استفسار عن د.عبدالعزيز راجح هاشم الشريف

[اسمي عبدالله]

السلام عليكم ورحمة الله وبركاته

كيفكم شباب ان شاء الله بخير ونعمه

انا حبيت استفسر عن د. عبدالعزيز راجح هاشم الشريف

من ناحية الشرح والدرجات

وجزاكم الله خير

[المحاسب]

هذا الدكتور سيئ جدا وانا انصحك تحذف والله يجيبلك مرض نفسي
اسعد جوهر يقولوا سيء احسن اثنين اسامه فلالي ومحمد النفيعي
هذا الترم كنت ابغاها عند محمد بس ماهم منزلين اسمه
وانا حذفت الترم اللي راح والترم هذا من عند الشريف

[jazan]

زي ماقال المحاسب بالضبط

والله هذا معقد لدرجة كبيره

وبعدين مو دكتور هوا استاذ بس

[اسمي عبدالله]

يعطيكم العافيه شباب

وان شاء الله احذفها من عنده

وجزاكم الله كل خير

[Romeo Jeddah]

انا اخدت عندو الترم اللي راح في البدايه كان جدا سيء واكتر من نص الشعبه حذفو الماده لكن بعدين اتحسن اسلوبو واسئلتو كلها اختيارات ويجيبلك اسئله اضافيه في الاختبار والاسئله مش صعبه ممكن تقول عليها متوسطه ويديلك درجات على النشاطات مثلا لوفي ندوه في الجامعه يقلك روح وسجل اسمك وخد درجتين واو تلات وفوق دا كلو يديلك بونس نهايه الترم نصيحه خد عندو

[الشريف ريان]

السلام عليكم اخوي

بالنسبة لأسلوب الأستاذ عصبي ومزاجي وتحسو معقد بس بالنهاية تاخذ معاه درجات اغلب الشباب 80 و85 وفيه الي جاب 90 اهم شيء لاتعابطه وركز بالمصطلحات الانجليزية عليها بونس اخر كتاب ماجد المنيف الوردي بـ 55 ريال باختباراته كلها من الدوري الأول إلى النهائي واشترك بناديين طلابيين وتأخذ 5 درجات وتجيه بنهاية الترم بورقة من النادي مختمة ويضيفلك هيا واحضر الاشياء الي يقلك عليها واحضر قبل الإجازات لاتغيب تاخذ بونس درجتين وافتكر الي حضروا قبل الحج وخصم بس في النهاية مسحها الي غابو غيايبين واكتب معاه الي يقوله ويكتبه بالسبورة وفيه عندي اوراق اعطانا للدروس مرررة تفيد احاول انزلك هيا ان شاء الله وهوا على فكرة يشد وينقص بالبداية وتخاف بس في النهاية مجموع الشباب اغلبهم كان 50 وما فوق من 60 وتاخذ درجة حلوة معاه
تقسيم درجاته:
دوري اول 15 (اختيارات وصح وخطأ ومصطلحات انجليزية)
دوري ثاني 15 (اختيارات وصح وخطأ ومصطلحات انجليزية)اسهل من الدوري الاول
حضور 10 احضر ولا تغيب تاخذها كاملة وقبل الاجازات فيه بونس يضاف لاختباراتك لو خبصت وعلى فكرة يتاخرعلى المحاضرة بعض الاحيان ولاتمشي من المحاضرة إلا إذا جاه سكرتيره وأذنلكم أو حضركم(يداوم من أول اسبوع دراسة انتبه)
مشاركة 10 حل الواجبات واحد ببداية الترم ادانا بسيط والتاني بنهاية الترم مع الاختبارات النهائية بإذن الله إذا أخذتها عنده ارسلها لك رابط واكتب معاه الي بالسبورة والي تسمعه واشتري كتاب ماجد المنيف الوردي وكتاب الخولي احسه افضل كتاب اغلب الي يشرحه منه واشترك بخدمة جامعتي عنده قائمة بالمشتركين بس اخسر شويا 4 شهور وقت الدراسة الشهر بـ 12 المسج و4 شهور
48 ريال ويشكرك اخر الترم برسالة مبروك على النجاح econ101
اختبارات فجائية 10 بس 3 مرات اختبرنا شفوي وتقدر تجاوب ومرات يحشرك بس على الأقل حاول وبالنهاية تاخذ معاه ولا تكذب عليه
النهائي 40 درجة (اختيارات وصح وخطأ ومصطلحات انجليزية)

نبذة عن بعض الي يدرسوا هذه المادة واخدوا معاهم اصحابي اقتصاد جزئي 101
اسامه ابراهيم هاشم فلالى الدرجات 60 و65 وواجبات مرررة دسمة ورسومات
اسعد سلامه مرجان جوهر الدرجات يقولو ما تتعدى 75 فتأكد واسال بنفسك
عابد عبدالله عبدرب النبي المشايخي ما كان يدرس الترم السابق(لا اعلم)

فاستخير الله قبل كل شيء وانا من وجهة نظري كويس بالنسبة للباقين مقارنة بالدرجات والمجهود

[الشريف ريان]

للمعلومية يجب تحضير الدرس الي يقلك عليه للمشاركة عشان تجاوب وبنهاية الترم ما كان يدقق يسال بعض الاحيان ويسالنا في الي اخدناه بالذات الي كتب معاه وسمع ايش قال يجاوب وهوا مطمن

[اسمي عبدالله]

يعطيكم العافيه و ما قصرتوا

واخوي الشريف ريان كفيت ووفيت

وجزاك الله كل خير وكثر الله من امثالك

[7no0o]

هاااي قااايز
انا باخد ماده ماليه عامه مع اسامه فلالي!! كيف نظامو؟؟ وكيف اسالتو لانو قلنا انها مقاليه...فكيف مستواها