لغة الدراسة بالمسار العلمي انصحوني

[HU~]

حبيبتي أول شي مبارك تخرجك من الثانوية الله يوفقك و يكتبلك الخير في حياتك القادمة!
تاني حاجة بالنسبة لإستفسارك ! اللغة الإنجليزية في السنة التحضيرية ماتُعتبر أبداً عائق حتى للناس اللي مستواهم متدني جداً جداً !
جميع الدروس في السنة التحضيرية عبارة عن إعادة للثانوي بس بالإنقيزي و أسهل كمان! كونهم يجيبوا الزبدة و المختصر المفيد بدون مايدخلوا في الأعماق
الرياضيات و الفيزياء و الكيمياء! جميعها مسائل بدون دش أو كلام إلا مايعد ع الأصابع!
أما بالنسبة للأحياء ففعلاً صعوبته تكمن في إنه بالإنقليزي بس كل سطر مترجم تحته بالعربي
في البداية حتتعبي و بعدين صدقيني حتلاقي إنه الكلام بالإنقليزي أسهل من العربي! < عن تجربة
والله أفتكر أول دوري أحياء مر عليّ كان وقتها عندي عزا و باقي على الأحياء تقريباً خمسة أيام و أنا مامسكته من بداية دراستي له
يا بكيت بكا مع التوتر و الأوضاع بس الحمدلله شديت حيلي و تعبببببببت كثير و جبت درجة حلوة و في الدوري الثاني انتبهت لنفسي و لاحظت في تحسن وفهم أكثر من أول!
و على فكرة الدكتورات شرحهم بالعربي في المحاضرة فلا تشيلي هم أبداً + لو في مصطلح ماعرفتيه في الإختبار يمديكي تسألي ويساعدوكي !
بإختصار في ناس أقل مني منك في لغتهم بس مشاء الله عدّوا السنة التحضيرية بأقل الخسائر و دحين دخلوا كلية الطب و مبسوطين وصاروا بلبل كمان !
فإيش انتي غير عنهم؟؟؟؟؟؟ أتعبي شوية!
خصصي وقت لمذاكرتك ضعف ماكنتي في الثانوية! وطبعاً أول بأول! و إن شاء الله ربي يحققلك مرادك و نشوفك في كلية أحلامك يا رب!
وبالمناسبة في ناس كثير كتبوا عن تجاربهم في قسم المواضيع المميزة أطلعي عليها عشان تستفيدي أكثر!
و أي شي ثاني أنا حاضرة ;)