♥همسآت قلبي♥ في صفحآت♥

[roo7 aboha]

يابوي جعلك للبقا والمكاسيب
عمري بدونك يالذرا وش أبي به

يابوي تسأل عن شفاك المراقيب
طلعة سواتك للنوايف غريبه

ليه المرض مايعرف الزين والعيب
مايدري أنك للمخاليق هيبه

أبسألك وشه به غزا وجهك الشيب
والقلب لايع والنواظر شحيبه

وش بك تحاتي لا نوى الموت تغريب
تخشى علينا بالليالي الكئيبه

خذ دلتك وأركى على مسند الجيب
وعطني شماغك بلثمه وأحتمي به

ونروح لأرض بها العشب والطيب
وتسمع كلام يالغلا تحتفي به

يابوي بنتك لا انحكى بالتجاريب
كل يشق لهيبه الصيت جيبه

يابوي ماني من سوات المخاريب
اللي تجيب لعلية القوم خيبه

وماني من اللي لا مشت حفها الريب
أنا من اللي مايدنس حليبها

مرفوع شاني عن غرام المكاتيب
وأكبر من انني ارتضي بالحبيبه

أنا غرامي لا تبدوا بالتراحيب
نفوس الاوادم في وجودي رحيبه

وإن كان زيني فتنة للمصاويب
أحط وجهي بالحريق ولهيبه

زيني أبيه واشتري سمعه الطيب
اسمٍ ينومس بالصروح الذهيبه

وإن كان عندي بالحلا شي اصعيب
عندي جدود مارضت بالغليبه

دموع القبايل في لقانا مساكيب
كن المقابر لاحضرنا قريبه

خضبت لك كفي من العز تخضيب
ورفعت راسي للنجوم الصعيبه

والله لأسدك بالفعول المصاليب
والله لأشيلك بالرخا والمصيبه

طلع المعالي ماانحكم بالشواريب
بنت وأناطح فارس القوم طيبه

وياشيخي ابش لو تدور الدواليب
بنتك إلا منه عوى الذيب ذيبه