ايش الحل فيهم؟

[lavendersmell]

انا بكالوريوس لغه انجليزية جبت في القدرات 75 وفي الستيب 76 ومكملة كل بياناتي في التسجيل للماستر ماعدا كشف الدرجات والتزكية العلميه من الاسبوع اللي فات رحت الكلية وقالوا الكشف ياخذ وقت لانك خريجه قديمه عام 1419 . المهم طلع الكشف بس مستني الدكتورة عشان توقعه وكل يوم وانا ادق عليهم ولسى ماجات حضرة الدكتوره عشان تخلصنا انا خايفه يجي الاربعاء والكشف ماتوقع ويروح علي حلم الماستر
الله يعافيكم ايش الحل لازم ارفقه الان ولا ينفع الحاقي ..
استاذ عماد ايش اسوي في المماطله ولا مبالاة عند منسوبات كلية التربيه. بليز اسال عن موضوعي ورد علي .

[الأمل الخالد]

مساء الخير ..
بالنسبة لكشف الدرجات لازم يتوقع ويتختم من العمادة .. وبعدين تأخذينه وتروحين للدكتورات عشان على اساسه يكتبون التوصيات .. الدكتورات اللي باقي موجودين من ذاك الوقت قليل اغلبهم نقلوا لكن اللي باقي موجودين فيهم الخير والبركة بتلاقي دكتورة هند بن فريج ودكتورة سامية رحيم الدين ودكتورة فتحية الغريبي ودكتورة ايمان التونسي ودكتورة سميحة حداد ودكتورة منى با دويس وغيرهم ويمكن نسيت بعضهم والله كلهم ذوق وتعاملهم راقي فوق ما تتصورين وحتى الدكتورات والاساتذة اللي جوا بعد ما تخرجت وما يعرفونك ما راح يقصروا ممكن يكتبون لك توصيات بناء على كشف الدرجات هذا لو في حالة ما لقيت احد من اللي درسوك .. أهم شي شوفي جداولهم على البورد اللي في الممر عشان تعرفي مواعيد دوامهم في الكلية ومتى يجوا وانتبهي ثم انتبهي احيانا ممكن تقعدي تستني دكتورة معينة عند مكتبها على اساس بتخلص محاضرتها وترجع المكتب لكن ممكن بعد ما تخلص المحاضرة تطلع من الكلية بدون ما تمر مكتبها فأفضل لو تقدري شوفي موعد ومكان محاضرتهاعلى البورد واسألي عن مكان القاعة وروحيلها شخصيا اضمن أو أسألي الدكتورات الثانيات اللي معاها في نفس المكتب هل بترجع المكتب بعد المحاضرة ولا لا اذا كان ايوة اقعدي استنيها .. أساسا انتي بتعرفي اذا كانت سايبة عبايتها على المكتب معناته اكيد بترجع واذا عبايتها معاها فاحتمال تطلع من الكلية بدون ما تمر المكتب حقها ( اللي بيقدم على الماجستير لازم يشغل مخه ويصير المحقق كونان وهذي بتحسب لك في مستوى القدرات الذهنية ) .. حاجة ثانية اذا انتي بتتخصي انجليزي حاولي التزكية تكون من نفس قسمك .. ولو بتتخصي في شي ثانية اتوقع ما فيه مشكلة تأخذي التوصية من الاقسام العامة لكن اسألي وتأكدي أفضل .. لكن نصيحة عشان لا يروح عليك الوقت روحي العمادة وحطي رقم جوالك عند السكرتيرة واطلبيها لو جت الدكتورة بس تعطيك نغمة عشان تجيبي الكشف يتوقع ويتختم وانتي في هذا الوقت خذي كشف الدرجات حتى لو كان بدون توقيع وتختيم وروحي اطلعي الدكتورات عليه عشان تكسبي وقت ويكتبون لك التوصية .. هم طبعا بيقولون لك ماهو موقع ومختم وهذا من حقهم انهم ما يحطون افاداتهم الا بناء على شي رسمي بس انتي بدورك قوليلهم ان الدكتورة لسى ماجت عشان كذا ما تختم وانك تبغينهم يطلعون عليه ويكتبون التوصية وانك مستعدة تخلين التوصية عندهم حتى تجيبي الكشف مصدق يعني كذا ما فيه ضرر لا عليك ولا عليهم لأن ترى جولتك عشان تأخذي التوصيات بتأخذ وقت وطبعا انتي عارفة من فين بتأخذي نماذج التوصيات اللي الدكاترة بيعبون لك التوصية فيها اعتقد من عند استاذة نظيرة على ما اعتقد تلاقيها في مكتب سكرتيرة الدراسات العليا اذكر كانت جنب مكتب ترجمة الوثائق ما هي بعيدة عنه وبعد ماتكملي التوصيات لازم ترجعيها من نفس المكتب اللي اخذتي النماذج منه عشان تتوقع وتتختم .
نصيحة : بعد اكتمال أوراقك خذي نسخ منها لأنك بتحتاجيها مستقبلا .. نصيحة ثانية البسي جزمة رياضية وافطري زين في البيت وخذي معاك موية ومناديل ومسكن في الشنطة والبسي لبس مريح .. باختصار عارفة الاستعدادات اللي تسويها الواحدة مننا لما بتسافر بر مسافة طويلة خذي نفس الاستعدادات .. شكلي خوفتك ما طمنتمك بس ماحبيت توقعي في نفس المواقف اللي وقعت فيها .. بالتوفيق
ولو تذكرت شي بأقولك .. ادعيلي الله ييسر لي ويفرج همي

