.,~ دفتر الأيام ~,. ملاذ بوح صامت

[خالد9921]

أخواني الكُبار فيهم طبع ما أقدر أسايرهم فيه
يجبرون عيالهم يسلّمون على إيدي
بقولتهم .. سلّم سلّم على يد عمّو عيب يا ولد وإلاّ يا بنت .. سلّم على يدّه !
وطبعاً انا ما اتحمّل يسلّمون على إيدي اسحبها بسرعة
واشمئز وقتها احس فيني من الكِبر والعنجهية الشيء الكثير المُقرف
بينما احسّ براحة جبّارة وانا اسحب إيدي ولا اخلي الطفل فيهم يطبع القُبلة على إيدي

لاحظوا أخواني هالتصرّف الصادر منّي بعد فترة
قالوا ليش ما تخلّيهم يسلّمون عليها .. خلّهم إنت عمّهم
مثل ما إنت تسلّم على أيادينا بعض المرّات

قلت لهم ياخي انا اسلّم على أياديكم مُختاراً لا مُكرهاً
احبّكم ياخي واشوف لكم أفضال عليّه كأنكم الأب الثاني لي
يكفي دعمكم لي من طفولتي لهذا اليوم بشتّى أنواع الدعم
ويكفي فخري الاجتماعي بكم وانا افخر بكم بين الناس بأعلى المراكز العلمية والوظيفية


أمّا بزارينكم مالي فضل عليهم فين وفين أشوف البزر فيهم
لا قدّ ربيتهم ولا قدّ صرّفت عليهم ولا لي أدنى ذرّة فضل عليهم
ولا حتى قد دعمتهم
بالعكس يمكن يجيني البزر يوم العيد معه 500 عيديات
ثم اضربه بشويش بدون ماحد داري واقول كخّة يا بابا واسحبها منه واشتري له حلاوة بريال
< لا تصدّقون





ما راح اسمح استعبد ناس لتقبيل يداي الكريمتين وأنا مالي فضل عليهم