لغة الدراسة بالمسار العلمي انصحوني

[Z8rRt]

قريت موضوعك ، لكن م قريت الردود لإستعجالي

بس حبيت أعلق على الموضوع , وأقولك وش حصل معي
أنا قبل كل شيء كنت طالب مهمل لدرجة ما تتصورينها , وخشيت ثانوية أهليه بسنة ثالث ثانوي
عشان أجيب نسبة حلوه تدخلني الجامعه , وبكل صراحه وبدون ذكر أسم الثانوية ,, أنا كنت أصحى الصباح الساعه 7
عشان أروح أسولف مع أخوياي إلى 12 , وأرجع البيت والكتب مثل ماهي بالسياره وعلى هالحال طول السنه !

يعني بكل أمانه , تخرجت من ثالث ثانوي وأنا والله لو تسأليني عن وش أخذنا بالكيمياء أو الفيزياء أو الأحياء ولو عنوان موضوع واحد أقولك مدري!

يعني بهالثانوية كانو يدفونا دف مو بصاحي عشان الفلوس -_-" لكن هذا مو موضوعنا ,, اللي أبي أوصله لك إني ماكنت عارف وشهو منهج ثالث ثانوي بالأساس
وجيت خشيت الجامعه وكان بيني وبين الدخول لمسار علمي إنتظام " بالصباح ومكافئه " نص درجة , وحاولت معهم لكن ما رضيوا
ف قالو لي تبي أدبي إنتظام ؟ " بالصباح ومكافئه " أو تروح علمي موازي " دوام مسائي بدون مكافئه " .. فكرت فيها وأخترت ادبي إنتظام
ورجعت البيت وأنا ماكنت مقتنع بصراحه
شاورت أهلي بالموضوع وأستخرت ربي , .. ورجعت للجامعه بنفس اليوم وقلت لهم خذو البطاقة , وحطوني علمي موازي وكان قرار جداً صعب الصراحه
لأني ماكنت أدررري عن منهج الثانوية شيء وكنت مهمل لدرجة ما تتصورينها
وبدأ الفصل الأول بالجامعه , والحمد لله يارب حسيت إني تغيرت 180 درجة , ودرجاتي جداً عالية الحمد لله
كل هذا لأني نسيت الماضي حقي بالثانوي , وعشت الحاضر اللي أنا فيه وأقنعت نفسي أن الماضي م يتغير لكن دامني بالحاضر بإمكاني أغيره وأصنع مستقبلي
وهذا أنا الحمد لله عديت السنة التحضيرية رغم أني مثل ما ذكرت ماكنت أدري عن مناهج الثانوية شيء , وأنجليزيتي ضعيفه .. ف الحمد لله يارب

اللي أبي أوصله , توكلي على الله وأختاري علمي .. وصدقيني نصيحة من أخوك ,, بالعزيمه والأصرار توصلين للي تبينه
ورح تواجهين صعوبة بالبداية , لكن لو عديتها .. رح يكون كل شيء طبيعي

والله يوفقك ويوفق الجميع ان شاء الله