كلية الطب هدفك؟....إذا تفضل لو سمحت.

[Feras L. Kindi]

السلام عليكم

كيف الحال دفعة 13؟
اتمنى تكونوا مستمتعين بالتحضيري زي ما استمتعنا XD

المهم خلينا ندخل بالموضوع...
اذا كان هدفك اخي او أختي هو كلية الطب فأسمعوا الكلام اللي حقوله لكم كويس...
انا سألت هذه الأسئلة في منتدى الطب شكلي ما عرفت اسأل او ما فهموا سؤالي كويس.
انا كنت مطنش الدراسة ايام الثانوية وماكنت اذاكر الا عشان الاختبارات ... والحمد لله كنت اعدي وبامتياز.
في التحضيري تعبت كثير خصوصا بالرياضيات والكيميا لاننا كنا اخذناهم قبل كذا وانا مطنشهم ولكن الباقي كان معظمه جديد.
سألت في قسم الطب عن ما اذا كان الكيميا في التحضيري لازم اركز فيها ولا طنش وحاخدها في كلية الطب. قالوا لي عادي راح تاخد كل شي وبالفعل كلامهم كان صحيح لكن مو بالظبط.

ياللي ناويين جديا ع كلية الطب ركزوا تركيز تام ع الكيميا راح تاخدوا فها اساسيات راح تساعدكم جدا ع الفهم في الكلية واخص بالذكر مادة البايو كمستري.
واسايات زي الاحماض والقواعد.
والاحياء ركزوا عليها كمان واقصد في القسم الخاص بالدي ان ايه والبروتينات واي شي يخص البشر بعيدا عن الطحالب وما الى ذلك.

طبعا انا اقصد هنا انكم تاخدوا المعلومات لحياتكم بعد كدا مو عشان الاختبار وخلاص.
الباقي مو مشكلة براحتكم بس ركزوا ع اللي قلت لكم عليه.
وطبعا الانجليزي لازم تتعلومها بنية انكم راح تستخدموها كثير في حياتكم وتساعدكم جدا خصوصا مع النظام الجديد راح تسوون ابحاث -غير اجباري ولكن مهم جداً- واكيد راح يساعدكم في الدراسة.
وظبطوا نومكن لان ساعات نومكم راح توصل للمستوى الطبيعي يعني حوالي 7 ساعات مو خمسطاعشر ساعة

ولا يمنع انكم تتصفحوا شوية بعض كتب الطب -قراءة فقط بنية الاستكشاف- راح تساعدكم عشان تتعودو ع الجو والمواد.

وان شاء الله اقابلكم في الكلية وقبلها في دورة Tech Me Medicine


كنت اتمنى احد ينصحني هذه النصايح واخذها بجدية ولكن للاسف مالقيت ...فاتمنى ماتضيعوا الفرصة انا قلت لكم اشياء راح تساعدكم جدا باذن الله بعد توفيقه ثم رضا الوالدين.

واي استفسار انا حاضر

في امان الله

[shroogh]

مشكور اخوي على نصائحك
بسأل عن المعدل المطلوب للالتحاق بكلية الطب هذا السؤال من اول يدور في راسي ابا القا له جواب

[جُوآن]

المشاركة الأصلية كتبت بواسطة shroogh مشكور اخوي على نصائحك بسأل عن المعدل المطلوب للالتحاق بكلية الطب هذا السؤال من اول يدور في راسي ابا القا له جواب

و انا كمان اسأل نفس السؤال


السنة دي وقفت النسب على كم ؟

[fi9]

المشاركة الأصلية كتبت بواسطة جُوآن و انا كمان اسأل نفس السؤال السنة دي وقفت النسب على كم ؟

طب وجراحة 1433 / 2012 دفعة 12


الاولاد الفرع رئيسي 89.741
الاولاد فرع شمال جدة 87.63
الاولاد موازي الفرع الرئيسي 84.889


البنات الفرع رئيسي 95.28
البنات موازي الفرع الرئيسي 93.565


طبعا النسب حتتغير , وممكن تكون اعلى او اقل . على حسب الدفعة

[Dr.doaa]

المشاركة الأصلية كتبت بواسطة fi9 طب وجراحة 1433 / 2012 دفعة 12 الاولاد الفرع رئيسي 89.741 الاولاد فرع شمال جدة 87.63 الاولاد موازي الفرع الرئيسي 84.889 البنات الفرع رئيسي 95.28 البنات موازي الفرع الرئيسي 93.565 طبعا النسب حتتغير , وممكن تكون اعلى او اقل . على حسب الدفعة

ليش كدا التفريق بين البنات والشباب ابغى سبب مقنع لدا التفريق

[fi9]

المشاركة الأصلية كتبت بواسطة dr.doaa ليش كدا التفريق بين البنات والشباب ابغى سبب مقنع لدا التفريق

اول شي صلَ على النبي

ثاني شي, النسب ما تتدخل الجامعة فيها , هيا تعتمد على شطارة الدفعة والراغبين في الكلية فقط

نسب البنات كانت عالية جدا لانهم دوافير فياخدو تقريبا ادفر 150 بنت في التحضيري والراغبين في الكلية واقل وحدة فيهم كانت نسبتها 95.28 واللي بدون مكافأة 93.565

ونفس الشي في الاولاد لكن احنا نسبنا اسوأ منكم بكثير و اقل واحد في الفرع الرئيسي نسبته 89.741 , وكذا

انتي لا تخافي , اهم شي شدي حيلك وجيبي نسبة موزونة عالية , والنسب تختلف من دفعة لدفعة وتعتمد على شطارتها والرغبات فقط

وفقك الله

[Dr.doaa]

اللهم صلي على محمد
ياخرابي بس150 بنت احنا تلات ارباع الدفعه تبغى طب كل ما اسال بنت تقول تبغى طب
ربنا يعين وشكرا جدا وربي يوفقك كمان

[fi9]

المشاركة الأصلية كتبت بواسطة dr.doaa اللهم صلي على محمد ياخرابي بس150 بنت احنا تلات ارباع الدفعه تبغى طب كل ما اسال بنت تقول تبغى طب ربنا يعين وشكرا جدا وربي يوفقك كمان

مو شرط 150 بالضبط , دفعة 11 فيها حوالي 200 بنت و 200 ولد , يختلف العدد من سنة لسنة , على حسب المقاعد في الكلية . انتي شدي حيلك وجيبي نسبة عالية وبإذن الله تدخلي كلية الطب

[taemina]

الله يعيين وييسر للكل

شكرا اخوي على النصائح المهمة دي ^^

[xamnus]

المشاركة الأصلية كتبت بواسطة feras l. Kindi ولا يمنع انكم تتصفحوا شوية بعض كتب الطب -قراءة فقط بنية الاستكشاف- راح تساعدكم عشان تتعودو ع الجو والمواد. في امان الله

أخي جزاك الله خير على الموضوع
ممكن تقترحلي أسماء كتب سطحية؟