الردود السلبيه على مواضيع السنه التحضيريه

[DANoOo.R]

السلام عليكم جميعاً
إن شاء الله يكون الكل بخير والكل حل في الاختبارات كويس
اليوم الموضوع اللي راح أتكلم عنه أتوقع أنه كثير من أعضاء المنتدى بيعانوا منه وبيتأثروا بيه ومنهم أنا وهو
(الردود السلبيه على المواضيع المطروحه في المنتدى من قبل الأعضاء الآخرين)
يعني بـ إختصار الكل عارف أنه احنا في فتره اختبارات ومو أي اختبارات اختبارات راح تحدد مصيرنا ومستقبلنا والكل لازم يشد حيله ويجتهد عشان يحقق اللي هو يبغاه..
هذه الردود اللي أنا بتكلم عليها بتأثر على نفس الشخص اللي كتبها وعلى الأعضاء اللي بيقروها يعني مثلا من بعض هذه الردود لما يجي عضو ويكتبلك أنا بكره لازم أغلط في الاختبار لأنه صعب أو الغلط في الاختبار شي لابد منه فبالتالي اللي راح يقرأ هذا الرد راح يبرمج في عقله أنه ايوا صح كلامه احنا لازم في كل اختبار نغلط أو مستحيل أجيب الفل مارك لأنه الاختبار صعب.. احنا في هذا المنتدى محتاجين لأحد يحفزنا ويرفع معنوياتنا مو نحبط أنفسنا وبعدين نحط غلطنا على غيرنا أو نلوم أحد تاني سواء دكتور/ة أو أستاذ/ة أو حتى أسئله..هذا الشي ماراح ينفعك في النهايه وأنت أو أنتي اللي راح تضيعي بسبب كلام مالوا أي قاعده أو معنى.
فياريت أنه نغير ردودنا السلبيه إلى ردود إيجابيه حتى لو كان في شي انت/ي مضايق/ة منه تقدر تطرح ردك بطريقه ثانيه بحيث أنه مايأثر سلبياً على اللي يقراه..
أتمنى تكون وصلت فكرتي ورسالتي للجميع..وهذا الكلام أعتبروه نصيحه وأتمنى الكل يتقبلها وإذا كان في أحد عنده اعتراض على الموضوع أتمنى أنه يكتب رده وأنا راح أتقبل أرآئكم وإذا كان فيها نقاش راح نناقشها سوا.
أسفه على الإطاله وأتمنى الكل يتوفق في الإختبارات ويجيب الفل مارك في النهائي وإن شاء الله ربنا يحقق لكل واحد اللي يبغاه ودايماً أتذكروا أنه ربنا مستحيل يضيع تعب أحد وراح يعوضنا خير

نهاية كلامي أشكر الأخ مراد الجنيد لأنه كان أول عضو دعم فكرتي واوحى لي بطرح هذا الموضوع
شكراً لك أخي مراد الجنيد وربنا يوفقك في اختباراتك ويحقق لك اللي في بالك

أختكم..DANoOo.R