][ تجمع للجداول و تعديلها و الحذف و الإضافة ][

[LeLou]

المشاركة الأصلية كتبت بواسطة Hakuna Matata أنا مستوى ثآلت فيزيآء طبية ، و إن شآءالله ذآ جدولي لغة عربية مع أستآذة رضية باحميد بيولوجيا الخلية مع فريال استيته ثقافية إسلامية مع رحآب بدوي تفاضل و تكامل 2 مع رانيا الحربي أمن و سلامة مختبرآت مع منيرة حماد فيزياء عامة 2 مع ثريا باعرآقي معمل فيزياء عامة مع لبنى سندي يآريت تفيدوني إذآ كويس ولا أعدل حآجة و كمان بالنسبة للاستآذآت ذآ كويسآت ولا أغير

عزيزتي انتِ حولتي مو كنتِ كيمياء حيوي؟!

عمومًا اللي أقدر أقول لك هو جدولك حلو بس ليش ما تآخذي فيزياء حيوية أظنها تقتح مواد..

بس شدي حيلك في فيزياء 202،، من غير مجاملات دا الكورس يمكن مقبرة قسم الطالبات..
لكن انك تجيبي في درجة شي مو مستحيل،، بس هو متعب بمعنى الكلمة و راح تفهمي كلامي بعد أول محاضرة بس أنا مو حابة أقول كلام سيء في العلن..
المادة بأربعة ساعات فتخسف و ترفع،، لكن خذيها نصيحة مني:/
كوني احضري دايمًا،، و حلي الواجبات اللي تديكم هي،، و سلمي الأستاذة تقارير المعمل،، لأنه كان واحدة من الأشياء اللي خسفتني الاب و الله المستعان..
و إن شاء الله تجيبي درجة كويسة فيها..

//

بالنسبة للبيو ردت عليكِ بيو كيميائية جزاها الله خير..

//

الماث حلوة خصوصًا لو اتأسستي في 110 كويس،، حتتسهل معاكِ المادة،، احضري كويس و إن شاء الله تجيبي فيها درجات كويسة..
الدكتورة رانيا الحربي أول مرة تدرس بعد حصولها على شهادة الدكتوراه،، بس كانت ماسكة المادة قبل لا تحضر الدكتوراه و الكلام اللي يُقال عنها جدًا طيب..

//

أمن و سلامة مختبرات جدًا سهلة،، و الدكتورة منيرة طيوبة و حبوية و قمة في الأخلاق ربي يسعدها..

و المعمل راح تديكِ هو أستاذة إن شاء الله،، الدكتورة لبنى مشرفة المعمل..
و عمومًا استاذات 281 بشكل عام كويسات،، مافي أستاذة مستوى شرحها أقل من المتوسط..
المعمل متعب شوية لكنه سهل بس فيه تجارب شغلها كثير،، لكني أصنفه سهل المستوى لطالبات الفيزياء،، و ممكن تكون فيه شوية صعوبة للطالبات من خارج التخصص..


بالتوفيق||~

المشاركة الأصلية كتبت بواسطة عنآن السحآب" السلام عليكم ورحمة الله وبركاته.. كيف حالكم جميعا يا علماء وعالمات؟ وكيف كانت الإجازة؟ إن شاء الله خير وبركة على الجميع يا رب.. أردت أن أخذ رأيكم ومشورتكم بجدولي إن كان مناسبا الترم الجاي إن شاء الله.. معادلات تفاضلية 1 الطرق النظرية للفيزياء 1 ميكانيكا تقليدية 2 معمل فيزياء حديثة معمل كيمياء عامة السيرة النبوية والخلفاء الراشدين مجموع عدد الساعات 15 ساعه ، فهل تنصحوني أزيد مادة سهلة، ولا ممكن يكون ضغط على المواد الدسمة؟ لأني قررت بعد تفكير عميق إني أزيد ترمين عن الخطة.. وجزاكم الله خيرا، وأتمنى للجميع سنة دراسية جديدة مليئة بالحماس والتفاؤل والإبداع"

و عليكم السلام و رحمة الله و بركــاته..

أمممم جدولك ما راح أقول لك سيء لأنه و بصراحة،، أنا لمن كنت في دا المستوى أخذت اللي أسوأ منه بمراحل،، و أشوف المستوى الخامس هو جحيم القسم..

معادلات تفاضلية و بصراحة مو زي ما يوصفوها الناس..
مو سهلة لو قارنتيها بماث 202،، لكن ح تعرفي مدى سهولتها و أنها تعتبر جنة مقارنة بطرق نظرية 2..
أنا أخذت المادتين مع بعض و كنت أشوف معادلات حاجة تافهة جنب نظرية 2،، رغم أني و للأمانة جبت في طرق نظرية درجة أعلى من معادلات..
هي المادة يبغالها تكوني متمكنة من التكاملات،، و أهم شي تراجعي قوانين التكامل + حضور و عدم غياب + تدرب على الحل + عدم مراكمة المادة + تركيز و انتِ تحلي في الاختبار..
و إن شاء الله درجات كويسة بإذن الله،، أعطي المادة مجهود بسيط و بإذن الله تنبسطي،، والأستاذة شرحها كويس و تفهم و أسئلتها مو صعبة أبدًا لكن تصحيحها دقيق و تخسف..
لذلك قلت لك ركزي و انتِ تحلي،، و المادة للأمانة تلقي فيها جميع القريدز من الــ a للــ f عشان كذا أقول لك مو مستحيلة،، التفاوت دليل اختلاف المجهود و أنه المادة مو مستحيلة..
و ما أشوفها من أسوأ المواد اللي درستها..

//

طرق نظرية 1 و باختصار شديد أسهل مادة ممكن تدرسيها في تاريخ حياتك الفيزيائية كلها..
و الدكتورة اللي ماسكتها عسل بمعنى الكلمة،، ما درستني لكني اتعاملت معاها إنسانة قمة في الأخلاق و يمدحوا شرحها..
بس عندك تشابتر عن التكاملات الثنائية و الثلاثية هو أصعب تشابتر و كو بذيك الصعوبة،، حتى أنظمة المحاور سهلة..
و الباقي كله كلام مكرر،، متجهات و محددات كلام فاضي،، و الأعداد المركبة و المصفوفات..
//

ميكانيكا 2..
مادة كلها اثباتات..
و الدكتورة أول مرة تمسكها فما أقدر أفيدك..
غير أنها عسل لأني اتعاملت معاها لكنها ما درستني،، و ما تعرف تتكلم عربي :-)

//

معمل فيزياء حديثة أسهل معمل في التخصص..

بس ترى في نظام في القسم جديد أنك ممنوع تاخذي المادة من غير المعمل أو العكس..
حديثة 2 لو أخذتيها ح تنفتح لك كوانتم..
أفضل لك انك تاخذي كوانتم قبل لا تتغير الدكتورة اللي ماسكتها و دي نصيحتي لكِ..
المفروض تستغلوها بكل ما لديكم من قوة..
رغم أني ما أحبذ تاخذي كوانتم و نظرية 2 ممكن تتعبي خصوصًا أنه الدكتورتين عندهم أمانة،، و دكتورة كوانتم كانت ماسكة نظرية 2 قبل كوانتم،، و دايمًا تقول لنا كانت نظرية 2 قبل كوانتم..
لكن في بنات عملوا دي الحركة و مشي معاهم الحال..

//

السيرة مادة جدًا سهلة و حلوة على حسب سمعتها المشهورة لكني ما أخذتها..


أعتذر على الإطالة عزيزتي..
موفقة||~