر يجي


ومانيل المطالب بالتمني ..ولكن تؤخذ الدنيا غلابا


ومانبغا نسمع دا الكلام مرآآآ تانيه لا منك ولا من غيرك تفهمي << عصبت ههههههههه


الله يوفقك ياقلبي وتنجحي وترفعي راس اهلك وتجي تفرحينا معاكي

[متاخره واااايد]

قريت كلامك كلو ههههههه


لو على صحباتك فأنا ابشرك صحباتي كلهم انتساب يعني ولا احد معايا .. حالتنا وحدة بس عشان اطمنك


وانا زيك فلاويه واجتماعيه كنت في التانوي جيت الجامعه وسرت مرآآآ هاديه وماصاحب احد وكلو كلامي رسمي


بس اهو الحمدلله تاني سنه بديت اتعود والبنات بالمنتدى حبوبات ومايقصروو


ومو اهم شي بالدنيا الصحبات صح مانقدر نعيش من غيرهم بس نقدر نتحمل بعادهم فتره لهدف معين زي التعليم


شدي حيلك عشان صحباتك يفرحولك .. والدنيا كده يعني لو بطلتي جامعه راح تشوفيهم متل اول..؟ مااتوقع


حاولي تراجعي نفسك .. وصدقيني مع الايام راح تكوني صداقات جديده وحلوه .. وطبعا صداقاتك الاولى حتكون موجوده


بالتوفيق .. وسامحيني ع الاطاله ^_^

[M!sS chocolate]

حاولت والله حاولت بس ماااااااااااااااااقدرت كلمت بنت عمي وجلست أبكي لها قولت يمكن
هيا فاهمه الجامعه وفاهمه الوضع وهيا ماقصرت تقولي تعالي عندي وقت البريكات
بس أنا رافضه الشيء هذا لانو شكلي يكون غلط مع بنات أكبر مني وهم مواضيعهم
عن قسمهم فأنا أجلس سااااكته ... جلست تقولي حاولي تتداخلي مع البنات والجاامعه
مافي شيء اسمه صحبه مرره الروح بالروح خلي علاقتكي سطحيه وبس
وأنا ماني قادره اخلي علاقتكي سطحيه اتعودت في المدرسه اني لمن أصاحب اشوف
البنت زي اختي مو صحبتي وفله ومزح وهبااال وعااادي ..بدون رسميات
لكن الجاامعه أحس الكل رسمي وماتاخذي راحتك مع البنااات ..
خالتي تقولي هو أول اسبوع اسبوعين بعدين بتشوفي الوضع عااادي لكن دحين كملنا
الشهرين وداخلين عالثالث وبرضو الوضع زي ماهواا ...

[متاخره واااايد]

حاولي تتآقلمي شوفي اذا ماقدرتي تتأقلمي دحين ماراح تقدري بعدين


لايهمك احد وخلي شغلك الشاغل دراستك واعتبريه مكان تجي تاخذي شي وترجعي البيت ..


مع الوقت راح تتأقلمي وتحبي الجامعه .. صدقيني .. انتي دحين هدي نفسك وشيلي فكره انك تبطلي ..

[وفاء جدة]

شوفي يامس.....

كلام متأخرة واااايد كله صح ..وبعدين ايش عذرك في ترك الجامعة ؟؟؟؟

الصحبات مو عذر كافي انك تسيبي الجامعة وتهدمي مستقبلك عشان البنات

طيب صحباتك بيتركوا الجامعة عشان انتي مو معاهم؟؟؟؟؟

واذا درجاتك معفنه ترى لسع باقي دوري ثاني ونهائي يعني باقي 70 درجة

شدي حيلك وان شاء الله تجيبي درجات حلووووة....

حاولي تتأقلمي مع بنات شعبتك.....

اتمنى انك ماتزعلي من كلامي.....

[شرووق]

يا قلبي كلنا كذه بدايه دخولنا الجامعه ... طبيعي راح نكون مشتاقين ..
للمدرسه وروتين المدرسه وصحباتنا .. لاننا دخلين عالم جديد .. انتي بنفسك ...
تقدري تثبتي وجودك ... من عند بوابه الجامعه يتحدد مصيرك ..وبعدين احنا لسه
تونا في البدايه الدرجات معوضه ان شاءالله ..
والصديقات ... حاولي على قد ماتقدري انك ما تخسري صديقات الثانوي ..
وانك تكوني صداقات جدد ما اقولك خليكي مرررررره فري ... بس حاولي
تسااعدي نفسك ... ولا زم تعرفي محد راح يوقف مستقبله علشاانك ..
وكلها فتره وتسمعي خبر خطبة هاذي وزواج هاذي وسفر هاذي ..
يعني صديقات الثانوي على قد ماهي راائعه بس ماهي دائمه ..
الاغلبيه كذا ...ويارب يكتبلك الصديقه الصالحه ..اللي تعينك
على دراستك وحيااتك ...

واااسفه بربرت كثييييير ....

[حابه # اتخصص]

أول شي شوفي يا عزيزتي حكايت أنك تسيبي الجامعة علشان درجات الدوري الأول فأنا اقولك
بدررررررررري لسه باقي الترم الثاني عشان يتقرر مصيرك ومو معقولة تضيعي سنة من عمرك عشان 30 درجة وأنت في يدك 70

شدي حيلك وربي يوفقك في اختباراتك الباقية

[*صبا*]

مساء الخييييييييييير

اعتبري كلامي كلام اخت لاختها واسمعي نصيحتي
الجامعه غيييرك يحلم انه يدخلها وانتي تتركيها عشان صاحباتك

مااتوقع انه شي حصلتي عليه بصعوبه زي الجامعه تقدري تفرطي فيه بسهوله
وحكايه انك تحولي انتساب ترى الانتساب راحه صح بس تكوني ضايعه موفاهمه شي

وبالنسبه لصاحباتك فما اتوقع انه فيه احد متعلق ويحب صاحباته كثر حبي لصاحباتي في الثانوي
و الحين ولاوحده معاااي بالجامعه ومره فاقدتهم بس مو معناته ان اترك الجامعه


وتركك للجامعه يضمن لك انه تشوفي صاحباتك طول الوقت

على فكره كل وحده تدخل الجااامعه تحس بهدا الشعور
بس مع الوقت تتعرفي على بنات وتحبيهم اكثرررر

واحب اقولك ان الصداقه في الجامعه ماتكون بنفس صوره الثانويه يعني مثل الاخواااات

لاتكون جدا عاديه

ساااااااااااااامحيني ع الاطاله واتمنى لك التوفيق