[lavendersmell]

ياحياتي الله يسعدك ويريح قلبك
انا رايحه بكره باذن الله . المشكله عندي دوام يعني حستأذن على نص الدوام وماادري يكفي الوقت ولا لا....
كم اخذ ت منك وقت المشاويرهاذي؟ والله مره شايله هم لان معد فيه وقت .
ادعيلي

[الأمل الخالد]

أنا أقول بلاش تداومي بكرة لحد ما تخلصي شغلك في الجامعة .. أنا اخذت التوصيات السنة الماضية وتقريبا اخذ مني كشف الدرجات والتوصيات ثلاث أيام . سنتري هناك لحد ما تخلصي .. يعني حتى لو مددوا التسجيل لحد يوم الجمعة ما بتستفيدي من الجامعة الا وقت الدوام صح ولا لا ؟

[عماد الحسن]

عليكم السلام ورحمة الله وأهلا بكم في المنتدى مع الشكر للمشاركين في الرد.

الله يعينكم على الجامعة ومشاويرها من بدري، لكن تذكري أن كل هذه الخطوات تفيدكم في السنوات القادمة والأمر يستحق المحاولة، مع الأسف وجود دكتورات بهذا الشكل لأنه لو كان الموضوع في قسم الرجال كان خلصوه من بدري، وأعتقد ممكن عمل كشف الدرجات لكم من قسم الطلاب لو أخوكم راجعهم.

أما التوصيات فيمكن التقديم بدونها الآن وبعد القبول تحصلي عليها،
عندكم يومين للمحاولة الله يسهل عليكم.

[فلزNA]

السلام عليكم
اختي انصحك نصيحة لوجه الله : طوول حياتك لاتتخيلي انك ممكن تنجزي اعمالك وبسرعة من القسم النسائي طول عمرهم غايبين أو مشغولين سواء في الجامعات أو البنوك او غيرها ..... روحـي من جهة الطلاب تخلصي شغلك

دعواتنا لكـ ..

[lavendersmell]

الحمد لله . اخيرا اليوم استلمت كشف الدرجات ورحت قسم اللغه الانجليزيه ومن توفيق الله لقيت الدكتوره منى بادويس وكانت مره مستعجله عندها دوره . سلمت عليه وذكرتها بالدفعة بحكم انها تعرف وحده منهم معرفة قويه وطلبت منها التوصية وماقصرت جبت لها الفورم اللي بالانجلش وسالتها عن الدكتورات قالت فيه هند بن فريج ورحت لها وسلمت عليها وطلبت منها التوصيه وكانت مشغولة قالت ممكن تنتظري شوي قلت ابشري وانا في نفسي اقول ياشيخة انتظر للعصر المهم اخلص اليوم وخرجت برا استنى ومن حسن الحظ لقيت وحدة نفس حكايتي .قالت انهم قالوا لها اذا تبغي تقدمي اي تخصص غير الانقلش لازم التوصيه تكون عربي وعطتني نموذج معاها زايد . قالت انا اخذت التوصية من الدكتورات بالعربي والانقلش . احترت اخذت من د\منى انقليزي ومن د\ هند عربي وانقلش .
ورحت لقسم العمادة وختمت الاوراق وكنت في منتهى السعادة كأنه يوم تخرجي . المهم خلصت من تسحيبات الحريم .
بس عندي سؤال هل صحيح ان اللي يبغى يكمل في تخصص غير تخصصه لازم اتوصيات تكون من التخصص اللي يبغى يكمل فيه .
كذا مصيبه حرجع الف من جديد.