بنات الي اخدت عند حنان مبارك f في مادة النوع الإجتماعي ضروري تدخل

[تونيا]

لا تنسوايا بنات الي تبغى تاخذ حقها بكرة تروح راح يكون هناك مجوعه من البنات والي تبغى تنضم لهم لازم الساعه 11 تكون هناك وبإذن الله راح نرجع منصورين وراح تشوفوا
(ان موعدهم الصبح أليس الصبح بقريب)
ولكم حبي وسلامي

[عسوله موووت]

تونيا غلاتي

ايش صار معاكي مع هذه الماده اليوم رحتي شفتيها والا لا؟

[تونيا]

اولا انا زعلانه من الجميع زعلانه على الاستسلام الي فيكم فين الهمه فين العزيمه في الثقه بالله اولا ثم بالنفس ثانيا في القوه بالله والعزيمه والاصرار فين وفين وفين ماشفت ولا احد فيكم ياترى كل هذا ضعف ولو كنتو خايفين كان استخرتوا قبل ماتروحوا للجامعه ولو فيه خير كان الله يسر روحتكم وماراح احد يلومكم لو طالبتوا بحقكم وانتوا عارفين انه مايضيع حق وراه مطالب لكن للاسف لا حياة لمن تنادي ومع ذلك انا ما نسيتكم واتكلمت عني وعن الجميع والكل كان معايا بفضل رب العالمين كل استاذة اشتكيها استقبلتني بصدر رحب ولله الحمد

[touch.of.pink.90]

لو ليكي حق حتاخذيه وربي معاكي
انا لسا ما اخذت الماده بس اتحمست معاكي واتمنى انك تقولينا ايش اللي حيسير معاكي

[تونيا]

احكيلكم حكايتي من البدايه
انا كمان جبت f ولما راجعت قالت الاستاذه حنان انا راجعت ورقتك اربع مرات كان هذا الكلام يوم الاربعاء اخر يوم في الامتحانات كان عندي امتحان اداره استراتيجيه ودخلت الامتحان وانا مدمرة نفسيا لأبعد الحدود لكن نصر الله قريب بالمؤمنين وفقني الله في هذي المادة (وأيما توفيق) وجبت 96 المهم ولما بدات الدراسه قدمت شكوى عند الدكتورة اقبال واعطيتها تشوف نتايجي الفصليه ولما شافت المعدل ودرجاتي في المواد الي اقل درجه 95 على طول اتصلت على استاذه حنان قدامي وطلبت منها تجيب ورقتي وكان معايا زميلتي وجابت كمان f قالتلها انا كمان يادكتوره وطلبتها ورقة زميلتي ووالله اني قاطعتها وقلت دكتوره في دفعه كمان جايه وكنت اقصد كل وحده مستسلمه ومتنازله عن حقها المهم قالت الدكتوره جيبي كل الاوراق وفي اليوم التاني الي سميته يوم النصر رحت و للاسف الشديد كان معايا زميلتي بس مافي غيرها لان الكل زيكم استسلم في آخر لحضه وشك في قدراته المهم انا رفعتني من 51 الى 61 يعني نجحتني وقلتلها استاذه كيف في يوم زدت 10 درجات قالت خلاص انتي ناجحه ايش تبغي
تحسبني راح افرح واجري على البيت لكن هيهات وزاد اصراري وما استسلمت زي الي استسلمت ورضيت بالدرجه السيئه وقلت لا يااستاذه ابغى اشوف ورقتي وخلتني اشوف ورقة الاجابه قلتلها ابغى كمان ورقة الاسئله قالت ايش تبغيبها خلاص هذي ورقة اجابتك فسكت خوفا من اني اغلط عليها او اسيئ الادب اما صحبتي فطلعت ورقتها ضايعه يعني مصيبه تانيه على الاستاذه المهم راحت الاستاده ورحت على طول لدكتوره اقبال لكن للاسف لقيتها راحت وزميلتي زيكم استسلمت وراحت لكن انا على طول نزلت لمكتب الوكيله (مو زيكم استسلم) وكلمت السكرتيره و الادرايات الي موجودين وكمان خليتهم يشوفوا نتايجي وانبسطوامني وصدقوني لا وكمان انفعلوا من كلامي وعلى طول اعطوني ورقه كتبت فيها خطاب على استاذة حنان وقالوا لي اكتبي كل حاجه وفعلا كتبت كل حاجه واستقبلوني بصر رحب واعطوني ارقامهم واخذوا رقمي وقالوا لا تاخفي حقك راح يرجعلك خلال هذي اليومين ورجعت البيت وانا ارى بصيص الامل(وهذا كله في يوم النصر الي كلمتكم عنه يعني امس) المهم مع ذلك ما اكتفيت ورحت اليوم ودخلت على دكتوره اقبال انا وزميلتي وكلمتها وقلتلها معقوله يا دكتوره في يوم ازيد 10 درجات وطلبت اشوف ورقة الاسئله والاجابه الخاصه فيا وقالت من حقك كلمي استاذه حنان ولو ما رضيت تعالي ليا قلتلها مارضيت راحت طلبت من استاذة نبيله تتصل باستاذه حنان وقالتلها قوليلها بكره تجيب اوراق الاسئله والاجابه لكل البنات وتراجع معاهم اخطائهم كمان
ونزلنا انا وصحبتي وخليتها هيا كمان تقدم خطاب على الاستاذه حنان وتقول انها مو بس f كمان ضيعت ورقتها يعني ان شاءالله بكرة النصر فعلا وهانت وما بعد الضيق
الا الفرج وطالما الشكوى من كل مكان وبكرة راح تجيب النموذجين اذن حيظهر الحق بإذن الله وتفائلوا بالخير تجدوه وانا والله يا بنات لما رحت مكتب الوكيله طلبت يعيدوا النظر في كل الاوراق لانه مستحيل احد يرسب في هذي الماده واتحججت بانه في بنات من خارج جده وما يقدروا يجوا الجامعه يراجعوا ووعدوني الاستاذات خير لا وكمان قالوا ان استاذه حنان التوب في الشكاوي وقالوا لي انه في اولياء امور اشتكوا عليها في هذي الماده وانه كل الاستاذات مستغربين الرسوب الكبير الي اول مره يحصل في هذي الماده ولا تخافوا يا بنات الحقوق راح ترجع لاصحابها والله خير معين
واخيرا
( آسفه لكثر كلامي واسفه لسوء الفاظي لكن حبي لكم وحرصي على مصلحتكم وغضبي من سكوتكم رغم ان الحق معكم جرأني على اساءة الأدب والتلفظ بما لا يليق بكم فأنتم بالتأكيد لستم كذلك لكن الحياه احيانا تنهال علينا بالمصائب التي تشل تفكيرنا وتجعلنا من هول الصدمه نتصلب في اماكننا بلا حراك لكن تذكروا كلما مررتم بمثل هذه الظروف تذكروا الله القوي الجبار والرحيم الحنان وسوف تستطيعون مواجهة كل الصعاب , فقط توكلوا على الله حق توكله وخذوا بالاسباب كما تعلمتم وامضوا في طريقكم دون خوف او تردد وتذكروا قوله جل وعلا (وليس للانسان الا ما سعى )وثقوا بقدرة الله وتفائلوا ولنحيا جميعاً بالأمل (فما اضيق العيش لولا فسحة الأمل )
ولنا ان شاء الله لقاء احكي فيه ما حصل ولا تنسوني من صالح دعائكم
واسأله ان ينصرني واياكم انه على ذلك لقدير
وآخر دعوانا ان الحمد لله رب العالمين وصلي اللهم وسلم وبارك على سيدناونبينا وحبيبنا محمد وعلى آله وصحبه اجمعين

