درجاتي زفت ...والسبب الدكاتره.....):

[سنة تحضيرية خطةب]

انا جدا مضايق من درجاتي بالذاات الكيمياء والاحصاء .....اما الاحياء كانت حلوه لانوا الي ذاكرتوا جا بالاختبار .....اما الاحصاء الاسئلة تبان انها سهلة لاكن كلها لف ودوران خبصت لليل وكمان الرسمة حق الخط جبت العيد فيها جاني احبااااااااااط لانوا حلمي اصير دكتور ....والكيمياء جبت العيد ..الدكتور يشرح لك سريع ويخلص لك اشياء كثيرة في محاضرة وحدة وفي الاختبار يجيك كل شئ انجليزي وتجيب العيد وبعدين....مضايق من درجاتي ومحبط وكرهت الدكاتره كلهم وودي اسحب من الجامعة ولخبطة اموري لو في بس شئ يرفع درجاتي باله يفيدني ...........

[سعدوشه]

الله يعين والله الحال من بعضة
بس خل املك بالله كبير .. وان شاء الله بتتعدل لاتنسى لسى فية دوري ثلني وفية فاينل
والمحاضرة اللي تحس نفسك م فهمتها من دكتورك احضر عند واحد غيره عشان تستفيد من الشرح وكل شي بيهون ان شاءالله ويااااااارب يكون فية بونس كثير لكل المواد

[نايف العبدلي ^]

المشاركة الأصلية كتبت بواسطة سنة تحضيرية خطةب انا جدا مضايق من درجاتي بالذاات الكيمياء والاحصاء .....اما الاحياء كانت حلوه لانوا الي ذاكرتوا جا بالاختبار .....اما الاحصاء الاسئلة تبان انها سهلة لاكن كلها لف ودوران خبصت لليل وكمان الرسمة حق الخط جبت العيد فيها جاني احبااااااااااط لانوا حلمي اصير دكتور ....والكيمياء جبت العيد ..الدكتور يشرح لك سريع ويخلص لك اشياء كثيرة في محاضرة وحدة وفي الاختبار يجيك كل شئ انجليزي وتجيب العيد وبعدين....مضايق من درجاتي ومحبط وكرهت الدكاتره كلهم وودي اسحب من الجامعة ولخبطة اموري لو في بس شئ يرفع درجاتي باله يفيدني ...........

هلا أخوي ..

بيني وبينك الغلط مننا كطلاب مو من الدكاترة .. المفروض اللي ما

يفهم من الدكتور يحول للدكتور ثاني .. لو مافي تحويل ..

يروح يأخذ مدرس خاص .. أنا من الطلاب اللي كانوا ما يفهمون

على الدكتور أبد .. أول شئ سويته كل مادة ما أفهمها جبت لها مدرس
خاص .. على هذا المنوال حتى خلصت من السنة التحضيرية ..

وبيني وبينك الدكتور يشرح فهمت ما فهمت ما يهم ..

يعني أنت لو ما تشتغل على نفسك محد درى عنك ..

بالنسبه لدرجات الدور الاول النازلة .. بالعكس هذا أكبر محفز

أنك تشتغل على نفسك وتشد حيلك .. ونصيحة أخوية مني لك

خذ مدرس للمادة اللي ما تفهم فيها .. وذاكر أول بأول .. عشان بعدين

راح تقضي الأجازة وتروح وتجي ما تشيل هم الدرجات لأنك وقتها

راح تكون واثق من حلك ..

الله يوفقك و يحقق لك اللي تتمناه أخوي ..

[حيــــــاة]

له له له ياخوي .. هذا لسى بداية الطريق والدوري الاول مو نهاية معدلك ..
عندك حلم !
عندك هدف !
عندك طموح !
اذ راح توصل ومافي شيئ بيمنعك لادكتور ولا غيرة ..

بعد ترم في الجامعة تعلمت ان نجاجك يعتمد 50% فقط عالدكتور وال50% الثانية على جهدك وبحثك واجتهادك ..
انا معك انه الدكتور وظيفته يفهمك ويشرح لك .. بس اذا لسبب او لآخر ما استوعبت منه او ماحبيت طريقة شرحه او مايوصل المعلومة تمام ..
عل معنى هذا نقول " مستقبلي بيضيع بسببه "
لا طبعا .. ومستحيل تخلي عائق زي كدا يكون سبب لتراجعك ..
خليه سبب لنهوض همتك وانك تبحث عالبديل وتكثف اجتهادك وتحاول تفهم مع نفسك او تحضر اكسترا مع دكتور ثاني .. او تستعين بملخصات اضافية .. او تروح لخصوصي ..او تجلس انت واصحابك وتشرحوا لبعض ..
في اكثر من طريقه وطريقه ..
وتقدر تنجح .. وبتفوق كمان ..
بس اصحى من حالة التوهان والياس الي انت فيها وراح تلقى كل شيئ قدامك ميسر ..
وبتقول لحالك ( ياااه اش القلق الي كنت عامله لنفسي عالفاضي !! )

صدقني هي ازمة وسحابة عابرة عشان تختبر نفسك وقدراتك تحت الضغط ..
انت لسى في الربع الاول من اول سنه ولسى قدامك كثييير والجامعه والدراسه في اي بقعه من بقاع الارض تحتاج صبر كثييير ..
حتى لو سحبت ورحت مكان ثاني .. يعني ممكن تكون دراسة الطب فيه اسهل !!
لا الدراسه هي هي والطب هو هو في اي مكان ..بس الحكمة كيف تتحمل ..

