شرح لرسم البياني للاحتكاك ؟؟

[LeLou]

المشاركة الأصلية كتبت بواسطة golden man7 شكراا لك شرح وافي وكافي ماشاء الله يعطيكي الف عاافية ماقصرتي بس عندي ثلاث اسئلة ايش الطريقة اللي احدد فيها النقاط (الدوائر ) ؟؟ ماهو المثلث اللي في منتصف الرسمة ؟؟ كيف اوجد V.I ؟؟ معليش اذا اخذت من وقتك ويارب يكون في ميزان حسناتك شكراا لك ..,

الله يعافيك,,

بالنسبة للسؤال الأول:~
النقاط تعينها حسب بيانات الجدول,, هي اللي أخذتها و إنت تسوي التجربة..
و أنا صورت الجدول تبعي..
ترسم المحاور,, و تقسمها تقسيم يتناسب مع القيم اللي عندك..
مثلاً زي في الرسم أعلاه:~
كانت قيم m في الجدول تتراوح ما بين 0.1675 إلى 0.4175
قسمت المحور الأفقي كل مربع كبير = 0.1
بحيث أنه الخط أو المربع الصغير جدًا = 0.01
و قيم M تتراوح ما بين 0.037 إلى 0.067
قسمت المحور الرأسي كل مربع كبير = 0.01
بحيث الخط أو المربع الصغير جدًا = 0.001
عشان أقدر أعين نقاطي..

لكن المربعات مو واضحة لأنه دا تصوير..
تعين النقاط عادي زي أيام المدرسة بس ما ترسم X مكان النقطة..
ترسم نقطة حولها دائرة..
لأنه في معامل الفيزياء لازم تكون في نسبة خطأ,, دي الحركة معناها النقطة في هذه الحدود..
بعدين ترسم خط يتوسط النقاط..

السؤال الثاني:~
المثلث دا عشان تحسب الميل..
ترسم مثلث في منتصف الخط تقريبًا..
و الميل زي ما أخذناه في المدرسة = فرق الصادات / فرق السينات
و الميل (Slope) هو معامل الاحتكاك..

السؤال الثالث:~
V.I هي الجزء المقطوع من المحور الرأسي..
في الرسمة زي ما إنت شايف الخط لا يمر بنقطة الأصل بل يقطع المحور الرأسي..
تشوف هو قطعه عند أي قيمة,, في حالتي كانت (0.022)..
بعدين حسب المعادلة إللي في نظرية التجربة أنه الجزء المقطوع من المحور الرأسي = معامل الاحتكاك * كتلة البلوك..
توجد كتلة البلوك زي ما هو موضح في الصورة..
دا عشان تتاكد أنه النتايج صحيحة،، لازم تطلع كتلة البلوك مقاربة للي طلعت لما وزنتوه في المعمل..
إذا استاذ المعمل ما طلب منكم دا الجزء لا تسويه..

أتمنى تكون وصلت الفكرة و أي سؤال أنا حاضرة..
بالتوفيق||~