سؤال بخصوص مادة التدريب العملي -2

[Baro0 Felembo0]

السلام عليكم

ياصبايا الانتساب
انا السنترا عندي حالف يمين انه ما يفتح وصراحه فقدت الامل منو وحاولت كل الطرق
المهم انا ترم تخرج
ومادة البراكتكم عندي ناس يقولو فيها محاضرات عالسنترا ود.سوزان مره قالتلي فيه ومره قالتلي مافي ياااعالم اش بيصير انا في الضياع هههههه

ياريت تفيدوني هل لها محاضرات وفيه اختبار نهائي عليها كمان ولا بس التدريب حقها والسلام ولا اش السالفه

مع العلم اني حاليا بتدرب

ياريت تفيدوني لاني مرره حايسه

[لولو وسوسو]

اختبار طبعا فيه

بس انا زيك واساسا لسا حتى ماسددت ومنقطعة عن الدراسة وحالتي حالة

ياليت تفيدونا ياللي عارفين

[i still feel ya]

عليكم السلام ورحمة الله وبركاته
هوا في محاظرات اكيد بس تقريبا 3 محاظرات تحدد وتشرح نقاط معينه من الملزمه اللي طالبتها و هيا اللي هتيجي في الاختبار. تقريبا اشياء بسيطه فقرات تعداد و اشياء روؤس اقلام ..
بالنسبه لتوزيع الدرجات والله ناسيه افتكر 20 ع التدريب - 20 ع الريبورت- 60 ع الامتحان النهائي "" كأنو لوم الامتحان قالتلنا هتحسب 20 على شيت الحضور والغياب >> مو متاكده كم الدرجه تحديدا بس قالت هتحاسب عليها
والامتحان بيكون جزء توفل - جزء كم سؤال ع الريبورت اللي عملتيه - جزء من الملزمه
** الامتحان كان جدا جدا جدا جدا جدا سهل . حاولي تاخدي تحديد الاشياء المهمه من البنات اللي بيحظرو وجهزي نفسك قبل الامتحان ع التوفل و ان شاء الله تاخدي فل مارك

[white rose]

وعليكم السلام ورحمة الله وبركاته

حياك الله اختي

ومشاكل السنترا ما تنتهي الله المستعان

الدكتورة خلصت المحاضرات من قبل المحاضرة الماضية فما فيه اي فايدة من حضورك لها هيا قد شرحت واعطتهم كل اللي تبغاه يصير انتي روحي لها للجامعة وهيا راح تساعدك وبلغيها انك ما حضرتي السنترا لمشاكل في الدخول وهيا حتعذرك ان شاء الله

طبعاً كطالبة خريجة لازم تسوي اجراءات التخرج وتلاقيها هنا : ►:: طريقة اجراءات التخرج لطالبات الانتساب + صورة لنموذج طلب التخرج [ تم التحديث]::◄

ايضا هنا تلاقي التدريب والفورمز وايميل المس وساعاتها المكتبية :

كل ماتريدون معرفته عن مادة التدريب العملي lane 463- للترم الاول 2014

طبعا انتي لازم تبداي ترسلي لها من ايميل وتخبريها وايميلك لازم يكون ايميل باسمك واكاديمي مو اي ايميل لانها ما حترد عليك وحتطول

الا اذا كان ايميل اكاديمي وقتها حترد عليك بعد ثلاث ايام بالكثير

الله يوفقك :-)

[ѕυрзя пıdσ]

ياقلبي لاتخافي مافي محاضرات عالسنترا
الدكتوره اعطتنا محاضرة وحدة بس ومسجله
والمنهج حيكون عباره عن تدريب 90 ساعه و اختبار نهائي عن القرامر
وموجود الرابط فوق في رد الاخت وايت روز
الي عليكي انك تعبي استماره التدريب تعبي بياناتك وبيانات جهه التدريب و ولي الامر
وترسليها بالسكان لو ماتقدري تروحيلها وهيا حترد عليكي بالموافقه عالمكان وانك تبدي تدريب
وتخلصي ساعاتك وبعد ماتخلصي تروحيلها وتعطيكي ورقه ريبورت عن تدريبيك و ورقه التقييم لجهه التدريب
وانصحك تروحيلها بدري لانو العادة تطول في الرد ومافي وقت ابدا


والله يوفقك يارب ويسهلك امرك

[white rose]

المشاركة الأصلية كتبت بواسطة ѕυрзя пıdσ ياقلبي لاتخافي مافي محاضرات عالسنترا الدكتوره اعطتنا محاضرة وحدة بس ومسجله والمنهج حيكون عباره عن تدريب 90 ساعه و اختبار نهائي عن القرامر وموجود الرابط فوق في رد الاخت وايت روز الي عليكي انك تعبي استماره التدريب تعبي بياناتك وبيانات جهه التدريب و ولي الامر وترسليها بالسكان لو ماتقدري تروحيلها وهيا حترد عليكي بالموافقه عالمكان وانك تبدي تدريب وتخلصي ساعاتك وبعد ماتخلصي تروحيلها وتعطيكي ورقه ريبورت عن تدريبيك و ورقه التقييم لجهه التدريب وانصحك تروحيلها بدري لانو العادة تطول في الرد ومافي وقت ابدا والله يوفقك يارب ويسهلك امرك

الله يجزاك خير ندو ما تقصري

اضيف اقتباسك الى :

▪♡:|:خلاصة اخبار دورة طالبات الانتساب - الفصل الدراسي الاول2014:|:♥▫


الله يتمم لكم تخرجكم باعلى الدرجات يارب :-)