وضعك وقلقك طبيعي .. وكلنا نمر به " مفاجعات الدوري الاول "
نكون طالعين من الامتحان متحمسين دي اول امتحانات لنا ك جامعيين بس تجي الصدمه قويه o_O
وكانك ذاكرت في عالم والاختبارات جات من عالم والدرجات عالم ثالث ..

ممكن السبب هو انك تكون لسى اول اختبارلت تخوضها اول دراسه فعليه .. ممكن الوقت ماكفاك تستوعب الجزئيات المقرره عليك ومافهمتها من دكارتك ..
بس صدقني هذه ابد ماهي النهاية .. ولسى قدامك فرص كثير تعدل ..
من الحين مفروض تكون عرفت اخطائك وسبب اخفاض درجاتك من ناحية طريقة مذاكرتك وغيره ..
من ناحية الاساله المحورة بتتعود عليها دامك جامعي .. ومع اطلاعك على نماذج الاساله للامتحانات السابقه لكل جزئية راح تلاحظ انه لابد منها في كل اختبار ..

حاول تعرف اش مشاكلك في الدراسه ..
ان كان الدكتور احضر عند غيره ..
لاتشتت نفسك بكثرة المصادر هذا من اكبر اسباب الضياع في الامتحانات المصادر الكثير وسبعطعش ملخص ومرجع ..
كافي شيئ واحد تستوعب منه ..

في الكيمياء انصحك ب " فديوهات يوسف زويل وملخصاته الي يشرح عليها "
فادتني في جزيئات كثير في الدوري .

...
اخر شيئ ..
تذكر ان الي اجتازوا وجابوا الفل مارك مو احسن منك .. وممكن درسوا عند نفس دكتورك كمان ..
بس كل واحد عرف كيف يتعامل مع نفسه وعرف يحدد نقاط تراجعه فين وقدر يحلها ..

عندك حلم .. عندك طموح .. عندك هدف ..
تقدر تحققه ومافي مخلوق يقدر يمنعك دامك تجتهد وتحاول وتسعى ..
ربنا مابيضيع لك تعب وبيتحقق مناك ..
بسسس ..
اصبببر اصبر اصبر وحاول ولا تتراجع ..
الخطأ مره واثنين وحتى عشرة مايعني انك ماراح تنجح وتنسحب ..
كل خطأ تقدر تتعلم منه ويفيدك ويقويك ..

درجاتك الي نقصتها الحين راح تسترجعها في الدوري الثاني والفاينل والترم الجاي ..

والله يحقق لك ماتتمنى ..

اسفه عالكلام الكثير وخروجي عن الموضوع
وترا ماقلت هالكلام من باب دفرنه زايدة بس جد حسيت بوضعك انك مره متازم وترا الموضوع اسهل من كذا بكثير ..
بس لا تياس وتفائل واسعى وراح توصل ..

وبس ..

مووفق : )

[سنة تحضيرية خطةب]

يعطيكم العافية ع الردود الحلوة ...ابدا ماتوقعت ناس زي كدا... إن شاء الله بعد الاجازة اتفاهم مع الدكاترة اذا مانفع احاول استمر واعوض الي فات

[AJF_995]

كيف أشوف نتيجة الاحصاء و الكيمياء !!

[Dede12]

اذا اقنعت نفسك ان الخطأ من الدكاترة محا تساعد نفسك بالعكس حتضرها
عادي اذا الدرجة مهي عالية اهم شي ماتكرر
انا العام في الفيزياء فالاختبار الدوري جبت 23
بفضل الله اتسهلت في النهائي وجبت 100
ارضى برزق الله واكثر من الدعاء وبر الوالدين بنية خالصة

[بيو كيميائية ^_^]

لو كانت درجة الأحياء زفته راح تكون كمان بسبب الدكاترة صح ؟؟

شوف أنا معك فيه دكاترة ماتدري وين الله حاطها و لا تعرف تشرح

بس أنا كطالب ايش أعمل أحاول أشوف لي طريقة

أفهم نفسي مافهمت أحضر عند دكتور يشرح كويس أو أسأل أحد الدكاترة المشهود لهم بحسن تعاونهم

أسأل زملائي

ما أجلس كذا

الحين أنت انسى الدوري الأول

و جهز للدوري الثاني

من هذا الأسبوع إبدأ ذاكر و شوف اللي مو فاهمة و على طول روح لأحد يساعدك

و بالتأكيد راح تشوف فرق كبير بين الدرجات و بتكون درجاتك عالية

و لا تصير فاشل تسحب و تتحطم و ماتحاول مرة ثانية

مافيه شيء يجي بالسهولة

بالتوفيق

[AoDi]

الكيمياء اتوقع الغلط من الاختبار اسئلتنا كانت عجيبة و اتوقع انتو كمان

آما الاحصاد فالوضع غريب الكل فرحان و محد جاب درجة كويسة الا القلة

و آما الاحياء فكان

المذاكرة = الاختبار = الدرجة