[عسوله موووت]

جزاكي الله كل خير
الله يجعله في موازين حسناتك
والله كان بودي اجي معك بس عندي صعوبه بالمواصلات مافي احد يقدر يجيبني في الصباح
انا ارسلت معامله الكترونيه طالبت فيها اعاده تصحيح اوراق الاختبار
وان شالله بفضل الله ثم منك يرجع لنا حقنا الضائع مع هذه الاستاذه التى لم تحافظ على الامانه وتوديها على الوجه المطلوب منها

[تونيا]

(ظهر الحق وزهق الباطل ان الباطل كان زهوقا )
(اللهم لك الحمد حتى ترضى ولك الحمد إذا رضيت ولك الحمد بعد الرضا)
الف الف الف مبروك يابنات انعاد تصحيح الاوراق ورجعت الحقوق لأصحابها بأمر من الوكيله
شفتوامو قلت لكم ثقوا بالله ولا تتنازلوا عن حقوقكم يا احب صديقاتي
هيا كل وحده تروح تملي عينها بالدرجه الجديده اليوم انا رحت الجامعه وقالوا لي تم تعديل الدرجات وانا اخذت (98) شوفوا كيف من (f) الى (98)
والله اني سجدت من الفرحه وكلكم صلوا لله ركعتين شكر ويمكن يترصد التعديل لكل وحده خلال هذي اليومين
انا دوبي فتحت ولسه ما اترصدت لكن دكتورة اقبال هيا الي بشرتني لانه كان معاها كشف الدرجات وخلاص طالما اتعدلت لا تشيلوا هم الرصد لانه ماراح يطول وهانت ...
ولا تنسوني من صالح دعاءكم
والسلام عليك ورحمة الله وبركاته
اختكم المحبه ... نجوى بكروري

[عسوله موووت]

الف الف الف مبروووووووووووووووووووك
وربي فرحتيني
الله يوفقك ويفتحها بوجهك باي طريق
يارب ان شالله ماتشوفين الهم بحياتك كلها
اللهم يسر امورك كلها
يارب لاتحرم اختي نجوى كل دعوه
الله يفرحك دنيا واخره


عقبال ماافرح بنتيجتي معك
وان شالله مابنساك من الدعاء

[رزان فهد]

الـــــــــــــــــــــــــــــــــــــــف مبـــــــــــــــــــــــــــــــــــــــــروك

والله فرحت لك من قلبي فعلا تنقهري لما تكوني مقدمة تمام وتلاقي احد يبخسك حقك


بس استاذة حنان مادريت انها راح تتعب معك ولة ان كان فتحت عيونها وهي تصحح ورقتك


والله اني كنت متابعة موضوعك وجد تحمست لك وانا اخذت المادة قبل مع غادة بفلح وعطتني 93 والحمد لله


والله يفتحها عليك ياقلبي وين ماتروحين

[براءة الورد]

بسم الله الرحمن الرحيم
السلام عليكم ورحمة الله

الف الف الف مبارك عليك اختي نجوى وربي فرحت لك وأحيي فيك روح الشجاعه والامل والتفاؤل اللي فيك والى الامام دائما
وجزاك الله خير الجزاء عنك وعن أخواتك الباقيات

انا اخدت الماده من اول مع ريم ولله الحمد

تقبلي مروووري
براااااااءه،،،،،،،